|
Aselmed n
Sidna Σisa s γur Matyas Uqdis
Ixef 1
Izuṛan
n Sidna Σisa Lmasiḥ
1 A ten-an izuṛan n Σisa
Lmasiḥ yellan si dderya n Sidna Dawed akk-d Sidna Ibṛahim :
2 Sidna Ibṛahim yeǧǧa-d
Isḥaq, Isḥaq yeǧǧa-d Yeεqub, Yeεqub yeǧǧa-d Yahuda d
watmaten-is.
3 Yahuda akk-d Tamaṛ ǧǧan-d
Fares, akk-d Ziraḥ ; Fares yeǧǧa-d ḥesrun, ḥesrun yeǧǧa-d
Aram.
4 Aram yeǧǧa-d
Σaminadab, Σaminadab yeǧǧa-d Naḥsun, Naḥsun yeǧǧa-d Salmun.
5 Salmun d Raḥab ǧǧan-d
Buεaz, Buεaz akk-d Rut sεan-d Σubed, Σubed yeǧǧa-d Yassa.
6 Yassa yeǧǧa-d Sidna
Dawed, Sidna Dawed yuγal d agellid, yeǧǧa-d γer tmeṭṭut n
Uryaḥ Sidna Sliman.
7 Sidna Sliman yeǧǧa-d
Raḥabεam, Raḥabεam yeǧǧa-d Abiya, Abiya yeǧǧa-d Asaf,
8 Asaf yeǧǧa-d
Yehucafat ; Yehucafat yeǧǧa-d Yihuram ; Yihuram yeǧǧa-d
Σuzya ;
9 Σuzya yeǧǧa-d Yuṭam
; Yuṭam yeǧǧa-d Aḥaz ; Aḥaz yeǧǧa-d ḥizeqya ;
10 ḥizeqya yeǧǧa-d
Mennac ; Mennac yeǧǧa-d Σamun ; Σamun yeǧǧa-d Yuciya ;
11 Yuciya yeǧǧa-d
Yixunya akk-d watmaten-is, di lweqt i deg iqaldiyen wwin at Isṛail
d imeḥbas γer tmurt n Babilun.
12 Mbeεd lweqt n usgiǧǧi
γer tmurtn Babilun, Yixunya yeǧǧa-d Calatyel ; Calatyel yeǧǧa-d
Zurubabil.
13 Zurubabil yeǧǧa-d
Abihud. Abihud yeǧǧa-d Ilyaqim ; Ilyaqim yeǧǧa-d Σazuṛ ;
14 Σazuṛ yeǧǧa-d Saduq
; Saduq yeǧǧa-d Yaxin ; Yaxin yeǧǧa-d Ilihud.
15 Ilhud yeǧǧa-d
Ilεazaṛ ; Ilεazaṛ yeǧǧa-d Mattan ; Mattan yeǧǧa-d Yeεqub.
16 Yeεqub yeǧǧa-d
Yusef, d Yusef agi i d argaz n Meryem i d-yeǧǧan Sidna Σisa i
gețțusemman Lmasiḥ.
17 Si lweqt n Sidna
Ibṛahim armi d lweqt n Sidna Dawed, εeddan ṛbeεṭac n
leǧyal. Σeddan daγen ṛbeεṭac n leǧyal si lweqt n Sidna Dawed
armi d lweqt n usgiǧǧi γer tmurt n Babilun. Si lweqt-agi n
usgiǧǧi armi d lweqt n Lmasih εeddan daγen ṛbeεṭac n
leǧyal.
Talalit
n Sidna Σisa
18 Atan wamek i d-ilul
Sidna Σisa : yemma-s Meryem tella tețwaxḍeb i yiwen wergaz
ițțusemman Yusef. S tezmert n ṛṛuḥ iqedsen, terfed s
tadist uqbel aț-țeddu ț-țislit.
19 Yusef axḍib-is,
yellan d argaz n ṣṣwab, ur yebγi ara a ț-țicemmet, dγa
yeqsed ad imsefṛaq yid-es s tuffra.
20 Akken yețxemmim i
waya, yers-ed γur-es lmelk n ṛebbi di targit yenna-yas : A
Yusef ! A mmi-s n Dawed ! Ur țțaggad ara aț-țesεuḍ Meryem
ț-țameṭṭut-ik, axaṭer llufan yellan di tεebbuṭ-is,
yusa-yas-d s ṛṛuḥ iqedsen.
21 A d-tesεu aqcic, a
s-tsemmiḍ Σisa, axaṭer d nețța ara iselken lumma-s si
ddnubat-nsen.
22 Ayagi akk yedṛa
iwakken ad ițwakemmel wayen i d-yenna Sidi ṛebbi seg imi n
nnbi Iceεya :
23 Ațan tεezrit
aț-țerfed tadist, a d-tesεu aqcic ad ițțusemmi Imanuwil
yeεni :« ṛebbi yid-nneγ.»
24 Mi i d-yuki Yusef,
ixdem ayen i s-d-yenna lmelk n Sidi ṛebbi, yeqbel Meryem
aț-țili ț-țameṭṭut-is ; yewwi-ț-id γer wexxam-is.
25 Meεna ur ț-innul ara
armi i d-tesεa mmi-s iwumi isemma Σisa. Imusnawen di Bitelḥem
Ixef
2
1 Sidna Σisa ilul di
taddart n Bitelḥem, di tmurt n Yahuda di lweqt n ugellid
Hiṛudus ameqqran, kra n imusnawen usan-d si cceṛq γer temdint
n Lquds, iwakken ad steqsin :
2 anda ilul llufan-nni
ara yilin d agellid n wat Isṛail ? Axaṭer nwala-d itri-ines si
cceṛq, nusa-d a t-neεbed.
3 Agellid Hiṛudus akk-d imezdaγ n temdint n Lquds meṛṛa dehcen, yerwi
lxaṭer-nsen mi slan s lexbaṛ-agi.
4 Hiṛudus yesnejmaε-ed
akk lmuqedmin d lεulama n wegdud, isteqsa-ten γef wemkan anda
ara d-ilal Lmasiḥ ara d-yasen.
5 Nnan-as : Ahat di tmurt
n Yahuda di taddart n Bitelḥem ! Axaṭer atan wayen i gura nnbi
Mixa :
6 I kemm a taddart n
Bitelḥem, ur telliḍ ara ț-țaneggarut ger temdinin n Yahuda,
axaṭer seg-em ara d-iffeγ ugellid ara yeksen at Isṛail
agdud-iw.
7 Hiṛudus yessawel i
imusnawen nni s tuffra, isteqsa-ten si melmi i walan itri-nni.
8 Dγa iceggeε-iten γer
Bitelḥem, yenna-yasen : Nadit lexbaṛ n ṣṣeḥ γef weqcic-agi,
m'ara t-tafem, init-iyi-d iwakken ad ṛuḥeγ ula d nekk a
t-εabdeγ.
9 Mi slan i ugellid,
ṛuḥen. Akken kan i ffγen, walan itri-nni i ẓran di cceṛq
yezwar, iteddu zdat-sen. Mi gewweḍ sennig wemkan anda yella
weqcic-nni, yeḥbes.
10 Feṛḥen aṭas mi
walan itri-nni.
11 Kecmen γer wexxam-nni,
walan llufan akk-d yemma-s Meryem ; tεeǧben s weqcic-nni dγa
seǧǧden zdat-es. Fsin tiyemmusin-nsen, fkan-as tirezfin :
ddheb, lebxuṛ akk-d leεṭeṛ γlayen.
12 Sidi ṛebbi
ixebbeṛ-iten-id di targit ur țțuγalen ara γer Hiṛudus, dγa
uγalen γer tmurt-nsen seg ubrid nniḍen.
Tarewla
γer Maṣer
13 Mi ṛuḥen, lmelk n
Sidi ṛebbi idheṛ-as-ed i Yusef di targit, yenna-yas-ed : Kker,
ddem aqcic akk-d yemma-s, rewlet γer tmurt n Maṣeṛ, qqimet
dinna alamma nniγ-ak-ed a d-tuγaleḍ, axaṭer Hiṛudus ad
iqelleb γef weqcic-agi iwakken a t-ineγ.
14 Yusef ikker yewwi
aqcic-nni akk-d yemma-s deg iḍ, yerwel γer tmurt n Maṣeṛ.
15 Yeqqim dinna armi
yemmut Hiṛudus, iwakken ad idṛu wayen i d-yenna Sidi ṛebbi
seg imi n nnbi Huceε : Ssawleγ-as i Mmi a d-iffeγ si tmurt n
Maṣer.
16 Mi gwala Hiṛudus
belli kelxen-t imusnawen-nni, ikcem-it zzεaf d ameqqran, iceggeε
γer taddart n Bitelḥem akk-d ț-țmura i s-d-izzin, ad nγen
arrac meṛṛa yesεan si sin iseggasen d akessar, s wakken yella
leḥsab i s-d-fkan imusnawen-nni.
17 Dγa yețwakemmel wayen
i d yenna nnbi Irmiya :
18 Yekker leεyaḍ di
taddart n Rama, nesla i imeṭṭawen d umeǧǧed, d ṛaḥil i
gețrun γef warraw-is, tegguma aț-țesbeṛ fell-asen, axaṭer
mmuten.
19 Mi gemmut Hiṛudus
ameqqran, lmelk n Sidi ṛebbi iweḥḥa-d i Yusef di targit mi
gella di tmurt n Maṣer,
20 yenna-yas : Kker, ddem
aqcic d yemma-s tuγaleḍ γer tmurt n wat Isṛail, axaṭer wid
yebγan ad nγen aqcic-nni, mmuten.
21 Yusef iddem aqcic-nni
d yemma-s, yuγal γer tmurt n wat Isṛail
22 Meεna mi gesla belli d
Aṛxilyus mmi-s n Hiṛudus, i gellan d agellid γef tmurt n
Yahuda, yuggad. SSidi ṛebbi iεeggen-as-ed di targit, iṛuḥ γer
tmurt n Jlili,
23 izdeγ deg yiwet n
taddart ițțusemman Naṣaret, iwakken ad yedṛu wayen i d-nnan
lenbiya : Ad ițțusemmi Anaṣari.
Ixef
3
Yeḥya
yețbecciṛ aγḍas n țțuba
1 Deg wussan-nni, iban-ed
Yeḥya aγeṭṭas, yețbecciṛ deg unezṛuf n tmurt n Yahuda,
2 iqqaṛ-ed : Tubet,
beddlet tikli, axaṭer tagelda n igenwan tqeṛṛeb-ed.
3 Fell-as i d-immeslay
nnbi Iceεya mi d-yenna : ț-țaγect n win ițεeggiḍen di lxali
: Heggit abrid n Sidi ṛebbi, ssemsawit iberdan-is.
4 Yeḥya yelsa llebsa
yețwaxedmen s ccεeṛ n welγem, tabagust n weglim γef wammas-is,
tamεict-is d ibẓaẓ akk-d tament n lexla.
5 Imezdaγ meṛṛa n
temdint n Lquds, tamurt n Yahuda akk-d tmura i d-yezzin i wasif
n Urdun, țțasen-d γur-es
6 iwakken a d-qiṛṛen s
ddnubat nsen, nețța yesseγḍas-iten deg wasif nni n Urdun.
7 Mi gwala aṭas n at
ifariziyen d isaduqiyen i d-ițasen ad țwaγeḍsen, yenna-yasen : A ccetla n izerman, anwa i kkun isfaqen belli
tzemrem aț-țrewlem i lḥisab i d-iteddun ?
8 Sbeggnet-ed s
lecγal-nwen belli tettubem, tbeddlem tikli.
9 Ur qqaṛet ara i
yiman-nwen : « Sidna Ibṛahim d jeddi-tneγ » ! Axaṭer, a
wen-iniγ : Sidi ṛebbi yezmer a d-yefk dderya i Ibṛahim seg
idγaγen-agi.
10 Ațan ihi tcaquṛt
thegga γer izuṛan n ttjuṛ, yal ttejṛa ur d-nețțak ara
lfakya lεali, aț-țețwagzem, aț-țețwaḍeggeṛ γer tmes.
11 Nekk sseγḍaseγ-kkun
deg waman iwakken aț-țetubem, lameεna a d-yas yiwen yesεan
tazmert akteṛ-iw, ur uklaleγ ara a s-fsiγ ula d arkasen is.
Nețța a kkun-yesseγḍes s ṛṛuḥ iqedsen ț-țmes.
12 Tazzert deg ufus-is,
ad yebrez annar-is, ad ijmeε irden-is γer ikuffan, ma d alim a
t-yesseṛγ di tmes ur nxețți.
Aγḍas
n Σisa Lmasiḥ
13 Sidna Σisa yusa-d si
tmurt n Jlili γer wasif n Urdun iwakken a t- yesseγḍes Yeḥya.
14 Yeḥya yugi, yenna-yas
: D nekk i geḥwaǧen ad iyi- tesγeḍseḍ, kečč tusiḍ-ed
γur-i iwakken a k-sγeḍseγ !
15 Sidna Σisa yerra-yas :
Anef tura ! Akkagi i glaq a nexdem lebγi n Sidi ṛebbi ! Dγa
Yeḥya yunef-as.
16 Mi gețwaγḍes Sidna
Σisa, yeffeγ-ed seg waman ; imiren kan ldin igenwan, yers-ed
fell-as ṛṛuḥ n Sidi ṛebbi s ṣṣifa n tetbirt.
17 Tekka-d yiwet n taγect
seg igenwan, tenna-d : « Wagi d Mmi ameεzuz, deg-s i gella
lfeṛḥ-iw ! »
Ixef
4
Ajeṛṛeb n Σisa Lmasiḥ
1 Imiren ṛṛuḥ iqedsen
yewwi Sidna Σisa γer unezṛuf iwakken a t-ijeṛṛeb Cciṭan.
2 Mi guẓam ṛebεin
wussan d ṛebεin wuḍan, yuγal yelluẓ.
3 Iqeṛṛeb γur-es
Yeblis yenna-yas : Ma d Mmi-s n ṛebbi i telliḍ, ini-yasen i
yedγaγen-agi ad uγalen d aγṛum.
4 Sidna Σisa yerra-yas :
Yura di tira iqedsen : Mačči s weγṛum kan ara iεic wemdan,
lameεna s mkul awal i d-ițasen s γur Sidi ṛebbi.
5 Cciṭan yewwi-t γer
temdint n Lquds issers-it γef yixef n lǧameε iqedsen,
6 yenna-yas : Ma d Mmi-s
n ṛebbi i telliḍ, ḍeggeṛ iman-ik d akessar, anaγ yura : Sidi
ṛebbi ad yefk lameṛ i lmalayekkat-is fell-ak, aa k-awint ger
ifassen-nsent iwakken ad ḥadrent aḍar-ik γef yedγaγe
n.
7
Sidna Σisa yerra-yas : Yura daγen : Ur tețjeṛṛibeḍ ara Sidi
ṛebbi IIllu-inek.
8 Cciṭan yewwi-t daγen
γef wedrar εlayen, isken-as-ed tigeldiwin meṛṛa n ddunit d
lεaḍima-nsent, yenna-yas :
9 A k-tent-fkeγ meṛṛa
ma yella tseǧǧdeḍ zdat-i a yi-tεebdeḍ.
10 Sidna Σisa yenna-yas :
Beεεed akkin fell-i a Cciṭan, axaṭer yura : Anagar Sidi
ṛebbi-inek ara tεebdeḍ , i nețța kan iwumi ara tseǧdeḍ.
11 Dγa Cciṭan iṭṭaxeṛ
fell-as. Imiren usant-ed lmalayekkat γur-es, iwakken a
s-qedcent.
Sidna
Σisa di temdint n Kafernaḥum
12 Mi gesla s Yeḥya
yețwaḥbes, Sidna Σisa yuγal γer tmurt n Jlili.
13 Iffeγ si taddart n
Naṣaret, iṛuḥ ad izdeγ di Kafernaḥum ; ț-țamdint yyellan
rrif n lebḥeṛ di leǧwahi n tmura n Zabulun d Nefṭali,
14 iwakken ad yedṛu
wayen yenna nnbi Iceεya :
15 A tamurt n Zabulun
akk-d Nefṭali, a timura iqeṛben lebḥeṛ akkin i wasif n Urdun
, a tamurt n Jlili i deg zedγen leǧnas ur nelli ara n wat
Isṛail,
16 agdud-nni yezgan di
ṭṭlam, iwala tafat tameqqrant, wid izedγen di ṭṭlam n lmut,
tceṛq-ed fell-asen tafat !
17 Seg imiren, Sidna Σisa
yebda yețbecciṛ yeqqaṛ : Tubet, uγalet-ed γer webrid, axaṭer
tagelda n igenwan tqeṛṛeb-ed.
18 Mi gțeddu Sidna Σisa
γef rrif n lebḥeṛ n Jlili, iwala sin iḥewwaten : SSemεun
ițțusemman Buṭrus akk-d gma-s Andriyus. Llan ṭeggiṛen
icebbaken-nsen γer lebḥeṛ, țṣeggiḍen.
19 Yenna-yasen : Ddut-ed
yid-i, a kkun-rreγ d iṣeggaḍen n yemdanen.
20 Dγa imiren kan, ǧǧan
icebbaken nsen, ddan yid-es.
21 Mi gerna yelḥa kra,
iwala sin watmaten nniḍen : Yeεqub d Yuḥenna yellan d arraw n
Zabadi. LLlan akk-d baba-tsen di teflukt, țxiḍin
icebbaken-nsen.
22 Yessawel-asen, imiren
kan ǧǧan dinna baba-tsen, taflukt-nni, ṛuḥen ddan yid-es.
23 Syenna, Sidna Σisa
yekka-d tamurt n Jlili meṛṛa, yesselmad di leǧwameε n wat
Isṛail, yețbecciṛ lexbaṛ n lxiṛ n tgeldit n ṛebbi,
isseḥlay yal aṭan d yal leεyubat n lγaci.
24 Slan yis ula di tmurt
n Ṣurya meṛṛa ; țțawin-as-ed imuḍan i ghelken si mkul aṭan
: wid ițwamelken, wid iwumi yețṛuḥu leεqel akk-d wukrifen.
Sidna Σisa isseḥla-ten akk.
25 D izumal n lγaci i
t-id-itebεen si tmurt n Jlili, si εecṛa n temdinin-nni, si
temdint n Lquds, si tmurt n Yahuda akk-d leǧwahi yellan
agemmaḍ i wasif n Urdun.
Ixef
5
Aselmed
deg udrar
1 Mi gwala annect-nni n
lγaci, Sidna Σisa yuli γer wedrar iqqim. Inelmaden-is qeṛṛben
γur-es,
2 dγa ibda isselmad-iten
: 3 D iseεdiyen wid ițeddun s neyya, aaxaṭer tagelda n
igenwan d ayla-nsen !
4 D iseεdiyen wid ițrun,
axaṭer ad țwaṣebbṛen !
5 D iseεdiyen wid
ḥninen, aaxaṭer ad weṛten tamurt i sen-iwεed Sidi ṛebbi !
6 D iseεdiyen wid
illuẓen, iffuden lḥeqq, axaṭer ad ṛwun !
7 D iseεdiyen wid yesεan
ṛṛeḥma deg wulawen-nsen, aaxaṭer ad iḥunn fell-asen Sidi
ṛebbi !
8 D iseεdiyen wid iwumi
yeṣfa wul, axaṭer ad walin Sidi ṛebbi !
9 D iseεdiyen wid i
d-isrusun talwit, aad țțusemmin d arraw n Sidi ṛebbi !
10 D iseεdiyen wid
ițțuqehṛen γef lḥeqq, aaxaṭer ddewla igenwan d ayla-nsen !
11 D iseεdiyen ara tilim,
m'ara kkun-regmen, mm'ara tețwaqehṛem, m'ara xedmen deg-wen
lbaṭel γef ddemma-w.
12 Feṛḥet, ilit di
lfeṛḥ, axaṭer ṛṛezq-nwen d ameqqran deg igenwan, aakka i
țwaqehṛen lenbiya i kkun-id izwaren.
Lmelḥ
akk-d tafat n ddunit
13 D kunwi i d lmelḥ n
ddunit, lameεna ma tṛuḥ-as lbenna i lmelḥ, s wacu ara
s-ț-id-nerr ? Yelha kan ma nḍeggeṛ-it γer beṛṛa a
t-rekkḍen yemdanen.
14 D kunwi i ț-țafat n
ddunit ; taddart yellan γef wudrar ulamek ara teffer !
15 Akken daγen, ur
nceεεel ara taftilt iwakken a ț-nγumm s kra, meεna a ț-nessers
γef lmeṣbeḥ, iwakken aț-țfeǧǧeǧ i wid akk yellan deg
wexxam.
16 Akka i glaq
aț-țecceεceε tafat-nwen zdat yemdanen, iwakken ad walin
lecγal-nwen ilhan, yerna ad ḥemden Baba-twen yellan deg
igenwan.
Aselmed
γef wayen yeεnan ccariεa
17 γur-wat aț-țγilem
usiγ-ed ad sseγliγ ayen i d-tenna ccariεa d wayen i d-nnan
lenbiya ! Ur d-usiγ ara ad sseγliγ, lameεna usiγ-ed ad
snekmaleγ.
18 A wen-iniγ tideț :
skud mazal igenwan d lqaεa, ula d yiwen wawal neγ usekkil n
ccariεa ur imeḥḥu, alamma yedṛa wayen akk yuran deg-s.
19 Win ur nqudeṛ ara ula
d yiwen n lameṛ amecṭuḥ n ccariεa, yerna isselmad i wiyaḍ ad
xedmen am nețța, ad ițwaḥseb d amecṭuḥ akk di tgelda n
igenwan. Ma d win ixeddmen ayen i d-tenna ccariεa, yerna
isselmad i wiyaḍ ad xedmen akken, ad yili d ameqqran di tgelda
n igenwan.
20 Axaṭer a wen-iniγ, ma
yella ur tuγem ara awal i Sidi ṛebbi akteṛ n wakken tețțaγem
awal i yimusnawen n ccariεa d ifariziyen, ur tkeččmem ara
tagelda n igenwan.
Aselmed
γef umenγi d wurrif
21 Teslam daγen s
leqwanen i d- ițțunefken i lejdud-nneγ : Ur tneqqeḍ ara
tamgeṛt, Win ara yenγen tamgeṛṭ, ad iεeddi di ccṛeε, ad
ițwaḥkem fell-as.
22 Ma d nekk a wen-iniγ :
kra n win ara izeεfen γef gma-s, ad iεeddi di ccṛeε. Win ara
yinin i gma-s : « ay abuhal, » ad ibedd zdat wesqamu n ccraε.
Win ara yinin i gma-s : « ay amehbul, » yuklal ad ikcem γer
ǧahennama.
23 M'ara tțedduḍ
aț-țefkeḍ lweεda i Sidi ṛebbi, temmektaḍ-ed zdat n wemkan n
iseflawen belli gma-k iṭṭef-ak cceḥna,
24 eǧǧ dinna
lweεda-nni, tṛuḥeḍ uqbel aț-ḍelbeḍ ssmaḥ i gma-k, d wamek
ara tefkeḍ lweεda-k i Sidi ṛebbi.
25 Ma yella iḍlem-ik
yiwen, tedduklem di sin γer wexxam n ccṛeε, γiwel msefham
kečč yid-es deg ubrid, m'ulac axṣim-ik a k-yawi γer lḥakem,
lḥakem a k-yefk i wεessas, aεessas-nni, a k-yerr γer lḥebs.
26 A k-iniγ tideț : ur
d-țeffγeḍ ara syenna alamma txellṣeḍ aṣurdi aneggaru n
ṭṭlaba-inek.
Aselmed
γef zzna
27 Teslam belli qqaṛen-d
: ur xeddem ara asekkak yeεni zzna.
28 Lameεna, nekkini a
wen-d-iniγ : win ara imuqlen tameṭṭut, imenna deg ul-is ad
iznu yid-es, atan am akken izna yid-es.
29 Daymi ma yella
ț-țiṭ-ik tayeffust i k-ițawin γer leḥṛam, qleε-iț,
ḍeggeṛ-iț akkin fell-ak. Axaṭer axiṛ-ak a k-iṛuḥ yiwen si
lemfaṣel-ik wala aț-țkecmeḍ s lekmal-ik γer ǧahennama.
30 Ma yella s ufus-ik
ayeffus i txeddmeḍ leḥṛam, gzem-it, tḍegṛeḍ-t akkin
fell-ak, axiṛ-ak a k-ixaṣ ufus wala ma tkecmeḍ s lekmal-ik
γer ǧahennama.
31 Qqaṛen-d daγen : Win
ara yebrun i tmeṭṭut-is, a s-yefk lkaγeḍ n berru.
32 Lameεna nekkini a
wen-iniγ : win ara yebrun i tmeṭṭut-is, yili ur tezni ara, d
nețța i ț-iwelhen γer zzna ma tezweǧ d wayeḍ. Daγen win
yuγen tameṭṭut innebran, ula d nețța yezna.
