|
Aselmed n Sidna Σisa
s γur
Yani Uqdis
Ixef 1
Awal n ṛebbi
1 Di tazwara yella win yellan d Awal n ṛebbi, yella akk-d ṛebbi, d nețța
i d ṛebbi.
2 Si tazwara, yella akk-d ṛebbi,
3 kullec yețwaxleq seg-s ; deg wayen meṛṛa yețwaxelqen, ulac ayen ur d-nekki
ara s γur-es.
4 Deg-s i tella tudert ; tudert-agi tella
ț-țafat i yemdanen.
5 Tafat tețfeǧǧiǧ di ṭṭlam, yerna
ṭṭlam ur ț-iqbil ara.
6 Yella yiwen wergaz yețwaceggeε ed s γur ṛebbi, argaz-agi isem-is
Yeḥya ;
7 yusa-d ad yili d inigi n tafat iwakken
imdanen meṛṛa ad amnen s cchada-ines.
8 Mačči d nețța i ț-țafat, nețța
yusa-d d inigi n tafat.
9 Tafat-agi ț-țafat n tideț, tusa-d
γer ddunit iwakken aț-țecṛeq γef yal amdan.
10 Win yellan d Awal n ṛebbi yella yakan
si tazwara di ddunit, imi d nețța i ț-ixelqen lameεna ddunit ur t- teεqil
ara.
11 Yusa-d γer lumma-s lameεna nețțat ur
t-teqbil ara.
12 Ma d wid i t-iqeblen yumnen yis, widak iεuzz-iten, uγalen d arraw n
ṛebbi,
13 mačči seg wemdan i d-lulen, mačči
s lebγi n tnefsit neγ s lebγi n wemdan, lameεna d ṛebbi i sen-yefkan tudert
tajdiṭ.
14 Win akken yellan d Awal, yuγal-ed d amdan, iεac gar-aneγ, yeččuṛ
ț-țideț akk-d ṛṛeḥma. Nețweḥḥid di lqeḍra i d-yefka Baba ṛebbi i Mmi-s
awḥid.
15 Yeḥya iched-ed fell-as zdat lγaci
yeqqaṛ : D nețța γef i wen-d-nniγ : win ara d-yasen deffir-iw yezwar-iyi-d
axaṭer yella uqbel ad iliγ.
16 Yesseṛwa-yaγ s lxiṛat-is, lbaṛaka γef tayeḍ.
17 ccariεa tusa-d s ufus n Sidna Musa, ma
d ṛṛeḥma ț-țideț usant-ed s Sidna Σisa Lmasiḥ
18 Yiwen ur yeẓri Sidi ṛebbi, Mmi-s awḥid
yellan γur-es, d nețța i γ-t-id isbeggnen.
Anagi
19 Atah wamek i geched Yeḥya asmi i d-ceggεen γures lḥekkam n wudayen
si temdint n Lquds. Ceggεen-d γures tajmaεt n lmu-qedmin akk-d yemṛabḍen n at
Lewwi akken a t-steqsin, nnan-as :
Anwa-k keččini ?
20 Yenna-yasen tideț mbla tuffra : Mačči d nekk i d Lmasiḥ !
21 Rnan steqsan-t : Anwa-k ihi ? D kečč i d nnbi Ilyas ? Yeḥya yenna-yasen
: Xaṭi mačči d nekk. Nutni rnan nnan-as : D nnbi i telliḍ ? Nețța yerra-yasen
: Xaṭi !
22 Rnan ḥeṛsen-t nnan-as : Anwa-k ihi ? Ilaq a nerr lexbaṛ i wid i
γ-d-iceggεen. D acu i teqqaṛeḍ γef yiman-ik ?
23 Yeḥya yenna-yasen : Nekk d win akken γef i d-yenna nnbi Iceεya :
ț-țaγect tețεeggiḍ deg unezṛuf : Heggit abrid i Sidi ṛebbi
!
24 Wid i d-yusan γur-es i gellan di tejmaεt n ifariziyen,
25 rnan steqsan-t nnan-as : Imi ur telliḍ
ara d Lmasiḥ neγ d nnbi Ilyas neγ d nnbi nniḍen, iwacu ihi i tesseγḍaseḍ
lγaci deg waman ?
26 Yeḥya yerra-yasen : Nekk sseγḍaseγ-kkun deg waman ; yella gar-awen
yiwen ur t-tessinem ara,
27 usiγ-ed uqbel-is, lameεna ur uklaleγ
ara ad fsiγ ulamma d lexyuḍ n warkasen-is.
28 Annect-agi meṛṛa yedṛa di taddart n Bitanya γer tama n cceṛq n
wasif n Urdun anda i gesseγḍas Yeḥya lγaci.
Sidna Σisa d izimer n ṛebbi
29 Azekka-nni, Yeḥya iwala Sidna Σisa iteddu-d γur-es, yenṭeq s ṣṣut εlayen
:
Atan Izimer n ṛebbi, d win ițekksen ddnub n ddunit.
30 Fell-as i wen-d-nniγ :
« a d-yas yiwen, zwareγ-t-id meεna yella uqbel a d iliγ.»
31 Nekk s yiman-iw ur
ẓriγ ara anwa-t meεna usiγ-ed ad sγeḍseγ deg waman akken a t-issinen wat Isṛail.
32 Atan wayen i d-yenna Yeḥya Aγeṭṭas fell-as :
Walaγ ṛṛuḥ iqedsen iṣubb-ed seg igenni s ṣṣifa n tetbirt yers-ed fell-as.
33 Nekk ur ẓriγ ara belli d nețța, meεna Sidi ṛebbi i yi-d iceggεen iwakken
ad sγeḍseγ deg waman, yenna-yi-d : « Aț-țwaliḍ ṛṛuḥ iṣubb-ed seg igenni,
a d-yers γef yiwen wergaz, d nețța ara yesγeḍsen imdanen s ṛṛuḥ iqedsen. »
34 Ayagi d ayen i ẓrant wallen-iw, daymi i d-cehdeγ fell-as qqaṛeγ : « Argaz-agi
d Mmi-s n ṛebbi.»
Inelmaden imezwura
35 Azekka-nni, Yeḥya mazal-it dinna nețța d sin seg inelmaden-is.
36 Akken i
gwala Sidna Σisa iεedda-d, yenna-yasen :
Atan izimer n ṛebbi !
37 Mi slan i imeslayen-agi, inelmaden-nni tebεen Sidna Σisa.
38 Sidna Σisa mi
geẓra tebεen-t-id, yezzi-d γur-sen, yenna-yasen :
D acu tebγam ? Nutni nnan-as :
ṛabi ( yeεni : a Sidi ), anda tzedγeḍ ?
39 Yenna-yasen :
Ddut yid-i aț-țeẓrem.
Inelmaden-nni ddan yid-es, ẓran anda yezdeγ. Aț-țili d ṛebεa n tmeddit,
qqimen yid-es armi yekfa wass.
40 Andriyus, gma-s n Semεun Buṭrus d yiwen seg
inelmaden-nni i gtebεen Sidna Σisa m'akken i sen-d-yehdeṛ fell-as Yeḥya ;
41 iṛuḥ uqbel γer gma-s Semεun, yenna-yas :
Nufa Lmasiḥ ! Win i gextaṛ ṛebbi.
42 Andriyus yewwi Semεun γer Sidna Σisa. Akken i t-iwala Sidna Σisa, imuqel-it
yenna-yas :
Kečč i d Semεun mmi-s n Yunes. Sya d asawen aț-tețțusemmiḍ Sifas yeεni :
Buṭrus.
43 Azekka-nni, Sidna Σisa yeqsed ad iṛuḥ γer tmurt n Jlili. Deg ubrid yemmuger-ed
Filibus, yenna-yas :
Ddu-d yid-i !
44 Filibus, d yiwen si taddart n Bitsayda, anda akken zedγen Buṭrus d Andriyus.
45 Syenna Filibus yeẓra-d Natanahil, yenna-yas :
Nufa win γef i d-yehdeṛ Sidna Musa di ccariεa, win akken i γef d-xebbṛen
lenbiya. D Σisa, mmi-s n Yusef n taddart n Naṣaret.
46 Natanahil yerra-yas :
Amek, yezmer a d-iffeγ wayen yelhan si taddart n Naṣaret ?
Filibus yerra-yas :
Eyya-d aț-țwaliḍ s wallen-ik !
47 Sidna Σisa mi gwala Natanahil iteddu-d γur-es, yenna :
Atah yiwen n wat Isṛail n tideț, ulac deg-s leγdeṛ.
48 Natanahil yenna i Sidna Σisa :
Anda i yi-tesneḍ ?
Sidna Σisa yerra-yas :
Uqbel a k-d-yessiwel Filibus, mi telliḍ ddaw n tneqleț, walaγ-k-in !
49 Dγa
Natanahil yenna-yas :
A Sidi, kečč d Mmi-s n ṛebbi ! D agellid n wat Isṛail !
50 Sidna Σisa yerra-yas :
Tumneḍ imi i k-d-nniγ walaγ k-in seddaw n tneqleț ; sya γer zdat aț-țeẓred
ayen yugaren annect-a !
51 S tideț qqaṛeγ-awen : aț-țwalim igenni yeldi,
lmalayekkat n Sidi ṛebbi țțalint țṣubbunt sennig Mmi-s n bunadem.
Ixef 2
Lbeṛhan amezwaru
1 Mi εeddan sin wussan, tella-d tmeγṛa di tmurt n Jlili di taddart Kana, tella
dinna yemma-s n Sidna Σisa.
2 Ula d Sidna Σisa yețwaεṛed nețța d inelmaden-is
γer tmeγṛa-nni.
3 Imi i ten-ixuṣṣ ccṛab, yemma-s n Sidna Σisa tusa-d
γur-es tenna-yas :
Ifuk-asen ccṛab !
4 Sidna Σisa yerra-yas :
D nekk neγ d kemm i teεna temsalt-agi a tameṭṭut ? Taswiεt-iw urεad i d-tusi.
5 Dγa yemma-s tenna i iqeddacen :
Xedmet ayen akk ara wen-d yini !
6 Llant dinna sețța n tsebbalin ( icmuxen )
yețwaxedmen s wedγaγ, țțawint si tmanyin ar meyya uεecrin n litrat, seg-sent
i d-țεemmiṛen wat Isṛail aman i luḍu.
7 Sidna Σisa yenna i iqeddacen nni :
Ččaṛet ticbayliyin-agi d aman.
Ččuṛen-tent armi d imi.
8 Dγa yenna-asen : Σemmṛet-ed tura kra n waman seg-sent tawim-ten i bab n tmeγṛa.
Kkren xedmen akken i sen-d-yenna.
9 Win iḍebbṛen di leqdic n tmeγṛa yeεṛeḍ
aman-nni i guγalen d ccṛab. Nețța ur yeẓri ansi i d-yekka ccṛab-agi, ma d
iqeddacen-is ẓran axaṭer d nutni i ten-id-yewwin. Iṛuḥ yessawel i yesli,
10 yenna-yas :
Di tmeγṛiwin, medden srusun-d uqbel ccṛab yelhan, mi ḥman inebgawen rennun-asen-d
win ṛqiqen,
kečč teǧǧiḍ ccṛab yelhan armi ț-țura !
11 D wagi i d lbeṛhan amezwaru i gexdem Sidna Σisa di taddart n Kana di tmurt n
Jlili.
S wakka i d-ibeggen tamanegt-is i inelmaden-is, dγa umnen yis.
12 Deffir wayagi Sidna Σisa iṣubb γer temdint n Kafernaḥum. Tedda yid-es yemma-s,
atmaten-is akk-d inelmaden-is ; qqimen dinna anagar kra n wussan.
Sidna Σisa di lǧameε iqedsen
13 Akken i d-yeqṛeb wass n Tfaska n izimer n leslak yellan d lεid n wat Isṛail,
Sidna Σisa yuli γer temdint n Lquds.
14 Yufa deg wefrag n lǧameε iqedsen wid
yeznuzun izgaren, ulli d yetbiren, yufa daγen dinna wid yețbeddilen idrimen ;
rran lǧameε iqedsen d ssuq.
15 Ixdem-ed ajelkwaḍ ( acelliṭ ) s wemrar, yebda itellif-iten s nutni s wulli-nsen
akk-d yezgaren-nsen, iqleb-asen ( ițți-yasen ) daγen ṭṭwabel i wid yețbeddilen
idrimen, iḍeggeṛ asen kullec γer lqaεa, issufeγ-iten meṛṛa seg ufrag n lǧameε
iqedsen,
16 yerna yenna i wid yeznuzun itbiren :
Kkset syagi ssuq-nwen ! Wagi d axxam n Baba, ur t-țarrat ara d ssuq !
17 inelmaden-is mmektan-d ayen yuran di tektabt n
Ẓabur : Leḥmala i sεiγ γef
wexxam-ik am tmes itețțen ul-iw !
18 Kkren wudayen nnan-as :
D acu n lbeṛhan ara γ-d-tbeggneḍ akken a neεqel lḥekma s wayes i txeddmeḍ
annect-agi ?
19 Sidna Σisa yerra-yasen :
Huddet lǧameε-agi iqedsen, a t-id-sbeddeγ di tlata wussan.
20 At Isṛail nnan-as :
Wid yebnan lǧameε-agi qqimen deg-s sețța uṛebεin iseggasen, kečč tzemreḍ
a s-tεiwdeḍ lebni di tlata wussan !
21 Lameεna « Lǧameε » i γef d-yehdeṛ
Sidna Σisa d lǧețța-s.
22 Asmi i d-yeḥya Sidna Σisa si lmut
γer tudert,
inelmaden-is mmektan-d awal-agi i d-yenna, dγa umnen s wayen yuran di tira
iqedsen d wayen i d-yenna Sidna Σisa.
23 Mi gella Sidna Σisa di temdint n Lquds di lweqt n lεid n Tfaska, aṭas i
gumnen yis mi ẓran lbeṛhanat i gxeddem.
24 Lameεna Sidna Σisa ur yesεi ara deg-sen
laman axaṭer yessen-iten akken ma llan.
25 Ur yeḥwaǧ ara a s-d-ḥkun γef yemdanen imi yessen ayen yellan deg wulawen-nsen.
Ixef
3
Sidna Σisa akk-d Nikudem
1 Yella yiwen wergaz isem-is Nikudem i gellan si tejmaεt n ifariziyen, d yiwen
seg imeqqranen n wat Isṛail.
2 Iṛuḥ-ed deg iḍ γer Sidna Σisa yenna-yas :
A Sidi neẓra belli d Sidi ṛebbi i k-id-iceggεen iwakken a γ-teslemdeḍ, axaṭer
yiwen ur izmir ad yexdem lbeṛhanat i txeddmeḍ m'ur yelli ara ṛebbi yid-es.
3 Sidna Σisa yerra-yas :
S tideț a k-d-iniγ : yiwen ur izmir ad iẓer tagelda n ṛebbi m'ur d-iεawed ara
talalit.
4 Nikudem yenna-yas :
Amek i gezmer yiwen a d iεiwed talalit ma yella d amγaṛ ? Izmer ad yuγal
γer
tεebbuṭ n yemma-s a d iεiwed talalit ?
5 Sidna Σisa yerra-yas :
Nniγ-ak s tideț : m'ur d-ilul ara yiwen seg waman akk-d ṛṛuḥ, ur ițțizmir
ara ad ikcem tagelda n ṛebbi.
6 Win i d-ilulen seg wemdan ț-țaṛwiḥt n
wemdan, win i d-ilulen s ṛṛuḥ iqedsen d ṛṛuḥ.
7 Ur țțawham ara imi i
k-d-nniγ « ilaq a d-tεiwdem talalit.»
8 Aḍu yețsuḍu γer wanda i s-yehwa,
tselleḍ i ṣṣut-is lameεna ur tẓerreḍ ara ansi d-yekka neγ anda iteddu. Akka
daγen i gella γef kra n win i d-ilulen s ṛṛuḥ iqedsen.
9 Nikudem yenna-yas :
Amek ara yedṛu wayagi ?
10 Sidna Σisa yerra-yas :
Tesselmadeḍ ccariεa i wat Isṛail ur tessineḍ ara annect-agi ?
11 A k- iniγ
tideț: neqqaṛ-ed ayen kan i nessen, nețcehhid-ed s wayen i nwala, lameεna
kunwi ur teqbilem ara cchada-nneγ.
12 M'ur tuminem ara mi wen-d-hedṛeγ
γef
temsalin n ddunit-agi amek ara tamnem s tid n igenwan ?
13 Yiwen ur yuli γer igenwan anagar Mmi-s n bunadem i d-iṣubben seg igenwan.
14 Akken i gεelleq Musa azrem n nnḥas
γef tgejdit deg unezṛuf, i glaq ad ițțuεelleq
daγen Mmi-s n bunadem
15 iwakken kra n win yumnen yis, ad yesεu tudert n dayem.
16 Sidi ṛebbi iḥemmel imdanen n ddunit meṛṛa armi i d-yefka Mmi-s awḥid
iwakken kra n win yumnen yis ur yețmețțat ara meεna ad yesεu tudert n dayem.
17 Sidi ṛebbi ur d-iceggeε ara Mmi-s γer ddunit iwakken ad iḥaseb imdanen
meεna iwakken a ten-isellek.
18 Win yumnen yis ur yețțuḥaseb ara, ma d win ur
numin ara atan yețțuḥaseb yakan, imi ur yumin ara s Mmi-s awḥid n Sidi
ṛebbi.
19 Atah lḥisab yellan fell-as : « tafat tusa-d γer ddunit meεna imdanen ḥemmlen
ṭṭlam axiṛ n tafat, axaṭer lecγal-nsen diri-ten. »
20 Kra n win ixeddmen
cceṛ, yekṛeh tafat yerna ur ițqeṛṛib ara γur-es, ițțaggad a d-tessedheṛ
yir lecγal-is.
21 Ma d win iteddun di tideț yețțas-ed γer tafat akken a d-iban belli kra n
wayen ixeddem, ixeddem it di lebγi n Sidi ṛebbi.
Sidna Σisa akk-d Yeḥya aγeṭṭas
22 Syenna Sidna Σisa d inelmaden is ṛuḥen γer tmurt n Yahuda, qqimen dinna kra
n wussan, sseγḍasen lγaci deg waman.
23 Yeḥya daγen yella yesseγḍas lγaci di Σinun ț-țama n Salim imi qwan waman
dinna. Aṭas lγaci i d-ițasen γur-es iwakken a ten-isseγḍes.
24 Di lweqt-nni
urεad i skecmen Yeḥya γer lḥebs.
25 Yiwen wass kra seg inelmaden n Yeḥya hedṛen d yiwen wergaz n wat Isṛail
γef luḍu.
26 ṛuḥen γer Yeḥya, nnan-as :
A Sidi, win yellan yid-ek mi telliḍ agemmaḍ i wasif n Urdun, win akken i
γef
d-tcehdeḍ, atan yesseγḍas ula d nețța, lγaci meṛṛa țṛuḥun
γur-es.
27 Yeḥya yerra-yasen :
Yiwen ur izmir ad ixdem ccγel nniḍen sennig wayen i s-d-yefka Sidi ṛebbi.
28 Aql-ikkun s yiman-nwen d inigan, acḥal d abrid i wen-d nniγ : mačči d nekk
i d Lmasiḥ, țwaceggεeγ d kan uqbel-is.
29 Iwumi tewjed teslit ? Anaγ i yesli ! Ma d aḥbib n yesli d win yețγimin
γer
tama-s, ifeṛṛeḥ m'ara isel i ṣṣut n yesli. Ula d nekk tura lfeṛḥ-iw
yennekmal.
30 Ilaq nețța ad yețțimγur nekk ad țțimẓiyeγ.
31 Win i d-yusan seg igenni yella nnig n wayen yellan meṛṛa, ma d win yellan n
ddunit-agi iheddeṛ anagar γef wayen yellan di ddunit. Win i d-yusan seg igenni
yella sennig-nsen meṛṛa.
32 Icehhed-ed γef wayen yeẓra d wayen yesla, lameεna
yiwen ur iqbil cchada-ines.
33 Win ara iqeblen cchada-ines, yetḥeqqeq belli Sidi ṛebbi yeqqaṛ tideț.
34
S tideț amceggeε n ṛebbi iheddeṛ imeslayen i s-d-yefka ṛebbi, imi i t-yeččuṛ
s ṛṛuḥ iqedsen.
35 Baba ṛebbi iḥemmel Mmi-s, yerra kullec ger ifassen-is.
36 Win yumnen s Mmi-s yesεa tudert ur nfennu ; ma d win ur numin ara s Mmi-s ur
yețwali ara tudert, urrif n ṛebbi yezga fell-as.
Ixef
4
Aman yessidiren
1 Ifariziyen slan s Sidna Σisa yesεa aṭas n inelmaden yerna yesseγḍas imdanen
akteṛ n Yeḥya.
2 Lameεna Sidna Σisa mačči d nețța s yiman-is i gesseγḍasen
lγaci, ccγel-agi yeǧǧa-t i inelmaden-is.