33 Teslam daγen s wayen i
d-nnan i lejdud-nneγ : Ur ḥennet ara, lameεna ayen i tεuhdeḍ s
limin zdat Sidi ṛebbi, ilaq a t-txedmeḍ.
34 Meεna nekk a wen-iniγ
: ur țgallat ara maḍi ! Ur țgallat s igenni, axaṭer d amkan
n lḥekma n Sidi ṛebbi,
35 ur țgallat s lqaεa
axaṭer fell-as i gesrusu iḍaṛṛen-is, neγ s Lquds imi
ț-țamdint n ugellid ameqqran.
36 Ur țgallat ara daγen
: « s yixef n uqeṛṛuy-nwen » axaṭer ur tezmirem ara
aț-țerrem ula d yiwen wenẓad d aberkan neγ d amellal.
37 Init « ih » ma ilaq
aț-ținim ih, neγ « xaṭi » ma ilaq aț-ținim xaṭi ; ayen akk
ara ternum d zzyada, s γur Cciṭan i d-ițas.
Aselmed
γef țțaṛ
38 Teslam s wayen i
d-qqaṛen : Tiṭ s tiṭ, tuγmest s tuγmest.
39 Meεna nekk a wen-iniγ
: ma yella win i wen-ixedmen cceṛ ur țțarat ara țțaṛ. Ma
iwwet-ik yiwen γer lḥenk ayeffus, sken-as lḥenk nniḍen.
40 Ma yebγa yiwen a
k-isiweḍ γer ccṛeε iwakken a k-ikkes aqenduṛ-ik, rnu-yas ula
d abeṛnus-ik.
41 Ma yella iḥṛes-ik
walebεaḍ a s-tbibbeḍ taεkumt azgen webrid-is, kečč
awi-yas-ț armi d axxam.
42 Efk-as ayen yeḥwaǧ i
win i k-d-issutren, ur reggel ara γef win ibγan ad yerḍel s
γur-ek.
ḥemmel
iεdawen-ik
43 Teslam i wayen i
d-qqaṛen : ḥemmel amdakkel-ik, tkeṛheḍ aεdaw ik.
44 Nekk a wen-iniγ :
ḥemmlet iεdawen-nwen i kkun ițqehhiṛen. BBarket wid i
kkun-ineεlen, xedmet lxiṛ i wid i kkun-ikeṛhen, dεut s lxiṛ i
wid i kkun-iḍelmen, akk-d wid i kkun-ițqehhiṛen.
45 S wakka ara d-tbanem d
arraw n Baba-twen yellan deg igenwan, axaṭer nețța icṛeq-ed
iṭij-is ama γef wid yelhan ama γef yemcumen, yețțak-ed
ageffur ( lehwa ) ama i wid ixeddmen lxiṛ, ama i wid ixeddmen
cceṛ.
46 Ma yella tḥemmlem kan
wid i kkun-iḥemmlen, d acu n lfayda ara tesεum ? Ula d
imekkasen n tebzert ( leγṛama ) xeddmen akenni.
47 Ma yella
tețțemsalamem d watmaten-nwen kan, d acu n lxiṛ i txedmem ?
Ula d imednuben xeddmen akken.
48 Sfut ihi akken yeṣfa
Baba-twen n igenwan.
Ixef
6
Aselmed
γef ssadaqa
1 Ayen txeddmem i Sidi
ṛebbi, ur t-id-sbegginet ara iwakken a kkun-walin medden,
m'ulac ur tseεεum ara lfayda γer Baba-twen yellan deg igenwan.
2 M'ara tseddqeḍ, ur
țberriḥ ara am akken xeddmen at sin wudmawen di leǧwameε neγ
deg iberdan, iwakken ad sεun ccan γer yemdanen. A wen iniγ
tideț : d ayagi kan i d lfayda-nsen.
3 Ma d kečč m'ara
tseddqeḍ, ilaq afus-ik ayeffus ur ițwali ara wayen ixeddem
ufus-ik azelmaḍ ;
4 iwakken ssadaqa-inek
aț-țeqqim di sser, akka ara tețwaqebleḍ γer Baba ṛebbi
yețwalin ayen txeddmeḍ di sser.
Aselmed
γef tẓallit
5 M'ara tețẓallam, ur
xeddmet ara am at sin wudmawen iḥemmlen ad ẓallen s ibeddi di
leǧwameε neγ deg iberdan iwakken a ten-walin medden. A wen-iniγ
tideț : d ayagi kan i d lfayda-nsen.
6 Ma d kečč m'ara
tebγuḍ aț-țẓalleḍ, ṛuḥ ekcem γer texxamt-ik, sekkeṛ
tawwurt, tedεuḍ di sser γer Baba ṛebbi, nețța yețwalin ayen
yellan di sser, a k-id-iqbel.
7 M'ara tețẓallam, ur
sṭuqqutet ara lehduṛ am akken xeddmen at ddunit, γilen s
lketṛa n imeslayen ara d țwaqeblen.
8 Ur ten-țεanadet ara,
axaṭer Baba ṛebbi yeẓra d acu teḥwaǧem uqbel a
s-t-tessutrem.
9 Atah wamek ilaq
aț-țețẓallam : AA Baba-tneγ yellan deg igenwan, iisem-ik ad
ițwaqeddes,
10 lḥekma n tgeldit-ik a
d-tass, llebγi-k ad idṛu di lqaεa aakken yedṛa deg igenwan.
11 Efk-aγ-d mkul ass
tamεict-nneγ.
12 Semmeḥ-aγ
ddnubat-nneγ aakken i nețsamaḥ i wid i γ-iḍelmen.
13 Ssebεed fell-aγ
ajeṛṛeb, ssellek-aγ si tḥila n Cciṭan. AAxaṭer
γur-ek i
tella tgeldit, ttazmert d lεaḍima i dayem. Amin !
14 Ma yella tețsamaḥem
i yemdanen ii wen-ixeddmen cceṛ, Baba ṛebbi yyellan deg
igenwan a wen-isameḥ uula i kunwi.
15 Lameεna ma yella
kkunwi ur tețsamaḥem ara i wiyaḍ, aatan Baba ṛebbi ur a
wen-ițsamaḥ aara ula i kunwi ddnubat-nwen.
Aselmed
γef wuẓummu
16 Asmi ara tuẓummem, ur
d tesbegginet ara iman-nwen tḥeznem am at sin wudmawen
issexsaṛen udmawen-nsen iwakken a ten-țwalin yemdanen belli
uẓamen. A wen-iniγ tideț : d ayagi kan i d lfayda-nsen. 17
Ma d kečč, m'ara tuẓumeḍ, ssired udem-ik, tdehneḍ
aqeṛṛuy-ik s rriḥa,
18 iwakken yiwen ur
k-iεeqqel belli tuẓameḍ. Ilaq ayagi ad iqqim gar-ak d Baba
ṛebbi ițwalin ayen yellan di sser, nețța a k-id-iqbel.
Agerruj
n ṣṣeḥ
19 Ur ssexzanet ara
igerrujen di ddunit anda ara ten-yečč ubeεεuc d ṣṣdiḍ, anda
ara ten-akren wid ifettken leḥyuḍ.
20 Meεna sxeznet axiṛ
igerrujen deg igenwan anda ur llin ibeεεac d ṣṣdiḍ
isserkuyen, anda ur zmiren ara imakaren ad fetken neγ ad akren.
21 Axaṭer anda yella
ugerruj-ik, dinna ara yili wul-ik.
22 Allen, ț-țiftilin n
lǧețța, ma yella seḥḥant wallen-ik, aț-țilliḍ s
lekmal-ik di tafat.
23 Lameεna, ma yella
allen-ik ur seḥḥant ara, aț-țiliḍ di ṭṭlam. Ma yella dγa
allen-ik ur seḥḥant ara, tafat yellan deg-k d ṭṭlam, acḥal
ihi berrik ṭṭlam i deg telliḍ.
Anezgum
24 Ur izmir yiwen ad
iqdec γef sin imεellmen deg yiwet n tikkelt. Ma iḥemmel yiwen,
ad ikṛeh wayeḍ ; ma yeṭṭef deg yiwen, ad iḥqeṛ wayeḍ. Ur
tezmirem ara ihi aț-țεebdem ṛebbi akk-d idrimen !
25 Daymi i wen-d-qqaṛeγ
: ur țḥebbiṛet ara i tudert-nwen, γef wayen ara teččem d
wayen ara teswem akk-d wayen ara telsem. Acu i gesεan azal,
ț-țudert neγ d lqut ? D lǧețța neγ d llebsa ? Tudert tugar
lqut, lǧețța tugar llebsa !
26 Walit igṭaṭ ( ifṛax
) deg igenwan : ur zerrεen, ur meggren, ur jemmεen ula d acemma
γer ikuffan, meεna Baba-twen yellan deg igenwan, yețțak-asen-d
tamεict-nsen. Eεni ur teswim ara akteṛ n yefṛax ?
27 Anwa i gzemren s
uḥebbeṛ, ad yernu kra n wussan i leεmeṛ-is ?
28 Iwacu ara tḥebbṛem
γef llebsa ? Walit amek i gemmun ijeǧǧigen n lexla : ur
zeṭṭen, ur țellmen,
29 lameεna a wen-iniγ :
ula d agellid Sliman s yiman-is di ccan-is ameqqran, ur yelsi am
yiwen seg-sen.
30 Ma yella ṛebbi
islusuy akka leḥcic yellan di lexla ass-agi, azekka ad
ițwadeggeṛ γer tmes, amek ur kkun-islusu ara ula d kunwi ay
imdanen ixuṣṣen di liman ?
31 Kkset anezgum i
yiman-nwen, ur qqaṛet ara : d acu ara nečč, d acu ara nsew
neγ d acu ara nels ?
32 Axaṭer ayagi d
imejhal i gețḥebbiṛen fell-as. Ma d Baba-twen yellan deg
igenwan, yeẓra ayen akk teḥwaǧem !
33 Nadit uqbel γef
tgeldit n Sidi ṛebbi d wayen yellan d lḥeqq, ayen nniḍen
meṛṛa d nețța ara wen-t-id yefken.
34 Ur țḥebbiṛet ara
ihi i uzekka, axaṭer azekka s unezgum-is weḥd-es. Yal ass s
leεtab-ines !
Ixef
7
Ur
țḥasabet ara wiyaḍ
1 Ur țḥasabet ara
wiyaḍ iwakken ur kkun-ițḥasab ula d yiwen.
2 Akken tețḥasabem
wiyaḍ ara kkun-iḥaseb Sidi ṛebbi. A wen-d-iktil s lkil s
wayes tețțektilim i wiyaḍ.
3 Acuγeṛ tețmuqquleḍ
axeclaw yellan di tiṭ n gma-k, kečč ur nețwali ara tigejdit
yellan di tiṭ-ik ?
4 Amek ara tiniḍ i gma-k
: « Eǧǧ-iyi ad kkseγ axeclaw-nni yellan di tiṭ-ik, » kečč
yesεan tigejdit di tiṭ-ik ?
5 A bu sin wudmawen !
Ekkes uqbel tigejdit yellan di tiṭ-ik, imiren aț-țwaliḍ amek
ara d-tekkseḍ axeclaw yellan di tiṭ n gma-k.
6 Ur țțaket ara ayen
yeṣfan i yeqjan, ur ṭeggiṛet ara tiεeqcin γlayen zdat
yilfan, m'ulac a ten ṛekḍen yerna a d-zzin fell-awen a
kkun-gezren.
7 Ssutret, a
wen-d-ițunefk ! Nadit, aț-țafem ! Sqerbebbet, a wen-d-ldin !
8 Axaṭer kra n win ara
issutren, a s-d-ițțunefk ! Win ițnadin, ad yaf ! A s-d-teldi
tewwurt i win ara isṭebṭben.
9 Anwa deg-wen ara yefken
ablaḍ i mmi-s ma yessuter-as-d aγṛum ?
10 Neγ, anwa deg-wen ara
yefken azrem i mmi-s ma yella yessuter-as-d aslem ?
11 Ma yella kunwi yellan
d imcumen tessnem aț-țefkem ayen yelhan i warraw-nwen, amek
Baba twen yellan deg igenwan ur d-ițțak ara ayen yelhan i wid
ara s-t-issutren ?
12 Ihi, xedmet i wiyaḍ
ayen i tebγam a wen-t-xedmen i kunwi, axaṭer akka i
γ-d-tweṣṣa ccariεa n Musa akk-d lenbiya.
Sin
iberdan
13 Kecmet si tewwurt
iḍeyqen ! Axaṭer acḥal tewseε tewwurt, acḥal yeshel webrid
yețțawin γer nnger, yerna aṭas i gețεeddayen syenna.
14 Meεna acḥal teḍyeq
tewwurt, acḥal yewεeṛ webrid yețțawin γer tudert yerna drus
i gețεeddayen syenna.
Ttejṛa
tețwaεqal s lfakya-s
15 ḥadret iman-nwen si
lenbiya n lekdeb ! țțasen-d γur-wen am izamaren, nutni γer
daxel d uccanen.
16 A ten-tεeqlem s
lecγal-nsen. UUr d-nțekkes ara tiẓurin seg inijel, neγ lexṛif
seg isennanen.
17 Ttejṛa yelhan,
tețțak-ed lfakya yelhan, yir ttejṛa tețțak-ed lfakya n
diri.
18 Ttejṛa yelhan ur
tezmir ara a d-tefk yir lfakya, akken daγen yir ttejṛa ur
tezmir ara a d-tefk lfakya yelhan.
19 Yal ttejṛa ur
d-nețțak ara lfakya lεali aț-țețwagzem, aț-țețwaḍeggeṛ
γer tmes.
20 S wakka, s lecγal-nsen
ara tεeqlem lenbiya n lekdeb.
21 Mačči d wid kan i
yi-d-iqqaṛen : « A Sidi, a Sidi » ara ikecmen γer tgelda n
igenwan, meεna d wid ixeddmen lebγi n Baba yellan deg igenwan.
22 Aṭas ara yi-d-yinin
ass n lḥisab : « a Sidi a Sidi, s yisem-ik i nbecceṛ imeslayen
s γur ṛebbi, s yisem-ik i nessufeγ leǧnun, s yisem-ik i
nexdem aṭas n lbeṛhanat ! »
23 Dγa a sen-d-rreγ :
beεdet akkin fell-i a wid ixeddmen cceṛ, ur kkun ssineγ ara !
Lebni
iseḥḥan
24 Akka, s kra n win
yesmeḥsisen i wawal-iw yerna ixeddem-it, ițemcabi γer wemdan
aεeqli yebnan lsas n wexxam-is γef wezṛu.
25 Ageffur ( lehwa )
yeγli-d, isaffen ḥemlen-d, aḍu ihubb-ed γef wexxam-nni, meεna
ur yeγli ara, axaṭer lsas-is yers γef wezṛu.
26 Ma d win ismeḥsisen i
wawal iw, ur nxeddem ara wayen i d-qqaṛeγ, icuba γer wemdan ur
nețxemmim ara, i gebnan axxam-is γef ṛṛmel ;
27 yeγli-d ugeffur,
ḥemlen-d isaffen, ihubb-ed waḍu γef wexxam-nni, imiren yeγli.
Lexsaṛa-s ț-țameqqrant !
28 Mi gfukk Sidna Σisa
aselmed, lγaci akk wehmen deg imeslayen-ines,
29 axaṭer isselmad-iten
s tissas, mačči am lecyux-nsen.
Ixef 8
Amdan
yeḥlan si lbeṛs
1 Mi d-yuder Sidna Σisa
seg udrar, aṭas n lγaci i t-id-itebεen.
2 Ataya yiwen wemdan
ihelken lbeṛs yusa-d γur-es, iseǧǧed zdat-es, yenna-yas : A
Sidi, ma yella tebγiḍ, tzemreḍ a yi-tseḥluḍ.
3 Sidna Σisa yessers
afus-is fell-as, yenna-yas : Bγiγ ! Ili-k teḥliḍ ! IImiren kan
iḥla wergaz-nni si lbeṛs-ines, yeṣfa weglim-is.
4 Dγa Sidna Σisa
yenna-yas : ḥader aț-țeḥkuḍ ula i yiwen γef wayagi, meεna
ṛuḥ γer yiwen si lmuqedmin a k-iẓer, ad iwali belli teṣfiḍ,
tefkeḍ lweεda-nni n tezdeg s wayes i wen-d-yumeṛ nnbi Musa,
iwakken ayagi a sen-yili d țbut.
Aqeddac
n lḥakem aṛumani
5 Akken i gekcem Sidna
Σisa γer temdint n Kafernaḥum, ataya yiwen umeqqran n lεeskeṛ
n ṛuman iqeṛṛeb ed γur-es, iḥellel-it, yenna yas :
6 A Sidi, aqeddac-iw
yenṭer, atan iḍleq deg wexxam, yekref !
7 Sidna Σisa yenna-yas :
Ad ṛuḥeγ a t-sseḥluγ.
8 Ameqqran n lεeskeṛ
yerra-yas : A Sidi, ur uklaleγ ara aț-țkecmeḍ γer wexxam-iw,
meεna ini-d kan yiwen n wawal, aqeddac-iw ad iḥlu.
9 Axaṭer nekk s yiman-iw
akken sεiγ wid iḥekmen fell-i, i sεiγ wid yellan seddaw n
lḥekma-w. Ad iniγ i yiwen ṛuḥ ad iṛuḥ, ad iniγ i wayeḍ
aṛwaḥ a d-yas, ad iniγ daγen i uqeddac-iw : xdem aya, a
t-ixdem.
10 Mi gesla Sidna Σisa imeslayen-agi itεeǧǧeb,
yenna i wid yellan dinna : A wen-iniγ tideț, ger wat Isṛail
meṛṛa ur ufiγ ara liman am wagi.
11 A wen-iniγ daγen :
aṭas ara d-yasen si cceṛq d lγeṛb, ad ṭṭfen imukan γer tama
n Ibṛahim, n Isḥaq akk-d Yeεqub di tgelda n igenwan.
12 Meεna aṭas seg wid i
gγilen ad weṛten tagelda ara yețwaḍeggṛen γer beṛṛa, γer
ṭṭlam anda ara ilin imeṭṭawen, nndama tameqqrant akk-d
weqṛac n tuγmas.
13 Sidna Σisa yenna i
umeqqran-nni n lεeskeṛ : ṛuḥ, imi tumneḍ atan wayen i
tḍelbeḍ a k-id-yaweḍ ! Di teswiεt-nni, yeḥla uqeddac-is.
Sidna
Σisa yesseḥlay imuḍan
14 Sidna Σisa iṛuḥ γer
wexxam n Buṭrus, yufa taḍeggalt n Buṭrus deg usu tuγ-iț
tawla.
15 Innul afus-is, dγa
teffeγ-iț tawla-nni. Imiren kan tekker-ed, tebda tqeddec-asen.
16 Mi geγli yiṭij,
wwin-d i Sidna Σisa aṭas n yemdanen ițwamelken. S wawal-is,
issufeγ seg-sen leǧnun yerna yesseḥla imuḍan meṛṛa.
17 Ixdem ayagi iwakken ad
ițwakemmel wawal i d-yenna nnbi Iceεya : Yewwi leεyub-nneγ ,
iεebba lehlakat-nneγ. Win yebγan ad iddu d Sidna Σisa
18 Sidna Σisa mi gwala
annect-nni n lγaci yezzi-yas-d, yumeṛ i inelmaden-is ad zegren
γer ugemmaḍ n lebḥeṛ.
19 Yiwen lεalem n ccariεa
iqeṛṛeb γer Sidna Σisa, yenna-yas : A Sidi, anda teddiḍ ad
dduγ.
20 Sidna Σisa yerra-yas :
Uccanen sεan lγiṛan, ifṛax n igenni sεan leεcuc, ma d Mmi-s n
bunadem ur yesεi ara anda ara yessers aqeṛṛuy-is.
21 Yiwen seg
inelmaden-is, yenna-yas : A Sidi, semmeḥ-iyi ad ṛuḥeγ ad
meḍleγ baba.
22 Sidna Σisa yerra-yas :
Ddu yid-i eǧǧ wid yemmuten ad meḍlen lmegtin-nsen.
Tabuciḍant
23 Sidna Σisa yuli γer
teflukt, ddan yid-es inelmaden-is.
24 Deg yiwet n teswiεt,
tekker-ed tbuciḍant di lebḥeṛ armi tγumm teflukt-nni s
lemwaji. Sidna Σisa yella iṭṭes.
25 Qeṛṛben-d
γur-es
inelmaden-is, ssakin-t-id, nnan-as : A Sidi, sellek-aγ m'ulac a
nemmet !
26 Yenna-yasen : Acimi
tuggadem, a wid iwumi ixuṣṣ liman ! IImiren ikker, yumeṛ i
waḍu d lebḥeṛ ad rsen dγa ters-ed talwit ț-țameqqrant.
27 Wid iḥedṛen,
tεeǧǧben qqaṛen : Anwa-t wagi ? Ula d aḍu d lebḥeṛ
țțaγen-as awal !
Taqeḍεit n yilfan
28 Mi gewweḍ Sidna Σisa
agemmaḍ i lebḥeṛ, γer tmurt n at Gadaṛa, a ten-aya sin
yergazen yețwazedγen, ffγen-d si tmeqbeṛt, mmugren-t-id. Yiwen
ur izmir ad iεeddi seg webrid-nni axaṭer weεṛen aṭas.
29 Bdan țεeggiḍen : D
acu i tebγiḍ γur-nneγ a Mmi-s n ṛebbi ? Tusiḍ-ed iwakken a
γ-tεețbeḍ uqbel lweqt ?
30 Di leǧwahi-nni, tella
yiwet n tqeḍεit tameqqrant n yilfan i gkessen dinna.
31 Leǧnun-nni
țḥellilen Sidna Σisa, qqaṛen-as : Ma tessufγeḍ-aγ, ceggeε-aγ
γer tqeḍεit-ihina n yilfan.
32 Sidna Σisa yenna-yasen
: ṛuḥet ! Ffγen-d si sin-nni n yemdanen, kecmen deg
yilfan-nni. IImiren kan, grarben γer daxel n lebḥeṛ, γeṛqen,
mmuten akk.
33 Imeksawen-nni rewlen,
ṛuḥen γer temdint ad ḥkun ayen akk yedṛan d yergazen-nni
yețwamelken.
34 Imezdaγ akk n temdint
ffγen-d γer Sidna Σisa ; mi d-wwḍen γur-es, ḥellelen-t ad
iffeγ si tmurt-nsen.
Ixef 9
Ukrif
yeḥlan
1 Sidna Σisa yuli γer
teflukt, yezger lebḥeṛ yuγal γer temdint n Kafernaḥum.
2 Wwin-as-d yiwen wukrif
iḍleq γef wusu. Mi gwala liman n yemdanen-agi, yenna i
wukrif-nni : Ur țțaggad ara a mmi, țwaεeffan ak ddnubat-ik.
3 Llan dinna kra si
lεulama țxemmimen deg wulawen-nsen qqaṛen : Argaz-agi yekfeṛ
!
4 Dγa Sidna Σisa yeẓran
ayen țxemmimen, yenna-yasen : Acuγeṛ yir axemmem-agi deg
ulawen-nwen ?
5 D acu i gsehlen a
t-id-iniγ : « țwaεfan-ak ddnubat-ik neγ kker telḥuḍ » ?
6 Meεna iwakken
aț-țeẓrem belli Mmi-s n bunadem yesεa tazmert di ddunit-agi
ad yeεfu ddnubat... Yenna i wukrif-nni : Ekker, ddem usu-inek
tṛuḥeḍ γer wexxam-ik !
7 Imiren, argaz-nni
yekker, iṛuḥ γer wexxam-is.
8 Mi walan ayagi, lγaci
akk ikcem-iten lxuf, țḥemmiden Sidi ṛebbi, imi i d-ifka
tazmert am tagi i yemdanen.
Sidna
Σisa issawel i Matta
9 Mi gεedda zdat wexxam
anda țxelliṣen tabzert, ( leγṛama ) Sidna Σisa iwala yiwen
umekkas isem-is Matta, yenna-yas : Ddu-d yid-i ! IImiren kan
ikker Matta, yedda yid-es.
10 Mi llan tețțen deg
wexxam n Matta, aṭas n imekkasen akk-d yir imdanen i d-yusan,
qqimen akk-d Sidna Σisa d inelmaden-is, tețțen yid-sen.
11 Ifariziyen mi walan
ayagi nnan i inelmaden-is : Acuγeṛ Ssid-nwen iteț akk-d
imekkasen d yir imdanen ?
12 Sidna Σisa yesla i
wayen i d nnan, yerra-yasen : Mačči d wid iseḥḥan i
geḥwaǧen ṭṭbib, meεna d wid ihelken.
13 Meyzet γef lmeεna n
wawal-agi yellan di tira iqedsen : D ulawen yeṣfan i bγiγ
mačči d iseflawen n lmal. AAxaṭer ur d-usiγ ara ad ssiwleγ i
iḥeqqiyen iwakken a d uγalen γer webrid, meεna i imednuben.
Asteqsi
γef wuẓummu
14 Inelmaden n Yeḥya
aγeṭṭas usan-d γer Sidna Σisa nnan-as : Acuγeṛ nukkni akk-d
ifariziyen nețțuẓum ma d inelmaden-ik ur țțuẓumen ara ?
15 Sidna Σisa yerra-yasen
: Eεni inebgawen n tmeγṛa zemren ad ilin di leḥzen skud yella
yesli yid-sen ? A d-yas wass i deg ara sen-ițwakkes yesli,
imiren ad uẓummen.
16 Ur nezmir ara a nxiḍ
tafaweț tajḍiṭ i uceṭṭiḍ aqdim, axaṭer tafaweț-nni
tajḍiṭ aț-țejbed aceṭṭiḍ-nni aqdim, acerrig-nni ad
innerni.
17 Ur nețεemmiṛ ara
daγen iyeddiden iqdimen s ccṛab ajdid, neγ m'ulac ad fellqen,
ccṛab ad inγel, iyeddiden ad xesṛen ; meεna a nerr ccṛab
ajdid deg yeddiden ijdiden, s wakkenni ccṛab d uyeddid ad
țwaḥerzen. ḥeggu n yelli-s n Jayṛus ḥellu n yiwet n
tmeṭṭut
18 Mazal Sidna Σisa
ițmeslay, yusa-d yiwen n ccix n lǧameε iseǧǧed zdat-es,
yenna-yas : Tura kan i temmut yelli, di leεnaya-k as-ed
aț-țserseḍ afus-ik fell-as, a d-teḥyu !
19 Sidna Σisa ikker yedda
yid-es nețța d inelmaden-is.
20 Ațaya yiwet n
tmeṭṭut yuḍnen ssiq tnac iseggasen aya, tekka-yas-d si
deffir, tennul tacḍaṭ n ubeṛnus-is,
21 axaṭer teqqaṛ deg
ul-is : « lemmer zemreγ ad nnaleγ γas ula ț-țacḍaṭ n
ubeṛnus-is, ad ḥluγ. »
22 Sidna Σisa yezzi γer
deffir, mi ț-iwala yenna-yas : Ur țțaggad a yell-i, liman-im
isseḥla-kkem. SSeg imiren tameṭṭut-nni teḥla.
23 Mi gewweḍ Sidna Σisa
γer wexxam n ccix-nni, yufa lγaci țmeǧǧiden, yerna nhewwalen
meṛṛa. Yenna-yasen :
24 Ffγet syagi, taqcict
ur temmut ara, d iḍes kan i teṭṭes. DDγa țmesxiṛen fell-as.
25 Mi ssufγen lγaci,
ikcem, yeṭṭef-ed taqcict-nni seg ufus, dγa tekker-ed.
26 Yeffeγ lexbaṛ-agi di
tmurt meṛṛa. ḥellu n sin iderγalen
27 Mi gṛuḥ Sidna Σisa
syenna, tebεen-t sin iderγalen, țεeggiḍen : A mmi-s n Sidna
Dawed, ḥunn fell-aγ !
28 Mi gewweḍ γer wexxam,
iderγalen-nni kecmen γur-es, dγa Sidna Σisa yenna-yasen :
Tumnem belli zemreγ a wen xedmeγ ayen i yi-d-tessutrem ?
RRran-as : Ih a Sidi numen !
29 Innul allen-nsen,
yenna : A wen-ițwaxdem s wakken yella liman-nwen !
30 Dγa yuγal-asen-d
yeẓri. Sidna Σisa yeggul deg-sen : γur-wat ad iffeγ lexbaṛ
γef wayagi !
31 Meεna akken kan ffγen,
bdan aberreḥ, lexbaṛ-nni yekka-d meṛṛa tamurt. ḥellu n win
yesgugem uṛuḥani
32 Mi ṛuḥen sin-nni, a
ten-aya wiyaḍ wwin-as-d yiwen wergaz i gesgugem uṛuḥani.
33 Akken issufeγ Sidna
Σisa aṛuḥani-nni, agugam-nni yebda ițmeslay. Lγaci akk
tεeǧben, qqaṛen : Leεmeṛ neẓri ayagi di tmurt n wat Isṛail
!
34 Lameεna ifariziyen
qqaṛen : S tezmert n ugellid n leǧnun i ten-issufuγ.
Wid
iḍaεen
35 Sidna Σisa yekka-d γef
temdinin ț-țudrin meṛṛa, yesselmad di leǧwameε nsen,
yețbecciṛ lexbaṛ n lxiṛ n tgeldit n Sidi ṛebbi, isseḥlay
mkul aṭan d mkul lεib.
36 Sidna Σisa tegzem
tasa-s mi gwala annect-nni n lγaci εyan, feclen, ḥeznen am ulli
ur nesεi ameksa.
37 Dγa yenna i
inelmaden-is : Tamegra meqqṛet, meεna drus ifellaḥen i gellan.
38 ḥellelet ihi bab n
tmegra a d iceggeε ixeddamen γer tmegra-s.
Ixef
10
Tnac
inelmaden imezwura
1 Sidna Σisa yessawel i
tnac inelmaden-is, yefka-yasen tazmert s wayes ara ssufuγen
leǧnun, ara seḥluyen mkul aṭan d mkul lεib.
2 Atnan yismawen n
tnac-nni inelmaden n Sidna Σisa :Amezwaru d Semεun ițțusemman
Buṭrus akk-d gma-s Andriyus, Yeεqub mmi-s n Zabadi akk-d gma-s
Yuḥenna,
3 Filibus d Bartelmay,
Suma akk-d Matta amekkas n tebzert, Yeεqub mmi-s n ḥalfi akk-d
Taddi ;
4 Semεun awaṭani, Yudas
n Qeṛyut, win akken ixedεen Sidna Σisa.
5 Sidna Σisa iceggeε tnac
inelmaden-is, iweṣṣa-ten : Ur țṛuḥut ara γer tmura
tibeṛṛaniyin, ur keččmet ara γer temdinin n at Samarya ;
6 ṛuḥet axiṛ γer wat
Isṛail yellan am ulli iḍaεen.
7 M'ara tețțeddum,
țbecciṛet qqaṛet : « Ațaya tgeldit n igenwan tqeṛṛeb-ed »
!
8 Sseḥlut imuḍan,
sseḥyut-ed lmegtin, ssizdeget wid ihelken lbeṛs, ssufγet
leǧnun. Akken i wen-d-ițțunefk mbla idrimen, fket ula d kunwi
mbla idrimen.
9 Ur țțawit yid-wen ama
d ddheb, ama d lfeṭṭa, ama d idrimen ;
10 ur țțawit yid-wen
agrab neγ sin iqendyaṛ, ur țțawit irkasen neγ aεekkaz,
axaṭer axeddam yuklal lqut-is.
11 Di yal tamdint neγ
taddart anda ara tkecmem, steqsit ma yella win ara yesṭerḥben
yis-wen, qqimet γur-es alamma tekkrem aț-țṛuḥem.
12 M'ara tkecmem γer
yiwen wexxam, sellmet fell-asen,
13 ma sṭerḥben yis-wen,
lehna-nwen aț-țers fell-asen ; ma yella ur sṭerḥben ara
yis-wen, lehna-nwen aț-țeqqim γur-wen.
14 M'ur qbilen ara ad
sṭreḥben yis-wen neγ ad semḥessen i wawal, ffγet seg
wexxam-nni neγ si temdint nni, zwit ula d aγebbaṛ seg
iḍaṛṛen nwen.
15 A wen-iniγ tideț :
ass n lḥisab, imezdaγ n temdint-agi ad țțuεaqben akteṛ n
temdinin n Sudum akk-d Gumuṛ.
Aqehheṛ i d-iteddun
16 Atan, a kkun-ceggεeγ
am ulli ger wuccanen, ḥeṛcet ihi am izerman, sεut neyya am
yetbiren.
17 ḥadret γef
yiman-nwen, axaṭer kra n yemdanen a kkun-sbedden γer ccṛeε;
yerna a kkun-wten s ujelkaḍ di leǧwameε-nsen.
18 Γef ddemma n yisem-iw,
a kkun-sbedden zdat lḥekkam akk-d igelliden, iwakken am nutni
am at leǧnas nniḍen, ad slen s yisem-iw.
19 M'ara kkun-ṭṭfen, ur
țḥebbiṛet ara γef wamek ara temmeslayem, neγ γef wayen ara
d-tinim, imeslayen ara d-tinim, a wen-d-țțunefken di teswiεt
nni kan.
20 Axaṭer mačči d
kunwi ara imeslayen, meεna d ṛṛuḥ n Baba ṛebbi ara
d-imeslayen seg-wen.
21 Amdan ad yefk gma-s
γer lmut, ababat ad yefk mmi-s, dderya a d kkren γer
imawlan-nsen, a ten ssiwḍen γer lmut.
22 A kkun-keṛhen irkul
γef ddemma n yisem-iw, meεna win ara yeṭṭfen alamma
ț-țaggara, ad ițțusellek.
23 M'ara tețwaqehṛem
deg yiwet n temdint, rewlet γer tayeḍ. A wen-iniγ tideț :
Mmi-s n bunadem a d-yuγal uqbel a d-tekkem tudrin meṛṛa n
tmurt n wat Isṛail.
24 Ulac anelmad yugaren
ccix-is neγ aqeddac yellan sennig umεellem is.
25 Akken ițwaḥseb ccix
ara yețwaḥseb unelmad-is. Daγen akken yella wemεellem ara yili
uqeddac-is. Ma semman i bab n wexxam Balzabul iḥekkmen γef
leǧnun, amek ur țsemmin ara akkenni i wat wexxam-is !
Sεut
tissas !
26 Ur ten-țaggadet ara
ihi ! Axaṭer kra n wayen yeffren a d-iḍheṛ, kra n lbaḍna
yellan a d-tban.
27 Ayen i wen-qqaṛeγ deg
iḍ, init-eț εinani deg wass, ayen slan imeẓẓuγen-nwen di
sser, berrḥet-eț deg iberdan.
28 Ur țțaggadet ara wid
ineqqen lǧețța lameεna ur zmiren ara ad nnγen ṛṛuḥ,
aggadet win izemren ad iḍeggeṛ ṛṛuḥ akk-d lǧețța γer
ǧahennama.
29 Eεni ur znuzun ara sin
iẓiwcen s uṣuṛdi ? Meεna ula d yiwen deg-sen ur d-iγelli γer
lqaεa mbla lebγi n Baba ṛebbi.
30 Ula d anẓaden
uqeṛṛuy-nwen țwaḥesben irkulli.
31 Ihi ur țțaggadet ara
: tesεam azal akteṛ n waṭas n iẓiwcen !
32 Kra win ara yessetḥin
s yisem-iw zdat yemdanen, ula d nekk, ad ssetḥiγ yis zdat Baba
yellan deg igenwan.
33 Kra win ara yi-nekṛen
zdat yemdanen, a t-nekkṛeγ ula d nekk zdat Baba yellan deg
igenwan.
34 γur-wat aț-țγilem d
lehna i d wwiγ γer ddunit ; mačči d lehna i d-wwiγ, meεna d
ccwal i d-wwiγ.
35 Axaṭer wwiγ-d lfiṛaq
ger weqcic d baba-s, ger teqcict d yemma-s, ger teslit
ț-țemγaṛt-is,
36 a d-kkren yeεdawen seg
at wexxam.
37 Win iḥemmlen baba-s d
yemma-s neγ mmi-s d yelli-s akteṛ iw ur yuklal ara ad yili d
anelmad-iw.
38 Kra win ur neqbil ara
ad inεețțab γef ddemma n yisem-iw iwakken ad iyi-itbeε, ur
yuklal ara ad yili d anelmad-iw.
39 Win iḥerzen
taṛwiḥt-is, a s-tṛuḥ, ma d win ara isebblen taṛwiḥt-is γef
ddemma-w ad yuγal a ț-yaf.
40 Win isṭerḥben
yis-wen, yis-i i gesṭerḥeb, win isṭerḥben yis-i, isṭerḥeb
s win i yi-d-iceggεen.
41 Win isṭerḥben s nnbi
imi s γur ṛebbi i d-yusa a s-d-ițțunefk wayen yuklal nnbi,
win isṭerḥben s uḥeqqi imi d aḥeqqi i gella, a s-d-ițunefk
wayen yuklal uḥeqqi.
42 Kra win ara yefken
lkas n waman isemmaḍen i yiwen seg imecṭuḥen-agi imi d
anelmad-iw i gella, a wen-iniγ tideț : ur a s-ițṛuḥ ara
lḥeqq yuklal.
Ixef 11
1 Mi gweṣṣa tnac-nni
inelmaden is, Sidna Σisa iṛuḥ syenna ad ibecceṛ di tudrin n
leǧwahi-nni.
2 Yeḥya yellan di
lḥebs, yesla s lecγal n Lmasiḥ, iceggeε
γur-es inelmaden is
iwakken a s-inin :
3 D kečč i d win akken
ara d yasen neγ ilaq-aγ a nerǧu wayeḍ ?
4 Sidna Σisa
yerra-yasen-d : ṛuḥet ssiwḍet-as lexbaṛ i Yeḥya γef wayen
twalam d wayen teslam :
5 Iderγalen țwalin,
iquḍaren leḥḥun, ibeṛsiyen ṣeffun, iεeẓẓugen sellen,
lmegtin ḥeggun-d, lexbaṛ n lxiṛ ițțubecceṛ i yimeγban.
6 D aseεdi win iwumi ur
țțiliγ ara d sebba n tuccḍa ( ugur ) !
7 Mi ṛuḥen
inelmaden-is, Sidna Σisa yebda iheddeṛ i lγaci γef Yeḥya : D
acu i tṛuḥem a t-id-teẓrem deg unezṛuf ? D aγanim yețhuzzu
waḍu ?
8 Γer wacu i tṛuḥem
aț-țfeṛǧem ? ΓΓer yiwen wergaz yelsan llebsa ifazen ? Wid
yețlusun llebsa ifazen, deg ixxamen n igelliden i țțilin.
9 Anwa i γer tṛuḥem a
t-id-teẓrem ihi ? D yiwen n nnbi ? țideț ih, d nnbi ! A
wen-iniγ : yugar nnbi.
10 Axaṭer d nețța i
γef yura : Atan zewwreγ zdat-ek amceggeε-inu, iwakken ad iheggi
abrid zdat-ek.
11 A wen-iniγ tideț :
ulac mmi-s n tmeṭṭut yugaren Yeḥya aγeṭṭas. Lameεna,
amecṭuḥ maḍi di tgelda n igenwan, meqqeṛ akteṛ-is.
12 Seg wussan-nni i deg
ițbecciṛ Yeḥya aγeṭṭas armi ț-țura, imdanen țnaγen γef
tgelda n igenwan, bγan a ț-țkecmen s ddreε.
13 Axaṭer ccariεa n
Musa d lenbiya hedṛen-d γef tgelda n igenwan armi d lweqt n
Yeḥya aγeṭṭas.
14 Ma tebγam
aț-țfehmem, d nețța i d Ilyas-nni ilaqen a d-yas.
15 Win yesεan
imeẓẓuγen, isel-ed !
16 Γer wuγur ara metleγ
lǧil-agi ? Icuba γer warrac yeqqimen deg uzniq, ssawalen i
warrac nniḍen, qqaṛen asen :
17 Newwet ajewwaq uur
tecḍiḥem ara, nnecna cnawi n leḥzen uur tmeǧdem ara.
18 Axaṭer Yeḥya yusa-d,
ur iteț ur itess, tennam : « izdeγ-it uṛuḥani. »
19 Mmi-s n bunadem
yusa-d, iteț, itess am wiyaḍ, teqqaṛem : «` Ițxemmim kan γef
wučči ț-țissit, d amdakkul n imekkasen ixeddaεen akk-d yir
imdanen » lameεna tideț tban-ed s lecγal-is.
Timdinin yugin ad
amnent
20 Sidna Σisa ibda
ițlumu timdinin nni i deg ixdem aṭas n lbeṛhanat, axaṭer
imezdaγ-is ur d-uγalen ara γer webrid n ṛebbi.
21 A nnger-im a tamdint n
Kurazim ! A nnger-im a tamdint n Bitsayda ! Axaṭer lemmer
lbeṛhanat yedṛan deg-kkunt dṛan di temdinin n
Ṣur akk-d
Sidun, tili imezdaγ-nsent aṭas aya i sburren tacekkaṛt n
leḥzen, qqimen γef yiγiγden iwakken a d sbegnen belli ndemmen
uγalen-d γer ubrid n ṛebbi.
22 Daymi, imezdaγ n
temdinin-agi ad țuεaqben akteṛ n wid n temdinin
n Ṣur akk-d
Sidun.
23 Ula d kemm a tamdint n
Kafernaḥum, tγileḍ aț-țaliḍ γer igenni ? Xaṭi !
Aț-țețwaḍeggreḍ γer laxeṛt ; axaṭer lemmer di temdint n
Sudum i dṛan lbeṛhanat i gedṛan γur-em, tili mazal-iț ar
ass-a !
24 Daymi, ass n lḥisab
anegaru aț-țețțuεaqbeḍ akteṛ n tmurt n Sudum.
Azaglu
fessusen
25 Di lweqt-nni, Sidna
Σisa inṭeq yenna : ḥemmdeγ-k a Baba ṛebbi, a Bab igenwan d
lqaεa, imi i d tessekneḍ i imecṭaḥ ayen i teffreḍ i
imusnawen d lεuqal.
26 Ih a Baba ṛebbi !
ḥemmdeγ-k imi d wagi i d lebγi-k.
27 Baba ṛebbi yerra-d
kullec ger ifassen-iw. YYiwen ur yessin Mmi-s n ṛebbi anagar
Baba ṛebbi ! Yiwen ur issin daγen Baba ṛebbi anagar Mmi-s
akk-d win iwumi yebγa Mmi-s a s-t-id-isken.
28 Aset-ed γur-i a wid
akk yeεyan, iεebban taεekkumt ẓẓayen, a wen-fkeγ talwit d
westeεfu.
29 Refdet γef tuyat-nwen
azaglu inu tlemdem s γur-i, axaṭer ul-iw yeččuṛ d ṛṛeḥma
yerna d aḥnin, aț-țafem talwit i teṛwiḥin-nwen.
30 Azaglu-inu yeshel,
taεekkumt-iw fsuset.
Ixef 12
Ass n
westeεfu
1 Yiwet n tikkelt, deg
wass n ssebt yellan d ass n westeεfu, Sidna Σisa izger igran n
yirden. Inelmaden-is lluẓen, bdan țekksen-d tigedrin,
tețțen-tent.
2 Ifariziyen mi
ten-walan, nnan i Sidna Σisa : Acuγeṛ inelmaden-ik xeddmen ayen
iḥeṛmen deg wass n westeεfu ?
3 Meεna Sidna Σisa
yerra-yasen : Eεni ur teγṛim ara wayen yexdem ugellid Dawed, mi
gelluẓ nețța d wid yellan yid-es ?
4 Mi gekcem γer wexxam
iqedsen, yečča seg weγṛum-nni yețțunefken d lweεda i
lmuqedmin yerna yefka seg-s i imdukkal-is !
5 Eεni ur teγṛim ara di
tektabt n ccariεa n Musa belli lmuqedmin xeddmen γas akken d
ass n westeεfu yerna mačči d leḥṛam fell-asen ?
6 Ihi a wen-d-iniγ :
yella dagi win yugaren axxam iqedsen.
7 Lemmer tfehmem d acu i
d lmeεna n wawal-agi : D ulawen yesεan ṛṛeḥma i bγiγ mačči
d isflawen n lmal ttili ur tḥekkmem ara s lmut γef wid ur
neḍlim ara !
8 Axaṭer Mmi-s n
bunadem, d nețța i gḥekmen γef wass n westeεfu.
Win
iwumi yekref ufus
9 Syenna, yerra γer yiwen
n lǧameε,
10 yella dinna yiwen
wergaz iwumi yekref ufus. Ifariziyen steqsan-t nnan-as : Eεni
iḥlel useḥlu deg wass n westeεfu ? Steqsan-t akka, iwakken a
s-d-afen sebba s wayes ara t-sḍelmen.
11 Yerra-yasen : Anwa
deg-wen yesεan yiwet n tixsi kan, ma yella teγli γer tesraft deg
wass n westeεfu ur ț-id-issalay ara ?
12 Eεni tixsi teswa
akteṛ n wemdan ? Ihi, yeḥlel a nexdem lxiṛ deg wass n
westeεfu !
13 Imiren Sidna Σisa
yenna-yas i wergaz-nni : Sleq-ed afus-ik ! YYeḍleq afus-is, dγa
yuγal iṣeḥḥa am ufus nniḍen.
14 Ifariziyen ffγen,
ṛuḥen mcawaṛen wway gar-asen amek ara a s-d-afen sebba s
wayes ara t-nγen.
Aqeddac
n Sidi ṛebbi
15 Mi gesla bγan a
t-nγen, Sidna Σisa iṛuḥ syenna. Aṭas i geddan yid-es,
yesseḥlay imuḍan meṛṛa,
16 iqqaṛ-asen : γur-wat
aț-țessufγem lexbaṛ !
17 Iwakken ad idṛu wayen
yenna nnbi Iceεya :
18 Ataya uqeddac-iw i
xtaṛeγ, win eεzizen fell-i, deg-s i gella lfeṛḥ-iw. A d-yers
ṛṛuḥ-iw fell-as, ad ibecceṛ lḥeqq i leǧnas.
19 Ur iskkaray ara ccwal,
ur ițεeggiḍ ara, ur ițḥettim ara iman-is γef wiyaḍ.
20 Ur ițkemmil ara i
uγanim iceqqeqen, ur isnusuy ara taftilt yețmețțaten, alamma
yesbedd lḥeqq.
21 Imiren leǧnas meṛṛa
ad ssirmen γur-es, fell-as ara țeklen.
Argaz
agugam, aderγal
22 Wwin-d i Sidna Σisa
yiwen wergaz i gesgugem, i gesderγel uṛuḥani. Yesseḥla-t,
yuγal wergaz-nni iheddeṛ, yețwali.
23 Lγaci meṛṛa wehmen
di Sidna Σisa qqaṛen : Mačči d wagi i d mmi-s n Sidna Dawed,
win akken ara d-yasen ?
24 Mi sen-slan ifariziyen
nnan : Argaz-agi yessufuγ leǧnun s tezmert n Balzabul iḥekkmen
γef leǧnun.
25 Sidna Σisa yeẓran
ayen i țxemmimen, yenna-yasen : Yal tagelda anda țnaγen lγaci
wway gar-asen, aț-țuγal aț-țenger. Yal taddart neγ yal axxam
i deg țnaγen imezdaγ wway gar-asen, ur d-yețγimi ara.
26
Ma yella Cciṭan issufuγ Cciṭan, atan yebḍa d yiman-is ! Amek
ihi ara d-tdum ddewla-s ?
27 Ma yella nekkini
ssufuγeγ leǧnun s tezmert n Balzabul, i warraw nwen s wacu i
ten ssufuγen ? Daymi, d arraw-nwen ara kkun-iḥasben !
28 Meεna ma yella nekkini
s ṛṛuḥ n ṛebbi i ssufuγeγ leǧnun, ihi tagelda n ṛebbi
ațan tewweḍ-ed armi d γur-wen.
29 Yiwen ur yezmir ad
ikcem γer wexxam n wergaz iǧehden iwakken a s-iddem ayla-as ma
yella ur t-yuriz ara uqbel, meεna m'ara t-yarez, imiren ad
yizmir ad iddem ayen akk yellan deg wexxam-is.
Win
ireggmen ṛṛuḥ iqedsen
30 Win ur nelli ara
yid-i, ixulef-iyi ; win ur d-njemmeε ara yid-i ițḍeggiε !
31 Daymi i wen-qqaṛeγ :
Mkul ddnub d mkul rregmat zemren ad țwasemmḥen i yemdanen, ma
d rregmat γef ṛṛuḥ iqedsen ur țwasemmaḥent ara !
32 Yal win ara iregmen di
Mmi-s n bunadem, a s-ițwasameḥ, ma d win ara iregmen ṛṛuḥ
iqedsen, ur s-ițwasamaḥ ara ama di lweqt-agi, ama di lweqt i
d-iteddun.
33 Σeqlet ttejṛa γer
lfakya-s : ma telha ttejṛa, a d-tefk lfakya yelhan, ma yella
diri-ț, a d-tefk lfakya n diri !
34 A ccetla n izerman,
amek ara d-tinim ayen yelhan ma yella kunwi diri-kkun ? Axaṭer
d ayen yellan deg ul i d-ițeffγen seg imi !