Mi geẓra Sidna Σisa belli slan yis,
3 yeffeγ si tmurt n at Yahuda. Iwakken ad
yuγal γer tmurt n Jlili,
4 ilaq-as ad iεeddi γef tmurt n Samarya.
5 Yelḥeq γer taddart n Sicar iqeṛben akal i d-yeǧǧa Sidna Yeεqub i mmi-s
Yusef ;
6 dinna i gella lbir n Sidna Yeεqub. Sidna Σisa yeqqim
γef yiri n lbir
akken ad yesteεfu. Aț-țili d tnac n wass.
7 Yiwet n tmeṭṭut n Samarya tusa-d aț-țagem ; Sidna Σisa iluεa-ț, yenna yas
:
A tameṭṭut, ma ulac aγilif efk- yi-d ad sweγ !
8 Yuγ lḥal inelmaden-is ṛuḥen γer temdint a d-aγen ayen ara ččen.
9
Tameṭṭut-nni tasamarit tenna-yas :
Amek, kečč yellan n wat Isṛail tessutreḍ-iyi-d aț-țesweḍ i nekk yellan
ț-țasamarit ? (axaṭer at Isṛail ur țemsaεaden ara yerna ur țemxalaḍen ara
d isamariyen).
10 Sidna Σisa yerra-yas :
Lemmer teẓriḍ ayen i gebγa ṛebbi a m-t-id yefk akk-d win i m-d-yessutren
aman, tili d kemm ara s-yessutren a m-d-yefk aț țesweḍ ; nețța, d aman
yessidiren ara m-d-yefk.
11 Tameṭṭut-nni tenna-yas :
A Sidi, ur tesεiḍ ara s wacu ara d-tessaliḍ aman yerna lbir-agi lqay. Ansi ara
k-d-kken waman-agi yessidiren ?
12 Tebγiḍ eεni a d-tiniḍ tεeddaḍ jeddi-tneγ
Yeεqub i γ-d yeǧǧan lbir-agi, i geswan seg-s nețța d warraw-is akk țqeḍεiyin-is
?
13 Sidna Σisa yerra-yas :
Kra n win ara yeswen seg waman-agi ad yuγal ad iffad,
14 lameεna win ara yeswen
seg waman ara s-d-fkeγ ur yețțuγal ara ad iffad. Yerna aman ara s-d-fkeγ ad
uγalen deg-s ț-țaεwint ur nețγaṛ ara, a d-tețfeggiḍ seg-s tudert n dayem.
15 Tameṭṭut-nni tenna-yas :
A Sidi, efk-iyi-d seg waman-agi iwakken ur țțuγaleγ ara ad ffadeγ neγ a d-aseγ
γer lbir-agi ad agmeγ.
16 Sidna Σisa yenna-yas :
ṛuḥ ssiwel-as i wergaz-im tuγaleḍ-ed γer dagi !
17 Tameṭṭut-nni terra-yas :
Ur sεiγ ara argaz !
Sidna Σisa yenna-yas :
Tesεiḍ lḥeqq imi d-tenniḍ ur sεiγ ara argaz.
18 Axaṭer xemsa iberdan i tzewǧeḍ,
win yellan yid-em tura mačči d argaz-im ; deg wannect-agi ț-țideț i d-tenniḍ
!
19 Nețțat tenna-yas :
A Sidi, εeqleγ-k d nnbi i telliḍ.
20 Ini-yi-d anwa i gesεan lḥeqq : lejdud
nneγ isamariyen εebbden ṛebbi γef wudrar-agi, ma d kunwi s wat Isṛail teqqaṛem
amkan anda i glaq a neεbed ṛebbi, d Lquds.
21 Sidna Σisa yenna-yas :
A tameṭṭut, amen s wayen ara m-d-iniγ ! Iteddu-d lweqt anda mačči
γef
wedrar-agi neγ di Lquds ara yețwaεbed Baba ṛebbi.
22 Kunwi s isamariyen
tεebbdem ayen ur tessinem ara, ma d nukkni nεebbed ayen nessen axaṭer leslak
ițekk-ed seg wegdud n Isṛail.
23 Lameεna iteddu-d lweqt yerna yewweḍ-ed, anda lmumnin n ṣṣeḥ ad εebbden
Baba ṛebbi s ṛṛuḥ, s tideț, axaṭer d lmumnin-agi n ṣṣeḥ i gebγa Baba
ṛebbi.
24 Imi ṛebbi d ṛṛuḥ i gella, ilaq wid ara t-iεebden a t-εebden s
ṛṛuḥ ț-țideț.
25 Tameṭṭut-nni tenna-yas :
Ẓriγ a d-yas win i gextaṛ Sidi ṛebbi, win ițțusemman « Lmasiḥ ». Asm'ara
d-yas a γ-d-yessefhem kra yellan.
26 Sidna Σisa yerra-yas :
Lmasiḥ, d nekk s yiman-iw !
27 Imiren kan wwḍen-d inelmaden is. Wehmen imi i t-id-ufan yețmeslay
ț-țmeṭṭut ; lameεna yiwen deg-sen ur s-yenni : d acu i tebγiḍ
γur-es, neγ
iwacu i tețmeslayeḍ yid-es ?
28 Dγa tameṭṭut-nni teǧǧa tacmuxt-is dinna,
tuzzel γer taddart tenna i lγaci :
29 Eyyaw aț-țeẓrem yiwen yenna-yi-d akk ayen xedmeγ ! Ad yili d nețța i d
Lmasiḥ !
30 Lγaci ffγen-d si taddart ṛuḥen ad ẓren Sidna Σisa.
31 Uqbel a d-yaweḍ
lγaci, inelmaden-is ḥeṛsen-t ad yečč, nnan-as :
A Sidi εeddi-d aț-țeččeḍ !
32 Yenna-yasen :
Sεiγ lqut ara ččeγ meεna kunwi ur teẓrim ara d acu-t.
33 Inelmaden qqaṛen wway gar asen :
Ahat yella win i s-d-yewwin ad yečč.
34 Sidna Σisa yenna :
Lqut-iw, d m'ara xedmeγ lebγi n win i yi-d-iceggεen akken ad kemmleγ ccγel i
γef
i yi-iwekkel.
35 Kunwi teqqaṛem mazal ṛebεa wagguren i tmegra ma d nekk a wen-d-iniγ: ldit
allen-nwen aț-țwalim igran weṛṛaγ-it, wejden i tmegra !
36 Win imeggren yewwi lexlaṣ-is, ijemmeε lγella i tudert n dayem. Akka lfeṛḥ
yesdukkel win izerrεen d win imeggren.
37 Axaṭer ț-țideț lemtel-agi i
d-yeqqaṛen : « Yiwen izerreε wayeḍ imegger » !
38 Nekk ceggεeγ-kkun aț-țmegrem anda ur tezriεem ara, anda i nεețțaben
wiyaḍ ; nutni nεețțaben, kunwi tγelltem lγella n leεtab-nsen.
39 Aṭas n isamariyen n taddart-nni i gumnen s Sidna Σisa mi d-tcehhed fell-as
tmeṭṭut-nni s imeslayen-agi : «yenna-yi-d akk ayen i xedmeγ !»
40 Mi wwḍen
γur-es isamariyen-nni, ḥellelen Sidna Σisa ad iqqim yid-sen. Dγa yeqqim
yid-sen sin wussan.
41 Aṭas nniḍen i gumnen yis mi slan i imeslayen-is.
42 Nnan-as i tmeṭṭut-nni
:
Tura numen yis mačči kan γef wayen i γ-d-tenniḍ fell-as, nesla yas s
yiman-nneγ, neẓra belli d nețța i d amcafeε n ddunit.
ṛuḥ, atan mmi-k yeḥla !
43 Mi εeddan sin wussan, Sidna Σisa iṛuḥ syenna γer tmurt n Jlili.
44 Yenna-yasen : « Ulac nnbi yesεan leqdeṛ di tmurt-is. »
45 Mi gewweḍ γer tmurt n Jlili, lγaci sṭreḥben yis s lfeṛḥ d ameqqran imi
ula d nutni ḥedṛen i lεid n Tfaska di temdint n Lquds, ẓran akk lbeṛhanat i
gexdem dinna.
46 Yuγal iεedda γef taddart n Kana di tmurt n Jlili anda akken i gerra aman d
ccṛab. Yella yiwen lḥakem n ddewla n temdint n Kafernaḥum yesεa mmi-s yuḍen
yenṭer.
47 Mi gesla s Sidna Σisa yuγal-ed si tmurt n Yahuda γer tmurt n Jlili, iṛuḥ-ed
γur-es, iḥellel-it iwakken a d yas ad yesseḥlu mmi-s yețmețțaten.
48 Sidna Σisa yenna-yas :
M'ur twalam ara licaṛat d lbeṛhanat ur tețțamnem ara ?
49 Lḥakem n ddewla yenna-yas :
A Sidi, di leεnaya-k γiwel uqbel ad yemmet mmi !
50 Sidna Σisa yerra-yas :
ṛuḥ, atan mmi-k yeḥla !
Argaz-nni yumen s wayen i s-d yenna Sidna Σisa, dγa yuγal
51 γer wexxam-is. Mi
gteddu γer wexxam, mmugren-t-id iqeddacen-is nnan-as :
Mmi-k yeḥla !
52 Yesteqsa-ten anta ssaεa i deg yeḥla, rran-as-ed :
Iḍelli γef lweḥda n tmeddit i t-teffeγ tawla.
53 Baba-s n weqcic-nni yewwi-d s lexbaṛ belli di ssaεa-nni i s-d-yenna Sidna
Σisa « Mmi-k yeḥla » i geḥla mmi-s, seg imiren yumen nețța d wat wexxam-is
meṛṛa.
54 D wagi i d lbeṛhan wis sin i gexdem Sidna Σisa di tmurt n Jlili mi d-yuγal
si tmurt n Yahuda.
Ixef 5
Ukrif yeḥlan di temdint n Lquds
1 Σeddan kra n wussan, Sidna Σisa yuli γer temdint n Lquds akken ad yeḥdeṛ i
lεid n wat Isṛail.
2 Di temdint-agi, zdat n tewwurt yețțusemman « tawwurt n wulli, »tella yiwet n
temda n waman qqaṛen-as s tεibṛanit : « Bitesda ». Zzin-as-d xemsa ifragen
yesεan ssqef.
3 Deg ifragen-agi aṭas n imuḍan i gḍelqen, iderγalen, iεibanen d wukrifen
țṛaǧun akk ad ḥerrken waman.
4 Axaṭer tiswiεin yețṣubbu-d yiwen n lmelk
γer temda, yețḥerrik aman-nni ; win ara ikecmen d amezwaru γer temda m'ara
ḥerrken waman ad yeḥlu si lehlak-is akken yebγu yili.
5 Yella dinna yiwen wergaz tmanya utlatin iseggasen nețța di lehlak.
6 Sidna
Σisa mi t-iwala yeḍleq, yeẓra belli aṭas aya segmi yuḍen, yenna-yas:
Tebγiḍ aț-țeḥluḍ ?
7 Amuḍin-nni yerra-yas-ed :
A Sidi, ur sεiγ ara win ara yi gren γer temda m'ara ḥerken waman ; m'ara
εeṛdeγ ad kecmeγ wayeḍ a yi-izwir.
8 Sidna Σisa yenna-yas :
Ekker fell-ak, ddem tagertilt-ik telḥuḍ !
9 Imiren kan argaz-nni yeḥla, yeddem tagertilt-is yebda tikli. Ayagi yedṛa deg
wass n ssebt yellan d ass n westeεfu.
10 Lecyux n wat Isṛail nnan-as i
wergaz-nni yeḥlan :
Ass-agi d ass n westeεfu, d leḥṛam fell-ak aț-țebbibeḍ tagertilt-ik !
11 Nețța yerra-yasen :
Win i yi-sseḥlan d nețța i yi-d yennan : « Ddem tagertilt-ik telḥuḍ. »
12 Steqsan-t nnan-as :
Anwa i k-d-yennan akka ?
13 Lameεna argaz-nni yeḥlan ur yeẓri ara anwa-t, axaṭer Sidna Σisa yekcem ger
lγaci ițemdeḥḥasen dinna.
14 Taswiεt kan, Sidna Σisa yemlal-it-id deg wefrag
n lǧameε iqedsen yenna yas :
Aql-ik teḥliḍ, sya d asawen xḍu i ddnub iwakken ur ideṛṛu ara yid-ek akteṛ
n wannect-nni !
15 Argaz-nni iṛuḥ ad ixebbeṛ lecyux n wat Isṛail belli d Sidna Σisa i
t-yesseḥlan.
Ababat d mmi-s
16 Lecyux n wat Isṛail bdan accetki γef Sidna Σisa imi i gexdem ayagi deg wass
n westeεfu.
17 Sidna Σisa yenna yasen :
Baba ṛebbi ixeddem ar tura, nekk daγen aql-i xeddmeγ !
18 Γef wawal-agi lecyux-nni ufan-as-ed sebba nniḍen, țqelliben amek ara
t-nγen, mačči kan imi ur iqudeṛ ara ass n westeεfu meεna imi gerra ṛebbi d
Baba-s yerna yesseεdel iman-is d ṛebbi.
19 Sidna Σisa yerra-yasen :
S tideț qqaṛeγ-awen : Mmi-s n ṛebbi ur ixeddem acemma s yiman is, ixeddem ala
ayen yeẓra ixeddem-it Baba-s. Kra n wayen ixeddem Baba-s ixeddem-it Mmi-s
daγen.
20 Axaṭer Baba-s iḥemmel Mmi-s, yesbeggin-as-d lecγal-is meṛṛa. Ad as-yernu
tazmert s wacu ara yexdem ayen yugaren kra n wayen teẓram ar ass-a,
aț-țwehmem di lecγal-is.
21 Akken Baba ṛebbi yeskkaray-ed lmegtin
ițțarra-yasen tudert, akken daγen Mmi-s yețțak tudert i win yebγa.
22 Baba ṛebbi ur iḥekkem γef yiwen, lameεna yerra lḥekma ger ifassen n Mmi-s
23 iwakken imdanen meṛṛa ad qadṛen Mmi-s akken țqadaṛen Baba-s. Win ur
nqudeṛ ara Mmi-s ur iqudeṛ ara Baba-s i t-id iceggεen.
24 S tideț nniγ-awen :
« kra n win yesmeḥsisen i wawal-iw, yumnen s win i yi-d-iceggεen yesεa tudert n
dayem yerna ulac fell-as lḥisab, lameεna iεedda yakan si lmut γer tudert.
25 S tideț nniγ-awen : « iteddu-d lweqt yerna yewweḍ-ed anda lmegtin ad slen i
ṣṣut n Mmi-s n ṛebbi, yerna wid akk ara s-yeslen ad idiren.
26 Akken yesεa Baba ṛebbi tudert deg yiman-is i gefka daγen i Mmi-s ad yesεu
tudert deg yiman-is.
27 Yerra ger ifassen-is lḥekma imi d Mmi-s n bunadem i
gella.
28 Ur țțawhamet ara, axaṭer lweqt iteddu-d, wid akk yellan deg i?ekwan ad
slen i ṣṣut n Mmi-s n bunadem,
29 imiren a d-kkren ; wid ixedmen lxiṛ a
d-ḥyun γer tudert n dayem ma d wid ixedmen cceṛ a d-ḥyun iwakken ad
țțuḥasben.
30 Ur xeddmeγ acemma s lebγi-w lameεna ḥekkmeγ s lebγi n Baba ṛebbi.
Lḥekma-inu d lḥeqq axaṭer ur țqellibeγ ara ad xedmeγ lebγi-w, lameεna lebγi
n win i yi-d-iceggεen. »
Inigan n Sidna Σisa
31 Ma yella d nekk kan i d icehden γef yiman-iw cchada-inu ur tețwaqbal ara.
32 Lameεna sεiγ inigi nniḍen, yerna cchada-ines tṣeḥḥa.
33 Tceggεem γer Yeḥya
testeqsam-t, nețța icehhed-ed γef tideț.
34 Nekk ur țkileγ ara γef cchada n wemdan, nniγ-awen-d annect-agi akken
aț-țețwasellkem.
35 Yeḥya yusa-d ț-țaftilt yețfeǧǧiǧen ger yemdanen, ma d kunwi tebγam
aț-țferḥem taswiεt kan di tafat-is.
36 Tella fell-i cchada nniḍen yugaren
tin n Yeḥya : d lecγal i yi d-yefka Baba ṛebbi a ten-xedmeγ.
Lecγal-agi țcehhiden-d fell-i belli d Baba ṛebbi i yi-d-iceggεen.
37 Ula d
Baba ṛebbi i yi d-iceggεen icehhed-ed fell-i, meεna kunwi leεmeṛ ur teslim i
ṣṣut-is, ur teẓrim udem-is.
38 Awal-is ur yezdiγ ara deg wulawen nwen imi ur
tuminem ara s win i d-iceggeε.
39 Tețnadim di tektabin iqedsen tγilem aț-țafem deg-sent tudert n dayem.
Tiktabin-agi d nutenti i-d-icehden fell-i.
40 Lameεna kunwi tugim a d-tasem
γur-i aț-țesεum tudert.
41 Ur țqellibeγ ara ad sεuγ cciεa
γer yemdanen,
42
?riγ belli deg wulawen-nwen ur tḥemmlem ara ṛebbi.
43 Nekk usiγ-ed s yisem n
Baba ṛebbi, kunwi ur iyi-teqbilem ara. Lemmer a d-yas wayeḍ a d-icehhed
γef
yiman-is a t-tqeblem !
44 Amek ara tesεum liman ma yella tețnadim aț-țemyeεǧabem wway gar awen wala
aț-țεeǧbem kan i ṛebbi ?
45 Ḥadret aț-țγilem d nekk ara iccetkin fell-awen zdat Baba ṛebbi ! D Musa
ara iccetkin fell-awen, d Musa-nni γef i tețțeklem.
46 Lemmer ț-țideț
tumnem s Musa tili tumnem yis-i, axaṭer yura-d fell-i di tira iqedsen.
47 Ma yella ur tuminem ara s wayen i d-yura, amek ara tamnem s wawal-iw ?
Ixef 6
Aγṛum s tawant
1 Syenna, Sidna Σisa yezger lebḥeṛ n Jlili ( iwumi qqaṛen daγen lebḥeṛ n
Tiberyas ).
2 Aṭas n yemdanen i geddan yid-es mi walan yesseḥlay imuḍan.
3 Daymi Sidna
Σisa yuli γer wedrar ad innejmaε d inelmaden-is.
4 Lεid n wat Isṛail iwumi
qqaṛen Tafaska n izimer n leslak tqeṛb-ed.
5 Akken i gwala lγaci iteddu-d
γur-es, Sidna Σisa yenṭeq γer Filibus yenna-yas :
Ansi ara d-naγ aγṛum i wannect agi n lγaci ?
6 Yesteqsa-t kan iwakken ad i?er d acu ara s-d-yini, axaṭer nețța yeẓra
yakan d acu ara yexdem.
7 Filibus yerra-yas :
A Sidi ur d-keffunt ara mitin alef iwakken mkul yiwen deg-sen a t-id-iṣaḥ
ciṭṭuḥ n weγṛum.
8 Andriyus gma-s n Semεun Buṭrus, yellan seg inelmaden, yenṭeq
γer Sidna Σisa
yenna-yas :
9 Yella dagi yiwen weqcic yesεa xemsa n teḥbulin n weγṛum n tem?in akk-d sin
iselman (iḥutiwen),
lameεna d acu ara d-xedmen i wannect-agi n lγaci ?
10 Sidna Σisa issendeh-iten ad sγimen lγaci. Deg wemkan-nni yeqwa leḥcic, lγaci
yeqqim γer lqaεa, ad ilin azal n xemsa alaf n yergazen.
11 Sidna Σisa yeddem-ed
tiḥbulin-nni n weγṛum, yeḥmed ṛebbi icekkeṛ-it, ifṛeq-itent i lγaci
yeqqimen γef leḥcic, yefreq-asen daγen iselman nni, ččan akk armi ṛwan.
12 Mi ččan ṛwan, Sidna Σisa iluεa inelmaden-is yenna-yasen :
Jemεet-ed ayen i d-yeqqimen akken ur ixețțeṛ ula d acemma.
13 Ayen i d-yegran si xemsa n teḥbulin-nni n weγṛum n temẓin, jemεen-t-id
ččuṛen yis tnac n iḍellaεen (tiquftin).
14 Lγaci-nni mi walan lbeṛhan-agi n
Sidna Σisa, țεeggiḍen qqaṛen :
Mbla ccekk argaz-agi d nețța i d nnbi-nni ara d-yasen γer ddunit.
15 Sidna Σisa mi geẓra lγaci bγan a t-rren d agellid fell-asen, iḍeṛṛef
iman-is, yuli γer wedrar.
Sidna Σisa ileḥḥu
γef waman
16 Mi geγli yiṭij, inelmaden-is uγalen ṣubben γer rrif n lebḥeṛ.
17 Rekben
taflukt ad zegren γer ugemmaḍ, γer Kafernaḥum. Yeγli-d yakan ṭṭlam, Sidna
Σisa urεad yelḥiq γur-sen.
18 Yekker-ed yiwen waḍu iǧehden, lebḥeṛ yerwi.
19 Inelmaden-is yuγ-iten lḥal wwḍen
γer tlemmast n lebḥeṛ. Walan Sidna Σisa
iteddu-d γur-sen, ileḥḥu-d γef wuḍar s ufella n waman. Mi d-iqeṛṛeb
γer
teflukt nsen, xelεen.
20 Sidna Σisa yenna yasen :
Ur țțaggadet ara, d nekk !
21 Bγan a t-srekben yid-sen di tefluk meεna ufan-d iman-nsen wwḍen
γer wemkan
anda țeddun.
Aγṛum n tudert
22 Azekka-nni, lγaci yeqqimen agummaḍ i lebḥeṛ wwin-d s lexbaṛ belli anagar
yiwet n teflukt i gellan dinna, yerna Sidna Σisa ur yeddi ara d inelmaden-is mi
ṛuḥen di teflukt.
23 Dγa tiflukin nniḍen i d-yusan si temdint n Tiberyas,
wwḍent-ed γer wemkan-nni anda akken i sen-yebḍa Sidna Σisa aγṛum mi geḥmed
ṛebbi.
24 Mi walan lγaci ulac dinna Sidna Σisa akk-d inelmaden-is, rekben tiflukin,
zegren γer Kafernaḥum ad qellben fell-as.
25 Mi t-ufan dinna, nnan-as :
A Sidi, melmi d-tusiḍ γer dagi ?
26 Sidna Σisa yerra-yasen :
S tideț a wen-d-iniγ :
imi teččam aγṛum armi teṛwam i tețqellibem fell-i mačči imi tfehmem
lbeṛhanat-iw.
27 Ur țḥebbiṛet ara γef yiεebbaḍ-nwen, ḥebbṛet
γef tudert
yețdumun i dayem.
Tudert-agi, d Mmi-s n bunadem ara wen-ț-id-yefken, Baba ṛebbi yefka-yas
tazmert imi i t-iεellem s ṭṭabeε-ines.
28 Nnan-as :
D acu ara nexdem ihi, d acu i gețṛaǧu ṛebbi deg-nneγ ?
29 Sidna Σisa yenna-yasen :
Sidi ṛebbi yețṛaǧu deg-wen aț-țamnem s win i d-iceggeε !
30 Nutni nnan-as :
Ihi acu n lbeṛhan ara γ-d-tessekneḍ akken a namen yis-ek ? D acu ara txedmeḍ
?
31 Lejdud-nneγ ččan tamanna deg unezṛuf, akken yura di ccariεa n Musa :
Yefka-yasen ččan aγṛum i d-yekkan seg igenni.
32 Dγa Sidna Σisa yenna-yasen :
S tideț nniγ-awen, mačči d Musa i wen-d-yefkan aγṛum i d-yekkan seg igenni,
lameεna d Baba ṛebbi ! D nețța i wen-d-yețțaken aγṛum n ṣṣeḥ i
d-itekken seg igenni.
33 Axaṭer aγṛum i d-yekkan s γur ṛebbi, d win i d-iṣubben seg igenni, d
nețța i d-yețțaken tudert n ṣṣeḥ i yemdanen.
34 Nutni nnan-as :
A Sidi țțak-aγ-d mkul ass seg weγṛum-agi.
35 Sidna Σisa yenna-yasen :
D Nekk i d aγṛum yețțaken tudert. Win i d-yusan γur-i ur yețțuγal ara ad
illaẓ, win yumnen yis-i ur yețțuγal ara ad iffad.
36 Nniγ-awen-t-id yakan :
twalam yerna tugim aț-țamnem !
37 Wid akk ara yi-d-yefk Baba ṛebbi a d-asen
γur-i ; win ara d-yasen γur-i ur t-țarraγ ara γef tewwurt.
38 Ur d-ṣubbeγ
ara seg igenni akken ad xedmeγ lebγi-w, ṣubbeγ-d ad xedmeγ lebγi nwin i
yi-d-iceggεen.
39 Win i yi-d iceggεen ur yebγi ara ad yeεṛeq ula d yiwen seg
wid i yi-d-yefka, lameεna a ten-id-sseḥyuγ si lmut deg wass aneggaru.
40 D wagi i d lebγi n Baba ṛebbi: « kra n win yețmuqulen γer Mmi-s, yumen yis,
ad yesεu tudert n dayem yerna a t-id-sseḥyuγ si lmut ass aneggaru.»
41 Lγaci
bdan smermugen gar-asen γef Sidna Σisa imi dyenna: « d nekk i d aγṛum i d
yekkan seg igenni.»
42 Qqaṛen : « Mačči d Σisa mmi-s n Yusef wagi ? Nessen baba-s nessen yemma-s,
amek i gezmer a d-yini tura : ṣubbeγ-d seg igenni ? »
43 Sidna Σisa yenna-yasen :
Beṛkat asmermeg gar-awen !
44 Ulac win i gzemren a d-yas γur-i ma yella
mačči d Baba ṛebbi i s-d yessawlen, yerna nekk a t-id-sseḥyuγ si lmut ass
aneggaru.
45 Akken yura deg idlisen n lenbiya : « Ad lemden akk s γur ṛebbi. »
Kra n win isellen i wawal n Baba ṛebbi, ilemden s γur-es, a d-yas γur-i.
46 Ulac win yeẓran Baba ṛebbi ala win i d-yusan s
γur-es, nețța yeẓra Baba
ṛebbi.
47 S tideț nniγ-awen : kra n win yumnen, yesεa tudert n dayem,
48 axaṭer d nekk i d aγṛum i d yețțaken tudert.
49 Γas akken lejdud nwen
ččan tamanna deg unezṛuf, mmuten.
50 Atan weγṛum i d-yekkan seg igenni : win
ara yeččen seg-s ur yețmețțat ara.
51 D nekk i d aγṛum n tudert i d yekkan seg igenni. Kra n win ara yeččen seg
weγṛum-agi ad yidir i dayem. Aγṛum ara d-fkeγ d lǧețța w, yis ara tεic
ddunit.
52 Mi slan wat Isṛail i wannect-agi bdan țemjadalen qqaṛen wway gar asen :
Amek akka i gezmer a γ-d-yefk aksum-is a t-nečč ?
53 Sidna Σisa yenna-yasen daγen :
S tideț a wen-d-iniγ: m'ur teččim ara si lǧețța n Mmi-s n bunadem, m'ur
teswim ara seg idammen-is ur tețțili ara deg-wen tudert.
54 Win ara yeččen si lǧețța-w, ara yeswen seg idammen-iw ad yesεu tudert n
dayem, yerna a t-id-sseḥyuγ si lmut ass aneggaru.
55 Axaṭer lǧețța-w d lqut
n ṣṣeḥ, idammen-iw ț-țissit n ṣṣeḥ.
56 Win ara yeččen si lǧețța-w, ara yeswen seg idammen-iw ad yili deg-i nekk
ad iliγ deg-s.
57 Baba ṛebbi i yi-d-iceggεen deg-s i tella tudert, d nețța i yi ssidiren.
Akken daγen win ara yeččen seg-i ad yidir yis-i.
58 D wagi i d aγṛum i d-yekkan seg igenni. Mačči am weγṛum-nni i ččan
lejdud-nwen ; nutni mmuten, ma d win ara yeččen aγṛum-agi ad yidir i dayem.
59 D imeslayen-agi i d-yenna Sidna Σisa asmi i gesselmed di lǧameε n wat
Isṛail di temdint n Kafernaḥum.
60 Mi s-slan inelmaden-is, aṭas deg-sen nnan
:
Imeslayen-agi weεṛen, anwa i gzemren a ten-yeqbel ?
61 Sidna Σisa, mi geẓra inelmaden is sgermuden wway gar-asen γef wayen i
d-yenna, yenna-yasen :
Iqṛeḥ-ikkun lḥal ?
62 D acu ara tinim ihi m'ara teẓrem Mmi-s n bunadem yuγal
γer wanda yella di tazwara ?
63 D ṛṛuḥ i d-yețțaken tudert amdan ur
yețțaweḍ γer wacemma ma yețkel γef yiman-is. Imeslayen-agi i wen-d-nniγ, d
wigi i d ṛṛuḥ, d wigi i ț-țudert.
64 Lexsaṛa : llan kra gar awen ur numin
ara ! Si tazwara Sidna Σisa yeẓra anwi deg-sen ur numin ara, yeẓra daγen anwa
ara t-ixedεen.
65 Yenna-yasen daγen :
Daymi i wen-d-nniγ : ulac win i gzemren a d-yas γur-i ma yella mačči d Baba
ṛebbi i s-d-issawlen. »
66 Seg imiren, aṭas i t-yeǧǧan seg inelmaden-is , rewlen fell-as.
67 Sidna Σisa yezzi γer tnac inelmaden-is, yenna-yasen :
Ur tebγim ara aț-țṛuḥem ula d kunwi ?
68 Semεun Buṭrus yerra-yas :
A Sidi, anwa i γer ara nṛuḥ ? γur-ek i gella wawal n tudert.
69 Nukni nesεa
laman deg-k, yerna neẓra belli d kečč i d Imqeddes i d-iceggeε Sidi ṛebbi.
70 Sidna Σisa yenna-yasen :
Mačči d nekk i kkun-ixtaṛen di tnac yid-wen ? ?as akken yiwen gar awen d
Cciṭan.
71 Yenna-d annect-agi γef Yudas, mmi-s n Semεun n taddart n Qeṛyut,
yiwen ger tnac inelmaden-is ara t-ixedεen.
Ixef 7
Sidna Σisa di lεid iεecciwen ( tiεcucin )
1 Deffir wayagi, Sidna Σisa ikemmel abrid-is iteddu di tmurt n Jlili. Ur yebγi
ara ad iṛuḥ γer tmurt n Yahuda, axaṭer imeqqranen n wat Isṛail țqelliben
fell-as iwakken a t nγen.
2 Lεid i deg xeddmen wat Isṛail tiεecciwin
iqeṛṛeb-ed.
3 Dγa atmaten is nnan-as :
Kker aț-țṛuḥeḍ γer tmurt n Yahuda akken inelmaden-ik yellan dinna ad ẓren
ayen i txeddmeḍ.
4 Win yebγan ad yețwassen, ur ilaq ara ad iffer wayen i
gxeddem. Imi tzemreḍ i lecγal imeqqranen, sbeggen-ed iman-ik a k-walin akk
yemdanen.
5 Atmaten-is s yiman-nsen ur uminen ara yis.
6 Sidna Σisa yenna-yasen :
Ma yella γur-wen iwweḍ-ed lweqt, nekk γur-i mazal.
7 Medden ur sεin ara sebba
s wayes ara kkun keṛhen, keṛhen-iyi nekk imi d-sbeggneγ yir lecγal-nsen.
8
Kunwi ṛuḥet aț-țεeggdem, ma d nekk ur tedduγ ara, imi lweqt-iw urεad i
d-yusi.
9 Mi sen-d-yenna ayagi, yeǧǧa-ten ṛuḥen, nețța yeqqim di tmurt n
Jlili.
10 Mi ṛuḥen watmaten-is ad εeggden, iṛuḥ ula d nețța mbla ma
yesseεlem yiwen.
11 Deg ussan n lεid, imeqqranen n wat Isṛail țnadin fell-as, steqsayen anda
yella.
12 Lγaci i d-yusan ad εeggden, bdan țmeslayen fell-as. Kra deg-sen
qqaṛen :
D argaz n lxiṛ ! Wiyaḍ qqaṛen :
Awah ! Yețkellix kan γef lγaci !
13 Yiwen ur d-yehdiṛ fell-as εinani axaṭer uggaden imeqqranen n wat Isṛail.
Lxilaf yebda yețțimγur
14 Mi gneṣṣef lεid n iεecciwen, Sidna Σisa yuli
γer lǧameε iqedsen, yebda
yesselmad.
15 At Isṛail wehmen, qqaṛen :
Ur yeγṛi ara d lεulama yerna yessen tira iqedsen, ansi i s-d-tekka tmusni-yagi
?
16 Sidna Σisa yenna yasen :
Ayen i sselmadeγ mačči s γur-i i d-yekka, yekka-d s γur win i yi-d iceggεen.
17 Win iqesden ad yexdem lebγi n ṛebbi ad yeεqel ma yella wayen i sselmadeγ
yekka-d s γur ṛebbi neγ d imeslayen-iw kan.
18 Win iheddṛen s yisem-is
yețqellib ad yawi cciεa i yiman-is. Ma d win yețqelliben a d-yawi cciεa i win
i t-id iceggεen yeqqaṛ tideț, ulac deg-s lexdeε.
19 Nnbi Musa yeǧǧa-yawen-d ccariεa, lameεna ulac gar-awen win i ț-itebεen !
Acuγeṛ i tețqellibem a yi tenγem ?
20 Lγaci nnan-as :
Anwa akka i gebγan a k-ineγ ? Waqila ikcem-ik lǧen !
21 Sidna Σisa yenna-yasen : Γef wayen akka xedmeγ i twehmem ?
22 Meyzet γef wayagi : nnbi Musa
yeǧǧa-yawen-d lextana (ṭṭhaṛa), lεadda-agi mačči s
γur-es i d-tekka
meεna s γur lejdud-is. Atan tqeblem tessextanem deg wass n westeεfu.
23 Ma yella tqeblem aț-țesxetnem i weqcic deg ass n westeεfu, iwakken ur tețxalafem
ara ccariεa n Musa, acuγeṛ terfam fell-i imi sseḥlaγ amdan s lekmal-is deg
wass n westeεfu ?
24 Beṛkat ! Ur ḥekkmet ara s wayen kan i țwalint
wallen-nwen, lemdet aț-țḥekmem s lḥeqq.
25 Kra n imezdaγ n temdint n Lquds wehmen, qqaṛen :
Mačči d win akken i țqelliben a t-nγen ?
26 Atan iheddeṛ εinani zdat lγaci,
yiwen ur s-yenni acemma ! Σeqlen-t lεulama-nneγ d nețța i d Lmasiḥ ?
27 Argaz-agi neẓra ansi-t, lameεna Lmasiḥ asm'ara d-yas yiwen ur iẓerr ansi ara
d-yekk.
28 Sidna Σisa yenṭeq s ṣṣut εlayen, slan-as-d akk deg wefrag n Lǧameε
iqedsen, yenna :
Tessnem-iyi yerna teẓram ansi i d-kkiγ ! Ur d-usiγ ara s lebγi-w, lameεna d Bab
n lḥeqq i yi-d iceggεen; kunwi ur t-tessinem ara.
29 Nekkini ssneγ-t axaṭer s
γur-es i d-usiγ yerna d nețța i yi-d-iceggεen.
30 Bγan a t-ṭṭfen imiren, meεna yiwen ur yesris afus-is fell-as imi ass-is
urεad d-yewwiḍ.
31 Aṭas n lγaci si terbaεt-nni i gumnen yis, qqaṛen :
M'ara d-yas Lmasiḥ, eεni ad ixdem lbeṛhanat yugaren wigi ?
32 Ifariziyen wwin-d s lexbaṛ s wayen heddṛen lγaci γef Sidna Σisa, dγa
lmuqedmin imeqqranen akk-d ifariziyen ceggεen iεessasen a t-id ṭṭfen.
33 Sidna
Σisa yenna i lγaci :
Mazal-iyi kra n lweqt yid-wen, syin akkin ad uγaleγ γer win i yi-d iceggεen.
34 Aț-țqellbem fell-i ur iyi-tețțafem ara imi ur tezmirem ara a d-tasem
γer
wanda ara yiliγ.
35 At Isṛail qqaṛen wway gar-asen :
Anda akka ara iṛuḥ armi ur nețțizmir ara a t-naf ? Eεni ad iṛuḥ
γer wat
Isṛail ițwazerεen ger leǧnas ? Neγ ibγa ad isselmed leǧnas nniḍen ?
36 D acu i gebγa a d-yini mi d-iqqaṛ : « aț-țqellbem fell-i, ur iyi-tețțafem ara
axaṭer ur tezmirem ara a d-tasem γer wanda ara yiliγ.»
Aman n leεwanṣer
37 Ass aneggaru n lεid, yellan d ass yesεan aṭas n lqima ; Sidna Σisa ibedden
ger lγaci iεeggeḍ, yenna :
Win iffuden a d-yas γur-i ad isew ; win yumnen yis-i a d-yas ad isew.
38 Akken
yura di lkutub : D isaffen n waman ara d-ițfeggiḍen seg-s.
39 Sidna Σisa yenna-d ayagi γef ṛṛuḥ iqedsen ara yeččaṛen ulawen n wid
yumnen yis. Di lweqt-nni, ṛṛuḥ iqedsen mazal ur d-ițțunefk ara axaṭer
Sidna Σisa werεad yekcim tamanegt-is.
Lxilaf γef Sidna Σisa
40 Ger lγaci i s-d-yeslan, llan wid yeqqaṛen :
Argaz-agi mbla ccekk d nețța i d nnbi-nni ara d-yasen !
41 Wiyaḍ qqaṛen :
D nețța i d Lmasiḥ !
Ma d kra nniḍen qqaṛen :
Yezmer Lmasiḥ a d-iffeγ si tmurt n Jlili ?
42 Ur yuri ara di tira iqedsen : Lmasiḥ a d-yeffeγ si dderya n Sidna Dawed, si taddart n Bitlḥem ?
43 S wakka i gebda yețțimγur lxilaf ger lγaci γef Sidna Σisa.
44 Kra deg-sen
bγan a t-ḥebsen lameεna yiwen ur yesris afus-is fell-as.
45 Mi yuγalen
iεessasen i d-yețwaceggεen a t-ṭṭfen, lmuqedmin imeqqranen d ifariziyen
nnan-asen :
Iwacu ur t-id-tewwim ara ?
46 Nutni rran-asen :
Di leεmeṛ ur nesli i yiwen iheddeṛ am nețța.
47 Ifariziyen nnan-asen :
Iseḥḥer-ikkun ula d kunwi ?
48 Teẓram yiwen si lecyux-nneγ, neγ seg
ifariziyen i gumnen yis ?
49 Anagar lγaci-agi ur nessin ara ccariεa... a
ten-inεel ṛebbi !
50 Nikudem yellan d yiwen seg-sen, win akken i gṛuḥen deg
iḍ γer Sidna Σisa, yenna-yasen :
51 Tserreḥ-aγ ccariεa-nneγ a neḥkem γef yiwen uqbel a s-nsel neγ uqbel a nẓer
d acu n cceṛ i gexdem ?
52 Nutni rran-as :
Ula d kečč d ajlili ? Qelleb mliḥ di tira iqedsen aț-țafeḍ : « Ulac nnbi
ara d-yekken si tmurt n Jlili.»
53 Imiren, mkul yiwen yuγal γer wexxam-is.
Ixef 8
ṛuḥ, xḍu i ddnub
1 Sidna Σisa yuli s yiγil uzemmur ;
2 azekka-nni, ssbeḥ zik yuγal γer lǧameε
iqedsen. Lγaci meṛṛa uzzlen-d γur-es. Sidna Σisa yeqqim gar-asen, yebda
yesselmad iten deg ufrag n lǧameε.
3 Atnaya lεulama n ccariεa akk-d ifariziyen
wwin-as-d yiwet n tmeṭṭut ṭṭfen-ț txeddem zzna.
Sbedden-ț ger lγaci akken a ț iwali Sidna Σisa.
4 Nnan-as :
A Sidi, neṭṭef tameṭṭut-agi mi txeddem zzna.
5 Di ccariεa, Sidna Musa
yumeṛ-aγ-d a neṛjem s yedγaγen tameṭṭut am tagi alamma temmut. I keččini d
acu ara d-tiniḍ ?
6 Steqsan-t iwakken a t-jeṛṛben, țnadin sebba s wacu ara ccetkin fell-as.
Sidna Σisa yekna, yețțaru s uḍad-is di lqaεa.
7 Imi t-ḥeṛṣen s usteqsi,
yekker yenna-yasen :
Win deg-wen werǧin yednib a ț-yeṛjem d amezwaru !
8 Yekna daγen yețțaru di lqaεa.
9 Lγaci-nni, mi slan annect-agi, bdan
tixxiṛen yiwen yiwen, seg umγaṛ armi d ameẓyan. Ǧǧan dinna Sidna Σisa
weḥd-es di tlemmast n wefrag n lǧameε iqedsen, nețța ț-țmeṭṭut-nni.
10 Dγa yerfed allen-is, yenna-yas :
A tameṭṭut, anda-ten widak-nni i d-icetkan fell-am ? Ulac win iḥekmen fell-am
?
11 Tenna-yas :
Ulac a Sidi !
Sidna Σisa yenna-yas :
Ula d nekk ur ḥekkmeγ ara fell-am. ṛuḥ, meεna sya d asawen xḍu i ddnub.
Tafat n ddunit
12 Sidna Σisa iheddeṛ i lγaci yenna yasen :
D nekk i ț-țafat n ddunit, win ara yi-tebεen ur iteddu ara di ṭṭlam, lameεna
ad yesεu tafat n tudert.