35 Argaz lεali
yessufuγ-ed ayen yelhan seg ugerruj yellan deg ul-is ma d amcum
yessufuγ-ed ayen n diri si lexzin n diri yellan deg ul-is !
36 Aql-i nniγ-awen-t :
ass n lḥisab, ad țțuḥasben yemdanen γef yal awal ur nesεi
lmeεna i d-iffγen seg yimi-nsen ;
37 axaṭer γef leḥsab n
imeslayen-ik ara tețțuḥasbeḍ, d imeslayen-ik ara d-isbeggnen
ma d aḥeqqi i telliḍ neγ d amcum.
Lemtel
n Yunes
38 Dγa kra n lεulama n
ccariεa akk-d ifariziyen nnan i Sidna Σisa : A Sidi, nebγa a
k-nwali txedmeḍ yiwen n lbeṛhan.
39 Sidna Σisa yerra yasen
: Lǧil am-agi ijehlen ixedεen ṛebbi, yessutur lbeṛhan, ur a
sen d-yețțunefkay ara lbeṛhan nniḍen anagar win n nnbi
Yunes.
40 Axaṭer akken yesεedda
nnbi Yunes tlata wussan d tlata wuḍan deg uεebbuḍ n uḥewtiw
ameqqran di lebḥeṛ, akken daγen ara yesεeddi Mmi-s n bunadem
tlata wussan d tlata wuḍan zdaxel n wakal.
41 Ass n lḥisab, imezdaγ
n temdint n Ninebi a d-kkren γer yemdanen n lǧil-agi ad ccetkin
fell-asen iwakken ad țțuḥasben, axaṭer nutni uγalen-d γer
webrid mi slan i ubecceṛ n nnbi Yunes. A wen-d-iniγ : atan
yella dagi win yugaren nnbi Yunes !
42 Ass n lḥisab,
tagellit n tmurt n ḥabac a d-tekker γer yemdanen n lǧil-agi
aț-țeccetki fell-asen iwakken ad țțuḥasben, axaṭer tusa-d
seg yixef n ddunit iwakken aț-țsel i tmusni n ugellid Sliman.
AAtan nniγ-awen yella dagi win yugaren agellid Sliman !
Tuγalin
n uṛuḥani
43 M'ara yețwaqecceε
uṛuḥani seg yiwen wemdan, ad ițezzi deg imukan yexlan, ad
ițqellib anda ara yaf ṛṛaḥa ur yețțaf ara.
44 Dγa ad yini : Ad
uγaleγ γer umkan ansi i d-ffγeγ ! Mi guγal γer wemdan-nni, ad
yaf amkan d ilem, zeddig yerna iseggem.
45 Imiren ad iṛuḥ a
d-yawi sebεa iṛuḥaniyen nniḍen i gweεṛen akteṛ-is, ad
kecmen γer dinna, ad zedγen. Lḥala n wergaz-nni aț-țenṭaṛ
akteṛ n tikkelt tamezwarut. Akka ara tedṛu d lǧil-agi
ijehlen.
Yemma-s
d watmaten n Sidna Σisa
46 Mazal Sidna Σisa
yețmeslay i lγaci, imi Yemma-s d watmaten-is llan di beṛṛa
bγan a t ẓren
47 mi d-yusa yiwen wergaz
yenna-yas : Yemma-k d watmaten-ik atnan di beṛṛa, bγan a
k-ẓren.
48 Sidna Σisa yerra-yas :
Anta i d yemma, anwi i d atmaten-iw ?
49 Iwehha s ufus-is γer
inelmaden is yenna : D wigi i d yemma d watmaten-iw !
50 Axaṭer win ixeddmen
lebγi n Baba yellan deg igenwan, d winna i d gma, i d weltma, i
d yemma.
Ixef 13
Lemtel
n win izerrεen
1 Ass-nni kan, Sidna Σisa
yeffeγ-ed seg wexxam, iṛuḥ ad iqqim rrif n lebḥeṛ,
2 d izumal n lγaci i
s-d-izzin, dγa yuli γer teflukt, yeqqim. LLγaci ibedd γef rrif n
lebḥeṛ,
3 nețța yebda
isselmad-iten s lemtul iqqaṛ-asen : Yiwen ufellaḥ yeffeγ ad
izreε.
4 Mi gzerreε, γlin-as kra
n iεeqqayen rrif n webrid, usan-d igṭaṭ ( ifṛax igenni )
ččan-ten.
5 Kra iεeqqayen nniḍen
γlin deg wakal yeččuṛen d izṛa, mγin-d s lemγawla axaṭer
ulac aṭas n wakal.
6 Mi gebda wezγal, yezlef
imγan nni dγa qquṛen, axaṭer ur sεin ara izuṛan lqayen.
7 Kra iεeqqayen nniḍen
γlin ger isennanen. Isennanen-nni gman dγa γummen-ten.
8 Meεna kra iεeqqayen
γlin deg wakal yelhan : fkan-d tigedrin, ta tefka-d meyya
iεeqqayen, ta sețțin, tayeḍ tlatin.
9 Win yesεan imeẓẓuγen
isel-ed !
10 Inelmaden-is qeṛṛben
γur-es, nnan-as : Acimi i sen-theddṛeḍ s lemtul ?
11 Yerra-yasen : Kunwi
yețțunefk-awen-d aț țissinem lbaḍna n tgelda igenwan, ma d
wiyaḍ, ur sen-d-ițțunefk ara.
12 Axaṭer win yesεan a
s-d-nernu alamma yella di tawant, ma d win ur nesεi ara, a
s-nekkes ula d ayen yesεa.
13 Daymi i sen-țmeslayeγ
s lemtul, axaṭer țmuqulen ur țwalin, țḥessisen ur sellen,
ur fehhmen.
14 S wakka, yedṛa-d
yid-sen wayen i d-ixebbeṛ fell-asen nnbi Iceεya : Aț-țsellem
s imeẓẓuγen-nwen, ur tfehhmem ara, aț-țmuqulem s
wallen-nwen, ur tețwalim ara,
15 Imi agdud-agi qquṛen
wulawen-nsen, qeflen imeẓẓuγen- sen, qqnen allen-nsen, iwakken
ur țwalin, ur sellen ; sseγṛen ulawen nsen, ugin ad fehmen,
axaṭer lemmer tuben, uγalen-d γer webrid, tili sseḥlaγ ten.
16 Ma d kunwi
amarezg-nwen ! Axaṭer allen-nwen țwalint, imeẓẓuγen nwen
sellen.
17 Aql-i nniγ-awen
tideț, aṭas si lenbiya akk-d imdanen iḥeqqiyen i gebγan ad
walin ayen tețwalim, ur t-walan, ad slen ayen tsellem, ur
t-slin.
Lmeεna
n lemtel n win izerrεen
18 A wen-d-iniγ lmeεna n
lemtel n win izerrεen :
19 m'ara isel wemdan i
wawal yeεnan tageldit n igenwan, ur t-yefhim ara, ițemcabi γer
yiri n webrid i γer tγelli zzerriεa ; d Cciṭan i d-ițasen ad
iqleε ayen izerεen deg ul-is.
20 Wayeḍ ițemcabi γer
wakal-nni yeččuṛen d izṛa anda teγli zzerriεa. M'ara isel i
wawal n ṛebbi, iqebbel-it s lfeṛḥ,
21 meεna ur
t-yețțaǧǧa ara ad iger izuṛan deg-s, ur yețțaṭṭaf ara.
M'ara d-tass lmeḥna neγ aqehheṛ γef ddemma n wawal n ṛebbi,
ad yeǧǧ imiren kan liman-is.
22 Wayeḍ daγen ițemcabi
γer zzerriεa yeγlin ger isennanen. M'ara isel i wawal n ṛebbi,
iγeblan n ddunit d ṭṭmeε n rrbeḥ țγummun awal-nni, dγa ur
d-ițțak ara lfakya.
23 Wayeḍ icuba daγen γer
zzerriεa yeγlin deg wakal yelhan, m'ara isel i wawal n ṛebbi,
ifehhem-it, daymi i d-ițțak lfakya ! Yal aεeqqa ițțak-ed :
wa tlatin, wa sețțin, wa meyya n tεeqqayin. Lemtel n uẓekkun
24 Sidna Σisa
yefka-yasen-d lemtel nniḍen : Tagelda n igenwan tcuba γer
yiwen wergaz i gzerεen irden deg iger-is.
25 Yiwen yiḍ mi ṭṭsen
akk medden, yusa-d weεdaw-is izreε aẓekkun ger yirden, imiren
iṛuḥ.
26 Mi d-gman yirden-nni
fkan-d tigedrin, aẓekkun-nni ula d nețța igma-d.
27 Iqeddacen n bab n
iger-nni, usan-d γur-es nnan-as : A Sidi, eεni mačči d irden
i tzerεeḍ deg iger-ik ? Ansi i d-ikka ihi uẓekkun-agi ?
28 Yerra-yasen : D yiwen
weεdaw i gxedmen akka ! IIqeddacen-nni nnan-as : Ihi tebγiḍ a
nṛuḥ a neqleε aẓekkun-agi ?
29 Yerra-yasen : Xaṭi !
Axaṭer m'ara tekksem aẓekkun, tzemrem a d-teglum s yirden.
30 Anfet-asen ad gmun di
sin alamma ț-țamegra. Ass-nni, a sen iniγ i wid imeggren :
qelεet-ed uqbel aẓekkun, cuddet-eț ț-țadliwin iwakken a
tent-nesseṛγ ma d irden jemεet țen-id γer ikuffan-iw.
Lemtel
n zerriεa n wuxerḍel
31 Sidna Σisa
yefka-yasen-d lemtel nniḍen : Tagelda n igenwan tcuba γer
yiwen uεeqqa n uxerḍel i d-iddem yiwen wergaz iwakken a t-izreε
deg iger-is.
32 Aεeqqa-yagi d nețța
i d amecṭuḥ meṛṛa ger zzerriεat yellan, lameεna mi
gețwazreε, igemmu yețțali alamma yekka-d sennig akk yemγan n
tebḥirt, yeggar-ed ifurkawen d imeqqranen, ula d ifṛax n
igenni , bennun leεcuc-nsen s ufella-s.
Lemtel
n temtunt
33 Sidna Σisa
yenna-yasen-d lemtel nniḍen : Tagelda n igenwan tețțemcabi
γer temtunt ( yiγes n temtunt ) ara d-teddem tmeṭṭut a
t-tsexleḍ i tlata lkilat n uwren, s wakka arukti-nni meṛṛa ad
yali.
34 Sidna Σisa
ițmeslay-ed i lγaci anagar s lemtul.
35 Ițmeslay-asen-d akka
iwakken ad yedṛu wayen i d-nnan lenbiya : A sen-mmeslayeγ s
lemtul, a sen-beccṛeγ tiγawsiwin yeffren seg wasmi i d-texleq
ddunit.
Sidna
Σisa issefhem-d lemtel n uẓekkun
36 Mi gekfa Sidna Σisa
ameslay, lγaci ṛuḥen, nețța ikcem γer wexxam. Inelmaden-is
qeṛṛben γur-es nnan-as : Ssefru-yaγ-d lemtel n uẓekkun deg
iger.
37 Yerra-yasen-d : Win
izerrεen irden d Mmi-s n bunadem ;
38 iger, d ddunit ;
irden, d wid ițekkan di tgelda n igenwan ; ma d aẓekkun, d
widak ițekkan d Cciṭan ;
39 aεdaw i gzerrεen
aẓekkun, d Cciṭan ; tamegra , ț-țaggara nddunit ; ma d wid
imeggren, d lmalayekkat.
40 Akken ara qellεen
aẓekkun ṭeggiṛen-t γer tmes, ara tedṛu di taggara n ddunit.
41 Mmi-s n bunadem a
d-iceggeε lmalayekkat-is, ad ssufγen si tgelda-s wid akk
yesseγlayen wiyaḍ di ddnub akk-d wid ixeddmen cceṛ,
42 dγa a ten-ḍeggṛen
γer tmes anda ara yilin imeṭṭawen d nndama tameqqrant ;
43 ma d wid iḍuεen
ṛebbi ad feǧǧeǧen am yiṭij di tgelda n Baba ṛebbi. Win
yesεan imeẓẓuγen isel-ed !
Lemtel
n ugerruj yeffren
44 Tagelda n igenwan
tețțemcabi γer ugerruj yeffren deg yiwen n yiger. Yiwen wergaz
yufa-t, yuγal iffer-it. Si lfeṛḥ-nni i gefṛeḥ, iṛuḥ izzenz
ayen akk yesεa iwakken ad yaγ iger-nni.
Lemtel
n tεeqquct
45 Tagelda n igenwan
tețțemcabi daγen γer yiwen umetjaṛ ițqelliben tiεeqcin
ifazen.
46 Mi gufa yiwet ifazen
γef tiyaḍ, iṛuḥ izzenz ayen akk yesεa, yuγal-ed yuγ-iț.
Lemtel
n ucebbak
47 Tagelda n igenwan
tețțemcabi daγen γer ucebbak ițwadeggṛen γer lebḥeṛ,
iwakken a d-iṭṭef iselman ( lḥut ) n mkul ṣṣenf.
48 M'ara yeččaṛ,
iḥewwaten a t-id-jebden γer rrif n lebḥeṛ, dγa ad qqimen
iwakken ad fernen iselman, ad jemεen wid yelhan, ad ḍeggṛen
wid n diri.
49 Akka ara tedṛu di
taggara n ddunit : lmalayekkat a d-asent a d ddment imcumen si
ger iḥeqqiyen,
50 iwakken a
ten-ḍeggṛent γer tmes anda llan imeṭṭawen d nndama
tameqqrant.
51 Dγa Sidna Σisa
yenna-yasen : Tfehmem ayagi meṛṛa ? RRran-as : Anεam a Sidi,
nefhem !
52 Yerna-yasen : Ihi, yal
amusnaw n ccariεa ara ifehmen tagelda n igenwan, icuba γer bab
n wexxam i d-ițekksen seg ugerruj-is tiγawsiwin tijdidin, akk-d
ț-țγawsiwin tiqdimin.
Ulac
nnbi ițwaqeblen di tmurt-is
53 Mi d-yenna lemtul-agi,
Sidna Σisa iṛuḥ syenna.
54 Yerra γer taddart i
deg ițțuṛebba. Isselmad di lǧameε nsen, lγaci akk iḥedṛen
wehmen, qqaṛen : Ansi i s-d-tekka tmusni-yagi akk d tezmert s
wayes ixeddem lbeṛhanat agi ?
55 Mačči d nețța i d
mmi-s n win ineǧṛen ijegwa ? Eεni yemma-s mačči ț-țin
iwumi qqaṛen Meryem ? Atmaten-is mačči d Yeεqub, Yusef,
Semεun akk-d Yuda ?
56 Yessetma-s daγen,
mačči gar aneγ i llant ? Ansi i s-d-ikka ihi wannect-agi ?
57 Γef wayagi akk i
sen-yella d sebba n tuccḍa, ugin ad amnen yis. DDγa Sidna Σisa
yenna-yasen : Nnbi yețwaḥqeṛ anagar di tmurt-is akk-d
wexxam-is.
58 Sidna Σisa ur yexdim
ara aṭas n lbeṛhanat dinna, axaṭer ugin ad amnen.
Ixef 14
Lmut n
Yeḥya aγeṭṭas
2 yenna i iqeddacen-is :
D Yeḥya aγeṭṭas ! D nețța i-d iḥyan si ger lmegtin, daymi
i gesεa tazmert s wayes ixeddem lbeṛhanat.
3 D agellid Hiṛudus i
gefkan yakan lameṛ ad qnen Yeḥya s ssnasel, a t-rren γer
lḥebs. Ayagi γef sebba n Hiṛudyad, tameṭṭut n Filibus yellan
d gma-s n Hiṛudus.
4 Axaṭer Yeḥya yella
yeqqaṛ i Hiṛudus : D leḥṛam fell-ak aț-țesεuḍ Hiṛudyad
ț-țameṭṭut-ik !
5 Seg imiren, Hiṛudus
ițqellib ad ineγ Yeḥya, meεna ikukra agdud n wat Isṛail
axaṭer ḥesben-t akk d nnbi.
6 Ass n lεid n umulli n
Hiṛudus, yelli-s n Hiṛudyad tecḍeḥ zdat inebgawen,
teεǧeb-as aṭas i Hiṛudus,
7 armi i s-iεuhed, a
s-yefk ayen ara s-d tessuter.
8 Tweṣṣa-ț yemma-s a
s-tini : Awi-yi-d γer dagi aqeṛṛuy n Yeḥya aγeṭṭas deg
uḍebsi.
9 Agellid Hiṛudus iḥzen
aṭas, yemmuγben, lameεna γef ddemma n limin i geggul zdat
inebgawen-is, issendeh a s-t-id-awin.
10 Iceggeε a s-d-gezmen
aqeṛṛuy i Yeḥya aγeṭṭas di lḥebs;
11 wwin-as-t-id i
teqcict-nni deg uḍebsi, nețțat tefka-t i yemma-s.
12 Inelmaden n Yeḥya
usan-d ad awin lǧețța-s iwakken a ț-meḍlen ; imiren ṛuḥen
ssawḍen-as lexbaṛ i Sidna Σisa.
Sidna
Σisa yessečč xemsa alaf n yemdanen
13 Mi gesla s lexbaṛ n
lmut n Yeḥya, Sidna Σisa yuli γer teflukt, iṛuḥ iwakken ad
iḍeṛṛef iman-is. Akken slan lγaci s wemkan i γer iteddu,
ffγen-d si tudrin, tebεen-t γef wuḍar.
14 Sidna Σisa yers-ed si
teflukt, iwala annect-nni n lγaci, dγa gezmen tasa-s ; ibda
yesseḥlay imuḍan-nsen.
15 Mi geγli yiṭij,
inelmaden n Sidna Σisa qeṛṛben γur-es, nnan-as : Amkan-agi
yexla yerna iṛuḥ lḥal ; ini-yasen i lγaci-yagi ad ṛuḥen γer
tudrin iwakken a d-aγen ayen ara ččen.
16 Sidna Σisa yerra-yasen
: Acuγeṛ ara ṛuḥen, fket-asen kunwi ad ččen !
17 Nnan-as : γur-nneγ
anagar xemsa teḥbulin n weγṛum, d sin iselman ( iḥutiwen ).
18 Yerra-yasen :
Awit-țen-id γer dagi !
19 Yenna i lγaci ad
qqimen γef leḥcic, iddem-ed xemsa teḥbulin-nni n weγṛum d sin
iselman-nni, yerfed allen-is γer igenni, iḥmed ṛebbi. Yebḍa
aγṛum-nni, yefka-t i inelmaden-is, feṛqen-t i lγaci.
20 Sčan akk armi ṛwan,
yerna inelmaden-is ččuṛen-d tnac iqecwalen n wayen i
d-yegran.
21 Ad ilin azal n xemsa
alaf n yergazen i geččan, mbla tilawin d warrac.
Sidna
Σisa ileḥḥu γef waman
22 Imiren kan, Sidna Σisa
iḥṛes inelmaden-is ad alin γer teflukt iwakken ad zwiren γer
rrif nniḍen n lebḥeṛ, ma d nețța ad yerr lγaci-nni.
23 Mi ṛuḥen akk
lγaci-nni, yuli weḥd-es γer wedrar iwakken ad iẓẓall, dγa
yeγli-d yiḍ.
24 Taflukt-nni tella di
tlemmast n lebḥeṛ, lemwaji kkatent-eț axaṭer aḍu
iqubel-iten-id.
25 Mi qṛib ad yali wass,
ataya Sidna Σisa iteddu-d γef wuḍar s ufella n waman.
26 Akken i t-walan
ileḥḥu γef waman, inelmaden-is xelεen qqaṛen : D lexyal !
Bdan țεeggiḍen s lxuf.
27 Meεna imiren kan Sidna
Σisa yenna-yasen-d : Ur xellεet ara, d nekk ! Ur țțaggadet ara
!
28 Dγa Buṭrus yenna-yas
: A Sidi, ma yella d keččini, efk-ed lameṛ a n-aseγ
γur-ek
γef wuḍar s ufella n waman.
29 Sidna Σisa yenna-yas :
As-ed ! BBuṭrus yers-ed si teflukt, ileḥḥu γef waman, iteddu
γer Sidna Σisa.
30 Meεna mi gwala
yekker-ed waḍu, ikcem-it lxuf, yebda izedder, dγa iεeggeḍ : A
Sidi, sellek-iyi !
31 Imiren kan, Sidna Σisa
yeḍleq afus-is, ijbed-it-id yenna-yas : A win iwumi ixuṣṣ
liman ! Acuγeṛ i k-ikcem ccekk ?
32 Ulin γer teflukt di
sin, dγa yers waḍu-nni.
33 Inelmaden-nni yellan
di teflukt seǧǧden zdat Sidna Σisa nnan-as : ț-țideț, d
kečč i d Mmi-s n ṛebbi !
34 Zegren lebḥeṛ-nni,
armi wwḍen γer tmurt n Jiniṣaret.
35 Imezdaγ n lǧiha nni
εeqlen Sidna Σisa, dγa ceggεen γer yal lǧiha n tmurt, wwin-as-d
imuḍan nsen meṛṛa.
36 ḥellelen-t iwakken a
ten-yeǧǧ ad nalen γas ula ț-țacḍaṭ uqenduṛ-is.
Ixef 15
Wid akk
i t-innulen, ḥlan. Lεaddat n ifariziyen
1 - 2 Acuγeṛ inelmaden-ik
țṛuẓun lεadda i d-ǧǧan lejdud-nneγ ? M'ara qeṛṛben γer
lqut, ur ssiriden ara ifassen-nsen.
3 Sidna Σisa yerra-yasen
: I kunwi, acimi tețṛuẓum lumuṛat n ṛebbi iwakken
aț-țxedmem ṛṛay nwen ?
4 Yak d ṣṣeḥ, ṛebbi
yenna-d : Qadeṛ baba-k d yemma-k, yyenna daγen : Kra win ara
ineεlen baba-s d yemma-s, ad yețwaḥkem fell-as s lmut.
5 Meεna kunwi teqqaṛem :
win yefkan d lweεda i ṛebbi ayen s wacu i glaq ad iεiwen
imawlan-is,
6 am akken d imawlan-is i
gεawen. S wakka, tbeddlem awal n ṛebbi, iwakken aț-țesεeddim
lεaddat-nwen.
7 Ay at sin wudmawen !
ț-țideț i d-yenna nnbi Iceεya mi d-icar fell awen :
8 Y enna-d ṛebbi :
agdud-agi, ițεuzzu-yi s wawal kan, ma d ul-is yebεed fell-i.
9 L eεbada-nsen ur tesεi
ara azal axaṭer sselmaden ayen i d-yekkan seg imdanen.
10 Dγa Sidna Σisa
yessawel i lγaci yenna-yasen : Semḥesset-d tfehmem ayagi :
11 mačči d ayen i
gkeččmen seg imi n wemdan i t-yessamasen, meεna d ayen i
d-ițeffγen seg-s.
12 Inelmaden qeṛṛben-d
γer Sidna Σisa nnan-as : Ifariziyen iγaḍ-iten lḥal γef
yimeslayen-nni i d-tenniḍ !
13 Yerra-yasen : Yal imγi
ur yeẓẓi ara Baba yellan deg igenwan, ad yețwaqleε.
14 Anfet-asen, d
iderγalen iteṭṭfen afus i iderγalen nniḍen ; ma yella aderγal
yeṭṭef afus i wayeḍ, ad γlin i sin γer tesraft.
15 Buṭrus yenṭeq-ed
yenna-yas : Ssefhem-aγ-d lemtel-agi.
16 Sidna Σisa yenna i
inelmaden-is : Eεni ula d kunwi txuṣṣ-ikkun lefhama ?
17 Ur tefhimem ara belli
ayen ikeččmen seg imi n wemdan yețțara γer uεebbuḍ-is,
mbeεd ad ițwadeggeṛ γer beṛṛa.
18 Lameεna ayen i
d-iteffγen seg imi itekk-ed seg wul, d annect-agi i gessenǧasen
amdan.
19Axaṭer seg wul i
d-tekken : yir ixemmimen, timegṛaḍ, zzna ( lεaṛ ), yir tikli,
tukerḍa, cchada n ẓẓuṛ akk-d rregmat.
20 Atan wayen
yessenǧasen amdan, mačči d učči mbla tarda n ifassen i
t-yessenǧasen.
Tabeṛṛanit yumnen s Sidna Σisa
21 Sidna Σisa iṛuḥ
syenna, iteddu γer tmura n Ṣur akk-d Sidun.
22 Yiwet n tmeṭṭut n at
Kenεan i gzedγen dinna tusa-d γur-es tețεeggiḍ : A Sidi, a
mmi-s n Sidna Dawed, ḥunn fell-i ! Ațan yelli izdeγ-iț
uṛuḥani, iεețțeb-iț aṭas.