13 Ifariziyen nnan-as :
Tețcehhiḍeḍ γef yiman-ik, cchada-inek ur tṣeḥḥa ara.
14 Sidna Σisa yenna-yasen :
Ț-țideț, țcehhideγ γef yiman-iw, lameεna cchada-inu tṣeḥḥa, axaṭer ?riγ
ansi d-kkiγ, ẓriγ daγen γer wanda tedduγ. Ma d kunwi ur teẓrim ansi d-kkiγ ur
teẓrim anda tedduγ.
15 Kunwi tḥekkmem γef wiyaḍ s lεeqliya n wemdan, ma d nekk ur ḥekkmeγ
γef
yiwen.
16 Ma yella yewwi-d lḥal ad ḥekmeγ, ad ḥekkmeγ s lḥeqq axaṭer ur
lliγ ara weḥd-i, Baba ṛebbi i yi-d-iceggεen yella yid-i.
17 Yura di
ccariεa-nwen belli ma ddukklen sin inigan γef yiwet n cchada, cchada-nsen
tețwaqbel.
18 Atan nekk cehdeγ-ed γef yiman-iw, Baba i yi-d-iceggεen d inigi
fell-i.
19 Nutni nnan-as :
Anda yella Baba-k ?
Yerra-yasen :
Ur iyi-tessinem, ur tessinem Baba. Lemmer i yi-tessinem, tili tesnem Baba.
20 Sidna Σisa yenna-d annect-agi mi gesselmad deg wefrag n lǧameε iqedsen, zdat
wemkan anda srusun lweεdat. Ula d yiwen ur yesris afus-is fell-as axaṭer urεad
d-yewwiḍ wass-is.
Nekk d Win yellan !
21 Sidna Σisa yerna yenna-yasen :
Atan ad ṛuḥeγ, aț-țqellbem fell-i lameεna aț-țemtem di ddnub-nwen, ur
tezmirem ara a d-tasem γer wanda ara ṛuḥeγ.
22 At Isṛail qqaṛen wway gar-asen :
Ahat yebγa ad ineγ iman-is imi γ-d-yenna ur tezmirem ara a d-tasem γer wanda ara
ṛuḥeγ ?
23 Sidna Σisa yerra-yasen :
Kunwi n lqaεa nekk n igenwan ; kunwi n ddunit-agi nekk mačči-yines.
24 Daymi i
wen-d-nniγ aț-țemtem di ddnub-nwen. Atan m'ur tuminem ara belli nekk « d Win
yellan, » aț-țemtem di ddnub-nwen.
25 Nnan-as :
Anwa-k keččini ?
Sidna Σisa yerra-yasen :
D win akken i wen-d-qqaṛeγ si tazwara.
26 Γef wayen i kkun-yeεnan sεiγ aṭas
ara d-iniγ, aṭas ara ḥasbeγ ; win i yi-d-iceggεen d Bab n tideț, d ayen i
sliγ γur-es i d-țεawadeγ di ddunit.
27 Imi ur fhimen ara belli γef Baba ṛebbi i sen-d-iheddeṛ,
28 yenna-yasen
daγen :
Asm'ara tessaεlim Mmi-s n bunadem, imiren aț-țfiqem belli nekk « d Win yellan
!» Aț-țεeqlem belli ur xeddmeγ acemma s yiman-iw,
lameεna qqaṛeγ-ed ayen i
yi-iselmed Baba ṛebbi.
29 Win i yi-d-iceggεen yella yid-i, ur yi-țțaǧa ara weḥd-i imi dayem xeddmeγ
lebγi-s.
30 Mi d-yenna imeslayen-agi, aṭas i gumnen yis.
Tarwa n tideț n Sidna Ibṛahim
31 Sidna Σisa yenna i wat Isṛail i gumnen yis :
Ma teṭṭfem s tideț deg awal-iw aț-țilim d inelmaden-iw n ṣṣeḥ.
32 Aț-țissinem tideț, tideț ara kkun isuffγen
γer tlelli.
33 Nnan-as :
Nukni ț-țarwa n Sidna Ibṛahim. Di leεmeṛ ur nelli d aklan n walebεaḍ ; amek
i tzemreḍ a d-tiniḍ : « Aț-țesεum tilelli »?
34 Sidna Σisa yerra-yasen :
S tideț qqaṛeγ-awen : kra n win ixeddmen ddnub d akli n ddnub.
35 Aklan ur
țwaḥsaben ara n at wexxam ma d mmi-s n wexxam yețwaḥseb dayem n at wexxam.
36 Ma yella d Mmi-s i wen-d-yefkan tilelli, aț-țilim s tideț di tlelli.
37 ?riγ belli kunwi ț-țarwa n Ibṛahim, lameεna tețnadim a yi tenγem axaṭer
awal-iw ur ikeččem ara ulawen-nwen.
38 Nekk qqaṛeγ-ed ayen ẓriγ
γer Baba, ma
d kunwi txeddmem ayen i tlemdem s γur Baba-twen !
39 At Isṛail rran-as :
Baba-tneγ nukkni, d Sidna Ibṛahim.
Sidna Σisa yenna-yasen :
Lemmer ț-țideț d arraw n Ibṛahim i tellam , tili txeddmem lecγal i gxeddem
Ibṛahim ;
40 kunwi tețqellibem a yi-tenγem, acuγeṛ ? Axaṭer qqaṛeγ-awen-d
tideț akken i ț-sliγ γer Baba ṛebbi. Ibṛahim di leεmeṛ ur yexdim am kunwi !
41 Kunwi txeddmem akken i gxeddem Baba twen ! Nutni rran-as :
Ur nelli ara d arraw n leḥṛam ; nesεa yiwen n Baba-tneγ kan : d ṛebbi !
42 Sidna Σisa yenna-yasen :
Lemmer ț-țideț d ṛebbi i d Baba twen tili tḥemmlem-iyi axaṭer s
γur-es i
d-kkiγ, s γur-es i d-usiγ γur-wen. Ur d-usiγ ara s yiman-iw lameεna d nețța
i yi-d-iceggεen.
43 Acuγeṛ ur tfehhmem ara ayen i wen-d-qqaṛeγ ? Axaṭer ur
tezmirem ara aț-țqeblem imeslayen-iw.
44 Baba-twen d Cciṭan yerna tebγam aț-țxedmem lebγi-s. Nețța d bu-tmegṛaḍ
si tazwara, ur yeṭṭif ara di tideț axaṭer ulac deg-s tideț. M'ara
yeskiddib, yețmeslay-ed seg ul-is imi d ameskaddab i gella ; d nețța i d bab
n lekdeb.
45 Lameεna nekk qqaṛeγ-d tideț, daymi ur iyi-tețțamnem ara.
46 Anwa deg-wen
ara yi-d-issuksen ula yiwet n lγelṭa ?
Ma nniγ-ed tideț, iwacu ur iyi-tețțamnem ara ?
47 Win yellan n ṛebbi
yesmeḥsis i wawal n ṛebbi. Kunwi ur tellim ara n ṛebbi, daymi ur tesmeḥsisem
ara i wawal-is.
48 At Isṛail nnan-as :
Nesεa lḥeqq mi d-nenna kečč d asamari, yerna izdeγ-ik uṛuḥani !
49 Sidna Σisa yerra-yasen :
Ur iyi-izdiγ ara uṛuḥani. Nekk țεuzzuγ Baba ṛebbi, kunwi tḥeqṛem-iyi.
50
Ur țqellibeγ ara ccan i yiman-iw, yella win yețḥebbiṛen fell-i, d nețța
ara yi-d-yefken lḥeqq.
51 A wen-iniγ tideț : win iḥerzen awal-iw ur yețmețțat ara maḍi.
Sidna Σisa akk-d Sidna Ibṛahim
52 At Isṛail nnan-as :
Atan tura iban izdeγ-ik uṛuḥani ! Sidna Ibṛahim yemmut, lenbiya mmuten,
kečč teqqaṛeḍ : win iḥerzen awal-iw ur yețmețțat ara maḍi !
53 Tugareḍ baba-tneγ Ibṛahim neγ lenbiya meṛṛa i gemmuten ? D acu i
tḥesbeḍ iman-ik ?
54 Sidna Σisa yerra-yasen :
Ma fkiγ ccan i yiman-iw, ccan-iw ur yesεi ara azal. Win i yi-d-yețțaken ccan d
Baba, win akken i teqqaṛem « d ṛebbi-nneγ.»
55 Kunwi ur t-tessinem ara, nekkini ssneγ-t. Ma nniγ-ed ur t-ssineγ ara ad
uγaleγ d akeddab am kunwi.
Lameεna ssneγ-t yerna xeddmeγ lebγi-s.
56 Baba-twen Ibṛahim yefṛeḥ mi geẓra
iteddu-d wass-iw, tura mi t-yeẓra yefṛeḥ aṭas.
57 At Isṛail nnan-as :
Amek, urεad tesεiḍ xemsin iseggasen teqqaṛeḍ walaγ Ibṛahim ?
58 Sidna Σisa yenna-yasen :
Uqbel a d-ilal Ibṛahim, lliγ !
59 Γef wannect-agi i d-ddmen wat Isṛail iblaḍen iwakken a t-ṛeǧmen. Sidna
Σisa yekcem ger lγaci, yeffeγ seg wefrag n lǧameε iqedsen.
Ixef 9
Aderγal yeḥlan
1 Deg ubrid-is, Sidna Σisa iwala yiwen wergaz, d aderγal seg wasmi i d-ilul.
2 Inelmaden-is steqsan-t nnan-as :
A Sidi, iwacu i d-ilul wergaz-agi d aderγal ? Anwa i gdenben d nețța neγ d
imawlan-is ?
3 Sidna Σisa yerra-yasen :
Tidderγelt-agi ur d-tekki ara si ddnub-is neγ si ddnub n imawlan-is, lameεna
iwakken medden meṛṛa ad ẓren ayen i gezmer ṛebbi a t-ixdem.
4 Skud mazal
tafat n wass, ilaq-aγ a nexdem lecγal n win i yi-d iceggεen ; iteddu-d yiḍ anda
yiwen ur yezmir ad ixdem.
5 Skud mazal lliγ di ddunit d nekk i ț-țafat n
ddunit.
6 Mi d-yenna imeslayen-agi, Sidna Σisa yessusef γer lqaεa, yexleḍ akal s
tsusaf-is, yeḍla-t γef wallen n uderγal-nni,
7 yenna-yas :
ṛuḥ aț-țessirdeḍ di tala n Silwi (Silwi lmeεna-ines «amceggeε»).
Aderγal-nni iṛuḥ a d-issired, mi d-yuγal, yețwali.
8 Lǧiran-is akk-d wid i
t-yessnen itețțer, qqaṛen :
Argaz-agi mačči d win akken yețγimin γer lqaεa yezga yessutur tin n ṛebbi ?
9 Kra qqaṛen :
D nețța.
Wiyaḍ qqaṛen :
Mačči d nețța, d wayeḍ i gțemcabin γur-es.
Ma d nețța yeqqaṛ :
D nekk s yiman-iw.
10 Nnan-as :
Ihi amek i d-ldint wallen ik ?
11 Nețța yerra-yasen :
Argaz-nni iwumi qqaṛen Σisa yexleḍ akal s tsusaf-is, yeḍla-t i wallen-iw,
yenna-yi-d : « ṛuḥ aț-țessirdeḍ di tala n Silwi.» Mi ṛuḥeγ ssardeγ,
imiren kan yuγal iyi-d yeẓri.
12 Nutni nnan-as :
Anda-t wergaz-agi ?
Yenna-yasen :
Ur ẓriγ ara anda yerra
Asteqsi γef wayen yeεnan lbeṛhan
13 Wwin argaz-nni yellan zik d aderγal γer ifariziyen.
14 Yuγ lḥal deg wass n westeεfu i gexleḍ Sidna Σisa akal s tsusaf-is, i
s-d-yerra iẓri i uderγal-nni.
15 Ifariziyen steqsan-t amek armi i t-id-yuγal
yeẓri. Nețța yenna-yasen :
Yexleḍ akal s tsusaf-is, yeḍla-t γef wallen-iw, ṛuḥeγ ssardeγ udem-iw,
imiren kan uγaleγ țwaliγ.
16 Γef wakka i nnan kra seg ifariziyen :
Argaz-agi ur yezmir ara a d-yekk s γur ṛebbi, imi ur yețqadaṛ ara lqanun n
wass n westeεfu.
Ma d wiyaḍ qqaṛen :
Lemmer d amednub i gella amek i gezmer ad ixdem lbeṛhanat am wigi ? Yekker
lxilaf ger lγaci-nni,
17 ifariziyen rnan steqsan daγen aderγal-nni :
I kečč d acu ara d-tiniḍ deg wergaz-agi i k-d-yeldin allen ?
Nețța yenna-yasen :
Nekk a d-iniγ, argaz-agi ț-țideț d nnbi.
18 Lameεna imeqqranen n wat Isṛail ugin ad amnen belli argaz-nni yella si zik d
aderγal, yuγal yețwali. Uγalen ceggεen γer imawlan-is, usan-d.
19 Steqsan-ten
nnan-asen :
Argaz-agi, ț-țideț d mmi-twen ? D ṣṣeḥ ilul-ed d aderγal ? Amek armi i
guγal yețwali tura ?
20 Imawlan n uderγal-nni nnan asen :
Ţ-țideț, d mmi-tneγ yerna ilul-ed d aderγal.
21 Meεna amek i guγal yețwali
tura neγ anwa i s-d-yerran iẓri... ur neẓri ara ! Steqsit-eț nețța, d argaz
i gella, izmer a d-yerr s yiman-is.
22 Imawlan-is nnan-asen akka, axaṭer uggaden lecyux n wat Isṛail i gqesden ad
sṭixṛen si lǧameε-nsen kra n win ara icehden belli Σisa d Lmasiḥ.
23 Daymi i
sen-nnan imawlan is : « D argaz i gella, yezmer ad yerr s yiman-is.»
24 Ifariziyen ssawlen tikkelt tis snat i wergaz-nni iwumi d-yuγal yeẓri nnan-as
:
Σuzz Sidi ṛebbi, ini-d tideț. Nukni neẓra belli argaz-agi d amednub.
25 Nețța yerra-yasen :
Ur ẓriγ ara ma d amednub i gella ; nekk ẓriγ yiwet lḥaǧa : « Lliγ d aderγal,
tura țwaliγ ».
26 Nnan-as daγen :
D acu i k-ixdem ? Amek i k-d-yeldi allen-ik ?
27 Yerra-yasen :
Nniγ-awen-t-id yakan meεna ur iyi-d-semḥessem ara. Iwacu tebγam a
wen-t-id-εiwdeγ ? Ula d kunwi tebγam aț-țuγalem d inelmaden-is ?
28 Regmen-t, nnan-as :
D kečč i d anelmad-is, nukkni d inelmaden n Sidna Musa.
29 Neẓra belli ṛebbi
ihḍeṛ-ed i Sidna Musa, ma d wagi ur neẓri ara ansi i d-yekka.
30 Argaz-nni yerra-yasen :
D ayen yessewhamen ! Argaz yeldi-yi-d allen, kunwi ur teẓrim ara ansi i d-yekka
!
31 Medden akk ẓran belli ṛebbi ur d-iqebbel ara ddeεwat n yemcumen, lameεna
iqebbel-ed win i t-iḍuεen, ixeddmen lbγi-is.
32 Seg wasmi i d-texleq ddunit werǧin nesli s yiwen yeldi-d allen i win i
d-ilulen d aderγal.
33 Lemmer argaz-agi mačči s
γur ṛebbi i d-yekka tili ur
yezmir ad yexdem acemma.
34 Rran-as :
Amek ! Seg wasmi i d-luleḍ kečč di ddnub seg iḍaṛṛen armi d aqeṛṛuy,
tura tusiḍ-ed a γ tesfehmeḍ ?
Dγa qecεen-t ( ḍerqen-t ) γer beṛṛa.
Tidderγelt n ṣṣeḥ
35 Sidna Σisa yesla belli qecεen argaz-nni γer beṛṛa. Iṛuḥ
γur-es,
yenna-yas :
Ini-yi-d, tumneḍ s Mmi-s n bunadem ?
36 Yerra-yas :
Anwa-t a Sidi ? Ini-yi-t-id iwakken ad amneγ yis.
37 Sidna Σisa yenna-yas :
Aql-ik tețwaliḍ-t s wallen-ik, d nețța s yiman-is i d-yețmeslayen yid-ek
tura.
38 Argaz-nni yenna-yas :
Umneγ a Sidi !
Dγa yeγli γef tgecrar zdat-es.
39 Sidna Σisa yenna :
D wagi i d lḥisab γef wacu i d-usiγ γer ddunit : wid ur nețwali ara ad walin,
wid yețwalin ad uγalen d iderγalen.
40 Kra n ifariziyen i geslan i imeslayen-is steqsan-t, nnan-as :
Ihi ula d nukkni d iderγalen ?
41 Sidna Σisa yerra-yasen :
Lemmer ț-țideț d iderγalen i tellam tili ulac ddnub fell-awen, lameεna tura
imi teqqaṛem nețwali, ddnub i yirawen-nwen.
Ixef 10
Ameksa n ṣṣeḥ
1 -- S tideț a wen-d-iniγ, win ur nkeččem ara si tewwurt
γer wemṛaḥ (
leεzib ) n wulli, iεedda si ẓẓeṛb, winna d amakar yerna d aqeṭṭaε.
2 Ma d win ikeččmen si tewwurt d nețța i d ameksa n wulli.
3 Aεessas n
wemṛaḥ ileddi tawwurt i umeksa, ulli sellent i ṣṣut-is, issawal-asent s
yismawen-nsent, yessufuγ-itent γer beṛṛa.
4 Mi gessufeγ tid akk yellan-ines, izeggir zdat-sent, ulli ttabaεent-eț axaṭer
ssnent ṣṣut-is.
5 D lmuḥal ad tebεen-t abeṛṛani, ad rewlent fell-as imi ur
ssinent ara ṣṣut n ibeṛṛaniyen.
6 Sidna Σisa yenna-yasen lemtel agi, lameεna ur fhimen ara ayen yebγa a
sen-yini.
7 Yenna yasen daγen :
S tideț qqaṛeγ-awen, d nekk i ț-țawwurt ansi țεeddayent wulli.
8 Wid
meṛṛa i d-yusan uqbel-iw d imakaren d iqeṭṭaεen. Lameεna ulli ur
sen-ḥessent ara.
9 D nekk i ț-țawwurt. Win ara ikecmen yis-i ad yețțusellek : ad ikcem ad
yeffeγ akken i s-ihwa, ad yaf ayen ara yečč.
10 Amakar yețțas-ed kan iwakken ad yaker, ad yezlu, ad yessenger. Nekk usiγ-ed
iwakken ad fkeγ tudert i wulli-inu, tudert s tugeț (ṭaqa).
11 D nekk i d ameksa n ṣṣeḥ. Ameksa n ṣṣeḥ yețțsebbil tudert-is
γef
wulli-ines.
12 Ma d win ur nelli ara d ameksa n wulli ur nelli ara d bab-nsent, d ameksa kan
yețwaxelṣen, ireggel, ițaǧǧa ulli m'ara iwali uccen. Imiren uccen a
d-yezḍem γef wulli, ad yawi kra seg-sent yerna ad yesserwel akk taqeḍεit.
13 Argaz-agi ixeddem akka imi d ameksa kan yețwaxelṣen, ur as tewqiε ara deg
wulli.
14 Nekk d ameksa n ṣṣeḥ, ssneγ ulli-inu nutenti ssnent-iyi,
15 akken i
yi-issen Baba ṛebbi i t-ssneγ ula d nekk. Țsebbileγ tudert-iw γef wulli-inu.
16 Sεiγ daγen ulli nniḍen ur nelli ara seg wemṛaḥ agi. Tigi daγen ilaq a
tent-id-awiγ, a d-ḥessent i ṣṣut-iw, s wakka aț-țili anagar yiwet n
tqeḍεit s yiwen umeksa.
17 Baba iḥemmel-iyi imi țsebbileγ tudert-iw meεna syin akkin a ț-id-rreγ.
18 Yiwen ur izmir a yi-ikkes tudert, țsebbileγ-ț s lebγi-inu. Sεiγ tazmert a
ț-sebbleγ, sεiγ daγen tazmert a ț-id-rreγ. D wagi i d lameṛ i yi-d yefka Baba
ṛebbi.
19 Mi d-yenna imeslayen-agi, yekker daγen lxilaf ger lγaci.
20 Aṭas
deg-sen qqaṛen :
Argaz-agi yezdeγ-it lǧen, yedderwec, acuγeṛ i s-tesmeḥsisem ?
21 Wiyaḍ qqaṛen :
Win ițwamelken ur yețmeslay ara akka. Qqaṛen daγen :
Izmer lǧen a d-yerr iẓri i iderγalen ?
D Mmi-s n ṛebbi neγ d lkafer ?
22 Yewweḍ-ed lweqt anda i țεeggiden di temdint n Lquds lεid n weεzal n Lǧameε
iqedsen ; imiren d ccetwa.