23 Sidna Σisa ur
as-d-yerri ula d yiwen wawal. Inelmaden-is qeṛṛben
γur-es
nnan-as : Err-as awal, axaṭer tugi aț-țeḥbes leεyaḍ
deffir-nneγ.
24 Sidna Σisa yerra-yasen
: țțuceggεeγ-ed anagar γer wulli iḍaεen n wat Isṛail !
25 Lameεna tameṭṭut-nni
teγli γer iḍaṛṛen n Sidna Σisa tenna-yas : A Sidi
εiwen-iyi
di leεnaya-k !
26 Yenna-yas : Ur ilaq
ara ad ițwakkes weγṛum i warrac, ad ițwadeggeṛ i yeqjan.
27 Tenna-yas : ț-țideț
a Sidi, lameεna ula d iqjan tețțen tifețțitin i d-iγellin si
ṭṭabla n imawlan-nsen.
28 Imiren Sidna Σisa
yerra-yas : Liman-inem d ameqqran a tameṭṭut ! A m-yețwaxdem
wayen tebγiḍ ! IImiren kan yelli-s teḥla.
Sidna
Σisa isseḥla aṭas n imuḍan
29 Sidna Σisa iṛuḥ
syenna, yerra γer leǧwahi n lebḥeṛ n Jlili, yuli γer wedrar
yeqqim.
30 Usan-d γur-es lγaci d
izumal, wwin-as-d iquḍaren, iderγalen, ineεyuba, igugamen d
waṭas imuḍan nniḍen. Ssersen-ten γer zdat iḍaṛṛen-is dγa
isseḥla-ten.
31 Imdanen meṛṛa
tεeǧben mi walan igugamen heddṛen, ineεyuba ḥlan, iquḍaren
leḥḥun, iderγalen țwalin, dγa bdan țḥemmiden Sidi ṛebbi
Illu n wat Isṛail.
Sidna
Σisa yessečč ṛebεa alaf n yemdanen
32 Sidna Σisa
yessawel-asen i inelmaden-is yenna-yasen : Γaḍen-iyi lγaci-agi
axaṭer tlata wussan aya segmi llan yid-i, yerna ur sεin d acu
ara ččen. Ur bγiγ ara a ten-rreγ akka lluẓen neγ m'ulac ad
feclen deg webrid.
33 Inelmaden nnan-as :
Ansi ara γ-d-yekk deg umkan-agi yexlan, weγṛum ara isseṛwun
annect agi n lγaci ?
34 Sidna Σisa yenna-yasen
: Acḥal n teḥbulin n weγṛum i tesεam
γur-wen ? RRran-as :
Sebεa n teḥbulin akk-d kra n iselman ( iḥutiwen ).
35 Imiren yenna i lγaci
ad qqimen γer lqaεa.
36 Yeddem-ed
tiḥbulin-nni n weγṛum d iselman-nni, iḥmed ṛebbi,
yebḍa-ten, yefka-ten i inelmaden-is iwakken a ten-feṛqen i
lγaci.
37 Sčan akk armi ṛwan,
yerna ččuṛen sebεa n tqecwalin n wayen i d-yegran.
38 Ger wid yeččan, llan
azal n ṛebεa alaf n yergazen mbla tilawin d warrac.
39 Mi gerra lγaci, Sidna
Σisa yerkeb di teflukt, iṛuḥ γer tmurt n Magadan.
Ixef 16
Ifariziyen akk-d isaduqiyen ssutren lbeṛhan
1 Ifariziyen d
isaduqiyen qeṛṛben γer Sidna Σisa, ssutren-as lbeṛhan
iwakken a t-jeṛben.
2 Sidna Σisa yerra-yasen : M'ara yeγli
yiṭij, twalam igenni d azeggaγ, teqqaṛem ad yelhu lḥal.
3 Akken daγen taṣebḥit,
teqqaṛem a d-iwwet ugeffur ( lehwa ) axaṭer yella usigna.
AAmek ! Tesnem aț-țfehmem lḥala n igenni, ur tezmirem ara
aț-țfehmem licaṛat yeεnan lweqt-agi !
4 Lǧil am agi ijehlen
ixedεen ṛebbi, yessutur lbeṛhan ! Meεna ur as-d-ițțunefkay
ara lbeṛhan nniḍen anagar win n nnbi Yunes ! Dγa iṛuḥ,
yeǧǧa-ten.
5 Mi zegren agummaḍ i
lebḥeṛ, inelmaden-is țțun ur wwin ara yid-sen aγṛum.
6 Dγa Sidna Σisa
yenna-yasen : ḥadret iman-nwen seg iγes n temtunt n ifariziyen
d isaduqiyen !
7 Inelmaden xemmemen deg
yiman-nsen, nnan : Ahat imi ur d-newwi ara yid-nneγ aγṛum i
γ-d-yenna akka !
8 Sidna Σisa iẓra γef
wacu i țxemmimen yenna-yasen : A wid i gxuṣṣen di liman !
Tγilem imi ur d-tewwim ara aγṛum i wen-d-nniγ akka ?
9 Mazal ur tefhimem ara ?
Eεni tețțum yakan xemsa teḥbulin-nni n weγṛum i bḍiγ i
xemsa alaf n yergazen ? D wacḥal n tqecwalin i d-yegran ?
10 Ur tecfim ara daγen
γef sebεa teḥbulin-nni n weγṛum i bḍiγ i ṛebεa alaf n
yemdanen, d wacḥal n tqecwalin i d-yegran ?
11 Amek akka ur tefhimem
ara belli mačči γef weγṛum i wen-d-țmeslayeγ ? ḥḥadret
iman-nwen seg iγes n temtunt n ifariziyen d isaduqiyen !
12 Imiren inelmaden-is
fehmen belli mačči γef yiγes n temtunt i sen-d-immeslay,
lameεna ad ḥadren iman-nsen γef wuselmed n ifariziyen d
isaduqiyen.
Anwa-t
Sidna Σisa ?
13 Mi gewweḍ Sidna Σisa
γer tmurt n Qiṣarya n Filibus, isteqsa inelmaden is,
yenna-yasen : D acu i-d-qqaṛen medden γef Mmi-s n bunadem ?
14 Rran-as : Kra qqaṛen
d Yeḥya aγeṭṭas, wiyaḍ qqaṛen d nnbi Ilyas, wiyaḍ daγen d
nnbi Irmiya neγ d yiwen ger lenbiya.
15 I kunwi, d acu-yi
γur-wen ?
16 Buṭrus yerra-yas :
Kečč d Lmasiḥ, Mmi-s n Sidi ṛebbi yeddren !
17 Yenṭeq γur-es
yenna-yas : Amarezg-ik, a Buṭrus a mmi-s n Yunes, axaṭer
mačči s tmusni-inek i tfehmeḍ ayagi, meεna d Baba ṛebbi
yellan deg igenwan i k-t-id-isbegnen.
18 Ihi nekk a k-iniγ :
kečč a Buṭrus d azṛu, yerna γef wezṛu-agi ara bnuγ
tajmaεt-iw, ula ț-ținezmarin n lmut ur țțaṭṭafent ara
zdat-es !
19 Ad a k-fkeγ tiṢura n
tgelda n igenwan, ayen ara teqneḍ neγ ayen iwumi ara tserrḥeḍ
di ddunit, ad yețwaqbel deg igenwan.
20 Imiren yumeṛ i
yinelmaden-is ur qqaṛen ula i yiwen belli d nețța i d
Lmasiḥ.
Sidna
Σisa ixebbeṛ-ed γef lmut-is
21 Seg imiren, Sidna Σisa
yebda issefham i inelmaden-is belli ilaq ad yali γer temdint n
Lquds, anda ara yenneεtab aṭas ger ifassen n lmuqedmin akk-d
lεulama n ccariεa ad ḥekmen fell-as s lmut, ass wis tlata a
d-iḥyu si ger lmegtin.
22 Buṭrus ijbed-it
weḥd-es, yenna yas : A k-imneε ṛebbi a Sidi, a wer d-yedṛu
wayagi yid-ek !
23 Sidna Σisa idewweṛ
γur-es, yenna-yas : Beεεed akkin fell-i a Cciṭan ! Tebγiḍ
aț-țiliḍ d ugur deg webrid-iw ! Ixemmimen-ik ur d-kkan ara s
γur ṛebbi, lameεna d ixemmimen n yemdanen.
24 Imiren Sidna Σisa
yenna i inelmaden-is : Kra win yebγan ad iddu yid-i, ilaq-as ur
yețḥebbiṛ ara γef yiman-is, ad iqbel ad inεețțab γef ddemma
n yisem-iw, a yi-d-itbeε.
25 Kra win yebγan ad
isellek taṛwiḥt-is, a s-tṛuḥ ; ma d win iseblen taṛwiḥt-is
γef ddemma-w ad yuγal a ț-yaf.
26 D acu n lfayda ara
yesεu wemdan di rrbeḥ n ddunit meṛṛa, ma yella yesṛuḥ
taṛwiḥt-is ? Neγ d acu i gezmer a t-yefk wemdan iwakken a
d-ifdu taṛwiḥt-is ?
27 Axaṭer Mmi-s n
bunadem a d-yas nețța d lmalayekkat-is di lεaḍima n Baba-s,
ad yefk i yal yiwen ayen yuklal, yal yiwen γef leḥsab n
lefεayel-is.
28 A wen-iniγ tideț :
llan kra seg wid yellan dagi, ur țmețțaten ara alamma ẓran
Mmi-s n bunadem yusa-d am ugellid.
Ixef 17
Tamanegt n Sidna Σisa
1 Mi εeddan sețța
wussan, Sidna Σisa yewwi yid-es Buṭrus, Yeεqub akk-d gma-s
Yuḥenna, ulin γer wedrar eεlayen, anda qqimen ḍeṛfen
iman-nsen.
2 Taswiεt kan ibeddel
ṣṣifa zdat sen, walan udem-is yețfeǧǧiǧ am yiṭij,
llebsa-s tuγal ț-țamellalt, tecceεceε am tafat.
3 A ten-aya
dehṛen-asen-d Sidna Musa akk-d Sidna Ilyas țmeslayen d Sidna
Σisa.
4 Buṭrus inṭeq yenna i
Sidna Σisa : A Sidi, yelha ma neqqim dagi, ma tebγiḍ ad sbeddeγ
tlata iqiḍunen : yiwen i kečč, yiwen i Sidna Musa, wayeḍ i
Sidna Ilyas.
5 Mazal-it ițmeslay mi
d-ters yiwet n tagut ițfeǧǧiǧen tγumm-iten. Si tagut-nni
tenṭeq-ed yiwet n taγect, tenna-d : Wagi d Mmi eεzizen deg-s i
gella lfeṛḥ-iw, smeḥsiset-as !
6 Mi slan i taγect-nni,
inelmaden ikcem-iten lxuf, γlin γef wudem.
7 Sidna Σisa yessers
afus-is fell-asen, yenna-yasen : Ur țțaggadet ara, kkret !
8 Mi refden allen-nsen,
ur walan ula d yiwen nniḍen anagar Sidna Σisa.
9 Akken i d-țadren seg
wedrar, Sidna Σisa yumeṛ-iten yenna-yasen : Ur qqaṛet i yiwen
wayen akka twalam alamma yeḥya-d Mmi-s n bunadem si ger
lmegtin. Anwa-t nnbi Ilyas ?
10 Inelmaden steqsan
Sidna Σisa nnan-as : Iwacu imusnawen n ccariεa qqaṛen-d : «
Ilaq a d-yas nnbi Ilyas d amezwaru ? »
11 Yerra-yasen :
ț-țideț ilaq a d-yas nnbi Ilyas d amezwaru, iwakken ad
iseggem kullec.
12 Ma d nekk aql-i nniγ
awen-d : nnbi Ilyas yusa-d yakan, lameεna imdanen ur t-εqilen
ara yerna xedmen deg-s akken i sen ihwa. Akka daγen ara
inεețțab Mmi-s n bunadem ger ifassen-nsen !
13 Inelmaden fehmen
imiren belli ițmeslay-asen-d γef Yeḥya aγeṭṭas.
Ḥellu
n weqcic iγellin
14 Mi wwḍen γer wanda
llan lγaci, yiwen wergaz iqeṛṛeb-ed γer Sidna Σisa, yeγli γef
tgecrar zdat-es yenna yas :
15 A Sidi, ḥunn γef mmi
! Atan kkaten-t imsigman, yenneεtab aṭas ! Acḥal d abrid i
geγli γer tmes neγ γer waman,
16 wwiγ-t-id i
inelmaden-ik, meεna ur zmiren ara a t-sseḥlun.
17 Inṭeq Sidna Σisa
yenna-yasen : A lǧil ijehlen, iεewjen ! Ar melmi ara yiliγ
yid-wen ? Ar melmi ara wen-sebṛeγ ? Awit-iyi-d aqcic-agi γer
dagi !
18 Sidna Σisa iεeggeḍ
γef lǧen-nni, yumeṛ-as ad iffeγ seg weqcic-nni. Imiren kan,
aqcic-nni yeḥla.
19 Mi llan inelmaden
iman-nsen, qeṛṛben γer Sidna Σisa nnan-as : Acuγeṛ nukkni ur
nezmir ara a t-nessufeγ ?
20 Sidna Σisa yerra-yasen
: Axaṭer txuṣṣem di liman ! Aql-i nniγ-awen, lemmer tesεim
liman annect n uεeqqa n uxerḍel, tili a s tinim i wedrar-agi,
qleε iman-ik sya γer dihin ad iqleε. Ulac wayen iwumi ur
tețțizmirem ara.
21 Sṣenf-agi n leǧnun
țeffγen anagar s tẓallit d uẓummu.
22 Mi llan di tmurt n
Jlili, Sidna Σisa yenna-yasen : Mmi-s n bunadem ad ițțusellem
ger ifassen n yemdanen;
23 a t-nγen, meεna ass
wis tlata a d-iḥyu si ger lmegtin. DDγa inelmaden ikcem-iten
leḥzen d ameqqran.
Sidna
Σisa akk-d Buṭrus xelṣen tabzert
24 Mi gewweḍ Sidna Σisa
akk-d inelmaden-is γer Kafernaḥum, imekkasen n lǧameε
qeṛṛben-d γer Buṭrus nnan-as : Eεni Ssid-nwen ur ițxelliṣ
ara tabzert n lǧameε ?
25 Yerra-yasen Buṭrus :
Ih, ad ixelleṣ ! Imiren kan mi gekcem Buṭrus γer wexxam, Sidna
Σisa iluεa-t, yenna-yas : D acu twalaḍ a Buṭrus ? Anwa i
glaqen ad ixelleṣ tabzert i igelliden n ddunit-a , d arraw-nsen
neγ d ibeṛṛaniyen ?
26 Buṭrus yerra-yas : D
ibeṛṛaniyen ! DDγa Sidna Σisa yerra-yas-d : Ihi arraw n tmurt
ur țxelliṣen ara !
27 Lameεna iwakken ur
ten-yețγaḍ ara lḥal, ṛuḥ, ḍeggeṛ tasennaṛt γer lebḥeṛ,
aslem ( aḥewtiw ) amezwaru ara d-teṭṭfeḍ, ldi-yas imi,
aț-țafeḍ deg-s aṣurdi n lfeṭṭa, efk-asen-t d lexlaṣ n
tebzert-nneγ nekk yid-ek.
Ixef 18
Anwa i
d ameqqran deg igenwan ?
1 Di lweqt-nni, inelmaden
n Sidna Σisa qeṛṛben γur-es nnan-as
: Anwa i d ameqqran di
tgelda n igenwan ?
2 Sidna Σisa yessawel i
yiwen weqcic isbedd-it di tlemmast-nsen, yenna :
3 A wen-d-iniγ tideț ;
ma yella ur d-tuγalem ara γer webrid, m'ur teqbilem ara
aț-țilim .am arrac imecṭuḥen, ur tkeččmem ara γer tgelda n
igenwan !
4 Daymi, win ara
yeṣṣemẓin iman-is am weqcic-agi amecṭuḥ, d nețța ara
yilin d ameqqran di tgelda n igenwan.
5 Kra win ara
yestṛeḥben s weqcic am-agi γef ddemma n yisem-iw, yis-i i
gesṭerḥeb.
6 Win ara yesseγlin di
ddnub ula d yiwen seg imecṭuḥen-agi yumnen yis-i, axiṛ-as a
s-cudden aγaṛef n tsirt γer temgeṛṭ-is, a t-ḍeggṛen γer
lebḥeṛ ad iγṛeq.
7 A tawaγit n ddunit-a,
imi qwant tsebbiwin n tuccḍa ! Axaṭer tisebbiwin n tuccḍa
ulamek ur d-țilint ara. Meεna a nnger n win ara yilin d
sebba-nsent.
8 Ma yella d afus-ik neγ
d aḍaṛ-ik ara k-yesseγlin di ddnub, gzem-iten, ḍeggeṛ-iten
akkin fell-ak, axiṛ-ak aț-țiliḍ di ddunit d aεiban wala
aț-țesεuḍ sin iḍaṛṛen neγ sin ifassen, aț-țwaḍeggṛeḍ
γer tmes ur nxețți.
9 Ma yella daγen ț-țiṭ-ik ara
k-yawin γer ddnub, qleε-iț ḍeggeṛ-iț akkin fell-ak ;
axiṛ-ik aț-țiliḍ di ddunit s yiwet n tiṭ wala aț-țesεuḍ
snat wallen, aț- țwaḍeggṛeḍ γer tmes n ǧahennama.
10 γur-wat
aț-țḥeqṛem yiwen seg imecṭuḥen-agi axaṭer aql-i nniγ
awen-t : lmalayekkat-nsen deg igenwan, zgant daymen zdat Baba
ṛebbi.
11 [ Axaṭer Mmi-s n
bunadem yusa-d ad isellek wid i gḍaεen ! ]
Tixsi
iḍaεen ( Lq 15. 4-7 )
12 D acu twalam ? Ma
yella win yesεan meyya wulli dγa teεṛeq-as yiwet deg-sent, ur
ițțaǧa ara țesεa uțesεin-nni nniḍen di lexla iwakken a
d-inadi γef tin i s-iεeṛqen ?
13 A wen-iniγ tideț : ma
yufa-ț, ad ifṛeḥ yis akteṛ n țesεa uțesεin-nni nniḍen ur
neεṛiq ara.
14 Akken daγen Baba-twen
ṛebbi yellan deg igenwan, ur yebγi ara a s-iṛuḥ ula d yiwen
seg imecṭuḥen-agi.
Err-ed
gma-k γer webrid
15 Ma yella twalaḍ gma-k
idneb, ṛuḥ ṭṭef-it weḥd-es, nhu-t. Ma yuγ-ak awal, atan
trebḥeḍ-ed gma-k !
16 Meεna ma igumma a
k-d-isel, awi yiwen neγ sin yemdanen yid-ek, iwakken ad ilin d
inigan m'ara tefru temsalt , akken i d-tenna ccariεa.
17 Ma yugi a sen-isel,
ssiweḍ tamsalt γer tejmaεt n watmaten, m'ur iḥess ara ula i
tejmaεt-nni, ḥseb-it am akken d akafriw neγ d amekkas axabit !
18 A wen-iniγ tideț :
ayen akk ara teqnem neγ iwumi ara tserrḥem di ddunit, ad
yețwaqbel deg igenwan.
19 A wen-iniγ daγen s
tideț : ma yella sin seg-wen ddukklen iwakken ad ssutren kra di
tẓallit, Baba ṛebbi yellan deg igenwan, a sen-t-id-yefk.
20 Axaṭer anda ara
dduklen sin neγ tlata s yisem-iw, ad ḥedṛeγ gar-asen !
21 Imiren Buṭrus
iqeṛṛeb γur-es yenna-yas : A Sidi, acḥal n tikkal ilaq ad
semḥeγ i gma ma yeḍlem-iyi, armi d sebεa n tikkal ? SSidna
Σisa yerra yas :
22 Xaṭi ! Ur k-d-nniγ
ara alamma d sebεa tikkal, meεna alamma d sebεin iberdan sebεa
tikkal !
Sin n
iqeddacen yesεan ṭṭlaba
23 Daymi, tagelda n
igenwan tețțemcabi γer yiwen ugellid yebγan ad imḥasab
nețța d iqeddacen-is.
24 Akken yebda leḥsab,
wwin-as-d yiwen uqeddac iwumi yețțalas imelyunen.
25 Imi ur yesεi ara s
wacu ara ixelleṣ, agellid-nni ifka lameṛ a ten-zzenzen d
aklan, s nețța s tmeṭṭut-is, s warraw-is d wayen akk yesεa,
iwakken ad ixelleṣ ṭṭlaba-ines.
26 Aqeddac-nni yeγli γer
iḍaṛṛen n ugellid, iḥellel-it yenna-yas : «` A Sidi,
ṣṣbeṛ kra wussan, ad uγaleγ a k-xellṣeγ ayen akk i yi
tețțalaseḍ. »
27 Imi i t-iγaḍ aṭas,
agellid-nni isumeḥ-as ṭṭlaba-ines iserreḥ-as ad iṛuḥ.
28 Akken kan i d-iffeγ
uqeddac-nni immuger-ed yiwen seg imdukkal-is ixeddmen yid-es,
iwumi yețțalas kra n iṣurdiyen. IIkker γur-es yeṭṭef-it
si temgeṛṭ yeqqaṛ-as : « Err-iyi-d ayen i k țțalaseγ ! »
29 Amdakkel-is yeγli γer
iḍaṛṛen-is iḥellel-it, yenna-yas : « Sṣbeṛ kra n wussan,
ad uγaleγ a k-xellṣeγ ! »
30 Lameεna ur yeqbil ara
ad isbeṛ, yerra-t γer lḥebs, alamma tețwaxelleṣ
ṭṭlaba-ines.
31 Iqeddacen nniḍen mi
walan ayen yedṛan, iγaḍ-iten lḥal, dγa ṛuḥen ṣṣawḍen
lexbaṛ i ugellid.
32 Agellid iceggeε γer
uqeddac-nni akken a d-yas, dγa yenna-yas : « A yir amdan ! Mi
tețḥellileḍ deg-i, eεni ur k-sumḥeγ ara akk ṭṭlaba-inek ?
33 Acuγeṛ ihi ur
as-tsumḥeḍ ara i wemdakkel-ik akken i k-sumḥeγ nekkini ? »
34 Agellid-nni yezεef
aṭas, yerra aqeddac-nni γer lḥebs, iwakken ad inεețțab
alamma tețwaxelleṣ ṭṭlaba ines.
35 Akken daγen ara
wen-yexdem Baba ṛebbi yellan deg igenwan ma ur tețsamaḥem ara
i watmaten-nwen seg ul.
Ixef 19
Aselmed
γef berru
1 Mi gekfa lewṣayat-agi,
Sidna Σisa iṛuḥ si tmurt n Jlili γer tmurt n Yahuda γer
leǧwahi n wasif n Urdun.
2 Aṭas n lγaci i
t-iḍefṛen γer dinna, dγa yesseḥla wid akk ihelken.
3 Kra ifariziyen
qeṛṛben-d γur-es iwakken a t-jeṛben, nnan-as : Eεni
ccariεa-nneγ tsumeḥ-as i wergaz ad yebru i tmeṭṭut-is γef yal
sebba yellan ?
4 Yerra-yasen : Ur
teγṛim ara ayen i d-teqqaṛ ccariεa : di tazwara Sidi ṛebbi
ixleq-ed argaz ț-țmeṭṭut,
5 yenna-d : AArgaz ad
yeǧǧ baba-s d yemma-s, iiwakken ad iεic nețța
ț-țmeṭṭut-is, ddγa di sin yid-sen, ad uγalen d yiwen.
6 S wakka ur llin ara d
sin, meεna uγalen d yiwen. Ur as-ilaq ara ihi i wemdan ad ifṛeq
ayen yesdukkel Sidi ṛebbi !
7 Nnan-as : Acuγeṛ ihi
Sidna Musa yeǧǧa yaγ-d lqanun belli m'ara yebru wergaz i
tmeṭṭut-is, a s-yefk lkaγeḍ n berru ?
8 Sidna Σisa yerra-yasen
: Γef ddemma n wulawen-nwen yeqquṛen i wen-iserreḥ nnbi Musa
aț-țebrum i tilawin-nwen. Meεna di tazwara mačči akka i
gella lḥal.
9 Ma d nekk a wen-d-iniγ
: kra n win ara yebrun i tmeṭṭut-is yili ur tezni ara, iwakken
ad yaγ tayeḍ, d nețța i geznan !
10 Inelmaden nnan-as : Ma
yella akka i d lḥala n wergaz γer tmeṭṭut, ulac lfayda di
zzwaǧ !
11 Sidna Σisa yerra-yasen
: Mačči d imdanen meṛṛa i gzemren ad qeblen aselmed agi
lameεna anagar wid iwumi i d-ifka Sidi ṛebbi lefhama i gzemren
ad qeblen annect-agi.
12 Aṭas n sebbat i
gqeḍεen zzwaǧ i wemdan. Llan wid i d-ilulen si tεebbuṭ n
yemma-tsen ur sεin ara ddunit, wiyaḍ d imdanen i sen-ț-ikksen.
LLlan daγen wid iḥeṛmen iman-nsen γef zwaǧ, γef ddemma n
tgelda n igenwan. Win i gzemren ad ifhem aselmed agi a t-yefhem
!
Arrac
imecṭuḥen
13 Kra yemdanen țawin-d
i Sidna Σisa arrac imecṭuḥen iwakken ad issers afus-is
fell-asen a ten-ibarek, meεna inelmaden-is țțaran-ten.
14 Sidna Σisa yenna-yasen
: Anfet-asen i warrac a d-asen γur-i, ur sen-qeṭṭεet ara
abrid, axaṭer tagelda n igenwan thegga i nutni akk-d wid
yellan am nutni !
15 Yessers afus-is
fell-asen, iburek iten, dγa iṛuḥ syenna.
Ilemẓi
ameṛkanti
16 Imiren yiwen wergaz
iqeṛṛeb-ed γer Sidna Σisa, yenna-yas : A Sidi, d acu i
yi-ilaqen a t xedmeγ n wayen yelhan iwakken ad sεuγ tudert n
dayem ?
17 Sidna Σisa yerra-yas :
Acuγeṛ i yi-testeqsayeḍ γef wayen yelhan ? AAnagar yiwen i
gelhan ! Ma tebγiḍ aț-țesεuḍ tudert-agi, xdem lumuṛat
yellan di ccariεa. YYerra-yas-ed weqcic-nni : Anwi i d lumuṛat
ara tebεeγ ?
18 Sidna Σisa yerra-yas :
Ur tneqqeḍ ara tamgeṛṭ, ur tzennuḍ ara, ur tețțcehhideḍ
ara s ẓẓur, ur tețțakkṛreḍ ara,
19 qadeṛ baba-k d
yemma-k, tḥemmleḍ lγiṛ-ik am yiman-ik !
20Aqcic-nni yerra-yas-ed
: Ayagi akk xedmeγ-t, d acu i yi-ixuṣṣen ?
21 Sidna Σisa yenna-yas :
Ma tebγiḍ ihi aț-țkemleḍ deg webrid n Sidi ṛebbi , ṛuḥ,
zzenz akk ayen i tesεiḍ, tefkeḍ idrimen-nni i yimeγban, s
wakka aț-țesεuḍ agerruj deg igenwan ! Imiren as-ed,
aț-țedduḍ yid-i.
22 Mi gesla i
yimeslayen-agi, ilemẓi-nni yeḥzen aṭas dγa iṛuḥ, axaṭer d
ameṛkanti ameqqran i gella.
23 Sidna Σisa yenna i
inelmaden-is : A wen-iniγ s tideț : iwεeṛ aṭas i umeṛkanti
ad ikcem γer tgelda n igenwan !
24 A wen-iniγ daγen : ma
yella iwεeṛ i welγem ad iεeddi di tiṭ n tissegnit, iwεeṛ
akteṛ i umeṛkanti ad ikcem γer tgelda n igenwan !
25 Mi slan i
imeslayen-agi, inelmaden-is dehcen aṭas, nnan-as : Anwa i
gzemren ad ițțusellek ihi ?
26 Dγa Sidna Σisa
imuqel-iten, yenna : Imdanen s yiman-nsen ur zmiren ara, meεna
Sidi ṛebbi yezmer i kullec.
27 Buṭrus inṭeq,
yenna-yas : Aql-aγ nukkni neǧǧa kullec iwakken a k-netbeε, d
acu ara yedṛun yid-nneγ ?
28 Sidna Σisa yerra-yasen
: A wen-iniγ s tideț, asm'ara d-ḥyun lmegtin γer ddunit
tajḍiṭ, asm'ara yeqqim Mmi-s n bunadem γef wukersi n lḥekma
di lεaḍima-s, ula d kunwi yeddan yid-i, aț-țeqqimem di tnac
yid-wen γef yikersiyen n lḥekma iwakken aț-țḥasbem tnac n
leεṛac n wat Isṛail.
29 Yerna, kra win ara
yeǧǧen γef ddemma n yisem-iw axxam-is neγ atmaten-is,
yessetma-s neγ baba-s, yemma-s, arraw-is neγ tiferkiwin-is, ad
as-d-yețțunefk akteṛ n wayen yeǧǧa, yerna a t-id-tṣaḥ
tudert n dayem.
30 Aṭas seg wid yellan d
imezwura ad uγalen d ineggura, aṭas daγen seg wid yellan d
ineggura ad uγalen d imezwura.
Ixef
20
Yal
axeddam yuklal lexlaṣ-is
1 - 2 Imsefham yid-sen a
ten-ixelleṣ s twizeț n lfeṭṭa i wass, dγa iceggeε-iten γer
tfeṛṛant-is.
3 Iffeγ daγen γef țesεa
n ṣṣbeḥ, iwala wiyaḍ qqimen di beṛṛa mbla lxedma.
4 yenna-yasen : ṛuḥet
ula d kunwi aț-țxedmem di tfeṛṛant-iw, a wen-fkeγ ayen
tuklalem.
5 Dγa ṛuḥen. Bab n
tfeṛṛant-nni yexdem akken daγen γef tnac n wass akk-d
ț-țlata n tmeddit.
6 Iffeγ daγen γef lxemsa
n tmeddit, yufa wiyaḍ qqimen di beṛṛa yenna-yasen : Acuγeṛ i
tețγimim ass kamel mbla lxedma ?
7 Nnan-as-ed : Ulac win i
γ-d-ifkan lxedma ! YYenna-yasen : ṛuḥet ula d kunwi
aț-țxedmem di tfeṛṛant-iw !
8 Mi i d-tewweḍ tmeddit,
bab n tfeṛṛant yenna i lewkil-is : Ssiwel i ixeddamen
txellseḍ-ten yiwen yiwen. Zwir seg ineggura tessegriḍ
imezwura.
9 Usan-d wid yebdan
lxedma γef lxemsa n tmeddit, ixelleṣ-iten s ssuma n yiwen wass,
10 mi i d-tewweḍ nnuba n
wid ibdan lxedma γef țesεa n ṣṣbeḥ, γilen ad țwaxelṣen
akteṛ n wiyaḍ, meεna ula d nutni țwaxellṣen s ssuma n yiwen
wass.
11 Mi ṭṭfen
lexlaṣ-nsen, iγaḍ-iten lḥal, nnan i bab n tfeṛṛant-nni :
12 Ixeddamen-agi ineggura
xedmen yiwet n ssaεa kan, txellṣeḍ ten am nukkni yenεețțaben
ass kamel i wezγal ?
13 Meεna yerra-yas i
yiwen seg sen : Ay amdakkel, acuγeṛ i k-iγaḍ lḥal ? Eεni ur
nemsefham ara γef lexlaṣ-nwen ad yili tawizeț n lfeṭṭa d
ssuma n yiwen wass ?
14 Awi lḥeqq-ik
tṛuḥeḍ. I ma yella bγiγ ad fkeγ i uneggaru annect i k-fkiγ i
kečč ?
15 Eεni ur zmireγ ara ad
xedmeγ akken bγiγ s idrimen-iw ? Neγ iγaḍ-ik lḥal imi ur lliγ
ara d amecḥaḥ ?
16 S wakka aṭas ineggura
ara yuγalen d imezwura, aṭas n imezwura ara yuγalen d ineggura.
Sidna
Σisa ixebbeṛ-ed daγen γef lmut akk-d ḥeggu-ines
17 Mi țeddun ad alin γer
temdint n Lquds, Sidna Σisa iṭṭef tnac-nni inelmaden-is
weḥḥed-sen, yenna yasen :
18 ḥesset-ed : atan a
nali γer temdint n Lquds, anda ara ițțusellem Mmi-s n bunadem
ger ifassen n lmuqedmin imeqqranen akk-d lεulama n ccariεa. Ad
ḥekmen fell-as s lmut,
19 yerna a t-sellmen ger
ifassen nn ikafriwen iwakken ad stehzin fell-as, a t-jelkḍen (
a t-cellṭen ), a t-semmṛen γef wumidag, ass wis tlata a
d-iḥyu si ger lmegtin.
Ayen
tessuter tmeṭṭut n Zabadi
20 Imiren yemma-s n
Yeεqub d Yuḥenna, arraw n Zabadi, tqeṛṛeb-ed γer Sidna Σisa
nețțat d warraw-is, tseǧǧed γer iḍaṛṛen-is.
21 Sidna Σisa yenna-yas :
D acu i tebγiḍ ? Tenna-yas : Di leεnaya-k a Sidi, efk-asen
imukan i sin-agi n warraw-iw di tgelda-inek, iwakken ad qqimen
wa γer uyeffus-ik, wa γer uzelmaḍ-ik.
22 Sidna Σisa yerra-yasen
: Ur teẓrim ara ayen akka i d tessutrem ! Eεni tzemrem
aț-țeswem si tbuqalt-agi n lemṛaṛ ara sweγ ? NNnan-as : Ih a
Sidi, nezmer !
23 Yerra-yasen :
ț-țideț, aț-țeswem si tbuqalt-agi, meεna γef wayen yeεnan
imukan γer tama-w tayeffust neγ tazelmaṭ, mačči d nekk ara
ten-ifken, ad țțunefken i wid iwumi i ten-ihegga Baba ṛebbi.
24 Σecṛa n inelmaden-nni
mi slan ayagi, ikcem-iten zzεaf γef ddemma n sin-nni watmaten.
25 Sidna Σisa
yessawel-asen, yenna-yasen : Walit igelliden n yegduden nniḍen
akk-d imeqqranen-nsen amek ḥeṛsen yerna ḥeqṛen lγaci-nsen !
26 Ur ilaq ara ad yili
wannect-agi gar-awen. Ma yella yiwen seg-wen yebγa ad yuγal d
ameqqran, ilaq ad yili d aqeddac-nwen.
27 Akken daγen, win
yebγan ad yili d amezwaru, ilaq ad yuγal d akli-nwen.
28 Daymi Mmi-s n bunadem
ur d-yusi ara iwakken ad qedcen fell-as, meεna yusa-d iwakken ad
yili d aqeddac, yerna ad isebbel tudert-is iwakken ad isellek
aṭas n yemdanen.
Sin
iderγalen n temdint n Jiriku
29 Mi d-ffγen si temdint
n Jiriku, aṭas n lγaci i d-iḍefṛen Sidna Σisa.
30 Llan sin iderγalen
qqimen rrif n webrid, mi slan belli d Sidna Σisa i d-iεeddan
bdan țεeggiḍen : A Sidi ! A mmi-s n Sidna Dawed ! ḥunn
fell-aγ !
31 Lγaci-nni țlumun-ten,
qqaṛen asen ad ssusmen, ma d nutni țkemmilen leεyaḍ : ḥunn
fell-aγ a Sidi, a mmi-s n Sidna Dawed !
32 Sidna Σisa iḥbes,
issawel-asen, yenna-yasen : D acu i tebγam a wen-t- xedmeγ ?
33 Rran-as : Nebγa a
γ-d-yuγal yeẓri a Sidi !
34 Γaḍen aṭas Sidna
Σisa, yennul allen-nsen, imiren kan yuγal-iten-id yeẓri, dγa
ddan yid-es.
Ixef
21
Sidna
Σisa ikcem γer temdint n Lquds
1 Mi qṛib ad kecmen γer
temdint n Lquds, wwḍen γer yiγil n uzemmur yellan tama n
taddart n Bitfaji, Sidna Σisa iceggeε sin inelmaden-is,
2 yenna-yasen : ṛuḥet
γer taddart yellan γer zdat, dinna aț-țafem taγyult akk-d
mmi-s, brut-asen-d, tawim-iyi-ten-id.
3 Ma yella win i
wen-d-yennan kra, init-as : d Ssid-nneγ i ten-iḥwaǧen, imiren
a sen-d-iserreḥ.
4 Ayagi yedṛa-d am akken
i t-id yenna nnbi Zakarya di tira iqedsen :
5 Init i wat wedrar n
Siyun : AA taya ugellid-nwen iteddu-d γur-wen s wannuz,
irkeb-ed γef weγyul amecṭuḥ mmi-s n teγyult.
6 Inelmaden-nni ṛuḥen,
xedmen ayen i sen-d-yenna Sidna Σisa.
7 Wwin-d taγyult-nni d
mmi-s, sburren-asen llebsa-nsen, dγa srekben Sidna Σisa.
8 Aṭas n lγaci ssan
iceṭṭiḍen-nsen deg ubrid, wiyaḍ țṛuẓun-d tiseḍwa si
ttjuṛ, țessun-tent ula d nutni deg ubrid.
9 Lγaci yezwaren zdat
Sidna Σisa d wid i t-id-iḍefṛen, țεeggiḍen s lfeṛḥ qqaṛen
: ḥusana i mmi-s n Sidna Dawed ! Ițțubarek win i d-yusan s
yisem n Sidi ṛebbi ! ḥusana deg imukan eεlayen.
10 Mi gekcem Sidna Σisa
γer temdint n Lquds, imezdaγ meṛṛa nhewwalen, qqaṛen : Anwa-t
wagi ?
11 Lγaci-nni
țțaran-asen : D Sidna Σisa, nnbi-nni n taddart n Naṣaret i
d-yusan si tmurt n Jlili !
Lǧameε
iqedsen yuγalen d ssuq
12 Sidna Σisa yekcem γer
lǧameε iqedsen, iqecceε meṛṛa wid yețțaγen znuzun dinna
deg ufrag n lǧameε. Iqleb-asen ṭṭwabel i wid yețbeddilen
idrimen akk-d wid yeznuzun itbiren.
13 dγa yenna-yasen : Yura
: Axxam-iw ad ițțusemmi d axxam n tẓallit, ma d kunwi
terram-t d lγaṛ n imakaren.
14 Di lǧameε-nni,
qeṛṛben-d γur-es iderγalen d iquḍaren, dγa yesseḥla ten.
15 Lmuqedmin imeqqranen d
lεulama n ccariεa rfan mi walan leεǧayeb i gxeddem akk-d
warrac ițεeggiḍen di lǧameε :
ḥusana i mmi-s n Sidna Dawed !
16 Imiren nnan i Sidna
Σisa : Tesliḍ d acu i d-qqaṛen? Sidna Σisa yerra-yasen : Sliγ
ih ! Eεni ur teγṛim ara imeslayen-agi yuran di tira iqedsen :
Tessufγeḍ-ed leḥmadi seg imawen n warrac akk-d wid n llufanat
iteṭṭḍen.
17 Imiren yeǧǧa-ten
dinna, yeffeγ si temdint, iṛuḥ γer taddart n Bitanya, dinna i
gensa.
Taneqleț ițwaneεlen
18 Azekka-nni taṣebḥit
mi d-yuγal γer temdint, Sidna Σisa yelluẓ;
19 iwala yiwet n tneqleț
rrif n webrid, iqeṛṛeb γur-es, ur yufi deg-s acemma anagar
afriwen ; dγa yenna-yas : Seg wass-a, ur tețțuγaleḍ ara a
d-tefkeḍ lfakya ! IImiren kan, taneqleț-nni teqquṛ.
20 Inelmaden-is mi walan
ayagi tεeǧben, nnan : Amek akka teqquṛ tneqleț-agi deg yiwet
n teswiεt ?
21 Sidna Σisa yerra-yasen
: A wen-iniγ tideț, ma yella tesεam liman ur tețcukkum ara,
aț-țizmirem aț-țxedmem akteṛ n wayen xedmeγ i tneqleț-agi
! Aț-ținim i wedrar-agi qleε iman-ik syagi tḍeggṛeḍ
iman-ik γer lebḥeṛ, ayagi a d-yedṛu !
22 Ayen akk ara tessutrem
s liman di tẓallit, a wen-d-ițunefk !
Lḥekma
n Sidna Σisa
23 Sidna Σisa yekcem γer
lǧameε ibda yesselmad. Lmuqedmin akk-d imeqqranen n wegdud
qeṛṛben γur-es nnan-as : Ansi i k-d-tekka tezmert s wayes i
txeddmeḍ ayagi ? Anwa i k-d-yefkan tazmert-agi ?
24
Sidna Σisa yerra-yasen : A wen-fkeγ asteqsi ula d nekk, yiwen
kan ; ma tǧawbem-iyi-d, ula d nekk a wen-iniγ ansi i yi-d-tekka
tezmert-agi.
25 Aγḍas n Yeḥya, s
γur ṛebbi i d-ikka neγ s γur yemdanen ? Dγa bdan qqaṛen wway
gar-asen : Ma nenna-yas seg igenwan, a γ-d-yini acuγeṛ ihi ur
tuminem ara yis,
26 ma nenna-yas daγen seg
imdanen, nuggad lγaci-agi, axaṭer ḥesben akk Yeḥya d nnbi.
27 Dγa nnan-as i Sidna
Σisa : Ur neẓri ara ! YYerra-yasen : Ihi ula d nekk ur
wen-d-qqaṛeγ ara ansi i yi-d-tekka tezmert s wayes i xeddmeγ
ayagi !
Lemtel
n sin watmaten
28 D acu twalam ? Yiwen
wergaz yesεa sin warraw-is, yenṭeq γer umezwaru, yenna-yas : A
mmi, ṛuḥ aț-țxedmeḍ ass-agi di tfeṛṛant-iw.
29 Yerra-yas : Ur
țṛuḥuγ ara ! MMeεna yuγal yendem, iṛuḥ ad ixdem di
tfeṛṛant.
30 Yenna-yas daγen i
mmi-s wi sin ad iṛuḥ ad ixdem, yerra-yas-d : Ih a baba ad
ṛuḥeγ ! MMeεna ur iṛuḥ ara.
31 Anwa deg sen i gxedmen
lebγi n baba-s ? Rran-as-ed : D amezwaru a Sidi ! SSidna Σisa
yenna-yasen : A wen-d-iniγ tideț, imekkasen imakaren akk-d yir
tilawin a kkun zwiren γer tgelda n igenwan !
32 Axaṭer
Yeḥya yusa-d γur-wen yesken-awen-d abrid n tideț, meεna ur
t-tuminem ara ; ma d imekkasen d yir tilawin umnen yis. Yerna
γas akken twalam ayagi, ur d-tuγalem ara γer webrid teggumam
aț-țamnem yis.
Lemtel
n ixeddamen n tfeṛṛant
( Mq
12. 1-12 ; Lq 20. 9-19 )
33 A wen-d-rnuγ daγen
lemtel nniḍen : yella yiwen umεellem, yeẓẓa tafeṛṛant,
izzi-yas-ed s zzeṛb, yeγza amkan i tεeṣṣart n tẓurin, yebna
taεrict i tεessast, issekra tafeṛṛant-is i ixemmasen, imiren
iṛuḥ γer lγeṛba.
34 Mi d-yewweḍ lweqt n
tẓurin, iceggeε iqeddacen-is γer ixemmasen nni iwakken a
s-d-fken amur-is n lγella.
35 Meεna ixemmasen-nni
ṭṭfen iqeddacen-nni, wa wten-t, wa nγan-t, wayeḍ ṛejmen-t.
36 Iceggeε-asen daγen
tarbaεt nniḍen n iqeddacen yugaren tamezwarut. Meεna tedṛa
yid-sen am imezwura-nni.
37 Taggara, iceggeε-asen
mmi-s, yenna : Ahat imi d mmi a t-qadṛen !
38 Lameεna mi walan
mmi-s, ixemmasen-nni nnan wway gar-asen : Ataya win ara
iweṛten, kkret a t-nenneγ iwakken a nawi lweṛt-is.
39 Sṭfen-t, ḍeggṛen-t
γer beṛṛa n tfeṛṛant, dγa nγan-t.
40 Sidna Σisa yenna i
lγaci : Ihi tura, m'ara d-yas bab n tfeṛṛant-nni, d acu ara
sen-yexdem i ixemmasen-agi ?
41 Rran-as-ed : Ad ineγ
ixemmasen imcumen, ma ț-țafeṛṛant a ț-issekru i ixemmasen
nniḍen ara s-d-ifken amur-is di lweqt n lγella.
42 Sidna Σisa yenna-yasen
: Leεmeṛ teγṛim imeslayen-agi i d-nnant tira iqedsen :
Adγaγ-nni i ḍeggṛen wid ibennun, d nețța i guγalen d azṛu
alemmas , Win yeṭṭfen lebni. AA yagi yekka-d s γur ṛebbi, d
ayen i γ-istεeǧben.
43 Daymi i wen-qqaṛeγ :
Tagelda n igenwan a wen tețwakkes, aț-țețțunefk i leǧnas
nniḍen ara d-ifken lγella.
44 Win ara yeγlin γef
wusalas-agi ad yerreẓ, daγen win i γef ara d-yeγli usalas-agi
ad yețwamḥeq.
45 Mi slan i
imeslayen-agi, ifariziyen d lmuqedmin imeqqranen fehmen belli
fell-asen i d-iheddeṛ Sidna Σisa.
46 Meεna γas akken bγan a
t-ṭṭfen, ur zmiren ara axaṭer uggaden lγaci-nni i t-iḥesben
d nnbi.
Ixef
22
Lemtel
n wid ițwaεeṛḍen
1 Sidna Σisa
imeslay-asen-d daγen s lemtel, yenna-yasen :
2 Tagelda n igenwan
tcuba γer yiwen ugellid i gxedmen tameγṛa i mmi-s.
3 Iceggeε iqeddacen-is ad
ssiwlen i wid yețwaεeṛden, meεna ugin a d-asen.
4 Yerna iceggeε-asen
iqeddacen nniḍen a sen-inin : Heggaγ imensi, zliγ izgaren-iw d
wakraren-iw, kullec ihegga, aset-ed γer tmeγṛa !
5 Meεna widak-nni
ițwaεeṛḍen ur s-fkin ara azal, yal yiwen yelha d ccγel-is, wa
iṛuḥ γer yiger-is, wa γer ssuq-is.
6 Wiyaḍ ṭṭfen
iqeddacen-nni, regmen-ten, nγan-ten.
7 Agellid-nni ikcem-it
zzεaf d ameqqran, dγa iceggeε lεeskeṛ-is nγan iqettalen-nni,
sseṛγen tamdint-nsen.
8 Imiren yenna i
iqeddacen-is : Imensi n tmeγṛa ihegga, meεna widak-nni
ițwaεeṛḍen ur t-uklalen ara;
9 ṛuḥet γer izenqan,
tεeṛḍem-d γer tmeγṛa wid akk ara tafem deg iberdan.
10 Iqeddacen-nni ṛuḥen
γer izenqan jemεen-d wid akk ufan, ama d amcum ama d win yelhan,
s wakka axxam n tmeγṛa yeččuṛ-ed d lγaci.
11 Mi d-ikcem ugellid ad
iwali inebgawen, iwala yiwen wergaz ur yelsi ara llebsa n
tmeγṛa.
12 yenna-yas : Ay
amdakkel, amek i d-tkecmeḍ γer dagi mbla llebsa n tmeγṛa
yețwaheggan i yinebgawen ? Argaz-nni yessusem, ur yufi d acu
ara s-yini.
13 Agellid-nni yefka
lameṛ i iqeddacen-is yenna-yasen : Cuddet-as ifassen d
iḍaṛṛen, tḍeggṛem-t γer ṭṭlam n beṛṛa, anda llan
imeṭṭawen d nndama tameqqrant.
14 Axaṭer aṭas i
gețwaεerḍen, meεna drus ara yețwaqeblen.
Lexlaṣ
n tebzert i Qayṣer
15 Imiren ṛuḥen
ifariziyen ad mcawaṛen amek ara d-sseγlin Sidna Σisa deg
wawal.
16 Ceggεen-as kra seg
inelmaden-nsen akk-d kra si terbaεt n Hiṛudus, nnan-as : A
Sidi, neẓra-k d bab n lḥeqq i telliḍ, tesselmadeḍ iberdan n
ṛebbi s tideț, ur tuggadeḍ ula d yiwen, ur txeddmeḍ ara
lxilaf ger yemdanen.
17 Ini-yaγ-d ihi d acu
twalaḍ : d leḥlal neγ d leḥṛam a nxelleṣ tabzert ( leγṛama
) i ugellid Qayṣar (yestεemṛen tamurt-nneγ) ?
18 Meεna Sidna Σisa
yeẓran ayen i țxemmimen, yenna-yasen : Ay at sin wudmawen !
Acuγeṛ tebγam a yi-tjeṛbem?
19 Seknet-iyi-d aṣurdi s
wacu țxelliṣen tabzert ! FFkan-as-d aṣurdi n lfeṭṭa. 20
Dγa isteqsa-ten : Udem akk-d tira yellan deg uṣuṛdi-agi, wi
ten-ilan ?
21 Rran-as : N Qayṣer !
IImiren yenna-yasen : Erret ihi i Qayṣer ayen yellan n Qayṣer,
terrem i ṛebbi ayen yellan n ṛebbi!