23 Sidna Σisa yella yețṛuḥu ițțuγal deg wefrag n
Lǧameε iqedsen seddaw n wesqif n Sidna Sliman.
24 Yezzi-yas-d lγaci, nnan-as :
Ar melmi ara γ-teǧǧeḍ di ccekk ? Ma d Lmasiḥ i telliḍ ini-aγ t-id εinani !
25 Sidna Σisa yerra-yasen :
Nniγ-awen-t-id ur tuminem ara, yerna twalam lecγal i xeddmeγ s yisem n Baba : d
lecγal-agi i d yețcehhiden fell-i.
26 Kunwi ur tețțamnem ara axaṭer ur
tellim ara seg ulli-inu.
27 Ulli-inu smeḥsisent i ṣṣut-iw, ssneγ-tent yerna
ttabaεent iyi-d.
28 ?țakeγ-asent tudert n dayem, ur țmețțatent ara maḍi,
yiwen ur izmir a tent-yekkes seg ufus-iw.
29 Baba i yi-tent-id-yefkan yugar
kullec, win yellan ger ifassen is, yiwen ur izmir a s-t-id-yekkes
30 axaṭer
nekk d Baba, d yiwen.
31 Jemεen-d daγen idγaγen akken a t-nγen.
32 Yekker Sidna Σisa yenna-yasen :
Xedmeγ zdat-wen aṭas n lecγal yelhan yessewhamen, s tezmert n Baba ; γef wanwa
deg-sen i tebγam a yi-tenγem s iblaḍen ?
33 At Isṛail nnan-as :
Mačči γef ccγel yelhan i nebγa a k-neṛjem, lameεna imi i tkeffreḍ ! Axaṭer
kečč yellan d amdan terriḍ iman-ik d ṛebbi.
34 Sidna Σisa yerra-yasen :
Eεni ur yuri ara di ccariεa nwen : Nekk, Sidi ṛebbi nniγ-awen : Kunwi d
iṛebbiten !
35 Yiwen ur yezmir ad inkeṛ ayen i d-nnant tira iqedsen.
Ma yella ccariεa-nwen tsemma «iṛebbiten» wid iwumi i d-ițțuceggeε wawal n
ṛebbi,
36 amek armi teqqaṛem fell-i keffṛeγ mi d-nniγ « nekk d Mmi-s n
ṛebbi, » eεni mačči d Baba i yi-ixtaṛen, i yi-d-iceggεen
γer ddunit ?
37 Lemmer ur xeddmeγ ara lecγal n Baba tili ur teḥwaǧem ara aț țamnem yis-i.
38 Lameεna ma xeddmeγ-ten, γas akken ur tebγim ara aț-țamnem yis-i, amnet s
lecγal-iw akken aț țeẓrem, aț-țfehmem belli Baba yella deg-i nekk lliγ di
Baba.
39 Γef yimeslayen-agi, lecyux n at Isṛail εeṛden a t-ṭṭfen lameεna yemneε si
ger ifassen-nsen.
40 Syenna Sidna Σisa iṛuḥ γer tama nniḍen n wasif n Urdun,
γer wemkan nni
anda i gesseγḍes Yeḥya lγaci, yeqqim dinna kra n wussan.
41 Aṭas i d-yusan γur-es, qqaṛen wway gar-asen :
Yeḥya ur yexdim ula d yiwen lbeṛhan, lameεna ayen akk i d-yenna
γef wergaz-agi
ț-țideț.
42 Dinna, aṭas n lγaci i gumnen yis.
Ixef 11
Lmut n yiwen weḥbib n Sidna Σisa
1 Di taddart n Bitanya, llant snat n tyestmatin, Marṭa d Meryem akk-d gma-tsent
Laεẓar ;
2 Meryem, ț-țin akken i gdehnen iḍaṛṛen n Sidna Σisa s zzit n
leεṭeṛ terna teṣfeḍ-iten s ucebbub-is ; tesεa gma-s Laεẓar, yehlek yenṭer.
3 Yessetma-s ceggεent γer Sidna Σisa a s-inin :
A Sidi, atan weḥbib-ik yuḍen.
4 Mi gesla Sidna Σisa s lexbaṛ-agi yenna :
Lehlak-agi ur yeṣṣawaḍ ara γer lmut, lameεna a d-yesbeggen tamanegt n ṛebbi
; yis daγen ara d-tban tmanegt n Mmi-s n ṛebbi.
5 Sidna Σisa iḥemmel aṭas Marṭa, Meryem akk-d Laεẓar.
6 Γas akken yesla s
Laεẓar yuḍen , yerna sin wussan deg wemkan-nni anda yella.
7 Dγa yenna i
inelmaden-is :
Eyyaw a nuγalet γer tmurt n Yahuda.
8 Nnan-as :
A Sidi, mačči aṭas aya segmi țnadin wat Isṛail a k-nγen s iblaḍen, tura
tebγiḍ aț-țuγaleḍ γer dinna ?
9 Sidna Σisa yerra-yasen :
Eεni ur llint ara tnac n swayeε deg wass ? Ma ileḥḥu yiwen deg wass ur
t-kkaten ara wuguren axaṭer tella tafat, yețwali abrid.
10 Lameεna ma ileḥḥu
deg iḍ ad imḍerkal axaṭer ulac tafat.
11 Mi d-yenna ayagi, yerna yenna yasen
:
Aḥbib-nneγ Laεẓar tewwi-t tnafa, ad ṛuḥeγ a t-id-ssakiγ.
12 Γef wayagi inelmaden-is nnan as :
A Sidi, ma ț-țaguni i geṭṭes ihi a d-yekker.
13 Sidna Σisa yenna-d ayagi γef lmut n Laεẓar, nutni nwan
γef tguni i
d-yemmeslay.
14 Dγa yenna-yasen εinani :
Laεẓar yemmut,
15 yerna feṛḥeγ γef ddemma-nwen imi ur lliγ ara dinna di
teswiεt-nni, axaṭer ayagi d ayen ara yernun di liman-nwen. Eyyaw tura a
nṛuḥet γur-es.
16 Ṭuma iwumi qqaṛen Akniw, yenna i inelmaden nniḍen :
Eyyaw a neddut ula d nukkni iwakken a nemmet yid-es.
17 Mi qṛib ad yaweḍ γer dinna, Sidna Σisa yesla belli ṛebεa wussan aya segmi
i meḍlen Laεẓar.
18 Ad ilin wazal n tlata alaf kilumitrat ger taddart n
Bitanya ț-țemdint n Lquds.
19 Daymi aṭas n lγaci i d-yusan γer Marṭa d Meryem a tent-ṣebbṛen
γef lmut n
gma-tsent.
Ḥeggu akk ț-țudert
20 Akken kan i tesla Marṭa belli Sidna Σisa iteddu-d γer taddart, tuzzel
γur-es a t-temmager. Ma d Meryem teqqim deg wexxam.
21 Marṭa tenna i Sidna Σisa :
A Sidi, lemmer dagi i telliḍ, tili gma ur yemmut ara.
22 Lameεna ẓriγ ula
ț-țura, ayen akk ara tessutreḍ i ṛebbi a k-t-id-yeqbel.
23 Sidna Σisa yenna-yas :
Gma-m a d-yuγal γer tudert.
24 Marṭa terra-yas :
?riγ a d-yuγal γer tudert ass aneggaru, ass n ḥeggu n lmegtin.
25 Sidna Σisa yenna-yas :
D nekk i d ḥeggu, d nekk i ț-țudert. Win ara yesεun laman deg-i, ad yidir
γas
ma yemmut.
26 Yal amdan yeddren, yumnen yis-i, ur yețmețțat ara maḍi.
Tumneḍ s wannect-agi ?
27 Marṭa tenna-yas :
Umneγ a Sidi, d kečč i d Lmasiḥ, d kečč i d Mmi-s n ṛebbi, win akken ara
d-yasen γer ddunit.
28 Syenna, Marṭa tṛuḥ tessawel i weltma-s Meryem tenna-yas s tuffra :
Sidna Σisa yewweḍ-ed, yebγa a kem-iẓer.
29 Mi tesla s lexbaṛ-agi, tekker Meryem tuzzel γer Sidna Σisa.
30 Yuγ lḥal
urεad i d-yekcim γer taddart, mazal-it deg umkan-nni anda akken i t-temmuger
Marṭa.
31 Wid yellan țṣebbiṛen deg-s deg wexxam, mi ț-walan tekker teffeγ s tazzla,
ḍefṛen-ț, nwan γer uẓekka i tṛuḥ iwakken aț-țețru
γef gma-s.
32 Mi tewweḍ Meryem γer wemkan anda yella Sidna Σisa, akken kan i t-twala,
teγli γer iḍaṛṛen-is tenna :
A Sidi, lemmer dagi i telliḍ tili gma ur yemmut ara.
33 Mi ț-iwala tețru nețțat d wid yellan yid-es, Sidna Σisa ijreḥ wul-is,
tergagi tasa-s.
34 Yenna-yasen :
Anda i t-tmeḍlem ?
Nutni rran-as :
Eyya-d aț-țwaliḍ a Sidi.
35 Dγa Sidna Σisa yețru.
36 Mi t-walan yețru, nnan :
Walit acḥal i t-iḥemmel !
37 Ma d kra deg-sen qqaṛen :
Nețța i d-yerran iẓri i uderγal, ur yezmir ara ad issemneε Laεẓar si lmut !
Ḥeggu n Laεẓar
38 Sidna Σisa tejreḥ tasa-s tikkelt tis snat. Mi wwḍen γer
uẓekka yellan d
lγaṛ imedlen s yiwen wezṛu d ameqqran,
39 Sidna Σisa yenna :
Kkset azṛu-yagi !
Marṭa weltma-s n lmegget-nni tenna :
A Sidi, ṛebεa wussan aya segmi yețwamḍel, ad yili yebda yețriḥ !
40 Sidna
Σisa yerra-yas :
Ur am-d-nniγ ara ma tumneḍ aț-țwaliḍ tamanegt n ṛebbi ?
41 Kksen azṛu-nni, dγa Sidna Σisa yerfed allen-is γer igenni yenna :
Tanemmirt-ik a Baba ṛebbi axaṭer tqebleḍ taẓallit-iw.
42 Nekkini ẓriγ
tqebbleḍ-iyi daymen, lameεna nniγ-ed akka γef ddemma n wid i yi-d-yezzin dagi
iwakken ad amnen belli d kečč i yi-d-iceggεen.
43 Imiren kan iεeggeḍ s lǧehd
yenna :
A Laεẓar, effeγ-ed syenna !
44 Ataya lmegget-nni yeffeγ-ed seg uẓekka,
idaṛṛen-is d ifassen-is țțlen, udem-is iγumm s lekfen. Sidna Σisa yenna i
wid yellan dinna :
Kkset-as lekfen, teǧǧem-t ad iṛuḥ !
Wid yebγan ad nγen agellid n tudert
45 Aṭas seg widak-nni i d-yeddan d Meryem umnen s Sidna Σisa mi walan ayen
yexdem.
46 Kra deg-sen ṛuḥen γer ifariziyen ṣṣawḍen-asen lexbaṛ.
47 Lmuqedmin imeqqranen d ifariziyen nnejmaεen deg wexxam n ccṛeε, nnan :
D acu ara nexdem ? Argaz-agi yexdem aṭas n lbeṛhanat,
48 ma neǧǧa-t ad
ikemmel akka, lγaci akk ad amnen yis ; a d-asen iṛumaniyen a γ-hudden
lǧameε-nneγ ț-țmurt-nneγ.
49 Kayef yellan aseggas-nni d lmuqeddem ameqqran fell-asen,
50 yenṭeq
yenna-yasen :
Ur teẓrim ara belli ad yemmet axiṛ yiwen γef lumma wala ad yenger wegdud-nneγ
?
51 Ayagi mačči s γur-es i d-yekka meεna imi i gella d lmuqeddem ameqqran
aseggas-nni. Daymi i s-d-iweḥḥa Sidi ṛebbi belli ilaq ad immet Sidna Σisa
γef
wegdud.
52 Mačči kan γef wegdud-is ara yemmet meεna akken ad isdukkel arraw n
ṛebbi i gemzerwaεen di ddunit meṛṛa, a ten-yejmeε d yiwen wegdud.
53 Ass-nni dγa i εewwlen ( qesden ) lmuqedmin imeqqranen ad nγen Sidna Σisa.
54 Seg wass-nni, Sidna Σisa yejbed iman-is
γef lγaci. Iṛuḥ Syenna γer taddart n
Ifṛahim i d-yezgan ț-țama unezṛuf, yesεedda dinna kra n wussan nețța d
inelmaden is.
55 Akken i d-iqeṛṛeb lεid n Tfaska, aṭas n lγaci i d-ițasen si
mkul tamurt γer temdint n Lquds akken ad ssizedegen iman-nsen.
56 Lγaci-nni țqelliben γef Sidna Σisa, țmesteqsayen deg ufrag n lǧameε,
qqaṛen :
D acu i twalam ? A d-yas ad iεeggeḍ ?
57 Yuγ lḥal lmuqedmin imeqqranen d ifariziyen nebhen-d nnan : Win yeẓran anda
yella Σisa-nni, ilaq a d-yessiweḍ lexbaṛ i yiεessasen akken a t-ṭṭfen.
Ixef 12
Sidna Σisa deg wexxam n Laεẓar
1 Sețța wussan uqbel lεid n Tfaska, Sidna Σisa iṛuḥ
γer Bitani, taddart n
Laεẓar win akken i d-yesseḥya si lmut.
2 At wexxam n Laεẓar heggan-as imensi.
Marṭa tqeddec, Laεẓar yeqqim γer imensi akk-d Sidna Σisa.
3 Meryem teddem-ed
azgen n litra n leεṭeṛ yeṣfan γlayen nezzeh, tesmar-it γef yiḍaṛṛen n
Sidna Σisa, tesfeḍ-iten s ucebbub-is ; axxam meṛṛa yeččuṛ d rriḥa n
leεṭeṛ-nni.
4 Yudas n Qeṛyut, yiwen seg inelmaden-is, win akken ara t-ixedεen inṭeq-ed
yenna :
5 Acuγeṛ ur nezzenz ara leεṭeṛ agi ? Lemmer nezzenz-it tili yewwi-d azal n
telt meyya twiztin n lfeṭṭa ara nefṛeq i igellilen.
6 Mi d-yenna annect-agi mačči d igellilen i t-iγaḍen meεna yebγa ad yawi
idrimen-nni, axaṭer d amakar i gella. D nețța i d amdebbeṛ
γef
yidrimen-nsen, yețțaker-iten.
7 Dγa Sidna Σisa yenna-yas :
Anfet-as ! Leεṭeṛ-agi thegga-t i wass n temḍelt-iw.
8 Igellilen a ten-tesεum
daymen gar-awen ! Ma d nekk, ur iyi-tseεεum ara daymen yid-wen.
9 Yuγ lḥal lγaci slan belli Sidna Σisa di taddart n Bitanya i gella. Dγa
ț-țirebbaε i d-iṛuḥen γur-es, mačči kan iwakken a t-ẓren nețța, meεna
bγan ad ẓren Laεẓar i d yesseḥya si lmut.
10 Γef wannect-a, lmuqedmin
imeqqranen qesden ad nγen ula d Laεẓar.
11 Axaṭer γef ddemma-ines aṭas n
lγaci i sen iwexxṛen uγalen umnen s Sidna Σisa.
Sidna Σisa yekcem
γer temdint n Lquds
12 Azekka-nni, aṭas n lγaci i d yusan ad εeggden di temdint n Lquds. Slan belli
Sidna Σisa iteddu-d γer temdint.
13 Kksen-d tiseḍwa ( ticiṭwin ) n tezdayt, ṛuḥen a t-mmagren, țeddun
țεeggiḍen : Husana ! Yețțubarek win i d-yusan s yisem n Sidi ṛebbi !
Yețțubarek ugellid n wat Isṛail !
14 Sidna Σisa yufa yiwen weγyul d amecṭuḥ, yerkeb fell-as akken yura di tira
iqedsen :
15 Ur țțaggad a tamdint n Siyun, atan ugellid-im yusa-d, irkeb-ed
γef weγyul amecṭuḥ.
16 Imiren inelmaden is ur fhimen ara ayen ideṛṛun,
lameεna asmi i gekcem Sidna Σisa di tamanegt-is, mmektan-d belli ayen akk yuran
fell-as yedṛa yerna yețwakemmel.
17 Wid akk i gḥedṛen akk-d Sidna Σisa asmi i gessawel i Laεẓar a d-iffeγ seg
uẓekka mi i t-id-yesseḥya si lmut, cehden-d γef wayen ẓran ;
18 γef
wannect-agi aṭas n lγaci i d-yusan γur-es imi slan s lbeṛhan i gexdem.
19 Imi
walan akkenni, ifariziyen nnan wway gar-asen :
Twalam tura : ur nezmir i wacemma, lγaci akk ttabaεen-t !
Kra iyunaniyen țnadin
γef Sidna Σisa
20 Ger widak-nni i d-yusan ad εeggden di temdint n Lquds, llan kra n iyunaniyen.
21 Iyunaniyen-agi ṛuḥen γer Filibus ajlili n taddart n Bitsayda, nnan-as :
Nebγa a nẓer Sidna Σisa !
22 Filibus ixebbeṛ Andriyus, dγa ddukklen i sin a s-inin i Sidna Σisa.
23 Nețța yerra-yasen-d :
Yewweḍ-ed lweqt i Mmi-s n bunadem ad ikcem di tmanegt-is.
24 S tideț,
nniγ-awen : aεeqqa n yired yeγlin deg wakal m'ur yemmut ara ad iqqim weḥd-es,
lameεna ma yemmut ad yefti, a d-yefk aṭas n iεeqqayen.
25 Win yețḥadaren γef tudert-is ad as-tṛuḥ, ma d win ur nețḥebbiṛ ara
fell-as di ddunit-agi a ț-yaf i tudert n dayem.
26 Win yebγan ad iqdec fell-i,
a yi-d-yetbeε. Anda bγuγ iliγ, aqeddac-iw ad yili yid-i. Win iqeddcen fell-i,
ṛebbi a t-iεuzz.
27 Atan tura ul-iw yetḥeyyeṛ ; d acu ara d-iniγ ? A Baba sellek-iyi si
teswiεt-agi ? Nekk ẓriγ γef teswiεt agi i d-usiγ iwakken a ț-qableγ !
28 A
Baba, sbeggen-ed tamanegt-ik !
Dγa tenṭeq-ed yiwet n taγect seg igenni, tenna-d :
Sbeggneγ-d yakan tamanegt-iw yerna mazal a ț-id-sbeggneγ.
29 Wid yuγ lḥal dinna slan i ṣṣut nni, γilen d ṛεud. Wiyaḍ qqaṛen d
lmalayekkat i s-d yemmeslayen.
30 Sidna Σisa yenna-yasen :
Mačči γur-i i d-tenṭeq taγect agi, tenṭeq-ed γur-wen.
31 Tura ara yedṛu
lḥisab n ddunit. Tura ara yețwaqceε umesbaṭli n ddunit-a.
32 Ma d nekk m'ara
țwarefdeγ sennig lqaεa, a d-awiγ imdanen meṛṛa
γur-i.
33 S imeslayen-agi, Sidna Σisa yebγa a d-isbeggen amek ara yemmet.
34 Lγaci
nnan-as :
Ccariεa tenna-d belli Lmasiḥ ad yidir i dayem.
Amek i d-tenniḍ « Mmi-s n bunadem ilaq ad yețwarfed sennig lqaεa » ? Ini-yaγ-d
ihi anwa i d Mmi-s n bunadem ?
35 Sidna Σisa yenna-yasen :
Tafat mazal-iț gar-awen i kra n lweqt kan, lḥut skud tella uqbel a
kkun-iṭṭef ṭṭlam, axaṭer win ileḥḥun di ṭṭlam ur yeẓri ara anda
iteddu.
36 Skud tesεam tafat, amnet yis akken aț-țuγalem d arraw n tafat.
Mi d-yenna imeslayen-agi, Sidna Σisa iḍeṛṛef iman-is anda ulac lγaci.
At Isṛail ugin ad amnen
37 Γas akken aṭas n lbeṛhanat i gexdem Sidna Σisa zdat-sen, nutni ugin ad
amnen.
38 S wakka i gețwakemmel wayen i d-yenna nnbi Iceεya : A ṛebbi, anwa i gumnen s wayen i d-nbecceṛ, iwumi i d-tețwabeggen tezmert-ik ?
39 Acuγeṛ ugin ad amnen ? D nnbi Iceεya i d-yennan daγen :
40 ṛebbi yesderγel-iten , yesγeṛ ulawen-nsen, daymi allen-nsen ur țwalint ara, lefhama-nsen teqfel , ugin a d-uγalen
γer webrid, a kken a ten-sseḥluγ.
41 Nnbi Iceεya yenna-d ayagi γef Sidna Σisa mi gwala tamanegt-is.
42 Ula seg imeqqranen n wat Isṛail aṭas i gumnen yis ; lameεna
γef ddemma n
ifariziyen, ur bγin ara a d-sbeggnen liman-nsen, axaṭer uggaden a
ten-sṭixxṛen si lǧameε.
43 ḥemmlen ad sεun ccan γer yemdanen wala γer ṛebbi.
Asiwel γer liman
44 Sidna Σisa yessaεli taγect-is yenna : Win yesεan laman deg-i mačči yis-i kan i gumen, meεna yumen ula s win i
yi-d-iceggεen.
45 Win i yi iwalan, iwala win i yi-d-iceggεen.
46 Nekk usiγ-ed ț-țafat γer ddunit, kra n win yumnen yis-i, ur yețγimi ara di
ṭṭlam.
47 Win yeslan i wawal-iw ur nexdim ara ayen i d-nniγ mačči d nekk ara
t-iḥasben, axaṭer ur d-usiγ ara akken ad ḥasbeγ ddunit, meεna usiγ-ed a
ț-sellkeγ.
48 Kra n win i yi-ḥeqṛen ur neḥsib ara imeslayen-iw, ițțuḥaseb yakan : d
awal-agi i d-nniγ ara t-iḥasben ass aneggaru.
49 Imeslayen-agi mačči s γur-i i d-kkan : Baba i yi-d-iceggεen, d nețța i
yi-d-yefkan ayen i glaqen a t-id-iniγ d wayen ara slemdeγ.
50 Daymi nniγ-awen : aselmed γef i yi-d-iweṣṣa Baba ț-țudert n dayem. Nekk
sselmadeγ kan ayen i yi-d-yenna Baba.
Ixef 13
Sidna Σisa yessared iḍaṛṛen n inelmaden-is
1 Uqbel lεid n Tfaska n Izimer n leslak, Sidna Σisa yeẓra belli tewweḍ-ed
teswiεt i deg ara yeffeγ si ddunit, akken ad iṛuḥ γer Baba-s.
Γef wannect-agi, isbeggen-ed leḥmala-ines i inelmaden-is yellan di ddunit,
yerna yeǧǧa-yasen-d lmeεna ț-țameqqrant.
2 Llan tețțen imensi n Tfaska, Cciṭan yekcem yakan deg wul n Yudas, mmi-s n
Semεun n Qeṛyut, iwelleh-it ad ixdeε Sidna Σisa, a t-yezzenz.
3 Sidna Σisa yeẓra belli Baba ṛebbi yerra kullec ger ifassen-is, yeẓra s
γur
ṛebbi i d-yusa, γur-es ara yuγal.
4 Yekker γef yimensi, yekkes abeṛnus-is, yeddem-ed yiwen ubeḥnuq (ucettiḍ)
yebges yis.
5 Syenna, yesmar-ed aman γer yiwet n tbaqit, yebda yessirid
iḍaṛṛen n inelmaden-is, yesfeḍ-iten s ubeḥnuq-nni i gcudd
γef wammas-is.
6
Mi gewweḍ γer Semεun Buṭrus yenna-yas-d :
A Sidi d kečč ara yi-ssirden iḍaṛṛen ?
7 Sidna Σisa yerra-yas :
Ayen xedmeγ akka ur t-tfehhmeḍ ara tura, γer zdat ara t-tfehmeḍ.
8 Buṭrus yenna-yas :
Ala ! D lmuḥal a yi-tessirdeḍ iḍaṛṛen-iw !
Sidna Σisa yenna-yas :
M'ur k-ssardeγ ara iḍaṛṛen-ik ur d-yeqqim wacemma i γ-icerken.
9 Semεun Buṭrus yenna-yas :
Ihi ur iyi-issirid ara iḍaṛṛen kan, ssired-iyi ula d ifassen d uqeṛṛuy-iw.
10 Sidna Σisa yenna-yas :
Win yessarden yakan d azedgan, anagar idaṛṛen-is i geḥwaǧ a ten yessired
axaṭer zeddig meṛṛa. Kunwi aql-ikkun zeddigit lameεna mačči akken ma tellam
dagi.
11 Sidna Σisa yeẓra yakan win akken ara t-ixedεen, daymi i genna i inelmaden-is
: « kunwi ur zeddigit ara irkul. »
12 Mi sen-issared iḍaṛṛen-nsen, yerra abeṛnus-is, yuγal
γer wemkan is
yenna-yasen :
Tfehmem wayen akka i wen xedmeγ neγ ala ?
13 Tessawalem-iyi « a Sidi » ; tesεam lḥeqq axaṭer ț-țideț !
14 Ma yella
nekk yellan d Ssid-nwen ssardeγ-awen iḍaṛṛen-nwen, ilaq awen
at-țemsiridem iḍaṛṛen wway gar-awen.
15 Fkiγ-awen-d lemtel iwakken ula
d kunwi aț-țxedmem akken i wen-xedmeγ.
16 S tideț nniγ awen : aqeddac ur
yugar ara Ssid-is, amceggeε ur yugar ara win i t-id iceggεen.
17 Amarezg-nwen ma
tessnem ayagi, awi-d kan a t-txedmem.
18 Mačči fell-awen meṛṛa i d-nniγ ayagi : ssneγ widak i xtaṛeγ. Lameεna
ayen yuran ad yețwakemmel : « Win yeččan aγṛum yid-i, yuγal-iyi-d d
aεdaw.»
19 Nniγ-awen-t-id si tura uqbel a d-yaweḍ, iwakken asm'ara d-yedṛu
aț-țamnem belli nekk «d Win yellan.»
20 A wen-iniγ tideț : win iqeblen win
ara d-ceggεeγ d nekk i geqbel, win ara yi-qeblen yeqbel win i yi-d-iceggεen.
21 Segmi i d-yenna annect-agi, Sidna Σisa yetḥeyyeṛ, dγa yenna εinani :
A wen-d-iniγ s tideț, yiwen deg-wen ad iyi-ixdeε.
22 Inelmaden-is tḥeyyṛen, qqimen țemyex?aṛen wway gar-asen. Kull yiwen
yeqqaṛ deg wul-is : Γef anwa i d-yenna imeslayen-agi ?
23 Yiwen deg-sen, anelmad-nni i gḥemmel Sidna Σisa, yeqqim γer lmakla
γer
tama-s.
24 Semεun Buṭrus iwehha-yas akken a t-yesteqsi
γef wanwa i d-ițmeslay.
25 Anelmad-nni yekna γer Sidna Σisa, yenna-yas :
A Sidi, γef wanwa deg-nneγ i d-tmeslayeḍ ?
26 Sidna Σisa yerra-yas :
Ad ssisneγ ( seyyiγ ) talqimt n weγṛum di teṛbut-agi, win iwumi ara ț-fkeγ, d
winna ara yi-ixedεen.
Sidna Σisa yessasen talqimt n weγṛum, dγa yefka-ț i
Yudas mmi-s n Semεun n Qeṛyut.
27 Akken kan i geṭṭef Yudas talqimt-nni,
Cciṭan yekcem ul-is. Sidna Σisa yenna-yas :
Ayen ara txedmeḍ γiwel xdem-it !
28 Ger wid yellan yid-es, yiwen ur yefhim acuγeṛ i s-yenna ayagi.
29 Imi d
Yudas i gțsewwiqen fell-asen, kra seg inelmaden nwan iwekkel-it akken a d-iqḍu
i lεid neγ ad iseddeq i igellilen.
30 Akken kan i geṭṭef talqimt-nni, Yudas yeffeγ seg wexxam ; yuγ lḥal yeγli-d
yiḍ.
Aselmed amaynut
31 Mi geffeγ Yudas, Sidna Σisa yenna :
Tura ara d-tban tmanegt n Mmi-s n bunadem, yis ara yețwaεuzz ṛebbi.
32 Imi yis
ara yețwaεuzz, ṛebbi daγen ad iεuzz Mmi-s n bunadem yerna qṛib a d-yedṛu.
33
Ay arrac εzizen, aql-i mazal-iyi gar-awen meεna ur țεeṭṭileγ ara. Aț-țnadim
fell-i, atan ayen i nniγ i lγaci tura a wen-t-id-iniγ daγen i kunwi : «Ur
tezmirem ara aț țeddum γer wanda ara ṛuḥeγ » !
34 A wen-d-fkeγ yiwen n lameṛ d ajdid : « myeḥmalet wway gar awen. Akken i
kkun-ḥemmleγ, myeḥmalet wway gar-awen.»
35 Ma temyeḥmalem wway gar awen, lγaci meṛṛa a kkun-εeqlen belli d
inelmaden-iw i tellam.
36 Semεun Buṭrus yesteqsa-t yenna-yas :
A Sidi, γer wanda ara tṛuḥeḍ ?
Sidna Σisa yenna-yas :
Anda ara ṛuḥeγ ur tezmireḍ ara aț-țedduḍ tura, lameεna
γer zdat a
yi-d-tebεeḍ.
37 Buṭrus yenna-yas :
A Sidi, acuγeṛ ur zmireγ ara ad dduγ tura ? Aql-iyi wejdeγ ad sebbleγ iman-iw
fell-ak.
38 Sidna Σisa yerra-yas :
Tqebleḍ aț-țsebbleḍ iman-ik fell-i ? Tideț a k-iniγ : uqbel ad iskkuε
uyaziḍ a yi-tnekkṛeḍ tlata iberdan.
Ixef 14
Abrid, tideț akk-d tudert
1 Kkset anezgum seg ulawen nwen. Amnet s ṛebbi, amnet daγen yis-i.
2 Deg
wexxam n Baba aṭas n tmezduγin i gellan, ad ṛuḥeγ a wen-heggiγ amkan ; lemmer
ulac, tili nniγ-awen-t-id.
3 M'ara wen-heggiγ amkan, a d uγaleγ a kkun-awiγ yid-i akken anda lliγ
aț-țilim ula d kunwi.
4 Tessnem abrid yețțawin γer wanda i țedduγ.
5 Ṭuma yenna-yas :
A Sidi, ur neẓri ara γer wanda ara tṛuḥeḍ, amek i tebγiḍ a nissin abrid ?
6 Sidna Σisa yenna-yas :
D nekk i d abrid axaṭer d nekk i ț-țideț, d nekk i ț-țudert. Yiwen ur
yezmir ad iṛuḥ γer Baba m'ur yekki ara seg-i.
7 Ma tessnem-iyi, aț-țissinem
ula d Baba. Atan tura tessnem-t yakan yerna teẓram-t.
8 Filibus inṭeq-ed, yenna-yas :
A Sidi, sken-aγ-ed kan Baba ṛebbi beṛka-yaγ.
9 Sidna Σisa yenna-yas :
Amek, ayen akk i sεeddaγ yid-wen mazal ur iyi-tessineḍ ara a Filibus ! Win i
yi-iwalan iwala Baba. Amek armi teqqaṛeḍ : «Sken-aγ-ed kan Baba ṛebbi »
10 Mazal ur tumineḍ ara belli nekk lliγ di Baba, Baba yella deg-i ? Ayen i wen-d
qqaṛeγ ur d-yekki ara s γur-i : Baba yella deg-i, d nețța i gxeddmen
lecγal-agi-ines.
11 Amnet-iyi, nekk lliγ di Baba, Baba yella deg-i ; neγ m'ulac,
amnet xeṛsum γef ddemma n lecγal i twalam xedmeγ-ten.
12 A wen-iniγ tideț : win yumnen yis-i, ad ixdem ula d nețța lecγal i xedmeγ,
yerna ad ixdem akteṛ axaṭer ad ṛuḥeγ γer Baba.
13 Ayen akk ara tessutrem s yisem-iw a t-xedmeγ iwakken tamanegt n Baba ṛebbi a
d-tban s Mmi-s.
14 A wen-t-id εiwdeγ : ma tessutrem kra s yisem-iw a t-xedmeγ.
Lweεd yeεnan ṛṛuḥ iqedsen
15 Ma tḥemmlem-iyi, ḥerzet lewṣayat-iw.
16 Nekk ad ssutreγ i Baba a
wen-d-yefk Amεiwen nniḍen ara yilin yid-wen i dayem :
17 d ṛṛuḥ n tideț,
win akken ur tezmir ddunit a t-teqbel axaṭer ur t-twala ur t-tessin. Kunwi
tessnem-t axaṭer yella yid-wen yerna ad yili deg-wen.
18 Ur kkun-țțaǧǧaγ ara d igujilen, a d-uγaleγ
γur-wen.
19 Drus i yi-d iqqimen di ddunit ; ddunit ur tețεawad ara a yi-tẓer, ma d kunwi a yi-twalim
axaṭer ddreγ yerna ula d kunwi aț-țidirem.
20 Ass-nni aț-țfehmem belli nekk lliγ di Baba, aț-țeẓrem daγen belli kunwi
tellam deg-i nekk lliγ deg-wen.
21 Win i yi-ḥemmlen s tideț, d win i geṭṭfen lewṣayat-iw yerna
iḥrez-itent. Win i yi-ḥemmlen a t-iḥemmel Baba, nekk daγen a t-ḥemmleγ yerna
a d-sbeggneγ iman-iw γur-es.
22 Yuda (mačči Yudas n Qeṛyut), yenna-yas :
A Sidi, acuγeṛ i nukkni kan i tebγiḍ a d-sbeggneḍ iman-ik, mačči i ddunit
meṛṛa ?
23 Sidna Σisa yerra-yas :
Win i yi-ḥemmlen ad ixdem ayen i d-nniγ, ula d Baba a t iḥemmel ! A d-nas i
sin γur-es, a nezdeγ γur-es.
24 Ma d win ur iyi-nḥemmel ara ur ixeddem ara ayen i d-nniγ. Awal-agi i teslam
mačči s γur-i i d-yekka meεna d awal n Baba i yi-d-iceggεen.
25 Qqaṛeγ-awen-d akk annect-agi skud mazal-iyi yid-wen.
26 Lameεna Amεiwen, ṛṛuḥ iqedsen ara d-iceggeε Baba s yisem-iw, a
wen-isselmed kullec yerna a wen-d-ismekti ayen akk i wen-d-nniγ.
27 Ad ṛuḥeγ meεna a wen-d ǧǧeγ lehna, d lehna-w ara wen-d fkeγ. Lehna ara
wen-d-fkeγ mačči am lehna i d-tețțak ddunit. Daymi i wen-d-qqaṛeγ ur
țțaggadet ara, kkset anezgum seg wulawen-nwen.
28 Teslam-d mi wen-d-nniγ ad ṛuḥeγ meεna a d-uγaleγ
γur-wen. Lemmer
tḥemmlem-iyi, tili tfeṛḥem imi teẓram γer Baba ara ṛuḥeγ, axaṭer Baba
yugar-iyi.
29 Xebbṛeγ-kkun-id γef wannect-agi tura uqbel ad yedṛu iwakken m'ara d-yedṛu
aț-țamnem.
30 Sya d asawen, ur seεεuγ ara lweqt ad meslayeγ yid-wen imi Amesbaṭli n
ddunit-agi atan iteddu-d. Ur yeḥkim ara deg-i,
31 meεna ilaq imdanen n ddunit-a
ad εeqlen belli ḥemmleγ Baba yerna xeddmeγ akken i yi-d-yumeṛ. Ayaw kkret a
nṛuḥet syagi.
Ixef 15
Tafeṛṛant
1 D nekk i ț-țara n tideț, yerna d Baba i ț-ixeddmen.
2 Yal isegmi yeṭṭfen deg-i ur d-nețțak ara lfakya, igezzem-it, ma d isegman
i d-ițakken lfakya, iferres iten akken a d-efken lfakya s waṭas.
3 Akka ula d
kunwi i teṣfam s uselmed i wen-d-fkiγ.
4 Ilit deg-i, nekk ad iliγ deg-wen. Isegmi ur yezmir ara a d-yefk lfakya
weḥd-es m'ur yeṭṭif ara γer tara. Akken daγen kunwi, m'ur teṭṭifem ara
deg-i ur tețțizmirem ara a d-tefkem lfakya.
5 Nekk ț-țara, kunwi d isegman-is. Win yellan deg-i nekk lliγ deg-s, a d-yefk
lfakya s waṭas, axaṭer mbla nekk ur tețțizmirem aț-țxedmem acemma.
6 Win ur neṭṭif ara deg-i ad yețwaḍeggeṛ
γer beṛṛa n tfeṛṛant am isegmi
yețwagezmen. M'ara qqaṛen isegman, ad țwajemεen iwakken a sen-ceεlen times ad
ṛγen.
7 Ma teṭṭfem deg-i yerna awal-iw yezdeγ deg-wen, ssutret ayen i tebγam a
kkun-id-yaweḍ.
8 Ma tețțakem-d lfakya s tugeț tesbegginem-d belli ț-țideț d inelmaden-iw
i tellam ; akka ara d-tban tmanegt n Baba i yemdanen.
9 Akken i yi-iḥemmel Baba
i kkun ḥemmleγ ula d nekk ; dumet di tayri-inu.
10 Ma tḥerzem lumuṛat-iw aț țdumem di tayri-w, akken ḥerzeγ lumuṛ n Baba
yerna dumeγ di tayri-s.
11 Nniγ-awen-d akk ayagi iwakken lfeṛḥ-iw a kkun-yeččaṛ ula d kunwi, dγa
lfeṛḥ-nwen ad yennekmal.
12 Atan ihi lameṛ ara wen-d-fkeγ : « Myeḥmalet wway gar-awen akken i
kkun-ḥemmleγ nekkini.»
13 Ulac tayri yugaren tin n win ara isebblen tudert-is
γef yeḥbiben-is.
14 Aql-ikkun d iḥbiben-iw ma txeddmem ayen i wen d-umṛeγ.
15 Sya γer zdat ur
kkun-ḥețțbeγ ara d iqeddacen, axaṭer aqeddac ur yeẓri ara d acu i gxeddem
Bab-is. Tura aql-ikkun d iḥbiben-iw axaṭer slemdeγ-awen ayen akk i d-lemdeγ
γer Baba.
16 Mačči d kunwi i yi-ixtaṛen meεna d nekk i kkun ixtaṛen ; ceggεeγ-kkun
iwakken a d-tefkem lfakya, lfakya ara idumen. S wakka, Baba ṛebbi a wen-yeqbel
kra n wayen ara s-tessutrem s yisem-iw.
17 Atan ihi lameṛ ara wen-d-fkeγ : «
Myeḥmalet wway gar-awen».
Wid i tekṛeh ddunit
18 Ma yella tekṛeh-ikkun ddunit ilaq aț-țeẓrem belli tekṛeh-iyi uqbel-nwen.
19 Lemmer n ddunit i tellam tili tḥemmel-ikkun imi d ayla-s. Lameεna kunwi
mačči n ddunit, axaṭer d nekk i kkun-id yextaṛen si tlemmast n ddunit, daymi
i kkun-tekṛeh.
20 Mmektit-ed ayen i wen-d nniγ : aqeddac werǧin yugar Bab-is. Ma qehṛen-iyi a
kkun-qehṛen ula d kunwi ; ma ḥerzen imeslayen-iw ad ḥerzen imeslayen-nwen.
21 Γef ddemma-w ara xedmen akka, axaṭer ur ssinen ara win i yi-d-iceggεen.
22 Lemmer ur d-usiγ ara, lemmer ur sen-d-mmeslayeγ ara tili ulac ddnub fell-asen
lameεna tura ddnub i yirawen-nsen.
23 Win i yi-keṛhen yekṛeh daγen Baba.
24 Lemmer ur xdimeγ ara gar-asen ayen weṛǧin yexdem yiwen, tili ulac ddnub
fell-asen. Meεna tura, γas akken ẓran kullec, țkemmilen keṛhen-iyi am nekk am
Baba.
25 Axaṭer ilaq ad yețwakemmel wayen yuran di ccariεa : Keṛhen-iyi mbla
sebba.
26 M'ara d-yas umεiwen, win akken ara wen-d-ceggεeγ s γur Baba ṛebbi, ṛṛuḥ
n tideț ara d-yasen s γur-es, nețța s yiman-is ara d-icehden fell-i.
27
Kunwi daγen aț-țuγalem d inigan-iw imi tellam yid-i si tazwara.
Ixef 16
1 Nniγ-awen-d akk annect-agi iwakken ur tγellim ara.
2 Axaṭer, a kkun-stixṛen
si lǧwameε, yerna a d-yas lweqt anda wid ara kkun-inγen ad γilen d asfel i fkan
i ṛebbi.
3 Ad ssiwḍen γer wannect-agi imi ur iyi-ssinen nekk, ur ssinen Baba.
4 Nniγ-awen-d akk ayagi tura iwakken asm'ara ssiwḍen
γer wannect-agi, a d-mektim
belli nniγ-awen-t-id uqbel a d-yedṛu. Ur a wen-t-id-nniγ ara si tazwara axaṭer
mazal-iyi lliγ yid-wen.
Lecγal n ṛṛuḥ iqedsen
5 Tura ad ṛuḥeγ γer win i yi-d iceggεen ; atan yiwen deg-wen ur iyi-d-isteqsa
γer wanda ara ṛuḥeγ.
6 Imi i wen-d-nniγ akka, leḥzen yeččuṛ ulawen-nwen.
7
A wen-iniγ tideț, yelha-yawen ma ṛuḥeγ axaṭer m'ur ṛuḥeγ ara, amεiwen ur
d-yețțas ara γur-wen, meεna ma ṛuḥeγ a wen t-id-ceggεeγ.