22 Mi slan i
imeslayen-agi, wehmen, dγa ṛuḥen ǧǧan-t.
Asteqsi
γef ḥeggu n lmegtin
23 Ass-nni, isaduqiyen i
gellan d imdanen ur nețțamen ara s ḥeggu n lmegtin, usan-d
γer Sidna Σisa, steqsan-t, nnan-as :
24 A Sidi, Sidna Musa
yenna-d : ma yella yemmut wergaz d amengur, ilaq gma-s ad yaγ
taǧǧalt-nni iwakken a d-isεu yid-es dderya ara iweṛten
gma-s-nni yemmuten.
25 Yuγ lḥal llan
γur-nneγ sebεa watmaten, amezwaru izewǧen yemmut ur d-yeǧǧi
dderya, dγa gma-s yerra ( yuγa ) tameṭṭut-nni.
26 Akkenni i tedṛa d wis
sin, d wis tlata, armi d wis sebεa.
27 Mi mmuten irkulli,
temmut ula ț-țameṭṭut-nni;
28 ass n ḥeggu n lmegtin
anwa deg-sen ara ț-yesεun ț-țameṭṭut-is imi i ț-uγen di
sebεa yid-sen ?
29 Sidna Σisa yerra-yasen
: Tγelṭem ! Axaṭer ur tefhimem tira iqedsen, ur tessinem
tazmert n ṛebbi.
30 Ass n ḥeggu n
lmegtin, irgazen ț-țilawin ur zeggjen ara, meεna ad uγalen am
lmalayekkat deg igenni.
31 Γef wayen yeεnan
ḥeggu n lmegtin, ur teγṛim ara acu i d-yenna Sidi ṛebbi ? :
32 D nekk i d Illu n
Ibṛahim, n Isḥaq, n Yeεqub. Sidi ṛebbi mačči d ṛebbi n
lmegtin, meεna d ṛebbi n wid yeddren.
33 Mi s-slan, lγaci
qqimen țweḥḥiden deg imeslayen-is !
Anwa i
d lameṛ ameqqran ?
34 Mi slan ifariziyen
belli Sidna Σisa yeγleb isaduqiyen deg wawal, nnejmaεen wway
gar-asen.
35 Yiwen seg-sen d lεalem
n ccariεa, isteqsa-t iwakken a t-ijeṛṛeb :
36 A Sidi, anwa i d
lameṛ ameqqran meṛṛa di ccariεa ?
37 Sidna Σisa yerra-yas :
Aț-țḥemleḍ Illu Sidi ṛebbi-inek seg wul-ik, s
teṛwiḥt-ik, s wayen yellan di tezmert-ik.
38 D wagi i d lameṛ
yellan d amezwaru yerna d ameqqran akk di ccariεa.
39 Atan wayeḍ yesεan
azal annect umezwaru-agi : Aț-țḥemleḍ lγiṛ-ik am yiman-ik.
40 D sin lumuṛat-agi i d
lsas n ccariεa akk-d lenbiya.
Lmasiḥ, d mmi-s n Sidna Dawed ?
41 Mi llan ifariziyen
nnejmaεen, Sidna Σisa isteqsa-ten yenna :
42 D acu ara d-tinim γef
Lmasiḥ ? Ansi ara d-yekk, yeεni anwi i d lejdud-is ? NNnan-as
: D mmi-s n Sidna Dawed.
43 Sidna Σisa yenna-yasen
: Amek ihi i s-isemma Dawed s tezmert n ṛṛuḥ iqedsen « Sidi
» mi genna :
44 Sidi ṛebbi yenna i
Ssid-iw : ṭṭef amkan γer tama-w tayeffust, alamma rriγ
iεdawen-ik seddaw iḍaṛṛen-ik.
45 Ma yella ihi Dawed
yessawel-as « Sidi » amek ara yili ihi d mmi-s?
46 Yiwen deg-sen ur izmir
a s-d yerr awal, seg wass-nni țțaggaden a t-steqsin.
Ixef
23
Qqaṛen, ur xeddmen
1 Imiren Sidna Σisa
yenṭeq γer lγaci d inelmaden-is yenna yasen :
2 Lεulama d ifariziyen
sselmaden ccariεa n Musa.
3 Xedmet ayen akk ara
wen-d-inin, meεna ur xeddmet ara wayen xeddmen nutni, axaṭer
ayen i d-qqaṛen ur t-xeddmen ara.
4 țcuddun tiεekkmin
ẓẓayen țεebbin-tent γef tuyat n yemdanen, ma d nutni țțagin
a ten-εiwnen ula s yixef n iḍuḍan-nsen.
5 Ayen akk i xeddmen,
xeddmen-t iwakken a ten-walin yemdanen, țεelliqen tiḥerztin
ț-țeγṛisin γef yiman-nsen.
6 ḥemmlen ad ṭṭfen
imukan imezwura ama di tmeγṛiwin ama di leǧwameε, ḥemmlen
m'ara țsellimen fell-asen yemdanen di tejmuyaε akk-d leswaq ;
7 ḥemmlen daγen m'ara
sen-qqaṛen yemdanen : « a Sidi ».
8 Ma d kunwi γur-wat a
wen qqaṛen : « a Sidi » axaṭer d atmaten i tellam yerna yiwen
kan i d Ssid-nwen.
9 Ur qqaṛet ula i yiwen
di ddunit : « Baba » axaṭer anagar yiwen i d baba-wen, d Baba
ṛebbi yellan deg igenwan.
10 Ur qebblet ara
aț-țețțusemmim : « imeqqranen » axaṭer anagar yiwen i d
ameqqran : d Lmasiḥ !
11 Ameqqran deg-wen, d
win iqeddcen fell-awen.
12 Kra n win issimγuren
iman-is a d-yers, ma d win issimẓiyen iman is ad ițwarfed !
13 A nnger-nwen ay
ifariziyen d lεulama n ccariεa, ay at sin wudmawen ! AAxaṭer
tmeddlem tiwwura n igenwan i yemdanen, ur tkeččmem kunwi, ur
tețțaǧǧam ad kecmen wid yebγan !
14 A nnger-nwen ay
ifariziyen d lεulama n ccariεa, ay at sin wudmawen ! Axaṭer
tettețțem ayla n tuǧǧal, tesṭuqqutem awal di tẓallit-nwen
iwakken a d-tesbegnem iman-nwen telham. Γef wayagi, lεiqab i
kkun-ițṛaǧun d ameqqran !
15 A nnger-nwen ay
ifariziyen d lεulama n ccariεa, ay at sin udmawen ! Tețnadim
timura, tzeggrem lebḥuṛ iwakken a d-rebḥem γas ula d yiwen
γer ddin i tettabaεem; mi t-id-rnam γur-wen, tețțaram-t d win
yuklalen ǧahennama akteṛ-nwen !
16 A nnger-nwen ay
iderγalen iteṭṭfen afus i wiyaḍ ! Teqqaṛem : « Ma yella
yeggul bunadem s lǧameε iqedsen, γas yeḥnet ulac fell-as ; ma
d win ara yegallen s ddheb yellan di lǧameε, ur s-ilaq ara ad
iḥnet, ilaq ad iṭṭef di limin-ines ! »
17 Ay imehbal, ay
iderγalen ! D acu i gesεan azal, d ddheb neγ d lǧameε i
gețțarran ddheb-nni d imqeddes ?
18 Teqqaṛem daγen : «
Win ara yegallen s udekkan n iseflawen, γas iḥnet ulac
fell-as, ma d win ara yegallen s iseflawen nni, ur s-ilaq ara ad
iḥnet, ilaq ad iṭṭef di limin-ines.»
19 Ay iderγalen ! Anwa i
gesεan azal, d iseflawen neγ d udekkan-nni i gerran iseflawen d
imqedsen ?
20 Win ara yegallen s
udekkan n iseflawen, yeggul s udekkan-nni d wayen akk yersen
fell-as.
21 Win ara yegallen daγen
s lǧameε, yeggul s lǧameε akk-d Win i gellan deg-s.
22 Win ara yegallen s
igenwan, yeggul daγen s igenwan akk-d Sidi ṛebbi iḥekkmen
deg-sen.
23 A nnger-nwen ay
ifariziyen d lεulama n ccariεa, ay at sin udmawen ! tețțakem
leεcuṛ γef nneεneε, abesbas d lkemmun, lameεna tețțaǧǧam
γer deffir lḥeqq, ṛṛeḥma d laman. D annect-agi i gețṛaǧu
deg-wen Sidi ṛebbi aț-țezwirem deg-sen a ten-txedmem, mbla ma
terram deg idis ayen nniḍen.
24 Ay iderγalen
iteṭṭfen afus i wiyaḍ ! Tețṣeffim tissit-nwen γef yizi,
tesseblaεem alγem.
25 A nnger-wen ay
ifariziyen d lεulama n ccariεa, ay at sin wudmawen ! Axaṭer
tessizdigem taqbuct d uḍebsi s ufella kan, meεna γer daxel-nsen
ččuṛen ț-țukeṛdiwin d ṭṭmeε.
26 Ay afarizi aderγal !
Ssizdeg uqbel daxel n teqbuct d uḍebsi, iwakken ula s
ufella-nsen ad izdigen !
27 A nnger-nwen ay
ifariziyen d lεulama n ccariεa, ay at sin udmawen !
Tețțemcabim γer iẓekwan isebγen s lǧir ; s ufella cebḥen,
γer daxel ččuṛen d iγsan n lmegtin d rekku.
28 Akka ula d kunwi,
tețbegginem-d iman-nwen telham γer yemdanen, lameεna zdaxel
teččuṛem d leγruṛ d cceṛ.
29 A nnger-nwen ay
ifariziyen d lεulama n ccariεa, ay at sin wudmawen ! Tbennum
iẓekwan n lenbiya, tețcebbiḥem iẓekwan n wid iḍuεen Sidi
ṛebbi,
30 teqqaṛem lemmer i
nεac di zzman n lejdud-nneγ, tili ur neqbil ara a nțekki
yid-sen deg ussizel n idammen n lenbiya.
31 S wakka tețcehhidem
belli kunwi ț-țarwa n wid ineqqen lenbiya
32 yerna kunwi
tețkemmilem ayen xedmen lejdud-nwen !
33 A ccetla n izerman !
Amek ara tmenεem si lεiqab n ǧahennama ?
34 Daymi ara
wen-d-ceggεeγ lenbiya, imusnawen akk-d lεulama. Kra seg-sen a
ten-tenγem, kra a ten-tsemmṛem γef wumidag, kra nniḍen a
ten-tejlekḍem di leǧwameε nwen yerna a ten-tețqehhiṛem si
temdint γer tayeḍ.
35 Ihi, idammen n
iḥeqqiyen yuzzlen di lqaεa, si Habil aḥeqqi mmi-s n Adem armi
d Zakarya mmi-s n Birikya, i tenγam ger lǧameε iqedsen d
udekkan iseflawen, a d-uγalen γer yiri-nwen.
36 A wen-d-iniγ tideț :
ayagi meṛṛa a d-yeγli γef lǧil-agi !
37 A tamdint n Lquds ! A
tamdint n Lquds ineqqen lenbiya, ireǧǧmen wid i
m-d-ițuceggεen s γur ṛebbi, acḥal n tikkal i bγiγ a d-jemεeγ
arraw-im akken tjemmeε tyaziṭ ifṛax-is ddaw wafriwen-is, meεna
tegummaḍ !
38 Ihi atan wexxam-im ad
yexlu !
39 Axaṭer aql-i a
wen-iniγ : ur tețțuγalem ara a yi-twalim, alamma d ass i deg
ara d-tinim : Yețțubarek win i d-yusan s yisem n Sidi ṛebbi !
Ixef
24
Taggara
n ddunit
1 Mi d-iffeγ si lǧameε
iqedsen, Sidna Σisa iteddu ad iṛuḥ. Inelmaden-is qeṛṛben-d
γur-es, țwehhin-as iwakken ad yerr ddehn-is γer cbaḥa akk-d
lebni n lǧameε iqedsen.
2 Meεna Sidna Σisa
yenna-yasen : Twalam annect-agi meṛṛa ? A wen-iniγ tideț : ur
d-yețγimi wezṛu γef wayeḍ, kullec ad ihud.
3 Yuli γer yiγil n
uzemmur iqqim weḥd-es, inelmaden-is usan-d a t-steqsin nnan-as
: Melmi ara d-idṛu wayen i d tenniḍ, amek ara neεqel ass
ameqqran n tuγalin-ik akk-d taggara n ddunit ?
4 Sidna Σisa yenna-yasen
: γur-wat win ara wen-ikellxen !
5 Axaṭer aṭas n
yemdanen ara d-yasen s yisem-iw, a d-inin : « D nekk i d
Lmasiḥ ! » Yerna ad kellxen aṭas n lγaci.
6 Aț-țeslem s ṭradat
ț-țegrawliwin, meεna γur-wat a kkun-iffeγ leεqel. Ur
țțaggadet ara, axaṭer ilaq a d-yedṛu wannect-a, meεna mazal
mačči d nnger n ddunit.
7 Agdud ad yennaγ d
wayeḍ, tagelda aț-țeẓdem γef tayeḍ, a d-yili laẓ d
zzelzlat deg waṭas n imukan.
8 Ayagi akk ara yedṛun,
ad yili am lqeṛḥ amezwaru n tmeṭṭut iṭṭfen addud.
9 Imiren a kkun-fken
iwakken aț-țețțuεetbem, a kkun-nγen, leǧnas meṛṛa a
kkun-keṛhen γef ddemma n yisem-iw.
10 Aṭas ara yeǧǧen
liman-nsen, ad msekṛahen, ad țemyexdaεen wway gar-asen.
11 A d-nnulfun lenbiya n
lekdeb, ad γurṛen aṭas n lγaci,
12 simmal ad yețzad
lbaṭel, simmal lmaḥibba n waṭas n yemdanen aț-țenqes.
13 Ma d win ara yeṭṭfen
di liman-is alamma ț-țaggara, ad ițțusellek.
14 Lexbaṛ-agi n lxiṛ
γef tgelda n Sidi ṛebbi, ad ițțubecceṛ di ddunit meṛṛa
iwakken leǧnas ad slen yis. Imiren ara d-taweḍ taggara n
ddunit.
Lmuṣiba tameqqrant
15 M'ara twalim deg
wemkan iqedsen win iwumi semman lmuṣiba issengaren i γef
d-ihḍeṛ nnbi Danyel ; ( win ara yeγṛen taktabt-agi n nnbi
Danyel ad ifhem !)
16 Imiren, wid ara yilin
di tmurt n Yahuda ilaq ad rewlen γer idurar,
17 win ara yilin s ufella
n ssqef, ur ilaq ara ad ikcem γer wexxam iwakken a d-iddem
lqecc-is,
18 win daγen ara yilin di
lexla, ur ilaq ara ad yuγal γer deffir iwakken a d-iddem
abeṛnus-is !
19 A tawaγit n tilawin
ara yilin s tadist akk-d țid ara yessuṭuḍen deg ussan-nni !
20 Dεut γer ṛebbi
iwakken tarewla agi-nwen ur d-tdeṛṛu ara di ccetwa neγ deg
wass n westeεfu.
21 Axaṭer « ad yili
yiwen n leεtab ur d-nelli seg wasmi d-tebda ddunit ar ass-a
yerna ur ițțuγal ara a d-yili ! »
22 Lemmer ur issenqes ara
Sidi ṛebbi deg wussan-nni, tili yiwen ur imenneε, meεna γef
ddemma n wid yextaṛ ara yeṣṣenqes i wussan-agi.
23 Imiren ma
yenna-yawen-d yiwen : Lmasiḥ atan dagi neγ atan, dihin, ur
țțamnet ara !
24 Axaṭer a d-asen wid
ara yerren iman-nsen d Lmasiḥ neγ d lenbiya, ad xedmen
lbeṛhanat d leεǧayeb akk-d licaṛat iwakken ad kelxen ma
zemren ula d wid yextaṛ Sidi ṛebbi.
25 Atan nniγ-awen-t-id
ihi :
26 ma nnan-awen Lmasiḥ
atan deg unezṛuf, ur țṛuḥut ara, neγ ma nnan-awen walit,
atan deg umkan-ihin yeffren, ur țțamnet ara.
27 Axaṭer asm'ara d-yas
Mmi-s n bunadem, ad yili am tafat n lbeṛeq m'ara d-tfeǧǧeǧ
si cceṛq alamma d lγeṛb.
28 Anda yella umuṛḍus (
lǧifa ), dinna ara nnejmaεen igudar.
29 M'ara εeddin
wussan-nni n leεtab, iṭij ad inqes, aggur ur d-ițțak ara
tiziri-ines, itran a d-γlin seg igenni, tizmar n igenwan ad
rgagint.
30 Imiren a d-iban Mmi-s
n bunadem deg igenni, leεṛac meṛṛa n ddunit ad meǧden, a d
wwten deg idmaren-nsen m'ara walin Mmi-s n bunadem deg igenwan,
yusa-d γef wusigna s tezmert akk-d lεaḍima tameqqrant.
31 A d-iceggeε
lmalayekkat-is ad berrḥent s ṣṣut n lbuq, a d snejmaεent wid
akk yextaṛ Sidi ṛebbi, si yal amkan, seg ixef n ddunit γer
wayeḍ.
32 Meyzet γef lemtel n
tneqleț : mi lqaqit isegman-is, fsan wafriwen-is, teḥsam
yewweḍ-d unebdu !
33 Ula d kunwi, m'ara
twalim yewweḍ-ed wannect-agi meṛṛa, ḥṣut belli Mmi-s n
bunadem ițeddu-d, atan γer tewwurt.
34 A wen-d-iniγ tideț :
lǧil-agi ur ițεedday ara alamma ideṛṛu-d wannect agi
meṛṛa.
35 Igenni d lqaεa ad
fnun, ma d imeslayen-iw ur fennun ara !
Tuγalin
n Mmi-s n bunadem
36 Meεna γef wayen yeεnan
ass neγ ssaεa n wannect-agi meṛṛa, yiwen ur ten-issin, ama d
lmalayekkat n igenwan, ama d Mmi-s n ṛebbi, anagar Baba ṛebbi
i geẓran.
37 Am akken i tedṛa di
zzman n nnbi Nuḥ, akken daγen ara tedṛu di lweqt n Mmi-s n
bunadem.
38 Axaṭer deg ussan-nni
uqbel a d-neflen waman γef ddunit, imdanen llan tețțen,
tessen, țemyezwaǧen, zeggjen i warraw-nsen, armi d ass i deg
yekcem nnbi Nuḥ γer lbabuṛ.
39 Yiwen ur ifaq s
wacemma armi d-ḥemlen waman i ten-yewwin, snegren-ten akk.
AAkken ara tedṛu di lweqt n tuγalin n Mmi-s n bunadem !
40 Imiren, ger sin
yergazen ara yilin deg iger, yiwen ad ițwarfed wayeḍ a
d-iqqim.
41 Ger snat n tilawin
yeẓẓaden s tsirt, yiwet aț-țețwarfed tayeḍ a d-teqqim !
42 Σasset ihi ur γefflet
ara ! Axaṭer ur teẓrim ara lweqt i deg ara d-yas Ssid-nwen !
43 Rret ddehn-nwen γer
wayagi : lemmer yeẓri bab n wexxam lweqt i deg ara d-yas
umakar, tili ad iεiwez ur iggan ara, iwakken ur t-țțakren ara.
44 Daymi ula d kunwi
heggit iman-nwen axaṭer di lweqt i γef ur tebnim ara, ara d-yas
Mmi-s n bunadem.
Aqeddac
n diri d uqeddac yelhan
45 Anwa i d aqeddac
aεeqli i γef ara yețkel bab n wexxam ? D win ara iwekkel γef
wat wexxam-is meṛṛa, iwakken a sen-yefk lqut-nsen di lawan.
46 Amarezg n uqeddac-agi
ara d-yaf bab n wexxam m'ara d-yaweḍ, yelha d ccγel-nni.
47 A wen-iniγ tideț : a t-yerr d lewkil γef wayla-s meṛṛa !
48 Meεna ma yella
axeddam-agi diri-t, ad yini deg ul-is : bab n wexxam iεeṭṭel,
mazal ur d-ițas ara ;
49 dγa ad ibdu ad ikkat
iqeddacen n wexxam-nni, ad iteț, ad itess nețța d isekṛanen.
50 Bab n wexxam a d-yas
deg wass i γef ur ibni ara uqeddac-nni, di lawan ur yeẓri.
51 A t-iqecceε, a
t-iεaqeb akken țwaεaqben at sin udmawen : imiren ara yilin
imeṭṭawen d nndama tameqqrant.
Ixef
25
Lemtel
n εecṛa telmeẓyin
1 Daymi deg wussan-nni,
tagelda n igenwan aț-țecbu γer εecṛa telmeẓyin i geddmen
tiftilin-nsent iwakken ad ṛuḥent ad mmagrent isli.
2 Xemsa seg-sent
ț-țuḥṛicin, xemsa nniḍen ț-țungifin.
3 Mi d-ddment
tungifin-nni tiftilin nsent, ur d-wwint ara zzit yid-sent.
4 Ma ț-țuḥṛicin-nni,
wwint-ed yid-sent tiqbucin n zzit.
5 Imi i gεeṭṭel yesli,
tilmeẓyin-nni nuddment dγa ṭsent.
6 Di tlemmast n yiḍ,
yiwet n taγect tεeggeḍ-ed : Ataya yesli iteddu-d, ffγemt a
t-temmagremt !
7 Imiren kan ukint-ed akk
telmeẓyin-nni, heggant tiftilin-nsent.
8 Tungifin-nni nnant i
tuḥṛicin : Fkemt-aγ-d kra si zzit-nkunt, tiftilin-nneγ qṛib
ad xsint.
9 Tuḥṛicin rrant-asent
: Ulamek, ur aγ-d-tkeffu ara i nekkunti d kunemti, ṛuḥemt a d
taγemt i yiman-nkunt γer wid yeznuzun.
10 Mi ṛuḥent a d-aγent,
isli yewweḍ-ed, tuḥṛicin-nni iheggan iman-nsent kecment
yid-es γer wexxam n tmeγṛa, dγa rran-d tawwurt.
11 Mi i d-wwḍent
tungifin-nni, bdant țεeggiḍent : A Sidi, a Sidi ldi-yaγ-d
tawwurt.
12 Meεna nețța
yerra-yasent-ed : A kunt-iniγ tideț : ur kkunt ssineγ ara !
13 Daymi a wen-iniγ :
Σasset, imi ur teẓrim ass, ur teẓrim lweqt.
Lemtel
n tlata iqeddacen
14 Ass n tuγalin n Mmi-s
n bunadem ad yili daγen am yiwen wergaz i gțeddun ad iṛuḥ
γer lγeṛba, yesnejmaε-ed iqeddacen-is, iwekkel iten γef wayen
akk yesεa.
15 Ifka i umezwaru
xemsmeyya twiztin n ddheb, wi sin yefka-yas mitin, wis tlata
yefka-yas meyya ; yefka i yal yiwen s wakken tella tezmert-is,
dγa iṛuḥ.
16 Imiren kan,
aqeddac-nni iwumi yefka xemsmeyya twiztin, iṛuḥ yetjeṛ
yis-sent, irbeḥ-ed xemsmeyya nniḍen.
17 Ula d win iwumi yefka
mitin, ixdem akken, irbeḥ-ed mitin nniḍen.
18 Ma d win iwumi yefka
meyya, iṛuḥ yeγza di lqaεa, yeffer tiwiztin-nni i s-d-ifka
umεellem-is.
19 Mi gεedda lweqt,
yuγal-ed umεellem-nni, isnejmaε-iten-id iwakken ad imḥasab
yid-sen.
20 Win akken iwumi yefka
xemsmeyya twiztin, yusa-d yewwi-d yid-es xemsmeyya twiztin
nniḍen, yenna-yas : A Sidi tefkiḍ-iyi-d xemsmeyya twiztin n
ddheb, a tent-ih xemsmeyya nniḍen i d-rebḥeγ yis-sent.
21
Amεellem-is yenna-yas : D ayen yelhan i txedmeḍ ay aqeddac
unṣiḥ, imi deg-ek laman γef tγawsiwin timecṭuḥin, sya d
asawen a k-wekkleγ γef timeqqranin ! Ili-k di lfeṛḥ yid-i !
22 Aqeddac-nni iwumi
yefka mitin twiztin n ddheb, iqeṛṛeb-ed ula d nețța,
yenna-yas : A Sidi tefkiḍ-iyi mitin twiztin n ddheb, a tent-ih
mitin nniḍen i d-rebḥeγ yis-sent.
23 Amεellem-is yenna-yas
: D ayen yelhan i txedmeḍ, ay aqeddac unṣiḥimi deg-k laman
γef tγawsiwin timecṭuḥin, sya d asawen a k-wekkleγ γef
timeqqranin ! Ili-k di lfeṛḥ yid-i !