8 M'ara d-yas, a d-isbeggen i yemdanen belli γelṭen γef wayen yeεnan ddnub,
lḥeqq, d lḥisab n ṛebbi.
9 ?elṭen γef wayen yeεnan ddnub, imi ugin ad amnen
yis-i ;
10 γef wayen yellan d lḥeqq imi tedduγ
γer Baba yerna ur tețțuγalem
ara a yi-twalim ;
11 γelṭen γef wayen yeεnan lḥisab n ṛebbi, imi amesbaṭli n
ddunit-agi yețțuḥaseb yakan.
12 Aṭas n lewṣayat i mazal a wen tent-id-iniγ, lameεna di teswiεt-agi ur
sent-tezmirem ara.
13 Asm'ara d-yas ṛṛuḥ n tideț, a kkun-iseddu di tideț akken tella, ayen ara
wen-d-yini mačči s γur-es i d-yekka meεna a d-immeslay γef wayen akk i gesla
yerna a kkun id-ixebbeṛ γef wayen akk ara yedṛun γer zdat.
14 A d-isbeggen tamanegt-iw axaṭer s γur-i ara d-yawi wayen akk ara
wen-d-yini.
15 Ayla n Baba d ayla-w ula d nekk. Daymi i wen-d-nniγ s
γur-i ara
d-yawi wayen akk ara wen-d-yini.
16 Di kra n lweqt ur iyi-tețwalim ara, kra n
lweqt daγen aț-țuγalem a yi-twalim.
Leḥzen ad yuγal d lfeṛḥ
17 Dγa kra seg inelmaden-is țmesteqsayen, qqaṛen :
D acu i gebγa a γ-d-yini mi i d-yeqqaṛ : « Kra n lweqt ur iyi tețwalim ara,
kra n lweqt daγen aț-țuγalem a yi-twalim », neγ mi γ-d yenna : «Ad ṛuḥeγ
γer
Baba»?
18 Nnan daγen :
D acu i d lmeεna n «Kra n tallit kan» i γef i γ-d-yemmeslay ? Ur nefhim ara d
acu i gebγa a d-yini !
19 Sidna Σisa yefhem belli bγan a t-steqsin, dγa yenna-yasen :
Tețmesteqsayem γef wayen i bγiγ a d-iniγ s imeslayen-agi : « Tallit kan i mazal
ur yi-tețwalim ara, tallit daγen a yi-twalim » ;
20 nniγ-awen s tideț : kunwi aț-țețrum, aț-țmeǧdem, ma d imdanen n
ddunit-a ad feṛḥen aṭas. Kunwi aț-țeṛwum lqeṛḥ meεna lqeṛḥ-nwen ad
yuγal d lfeṛḥ.
21 M'ara d-tarew tmeṭṭut tețțenεețțab aṭas di
teswiεt-nni, lameεna akken kan ara twali llufan-is ilul-ed tețțu lqeṛḥ-is
imi lfeṛḥ-is d ameqqran.
22 Kunwi daγen aql-ikkun tețwaqeṛḥem tura meεna a
d-uγaleγ a kkun-zṛeγ, imiren ulawen-nwen ad ččaṛen d lfeṛḥ ; lfeṛḥ-agi
yiwen ur izmir a wen t-yekkes.
23 M'ara d-yas wass-nni ur tețțuγalem ara a
yi-testeqsim. A wen iniγ s tideț : ayen akk ara tessutrem i Baba s yisem-iw a
wen-t-id-yeqbel.
24 Ar tura ur tessutrem acemma s yisem-iw. Ssutret a wen-d-yețțunefk akken
lfeṛḥ-nwen ad yețwakemmel.
25 Ayen akk i wen-d-nniγ, nniγ awen-t-id s lemtul. A d-yas lweqt ur a
wen-d-țmeslayeγ ara akka, a wend hedṛeγ εinani γef wayen yeεnan Baba.
26 Ass-nni aț-țdeεεum γer Baba s yisem-iw, yerna ur wen-d-qqaṛeγ ara belli ad
dεuγ γer Baba fell-awen.
27 Axaṭer Baba iḥemmel-ikkun imi iyi-tḥemmlem, yerna
tumnem belli s γur-es i d-kkiγ.
28 Ţ-țideț usiγ-ed s γur Baba, usiγ-ed γer ddunit, ma ț-țura ad ǧǧeγ
ddunit ad uγaleγ γer Baba.
29 Inelmaden-is nnan-as :
Atan tura tețmeslayeḍ-aγ-d εinani mačči s lemtul.
30 Tura neẓra belli
tessneḍ kullec imi uqbel a d-nehdeṛ teẓriḍ γef wacu i nebγa a k-nesteqsi.
Γef wayagi i numen belli s γur ṛebbi i d-tusiḍ.
31 Sidna Σisa yerra-yasen :
Tura tumnem !
32 Atan iteddu-d lweqt yerna yewweḍ-ed, aț țemfaṛaqem
γer mkul
tama a yi teǧǧem iman-iw. Lameεna ur lliγ ara weḥd-i axaṭer Baba yella
yid-i.
33 Ilaq-iyi a wen-d-iniγ daγen annect-agi akken aț-țafem deg-i talwit.
Aț-țεeddim si teswiεin n ddiq di ddunit, aț-țneεtabem meεna ṣebṛet ! Nekk
γelbeγ ddunit.
Ixef 17
Sidna Σisa ideεεu
γer ṛebbi
1 Mi d-yenna imeslayen-agi, Sidna Σisa yerfed allen-is γer igenni, yenna : A
Baba, yewweḍ-ed lweqt ! Sbeggen-ed tamanegt n Mmi-k iwakken ula d nețța a
d-isbeggen tamanegt-ik !
2 Tefkiḍ-as tazmert γef yemdanen n ddunit meṛṛa akken ad yefk tudert n dayem
i wid akk i s-d-tefkiḍ.
3 Tudert n dayem : d asm'ara issinen yemdanen belli d kečč i d ṛebbi awḥid,
Illu n tideț, ad issinen daγen Σisa Lmasiḥ, win akken i d-tceggεeḍ.
4 Sbeggneγ-ed tamanegt-ik di ddunit mi kfiγ ccγel-nni i γef iyi-twekkleḍ.
5
Tura a Baba, εuzz-iyi s tmanegt-ik, tin akken i sεiγ asmi lliγ
γur-ek uqbel a
d-texleq ddunit !
Sidna Σisa ideεεu
γer ṛebbi γef yinelmaden-is
6 Sbeggneγ-d isem-ik i yemdanen akk i yi-d-tefkiḍ si ddunit. Llan d ayla-k,
tuγaleḍ tefkiḍ-iyi-ten-id ; nutni ḥerzen awal-ik.
7 Tura ẓran belli ayen akk
i yi-d-tefkiḍ s γur-ek i d-yekka ;
8 axaṭeṛ ṣṣawḍeγ-asen-d awal-ik akken
yella, yerna qeblen-t. Ẓran ț-țideț s
γur-ek i d-kkiγ yerna umnen d kečč i
yi-d-iceggεen.
9 Deεεuγ γur-ek fell-asen. Ur deεεuγ ara γef yemdanen nniḍen lameεna
γef wid i
yi-d-tefkiḍ, axaṭer nutni d ayla-k.
10 Ayen yellan d ayla-w inek, ayen yellan d
ayla-k inu. Tamanegt-iw tețfeǧǧiǧ deg-sen.
11 Qṛib tura ad ffγeγ si ddunit, a n-ṛuḥeγ
γur-ek meεna nutni ad qqimen di
ddunit. A Baba, ay Imqeddes ! Ḥerz-iten s tezmert n yisem-ik, isem-nni i
yi-d-tefkiḍ iwakken ad uγalen d yiwen, akken nella nekk yid-ek d yiwen.
12 Seg wasmi lliγ gar-asen, ḥerzeγ-ten s tezmert n yisem-ik, isem-agi i
yi-d-tefkiḍ. Ḥerzeγ-ten, yiwen deg-sen ur yeεṛiq anagar win i glaqen ad
yeεṛeq, iwakken tira iqedsen ad nnekmalent.
13 Tura a n-uγaleγ γur-ek, qqaṛeγ-ed akk annect-agi skud mazal-iyi di ddunit,
akken ad ččaṛen wulawen-nsen d lfeṛḥ am lfeṛḥ-iw ikemlen.
14 Fkiγ-asen awal-ik meεna at ddunit keṛhen-ten axaṭer am nekk am inelmaden-iw
ur nelli ara n at ddunit.
15 Ur k-d-ssutreγ ara akken a ten tekkseḍ si ddunit, meεna a ten tmenεeḍ si
Cciṭan.
16 Nutni mačči n ddunit, akken ula d nekk ur lliγ ara n ddunit.
17 Ḥerz-iten di tideț ; d awal-ik i ț-țideț.
18 Akken i yi-d-tceggεeḍ γer
ddunit, nekk daγen a ten-ceggεeγ.
19 Γef yisem-ik ad sebbleγ iman-iw fell-asen,
iwakken ula d nutni ad sebblen iman-nsen γef tideț.
Sidna Σisa ideεεu
γef wid akk ara yamnen yis
20 Mačči fell-asen kan i deεεuγ, deεεuγ daγen
γef wid akk ara yamnen yis-i s
cchada n inelmaden-iw.
21 A k-ssutreγ a Baba ad uγalen akk d yiwen. Akken telliḍ deg-i a Baba nekk
daγen lliγ deg-k, ad uγalen d yiwen iwakken at ddunit ad amnen belli d kečč i
yi-d-iceggεen.
22 Fkiγ-asen tamanegt i yi-d-tefkiḍ iwakken ad uγalen d yiwen, akken nella nekk
yid-ek d yiwen :
23 nekk deg-sen, kečč deg-i. Ad uγalen akk d yiwen, iwakken
at ddunit meṛṛa ad setεeṛfen belli d kečč i yi-d-iceggεen, yerna
tḥemmleḍ-ten akken i yi tḥemmleḍ !
24 A Baba bγiγ wid meṛṛa i yi-d tefkiḍ ad ilin yid-i anda ara yiliγ, ad walin
tamanegt i yi-d-tefkiḍ axaṭer tḥemmleḍ-iyi uqbel a d-texleq ddunit.
25 A Baba, Kečč yellan d aḥeqqi at ddunit ur k-ssinen ara ma d nekk ssneγ-k,
wigi ẓran belli d kečč i yi-d-iceggεen.
26 Sbeggneγ-k-id γur-sen yerna mazal a k-id-sbeggneγ, iwakken tayri akk i
yi-d-tefkiḍ aț-țili deg-sen, nekk daγen ad iliγ deg-sen.
Ixef 18
Sidna Σisa yețwaḥbes
1 Mi gfukk taẓallit, Sidna Σisa yekker iṛuḥ nețța d inelmaden is, zegren
iγzer n Sidṛun. Dinna tella yiwet n tmazirt kecmen γur-es.
2 Yudas ara
t-ixedεen yessen mliḥ amkan-nni, axaṭer Sidna Σisa yennum ițṛuḥu
γer dinna
nețța d inelmaden-is.
3 Yudas yewwi-d yid-es tarbaεt n lεeskeṛ akk-d
iεessasen n lǧameε ; ceggεen-ten-id lmuqedmin imeqqranen d ifariziyen, wwḍen-d
γer tmazirt-nni. Wwin-d yid-sen tiftilin, isufa akk-d leslaḥ.
4 Sidna Σisa
yeẓran akk ayen ara yedṛun yid-es, iqeṛṛeb γur-sen yenna yasen :
Γef wanwa i tețnadim ?
5 Nutni rran-as :
Nețnadi γef Σisa anaṣari ! Sidna Σisa yenna-yasen :
D nekkini.
Yudas, win akken ara t-ixedεen yuγ-it lḥal gar-asen.
6 Imi i sen-yenna Sidna Σisa « d nekkini », uγalen akk γer deffir, γlin
γer
lqaεa.
7 Sidna Σisa yesteqsa-ten daγen yenna :
Γef wanwa i tețnadim ?
Nutni rran-as :
Γef Σisa anaṣari !
8 Sidna Σisa yerna yenna-yasen :
Nniγ-awen-d d nekk ! Ma d nekk i γef tețnadim, ǧǧet widak-agi ad ṛuḥen.
9 Akka i gedṛa wawal-nni i d yenna yakan : « Ur sruḥeγ ula d yiwen seg widak i
yi-d-tefkiḍ. »
10 Semεun Buṭrus yejbed-ed ajenwi, yewwet yis aqeddac n
lmuqeddem ameqqran, igzem-as ameẓẓuγ ayeffus. Aqeddac-agi isem-is Maṛxus.
11 Sidna Σisa yenna i Buṭrus :
Err ajenwi-inek γer titar-is (teγlaft-is). Eεni ur ilaq ara ad sweγ taqbuct n
leεtab i yi-d-yefka Baba ?
12 Lεeskeṛ akk-d iεessasen n lǧameε ṭṭfen Sidna Σisa,
13 wwin-t yețwarez
γer wexxam n Ḥanna aḍeggal n Kayef yellan d lmuqeddem ameqqran aseggas-nni.
14 Kayef d win akken i sen-yennan i wat Isṛail : « Axiṛ ad immet yiwen kan
γef
lumma.»
Ankaṛ amezwaru n Semεun Buṭrus
15 Semεun Buṭrus, nețța d yiwen unelmad nniḍen tebεen Sidna Σisa.
Anelmad-agi yessen lmuqeddem ameqqran s yiman-is ; itbeε Sidna Σisa mi t-wwin
γer wefrag n wexxam n lmuqeddem ameqqran,
16 ma d Buṭrus yeqqim di beṛṛa
γer
tama n tewwurt.
Anelmad-nni yessnen lmuqeddem ameqqran yuγal yeffeγ ed, yehdeṛ-as i tεessast n
tewwurt, dγa tessekcem Buṭrus.
17 Taqeddact-nni yețεassan tawwurt, tenna i
Buṭrus :
Ur telliḍ ara ula d kečč seg inelmaden n wergaz-agi ?
Buṭrus yerra-yas :
Xaṭi, ur lliγ ara seg-sen !
18 Iqeddacen akk-d iεessasen ceεlen times di lkanun, zzin-as iwakken ad sseḥmun
axaṭer d asemmiḍ. Buṭrus iqeṛṛeb γur-sen ad yeẓẓiẓen ( ad isseḥmu )
ula d nețța.
Sidna Σisa zdat lmuqeddem ameqqran
19 Lmuqeddem ameqqran yebda yesteqsay Sidna Σisa γef wayen yeεnan inelmaden-is d
uselmed-ines.
20 Sidna Σisa yenna-yas :
Hedṛeγ εinani zdat lγaci, slemdeγ di leǧwameε n wat Isṛail, slemdeγ daγen deg
wefrag n lǧameε iqedsen anda i gețnejmaε lγaci, ur hdiṛeγ ara s tuffra.
21 Iwacu i yi testeqsayeḍ ? Steqsi widak i yi-slan amek i sen-hedṛeγ, nutni ẓran
akk ayen i d-nniγ.
22 Mi d-yenna ayagi, yiwen uεessas yellan zdat-es, yewwet it
s useṛfiq, yenna-yas :
Akka ara d-thedṛeḍ i lmuqeddem ameqqran ?
23 Sidna Σisa yenna-yas :
Ma nniγ-ed ayen ixesṛen, ini yi-d d acu-t ; ma yella ț-țideț i d nniγ,
acuγeṛ i yi-tewteḍ ?
24 Imiren ?anna iceggeε Sidna Σisa yețwarez γer Kayef, lmuqeddem ameqqran.
Ankaṛ wis sin d wis tlata n Semεun Buṭrus
25 Semεun Buṭrus mazal-it yeqqim yeẓẓiẓin deg wemkan-nni, iluεa-t-id yiwen
yenna-yas :
I kečč, ur telliḍ ara d yiwen seg inelmaden n wergaz-agi ?
Buṭrus inkeṛ yenna-yas :
Xaṭi, ur lliγ ara seg-sen !
26 Yiwen seg iqeddacen n lmuqeddem ameqqran, yețțilin i win akken iwumi yegzem
Semεun Buṭrus ameẓẓuγ, iwehha-d γur-es yenna-yas :
Ur k-ẓriγ ara yid-es di tmazirt ?
27 Lameεna Buṭrus yenkeṛ daγen. Imiren kan iskkuε uyaziḍ.
Bilaṭus yeḥkem s lmut
γef Sidna Σisa
28 Mi d-ffγen s γur Kayef, lecyux n wat Isṛail wwin Sidna Σisa
γer lḥakem
Bilaṭus ; yuγ lḥal d lefjer. Wid i t-yewwin ur kcimen ara γer daxel n lbeṛj
(sṛaya) n Bilaṭus, iwakken ad qqimen d izedganen m'ara ččen imensi n lεid n
Tfaska.
29 Daymi i d-iffeγ γur-sen Bilaṭus, yesteqsa-ten yenna :
D acu i gexdem wergaz-agi ?
30 Rran-as :
Lemmer ur yexdim ara ayen n diri, tili ur k-t-id-nețțawi ara.
31 Bilaṭus yenna-yasen :
Atan γur-wen, ḥekmet fell-as s ccariεa-nwen !
Nutni nnan-as :
Nukni ur nezmir ara a neḥkem γef yiwen s lmut !
32 Ayagi, iwakken ad yedṛu wayen i d-yenna Sidna Σisa γef lmut i t-yețṛaǧun.
33 Bilaṭus yekcem γer wexxam n ccṛeε akken ad icaṛeε Sidna Σisa ; yesteqsa-t,
yenna-yas :
D kečč i d agellid n wat Isṛail ?
34 Sidna Σisa yerra-yas :
Yella win i k-t-id-yennan neγ d kečč i t-id-yennan s yiman-ik ?
35 Bilaṭus yerra-yas :
Tḥesbeḍ-iyi n wat Isṛail nekkini ? D lmuqedmin imeqqranen d wat n tmurt-ik i
k-id-yewwin γur-i ! D acu i txedmeḍ ?
36 Sidna Σisa yerra-yas :
Tagelda-w mačči n ddunit-agi. Lemmer tagelda-w n ddunit-agi tili iqeddacen-iw
nnuγen akken ur d-γelliγ ara ger ifassen n imeqqranen n wat Isṛail. S tideț
tagelda-w mačči n dagi.
37 Bilaṭus yenna-yas :
Ihi d agellid i telliḍ ?
Sidna Σisa yerra-yas :
Tenniḍ-t-id s yiman-ik, d agellid i lliγ ! Luleγ-d yerna usiγ-ed
γer ddunit-agi
akken a d-cehdeγ γef tideț. Win iḥemmlen tideț, yesmeḥsis i wayen i
d-qqaṛeγ.
38 Bilaṭus yenna-yas :
D acu i ț-țideț ?
Mi s-d-yenna ayagi, Bilaṭus yuγal γer wat Isṛail yenna-yasen :
Nekk, ur ufiγ ara sebba s wayes ara ḥekmeγ γef wergaz-agi.
39 Meεna akken i
tella lεadda, di mkul lεid n Tfaska țserriḥeγ-awen-d i yiwen umeḥbus ; tebγam
ihi a d-serrḥeγ i ugellid n wat Isṛail ?
40 Dγa nutni bdan țεeggiḍen, qqaṛen :
Ala ! Ur as-d-țserriḥ ara i nețța ! Serreḥ-ed i Baṛabas !
Baṛabas-agi, d argaz bu tmegṛaḍ.
Ixef 19
1 Bilaṭus yefka lameṛ ad awin Sidna Σisa a t-wten s ujelkkaḍ.
2 Lεeskeṛ
zḍan taεeṣṣabt s isennanen, ssersen-as-ț γef wuqeṛṛuy, selsen-as daγen
abeṛnus azeggaγ,
3 imiren țqeṛṛiben γer zdat-es qqaṛen :
Azul fell-ak ay agellid n wat Isṛail ! Rnan kkaten-t s iṣeṛfiqen ( ibeqqayen
).
4 Bilaṭus yeffeγ-ed daγen γer imeqqranen n wat Isṛail yenna-yasen :
Atan a wen-t-id-awiγ γer dagi akken aț-țeẓrem belli ur ufiγ ara deg-s sebba s
wayes ara ḥekmeγ fell-as.
5 Ssufγen-d Sidna Σisa γer beṛṛa s tεeṣṣabt-nni n isennanen akk-d ibidi (
abeṛnus ) azeggaγ.
Bilaṭus yenna-yasen :
Atan γur-wen !
6 Mi t-walan imeqqranen n wat Isṛail d iεessasen, bdan țεeggiḍen :
Semmeṛ-it γef wumidag ! Semmeṛ-it γef lluḥ !
Bilaṭus yenna yasen :
Ma tebγam a t-tsemmṛem γef wumidag, atan
γur-wen ! Ma d nekk, ur ufiγ ara
sebba s wayes ara ḥekmeγ fell-as.
7 Lecyux n wat Isṛail rran-as :
Nukni nesεa ccariεa ; ccariεa nneγ teqqaṛ-ed : Argaz am agi ilaq ad yemmet
axaṭer yenna-d : « Nekk d Mmi-s n ṛebbi.»
8 Imeslayen-agi sxelεen Bilaṭus.
9 Yuγal yekcem γer wexxam n ccṛeε yesteqsa
daγen Sidna Σisa, yenna-yas :
Ansi i d-tekkiḍ ? Sidna Σisa ur s-d-yerri ara awal.
10 Bilaṭus yenna-yas :
Amek ! Ur iyi-d-țarraḍ ara awal ? Ur teẓriḍ ara belli zemreγ a k-serḥeγ,
zemreγ daγen ad fkeγ lameṛ a k-semmṛeγ γef wumidag ?
11 Sidna Σisa yenna-yas :
Ur tezmireḍ i wacemma fell-i anagar ayen i k-d-yețțunefken seg igenni. Daymi
win i yi-d-yewwin ger ifassen-ik yewwi ddnub akteṛ-ik.
12 Seg imiren Bilaṭus yețqellib amek ara d-iserreḥ i Sidna Σisa lameεna
lecyux n wat Isṛail sekkren leεyaḍ, qqaṛen-as :
Ma tserrḥeḍ-as i wergaz-agi ur telliḍ ara d aḥbib n Qayṣer, axaṭer win
yerran iman-is d agellid, d aεdaw n Qayṣer.
13 Mi gesla i imeslayen-agi,
Bilaṭus yessufeγ-ed Sidna Σisa γer beṛṛa, yeqqim γef wukursi n ccṛeε deg
umkan iwumi qqaṛen s tεibṛanit «Gabbaṭa» yeεni «afrag yessan s yeblaḍen».
14 Ass-nni, d ass uqbel lεid n Tfaska ; aț-țili d leǧwahi n tnac, Bilaṭus yenna
i lecyux n at Isṛail :
Atan ugellid-nwen !
15 Meεna nutni rnan εeggḍen :
Enγ-it ! Enγ-it ! Semmeṛ-it γef wumidag !
Bilaṭus yenna-yasen :
Amek ! Ad semmṛeγ agellid nwen ?
Lecyux n wat Isṛail rran-as :
D Qayṣer i d agellid-nneγ, ur nesεi ara agellid nniḍen.
16 Dγa Bilaṭus yefka-yasen-t akken a t-semmṛen γef wumidag.
Ṭṭfen-d Sidna Σisa
17 sbubben-as amidag, ffγen si temdint, ulin
γer wemkan
yețțusemman « tiγilt n uqeṛṛuy » ( iwumi qqaṛen s tεibṛanit « Gulguṭa »).
18 Dinna i t-semmṛen γef lluḥ nețța akk-d sin nniḍen. Sbedden imidagen
yiwen sya wayeḍ sya, Sidna Σisa di tlemmast.
19 Bilaṭus yumeṛ ad semmṛen yiwet n telwiḥt sennig uqeṛṛuy n Sidna Σisa,
yura deg-s : « Σisa anaṣari, agellid n wat Isṛail.»
20 Imi amkan-nni anda i t-semmṛen ur yebεid ara γef temdint, aṭas n wat
Isṛail i geγṛan talwiḥt-nni yuran s tεibṛanit, s tlatinit ț-țyunanit.
21 Lecyux n wat Isṛail ccetkan γer Bilaṭus, nnan-as :
Ur ilaq ara aț-țaruḍ γef telwiḥt nni «Agellid n wat Isṛail,» lameεna ilaq
aț-țaruḍ «Argaz-agi yenna d : nekk d agellid n wat Isṛail.»
22 Bilaṭus yerra-yasen :
Ayen uriγ ad yeqqim akken i t-uriγ.
23 Mi semmṛen Sidna Σisa γef wumidag, lεeskeṛ ddmen-d lqecc-is bḍan-ten
γef
ṛebεa, yal yiwen yewwi amur-is ; yeqqim-ed ujellab-is ur nefṣil ur nxaḍ,
mazal-it akken yezḍa seg yixef γer wayeḍ.
24 Heddṛen wway gar-asen, nnan :
Acuγeṛ ara t-ncerreg, eyyaw axiṛ a nger tasγaṛt fell-as a nẓer anwa ara
t-yawin.
S wakka i gennekmal wayen yuran di tira iqedsen : Feṛqen lqecc-iw, gren
tasγaṛt γef wubeṛnus-iw.» Akka i xedmen iεsekṛiyen-nni.
25 Zdat umidag, tbedd yemma-s n Sidna Σisa, weltma-s n yemma-s, Meryem
tameṭṭut n Klufas akk-d Meryem tamagdalit.
26 Mi gwala Sidna Σisa yemma-s
tbedd γer tama n unelmad-nni i gḥemmel, yenna-yas :
A tameṭṭut, atan mmi-m.
27 Yenna daγen i unelmad-nni :
Ațan yemma-k.
Seg imiren anelmad-nni yewwi-ț γer wexxam-is.
28 Mi geẓra Sidna Σisa dayen
kullec ifuk, yenna iwakken ad nnekmalent tira iqedsen :
Ffudeγ !
29 Yella dinna ubuqal yeččuṛen d lxell. Dmen-d ameččim n taḍuṭ cudden-t
γer yixef n uγanim, sbezgen t-id s lxell-nni, ssawḍen-as-t γer yimi-s.
30 Akken
kan i geεṛeḍ lxell-nni, Sidna Σisa yenna :
Kullec yețwakemmel !
Yessekna aqeṛṛuy-is, yessufeγ ṛṛuḥ.
31 Tafaska n izimer n leslak yeγli-d deg wass n westeεfu. Tameddit n wass uqbel
ass n westeεfu, lecyux n wat Isṛail ur bγin ara ad ǧǧen lǧețțat-nni
γef
yimidagen di leεwaceṛ. ṛuḥen ad ssutren i Bilaṭus a sen-ṛẓen iḍaṛṛen i
widak-nni yețwasemmṛen ; iwakken ad kksen lǧețțat-nsen.
32 Lεeskeṛ ṛuḥen, ṛẓan iḍaṛṛen i yiwen seg widak-nni yețwasemmṛen
ț-țama n Sidna Σisa, syenna uγalen γer wayeḍ.
33 Mi wwḍen γer Sidna Σisa,
ufan-t yemmut yakan, daymi ur s-ṛzin ara iḍaṛṛen-is.
34 Yiwen uεeskṛi
yessenta yas isekkin deg idis, imiren ffγen-d waman akk-d idammen seg-s.
35 Win i d-yeḥkan γef wannect-agi d inigi n ṣṣeḥ, axaṭer d ayen i geẓra s
wallen-is. Yezṛa ț-țideț i d-yenna, yenna-t-id akken aț-țamnem ula d
kunwi.
36 Ayagi meṛṛa yedṛa iwakken ad yețțukemmel wayen yuran di tira
iqedsen : Ula d yiwen seg yeγsan-is ur yețṛuz.
37 Yura daγen : Ad ssersen tamuγli γef win i fetken.
Sidna Σisa deg uẓekka
38 Deffir wannect-agi meṛṛa, Yusef n taddart n Arimati iṛuḥ yessuter i
Bilaṭus a t-yeǧǧ ad yawi lǧețța n Sidna Σisa. Nețța daγen yella d
anelmad-is, lameεna yeffer iman-is axaṭer ițțaggad lecyux n wat Isṛail.
Bilaṭus yeqbel wayen i s-d yessuter ; dγa Yusef iṛuḥ a d-yawi lǧețța n
Sidna Σisa nețța d Nikudem,
39 win akken i gṛuḥen deg yiḍ
γer Sidna Σisa.
Nikudem yewwi-d yid-es azal n tlatin litrat n leεṭeṛ ixeddmen i lmegtin.
40 Di sin yid-sen, wwin-d lǧețța n Sidna Σisa xedmen-as leεṭeṛ akken i
tella lεadda n wat Isṛail, imiren țțlen-t s lekfen.
41 Zdat wemkan anda
semmṛen Sidna Σisa, tella deg yiwet n tmazirt yiwen n yefri yețwaheggan d
aẓekka, ulac win i gmeḍlen deg-s.
42 Imi i geqṛeb yefri-nni, rran lǧețța n
Sidna Σisa γer daxel, axaṭer ass i d-iteddun d ass n westeεfu n wat Isṛail.
Ixef
20
Aẓekka yeqqim d ilem
1 Ass n lḥedd, ṣṣbeḥ zik qbel ad yali wass, Meryem tamagdalit tṛuḥ
γer uẓekka. Twala azṛu-nni iqeflen imi n uẓekka yețwakkes.
2 Imiren kan tuzzel
aț-țessiweḍ lexbaṛ i Semεun Buṭrus akk-d unelmad-nni i gḥemmel Sidna Σisa.
Tenna-yasen :
Kksen-d Ssid-nneγ seg uẓekka, ur neẓri ara anda i t-rran.
3 Buṭrus d unelmad-nni ddukklen, ṛuḥen γer uẓekka.
4 Uzzlen i sin, lameεna
anelmad-nni yeǧǧa Buṭrus γer deffir, yewweḍ d amezwaru.
5 Imuqel γer daxel n uẓekka, iwala lekfen di lqaεa, lameεna ur yekcim ara.
6 Semεun Buṭrus i t-id-itebεen ilḥeq-ed. Yekcem γer daxel
uẓekka, iwala lekfen
di lqaεa,
7 ma d aceṭṭiḍ s wayes yețțel uqeṛṛuy n Sidna Σisa ur yelli ara
akk-d lekfen-nni, meεna yers γer rrif, mazal-it deg wemkan-is akken yețțel.
8 Anelmad-nni i gewwḍen d amezwaru, yekcem ula d nețța
γer uẓekka. Mi gwala,
yumen.
9 Axaṭer armi d imiren, urεad fhimen belli Sidna Σisa ilaq a d yeḥyu si ger
lmegtin akken yura di tira iqedsen.
10 Sin inelmaden-nni uγalen γer
yexxamen-nsen.
Sidna Σisa ibeggen-ed iman-is i Meryem tamagdalit
11 Yuγ lḥal Meryem tella di beṛṛa, tețru tama n uẓekka. Mi tella tețru,
tmuqel γer daxel,
12 twala snat lmalayekkat s llebsa tamellalt, qqimen deg
wemkan-nni anda akken i ssersen lǧețța n Sidna Σisa, yiwen
γer uqeṛṛuy
wayeḍ γer iḍaṛṛen,
13 nnan-as :
Acuγeṛ i tețruḍ ?
Meryem tenna-yasen :
Wwin Ssid-iw, yerna ur ẓriγ ara anda i t-rran !
14 Urεad d-tfuk ameslay tmuqel γer deffir, twala Sidna Σisa ibedd-ed, lameεna ur
teεqil ara belli d nețța.
15 Sidna Σisa yenna-yas :
Acuγeṛ i tețruḍ ? Γef wanwa i tețqellibeḍ ?
Meryem tγil d aεessas n tmazirt, tenna-yas :
Ma yella d kečč i t-iddmen, ini-yi-d γer wanda i t-tewwiḍ akken ad ṛuḥeγ a
t-id-awiγ.
16 Sidna Σisa iluεa-ț-id yenna-yas :
Meryem !
Tezzi γur-es, dγa tenna-yas s tεibṛanit :
Rabuni ! ( yeεni : a Sidi ! )
17 Sidna Σisa yenna-yas :
Ur yi-d-țmassa ara, axaṭer urεad uliγ γer Baba. Lameεna ṛuḥ ini-yasen i
watmaten-iw : aql-iyi ad aliγ γer Baba yellan d Baba-twen, γer Yillu-yiw yellan
d Illu-nwen.
18 Meryem tamagdalit tṛuḥ aț țessiweḍ lexbaṛ i inelmaden. Tenna yasen :
Ẓriγ Sid-nneγ, atah wayen i yi-d-yenna ...
Sidna Σisa ibeggen-ed iman-is i inelmaden-is
19 Ass n lḥedd tameddit, inelmaden llan deg yiwen wexxam γelqen tiwwura axaṭer
uggaden at Isṛail. Ataya Sidna Σisa ibedd-ed gar-asen, yenna-yasen :
Sslam fell-awen !
20 Akken i gsellem fell-asen isken asen-d ifassen-is akk-d yidis-is. Inelmaden
feṛḥen aṭas imi walan Ssid-nsen.
21 Sidna Σisa yenna-yasen daγen :
Sslam fell-awen. Akken i yi-d iceggeε Baba, nekk daγen a kkun ceggεeγ.
22 Mi d-yenna annect-agi, isuḍ γef yinelmaden-is, yerna yenna-yasen :
Stṛeḥbet s ṛṛuḥ iqedsen.
23 Wid iwumi ara tsemḥem ddnubat a sen
țwasemḥen, ma d wid iwumi ur tețsemmiḥem ara ddnubat-nsen ad qqimen i
yirawen-nsen.
Sidna Σisa ibeggen-ed iman-is i
Ṭuma
24 Ṭuma, iwumi qqaṛen Akniw, yellan d yiwen si tnac-nni, ur yelli ara yid-sen
mi d-yusa Sidna Σisa.
25 Inelmaden nniḍen nnan-as :
Neẓra Sidna Σisa !
Meεna nețța yerra-yasen :
Ma yella ur walaγ ara ccwami n imesmaṛen deg ifassen-is, ma yella ur sriseγ ara
aḍad-iw anda ntan imesmaṛen, ma yella ur sriseγ ara afus-iw γef yidis-is, ur
țamneγ ara.
26 Mi εeddan tmanya n wussan, inelmaden nnejmaεen daγen deg wexxam. Tikkelt-agi
Ṭuma yella yid-sen. Ataya Sidna Σisa yekcem-ed γur-sen γas akken γelqent
tewwura. Ibedd gar-asen, yenna-yasen :
Sslam fell-awen !
27 Sidna Σisa yenna i Ṭuma :
Awi-d aḍad-ik atnan ifassen-iw, qeṛṛeb-ed afus-ik tserseḍ-t
γef yidis-iw. Ur
jehhel ara, amen !
28 Ṭuma yerra-yas :
A Sid-iw ! Ay Illu-yiw !
29 Sidna Σisa yenna-yas :
Armi i yi-twalaḍ i tumneḍ ! Amarezg n win ara yamnen mbla ma iwala.
30 Aṭas n lbeṛhanat i gexdem daγen Sidna Σisa zdat inelmaden-is, ur
d-temmeslay ara fell-asen tektabt-agi.
31 Lameεna ayen akk i d-yețwajemεen
deg-s yura-d iwakken aț-țamnem belli d Σisa i d Lmasiḥ, dMmi-s n ṛebbi
yerna ma tumnem yis aț-țesεum tudert s yisem-is.
Ixef 21
Ṣṣyada yessewhamen
1 Syin akkin, Sidna Σisa isbeggen-ed iman-is daγen i inelmaden-is γef rrif n
lebḥeṛ n Tiberyas. Atah wamek i tedṛa :
2 Semεun Buṭrus, Ṭuma iwumi qqaṛen Akniw, Natanahil n taddart n Kana yellan di
tmurt n Jlili, arraw n Zabadi akk-d sin inelmaden nniḍen ddukklen akken.
3 Semεun Buṭrus yenna-yasen :
Ad ṛuḥeγ a d-ṣeggḍeγ iselman.
Nutni nnan-as :
Ula d nukkni a neddu yid-ek.
Dγa ṛuḥen rekben taflukt, ṣeggden iḍ kamel ur d-ṭṭifen ula d yiwen
uḥewtiw.
4 Akken yebda yețțali wass, ataya Sidna Σisa ibedd-ed
γef rrif n
lebḥeṛ ; inelmaden ur t-eεqilen ara d nețța.
5 Sidna Σisa yessawel-asen :
Ay arrac, teṭṭfem-d kra n lḥut neγ ala ?
Nutni rran-as :
Ur d-neṭṭif ula d yiwen !
6 Sidna Σisa yenna-yasen :
Ḍeggṛet acebbak γer tama tayeffust n teflukt a d-teṭṭfem.
Deggṛen acebbak γer wanda i sen-d-yenna, mi t-id-ssulin yeččuṛ ed d lḥut
armi ur zmiren ara a t-id refden.
7 Anelmad-nni i gḥemmel Sidna Σisa, yenna i Buṭrus :
D Sidna Σisa !
Mi gesla belli d Sidna Σisa, Semεun Buṭrus yekksen aqenduṛ-is mi gella
yețṣeggid, yelsa-t, dγa iḍeggeṛ iman-is γer waman.
8 Inelmaden nniḍen
uγalen-d s teflukt γer rrif, zzuγṛen-d yid-sen acebbak nni yeččuṛen d
iselman. Llan beεden γef rrif azal n meyya n lmitrat.
9 Mi d-rsen γer lqaεa, ufan-d aγṛum akk-d lḥut s ufella n yirrij n tmes.
10 Sidna Σisa yenna-yasen :
Awit-ed kra n iselman seg wid i d-teṭṭfem.
11 Semεun Buṭrus yuli γer teflukt, ijebd-ed acebbak-nni, yeẓẓuγer-it-id
γer
lqaεa. Ufan deg-s meyya utlata uxemsin iselman imeqqranen ; γas akken yeččuṛ
ucebbak-nni ur iqqeṛs ara.
12 Sidna Σisa yenna-yasen :
Qeṛṛbet-ed aț-țeččem.
Ula d yiwen seg inelmaden-nni ur yezmir a s-yini « anwa-k ? » ?ran akk belli d
Sidna Σisa.
13 Sidna Σisa iqeṛṛeb γur-sen, ifṛeq-asen aγṛum-nni d iselman-nni.
14
?-țikkelt tis tlata i d-yesken iman-is Sidna Σisa i inelmaden-is seg wasmi i
d-yeḥya si lmut.
Sidna Σisa akk-d Buṭrus
15 Mi kfan učči, Sidna Σisa yenna i Semεun Buṭrus :
A Semεun mmi-s n Yunes, tḥemmleḍ-iyi akteṛ n wigi ?
Semεun Buṭrus yenna-yas :
Ih a Sidi, teẓriḍ ḥemmleγ-k.
Sidna Σisa yenna-yas :
Ţḥadar izamaren-iw.
16 Sidna Σisa yenna-yas tikkelt tis snat :
A Semεun mmi-s n Yunes, tḥemmleḍ-iyi ?
Yerra-yas :
Ih teẓriḍ ḥemmleγ-k a Sidi !
Sidna Σisa yenna-yas :
Kess ulli-inu.
17 Sidna Σisa yesteqsa-t tikkelt tis tlata, yenna-yas :
A Semεun mmi-s n Yunes, tḥemmleḍ-iyi ?
Semεun Buṭrus iγaḍ-it lḥal, axaṭer ț-țikkelt tis tlata i t-id-yesteqsa : «
Ma tḥemmleḍ-iyi ?». Dγa yenna-yas :
A Sidi, teẓriḍ kullec, teẓriḍ belli ḥemmleγ-k !
Sidna Σisa yenna-yas :
Ţḥadar ulli-inu.
18 Qqaṛeγ-ak s tideț : asmi
meẓẓiyeḍ, tețbeggiseḍ i
yiman-ik weḥd-ek, tețṛuḥuḍ anda tebγiḍ. Lameεna asm'ara tuγaleḍ d amγaṛ,
aț-țḍelqeḍ iγallen-ik i wayeḍ akken a k-yebges yerna a k yawi
γer wanda ur
tebγiḍ ara aț-țṛuḥeḍ.
19 S imeslayen-agi, issemεen-ed amek ara yemmet Semεun Buṭrus
γef ddemma n
tmanegt n Sidi ṛebbi. Mi d-yenna ayagi, yenna-yas daγen :
Ddu-d yid-i !
20 Buṭrus yezzi γer deffir, iwala anelmad-nni i gḥemmel Sidna Σisa iteddu-d
deffir-nsen. Anelmad-agi d win akken i geknan γer Sidna Σisa asmi llan tețțen
imensi, i s yennan : «A Sidi, anwa ara k ixedεen ?»
21 Mi t-iwala, Buṭrus
yesteqsa Sidna Σisa yenna-yas :
I nețța a Sidi, d acu ara yedṛun yid-es ?
22 Sidna Σisa yenna-yas :
Ma bγiγ ad yidir alamma d asm'ara d-uγaleγ, d acu i k yecqan ? Kečč tbeε-iyi-d
!
23 Γef wannect-agi i geffeγ lexbaṛ ger watmaten, qqaṛen : « Anelmad-agi ur
yețmețțat ara ».
S tideț, Sidna Σisa ur d-yenni ara belli anelmad-agi ur yețmețțat ara
lameεna yenna-d kan : « Ma bγiγ ad yidir alamma asm'ara d uγaleγ, d acu i k
yecqan ? »
24 D anelmad-agi i d-ixebbṛen γef wannect-agi yerna yura-t-id.
Neẓra belli cchada-ines tṣeḥḥa.
25 Sidna Σisa yexdem daγen aṭas n lecγal nniḍen. Lemmer a ten-id neḥku yiwen
yiwen, ur cukkeγ ara ddunit meṛṛa aț-țawi tiktabin ara naru.
***
|
Amasih.net Akk izerfan
ttwaḥerzen.