24 Iwweḍ-ed win akken
iwumi yefka meyya twiztin, yenna yas : A Sidi ẓriγ-k d argaz
iweεṛen, tmeggreḍ anda ur tezriεeḍ, tjemmεeḍ seg wennar ayen
ur tesrewteḍ,
25 dγa uggadeγ-k, daymi i
ṛuḥeγ ffreγ deg wakal tiwiztin-nni i yi-tefkiḍ. Atan wayla-k,
ddem-it !
26 Amεellem-is yenna-yas
: Ay aqeddac amcum, ameεdaz ! Imi iyi-teẓriḍ meggreγ-d anda ur
zriεeγ, jemmεeγ-ed daγen anda ur srewteγ,
27 acuγeṛ ihi ur
tessekraḍ ara idrimin-iw iwakken m'ara d-uγaleγ a ten-id-erreγ
s lfayda.
28 Imiren amεellem-nni
yumeṛ i iqeddacen-is yenna-yasen : Kkset-as meyya-nni twiztin
ternum-tent i win yesεan εecṛa alef n twiztin !
29 Axaṭer kra win
yesεan, a s-nernu ad yili di tawant, ma d win ur nesεi ara, a
s-nekkes ula d ayen yesεa.
30 Ma d aqeddac-agi ur
nemεin, ḍeggṛet-eț γer ṭṭlam n beṛṛa anda ara yilin
imeṭṭawen d nndama tameqqrant.
Lḥisab
aneggaru
31 Asm'ara d-yas Mmi-s n
bunadem di tmanegt-is nețța d lmalayekkat meṛṛa, ad iḥkem
di lεaḍima-s ;
32 leǧnas meṛṛa a
d-nnejmaεen zdat-es, a ten-ifṛeq am umeksa iεeSlen ulli γef
tγeṭṭen.
33 Ad yerr ulli γer
uyeffus-is, tiγeṭṭen γer uzelmaḍ-is.
34 Imiren agellid ad yini
i wid yellan γer uyeffus-is : Aset-ed a kunwi iburek Baba,
aț-țweṛtem tagelda i wen-ițțuheggan seg wasmi i tebda
ddunit.
35 Axaṭer lliγ lluẓeγ
tefkam-iyi ččiγ, ffudeγ tefkam-iyi swiγ, usiγ-ed d abeṛṛani
testeṛḥbem yis-i,
36 lliγ d aεeryan
tesselsem-iyi, d amuḍin telham-d yid-i, lliγ daγen d ameḥbus
tusam-d teẓram-iyi.
37 Imiren iḥeqqiyen a
s-d-rren : A Sidi melmi i k-neẓra telluẓeḍ, nefka-yak
teččiḍ ? Neγ neẓra-k teffuḍeḍ nefka-yak teswiḍ ?
38 Melmi daγen i d-tusiḍ
d abeṛṛani nesṭeṛḥeb yis-ek, neγ melmi i k-nwala d aεeryan,
nessels-ik ?
39 Melmi i k-neẓra d
amuḍin neγ di lḥebs nusa-d γur-ek ?
40 Agellid a sen-d-yerr :
A wen-iniγ tideț, yal tikkelt i deg txedmem ayagi i yiwen seg
imecṭuḥen-agi yellan d atmaten-iw, i nekk iwumi t-txedmem.
41 Imiren ad yini i wid
yellan γer uẓelmaḍ-is : Beεdet akkin fell-i a kunwi
yețwaneεlen, ṛuḥet γer tmes n dayem yețwaheggan i Cciṭan d
wid i t- tebεen.
42 Axaṭer lliγ lluẓeγ
ur iyi tesseččem ara, ffudeγ ur iyi-tefkim ara ad sweγ,
43 usiγ-ed d abeṛṛani
ur tesṭerḥbem ara yis-i, lliγ d aεeryan ur iyi tesselsem ara,
lliγ daγen d amuḍin, d ameḥbus, ur d-tusim ara aț-țesteqsim
fell-i.
44 Imiren ula d nutni a
s-d-rren : A Sidi, melmi i k-neẓra telluẓeḍ neγ teffudeḍ d
abeṛṛani neγ d aεeryan, d amuḍin neγ d ameḥbus, ur d-nelhi
ara yid-ek ?
45 Nețța a sen-d-yerr :
A wen-iniγ tideț : yal tikkelt i deg ur texdimem ara ayagi i
yiwen seg imecṭuḥen-agi, i nekk iwumi ur t-texdimem ara.
46 Imiren widak-agi ad
kecmen γer lεiqab ur nfennu, ma d iḥeqqiyen ad kecmen γer
tudert n dayem !
Ixef
26
Amcaweṛ γef Sidna Σisa
1 Mi gfukk Sidna Σisa
imeslayen-agi, yenna i inelmaden-is :
2 Mazal sin wussan i lεid
n Tuffγa, Mmi-s n bunadem ad ițțuzenz iwakken ad ițuṣemmer
γef wumidag.
3 Dγa lmuqedmin
imeqqranen akk-d imeqqranen n wegdud nnejmaεen deg ufrag n
Kayef, i gellan d lmuqeddem ameqqran.
4 Msefhamen ad ṭṭfen
Sidna Σisa s tḥila iwakken a t-nγen.
5 Meεna nnan : « mačči
deg ussan-agi n lεid n Tuffγa ara t-neḥbes, neγ m'ulac ad
yekker ccwal ger lγaci .»
Tabuqalt n rriḥa
6 Mi gella Sidna Σisa di
taddart n Bitanya, deg wexxam n Semεun abeṛsi,
7 ațaya yiwet n tmeṭṭut
tewwi-d tabuqalt yețwaxedmen s wedγaγ amellal, teččuṛ d
leεṭeṛ γlayen. Mi geqqim Sidna Σisa γer ṭṭabla,
tameṭṭut-nni tusa-d tesmar leεṭeṛ-nni γef wuqeṛṛuy-is.
8 Mi walan ayagi,
inelmaden iγaḍ-iten lḥal, nnan : Iwumi lexsaṛa-yagi ?
9 Lemmer nezzenz
leεṭeṛ-nni, tili yewwi-d ssuma tameqqrant ara nefṛeq i
igellilen !
10 Sidna Σisa yeẓran
wayen nnan wway-gar-asen, yenna-yasen : Acuγeṛ i tesḥeznem
tameṭṭut agi ? D ayen yelhan i yi-texdem !
11 Axaṭer aț-țesεum
daymen igellilen yid-wen, meεna nekk ur țțiliγ ara daymen
yid-wen.
12 Mi d-tesmar
leεṭeṛ-agi fell-i, d lǧețța-w i thegga i temḍelt-iw.
13 A wen-iniγ tideț : di
yal amkan n ddunit i deg ara ițțubecceṛ lexbaṛ n lxiṛ, a d
țmektayen tameṭṭut-agi d wayen texdem.
Yudas
axeddaε
14 Imiren Yudas n
Qeṛyut, yiwen si tnac-nni inelmaden n Sidna Σisa, iṛuḥ γer
lmuqedmin imeqqranen,
15 yenna yasen : Ma
wwiγ-kkun γur-es a t-id teṭṭfem, d acu ara yi-tefkem ?
Fkan-as tlatin iṣurdiyen n lfeṭṭa.
16 Seg imiren, Yudas
yețεassa tagniț i deg ara yizmir ad izzenz Sidna Σisa.
Imensi
n lεid n Izimer n leslak
17 Ass amezwaru n lεid n
weγṛum mbla iγes n temtunt , inelmaden usan-d γer Sidna Σisa
nnan-as : A Sidi, anda tebγiḍ a k-nheggi imensi n lεid n Izimer
n leslak ?
18 Yerra-yasen : ṛuḥet
γer temdint, γer leflani, init-as : yenna-yak Ssid-nneγ,
lweqt-iw yewweḍ-ed, deg uxxam-ik ara sεeddiγ lεid n Izimer n
leslak nekk d inelmaden-iw.
19 Inelmaden-nni xedmen
ayen i sen-yenna Sidna Σisa, heggan imensi n lεid n Izimer n
leslak.
20 Mi d-teγli tmeddit,
Sidna Σisa yeqqim ad yečč nețța d inelmaden-is.
21 Mi llan tețțen
yenna-yasen : A wen-iniγ tideț : yiwen seg-wen ad iyi-izzenz.
22 Mi d-yenna ayagi,
ikcem-iten akk leḥzen d ameqqran, bdan qqaṛen as yiwen yiwen :
Neγ mačči d nekk a Sidi ?
23 Yerra-yasen : Win
igren afus-is yid-i deg uḍebsi, d nețța ara yi-izzenzen.
24 Ad yedṛu d Mmi-s n
bunadem akken yura fell-as ; mmeεna a nnger n win ara
t-izzenzen, lemmer ur d-ilul ara axiṛ-is.
25 Yudas ara t-ixedεen
yenṭeq yenna-yas : Eεni d nekk a Sidi ? SSidna Σisa yerra-yas :
Atan tenniḍ-t-id !
26 Mi llan tețțen,
Sidna Σisa yeddem-d aγṛum, iḥmed ṛebbi, icekkeṛ-it, dγa
yebḍa-t,
ifṛeq-it i inelmaden-is, yenna-yasen : Eččet
aγṛum-agi : d lǧețța-w.
27 Iddem-ed daγen
taqbuct, iḥmed ṛebbi, icekkeṛ-it, yefka-yasen-ț, yenna-yasen
: Swet akk si teqbuct-agi,
28 axaṭer ayagi d
idammen-iw, d idammen n lemεahda ara yazzlen γef yizumal n lγaci
γef ddemma n leεfu n ddnubat-nsen.
29 A wen-d-iniγ : ur
țțuγaleγ ara ad sweγ seg waman-agi n tẓurin alamma d ass i
deg ara ten-sweγ d ijdiden yid-wen, di tgelda n Baba ṛebbi.
Buṭrus
ad inkeṛ Sidna Σisa
30 Mi ḥemden Sidi ṛebbi
s ccnawi d isefra, ṛuḥen ulin γer yiγil n uzemmur,
31 dinna Sidna Σisa
yenna-yasen : Iḍ-agi ad a wen-iliγ akk d sebba n tuccḍa,
axaṭer yura di tira iqedsen ad wwteγ ameksa, ulli n
tqeḍεit-is ad rewlent γer yal tama.
32 Meεna m'ara d-ḥyuγ si
ger lmegtin, ad iyi-tafem zwareγ γer tmurt n Jlili.
33 Buṭrus
yenṭeq, yenna : Γas a sen-tiliḍ d sebba n tuccḍa i wiyaḍ
akk, nekk d lmuḥal ad ccḍeγ.
34 Sidna Σisa yenna-yas :
A k-iniγ tideț : deg iḍ-agi uqbel ad iskkuε uyaziḍ, ad
iyi-tnekṛeḍ tlata iberdan.
35 Buṭrus yerra-yas :
Γas lukan d lmut ara mmteγ yid-ek, d lmuḥal a k-nekkṛeγ ! Ula
d inelmaden nniḍen, nnan-as am nețța.
Tamazirt n Jitsimani
36 Imiren Sidna Σisa
iṛuḥ yid-sen γer yiwen wemkan ițțusemman Jitsimani, yenna i
inelmaden-is : Qqimet dagi, nekk ad ṛuḥeγ ad dεuγ γer Sidi
ṛebbi.
37 Yewwi yid-es Buṭrus
akk-d sin warraw-nni n Zabadi ; yebda ikcem-it leḥzen d leγben
d ameqqran.
38 Dγa yenna-yasen :
ḥusseγ s leḥzen n lmut, qqimet dagi, εiwzet yid-i !
39 Iṛuḥ yeγli γef
wudem, ibda yețẓalla yeqqaṛ : A Baba ṛebbi, ma yella wamek ,
ssebεed fell-i leεtab-agi ! Meεna akken tebγiḍ keččini,
mačči akken bγiγ nekkini.
40 Yuγal-ed γer
inelmaden-is, yufa-ten-id ṭṭsen, yenna i Buṭrus : Ur tezmirem
ara aț-țεiwzem yid-i ula d yiwet n ssaεa ?
41 Σiwzet, ẓallet,
iwakken ur tγellim ara deg ujeṛṛeb ! Axaṭer ṛṛuḥ n wemdan
yeǧhed ma d lǧețța ur tezmir ara !
42 Ibεed akkin tikkelt
tis snat iwakken ad iẓẓal, yenna : A Baba, ma yella ulamek ara
tesbeεdeḍ fell-i leεtab-agi , ma ilaq ad iyi-d-yaweḍ ! Ad
yedṛu lebγi-k !
43 Mi d-yuγal,
yufa-ten-id daγen ṭṭsen, iγleb-iten nuddam.
44 Yeǧǧa-ten, issebεed
iman-is daγen fell-asen, yedεa tikkelt tis tlata am tikkelt-nni
tamezwarut.
45 Mi d-yuγal γer
inelmaden-is, yufa-ten-id mazal-iten ṭṭsen ; yenna yasen :
Lweqt i deg ara yețwasellem Mmi-s n bunadem γer ifassen n
yemcumen iwweḍ-ed, kunwi mazal ikkun teṭṭsem ?
46 Dγa yenna-yasen :
Ekkret fell-awen, ataya iteddu-d win i yi-izzenzen !
Tuṭṭfa n Sidna Σisa
47 Mazal-it ițmeslay mi
d-iwweḍ Yudas yellan d yiwen si tnac-nni inelmaden. Ddan-d
yid-es aṭas n lγaci s iεekkzan d ijenwiyen, ceggεen ten-id
imeqqranen n lmuqedmin akk-d imeqqranen n wegdud.
48 Win akken i
t-izzenzen, imsefham yid-sen, yenna-yasen : Win i γef ara
selmeγ, d win ara teṭṭfem !
49 Imiren, iqeṛṛeb γer
Sidna Σisa yenna-yas : Sslam fell-ak a Sidi ! Dγa isellem
fell-as.
50 Sidna Σisa yenna-yas :
Ay amdakkel , ayen γef i d-tusiḍ a t-txedmeḍ, xdem-it ! Dγa
lγaci-nni qeṛṛben γer Sidna Σisa ṭṭfen-t.
51 Yiwen seg wid yeddan d
Sidna Σisa ijbed-ed ajenwi-ines, yewwet aqeddac n lmuqeddem
ameqqran, igzem-as-d ameẓẓuγ-is.
52 Sidna Σisa yenṭeq
yenna-yas : Err ajenwi-inek γer wemkan-is, axaṭer kra win ara
irefden ajenwi, ad immet s ujenwi !
53 Eεni tγileḍ ur zmireγ
ara ad ssutreγ i Baba ad iyi-d-iceggeε luluf n lmalayekkat ?
54 Amek ihi ara
țwakemlent tira iqedsen i d-ixebbṛen belli ilaq a d-yedṛu
wayagi meṛṛa ?
55 Imiren Sidna Σisa
yenna i lγaci : Kull ass țțiliγ yid-wen di lǧameε sselmadeγ,
ur iyi-teṭṭifem ara, ass-agi tusam-d γur-i s iεekkzan d
ijenwiyen am akken d bu tmegṛaḍ i lliγ !
56 Meεna annect-agi
meṛṛa yedṛa-d iwakken ad țwakemlent tira n lenbiya. IImiren,
inelmaden meṛṛa ǧǧan-t, yal yiwen γer wanda yerwel.
Sidna
Σisa zdat tejmaεt n imeqqranen n ccariεa
57 Wid yeṭṭfen Sidna
Σisa wwin-t γer Kayef, ameqqran n lmuqedmin, anda i nnejmaεen
lεulama n ccariεa d imeqqranen n wegdud.
58 Buṭrus iḍfeṛ-it,
ikcem γer wefrag n lmuqeddem ameqqran, yeqqim akk-d iεessasen n
lǧameε iwakken ad iẓer amek ara tefru temsalt.
59 Imiren lmuqedmin
imeqqranen akk-d usqamu n imeqqranen n ccariεa, țnadin inigan
ara icehden fell-as s ẓẓuṛ, iwakken ad ḥekmen fell-as s
lmut,
60 meεna ur s-d-ufin ara
sebba, γas akken aṭas i d-icehden fell-as.
61 A ten-aya sin yergazen
qeṛṛben d nnan : D wagi i d-yennan : « zemreγ ad huddeγ
lǧameε iqedsen n Sidi ṛebbi, a s-εiwdeγ lebni di tlata
wussan.»
62 Ameqqran n lmuqedmin
ikker, yenna-yas : Ulac ayen ara d-terreḍ γef wayen akka i
d-ccetkan fell-ak ?
63 Sidna Σisa yessusem.
Dγa ameqqran n lmuqedmin yenna-yas : Wekkleγ-ak Sidi ṛebbi
yeddren, m'ur aγ-d-tenniḍ ma d kečč i d Lmasiḥ, Mmi-s n
Sidi ṛebbi !
64 Sidna Σisa yerra-yas :
Tenniḍ-t-id ! Yerna a wen-iniγ, ssya d asawen : Mmi-s n
bunadem a d iḥkem γer uyeffus n Bab n tezmert, a t-twalim
iteddu-d γef wusigna seg yigenni.
65 Imiren ameqqran n
lmuqedmin icerreg aqenduṛ-is yenna : Ikfeṛ ! Iwumi neḥwaǧ
inigan tura ? Teslam akk d acu i d-yenna ! D acu tennam ?
66 Rran-as-d : Yuklal
lmut !
67 Dγa bdan ssusufen-t,
țțaken-as tiyitiwin d ibeqqayen,
68 qqaṛen-as : Eεqel a
Lmasiḥ, ini-yaγ-d anwa i k-iwwten !
Ankaṛ
n Buṭrus
69 Buṭrus yella yeqqim
deg ufrag, tqeṛṛeb-ed γur-es yiwet n tqeddact tenna-yas : Ula
d kečč telliḍ d Σisa ajlili !
70 Meεna yenkeṛ zdat-sen
meṛṛa yenna-yas : Ur ẓriγ ara d acu tebγiḍ a d tiniḍ !
71 Akken ițeddu γer
tewwurt, twala-t tqeddact nniḍen, tenna i wid akk yellan dinna
: Wagi yella akk-d Σisa anaṣari !
72 Inkeṛ daγen s limin :
Qqaṛeγ-awen ur ssineγ ara argaz-agi !
73 Taswiεt kan, wid
yellan dinna qeṛṛben daγen γer Buṭrus nnan-as : Mbla ccekk,
kečč telliḍ seg-sen, tameslayt-ik tbeggen-ed belli d ajlili i
telliḍ !
74 Ibda yețgalla irennu
: Di leεmeṛ ur ssineγ argaz-agi ! IImiren kan yeskkuε uyaziḍ.
75 Dγa Buṭrus immekta-d
imeslayen-nni i s-d-yenna Sidna Σisa : uqbel ad iskkuε uyaziḍ,
ad iyi-tnekṛeḍ tlata n tikkal . Yeffeγ γer beṛṛa s nndama
tameqqrant, iṭṭerḍeq d imeṭṭawen.
Ixef
27
Taṣebḥit zdat tejmaεt
1 Taṣebḥit, nnejmaεen-d
akk imeqqranen n lmuqedmin akk-d imeqqranen n wegdud, mcawaṛen
iwakken ad nγen Sidna Σisa.
2 Dγa urzen-t, wwin-t i
Bilaṭus, yellan d lḥakem n ṛuman yesteεemṛen tamurt.
Nndama
n Yudas
3 Mi gwala ḥekmen γef
Sidna Σisa, Yudas-nni i t-ixedεen yendem. Di nndama-nni-ines
tameqqrant, iṛuḥ γer imeqqranen n lmuqedmin d imeqqranen n
wegdud, yerra-yasen tlatin-nni twiztin n lfeṭṭa, dγa
4 yenna yasen : Denbeγ,
nekk i wen-d-izzenzen amdan aḥeqqi. RRran-as-d : Ur aγ-d-tewqiε
ara lmeεna, wagi d ccγel-ik.
5 Yudas iḍeggeṛ
tiwiztin-nni di lǧameε iqedsen, imiren iṛuḥ iεelleq iman-is.
6 Imeqqranen n lmuqedmin
leqḍen-d tiwiztin-nni n lfeṭṭa, nnan : Ur yeḥlil ara a
tent-nerr γer usenduq n lǧameε iqedsen, imi d lexlaṣ n
temgeṛt.
7 Mi mcawaṛen d acu ara
xedmen s twiztin-nni, msefhamen iwakken ad aγen iger n yiwen
wergaz ixeddmen afexxaṛ, iwakken a t-erren ț-țimeqbeṛt i
ibeṛṛaniyen.
8 Daymi iger-agi
ițțusemma ar ass-a : « Iger n idammen ».
9 S wakka i gedṛa wayen
i d-yenna nnbi Irmiya : Ddmen-d tlatin n twiztin n lfeṭṭa, d
wagi i d azal i s-fkan warraw n wat Isṛail ;
10 uγen-d yis iger γer
win ixeddmen afexxaṛ, akken i yi-d-yumeṛ Sidi ṛebbi.
Sidna
Σisa zdat Bilaṭus
11 Sidna Σisa ibedd zdat
lḥakem Bilaṭus. Yesteqsa-t lḥakem-nni yenna-yas : D kečč i
d agellid n wat Isṛail ? Sidna Σisa yerra-yas : Tenniḍ-t-id !
12 Lmuqedmin imeqqranen
akk-d imeqqranen n wegdud sseḍlamen deg-s, ma d nețța ur
sen-d-yerri ula d acemma.
13 Bilaṭus yenna i Sidna
Σisa : Eεni ur tesliḍ ara ayen akk γef i d-țcetkin fell-ak ?
14 Sidna Σisa yessusem,
ur as-d yerri ula d yiwen wawal, ayagi d ayen iswehmen lḥakem.
15 Lḥakem yennum di mkul
lεid n Tuffγa ițserriḥ-ed i yiwen umeḥbus i gextaṛ lγaci.
16 Yella yakan yiwen
umeḥbus mechuṛen, ițțusemman Barabas.
17 Mi d-nnejmaεen akk
lγaci, Bilaṭus isteqsa-ten : Anwa i tebγam a s-d-serrḥeγ : i
Barabas neγ i Σisa ițțusemman Lmasiḥ ?
18 Axaṭer yeẓra s
tismin i s-d-wwin Σisa.
19 Mi gella Bilaṭus
ițcaṛaε, tceggeε-as-d tmeṭṭut-is, tenna-yas-d : Ur ssekcam
ara iman-ik di temsalt n uḥeqqi-agi, axaṭer ass-agi targit
urgaγ fell-as terwi-yi.
20 Imeqqranen n lmuqedmin
akk-d imeqqranen n wegdud sḥeṛcen-d lγaci iwakken ad ssutren a
d-serrḥen i Barabas, ad nγen Sidna Σisa.
21 Lḥakem yenna-yasen :
Anwa ger sin-agi iwumi tebγam ad serrḥeγ ? Rran-as : I Barabas
! Serreḥ-ed i Barabas !
22 Bilaṭus yenna-yasen :
D acu ara xedmeγ ihi i Σisa ițțusemman Lmasiḥ ? Rran-as-d
akk : Ad ițțusemmeṛ γef wumidag !
23 Lḥakem yenna : D acu
i gexdem n diri ? Rnan țεeggiḍen : Semmeṛ-it γef wumidag !
24 Mi gwala lγaci ugin a
s-d ḥessen, yerna ccwal simmal yețțimγur, Bilaṭus yeddem-ed
aman, issared ifassen-is zdat lγaci, yenna : Nekk ur țekkiγ ara
di tazzla n idammen n uḥeqqi-agi, wagi d ccγel-nwen.
25
Lγaci meṛṛa nnan-as : Tazzla n idammen-is a d-tuγal γef
yirawen-nneγ d yirawen n warraw-nneγ.
26 Imiren Bilaṭus
iserreḥ-ed i Barabas, jelkḍen Sidna Σisa, dγa yefka lameṛ a
t-semmṛen γef wumidag.
27 Iεsekṛiyen n lḥakem
ssufγen Sidna Σisa γer ufrag, snejmaεen-d akk iεsekṛiyen
nniḍen, zzin-as.
28 Imiren kksen-as
llebsa-s, sselsen as abeṛnus azeggaγ.
29 Zḍan taεeṣṣabt s
isennanen, ssersen-as-ț γef wuqeṛṛuy is, fkan-as aγanim γer
ufus-is ayeffus. Bdan kennun zdat-es, stehzayen fell-as,
qqaṛen-as : Sslam fell-ak ay agellid n wat Isṛail !
30 Ssusufen-t, kkaten-t s
uγanim γer uqeṛṛuy.
31 Mi εyan deg ustehzi
fell-as, kksen-as abeṛnus-nni, rran-as llebsa-s, wwin-t a
t-semmṛen γef wumidag.
Lmut n
Sidna Σisa
32 Mi d-ffγen, mlalen-d
yiwen wergaz n tmurt n Siran, isem-is semεun, ḥettmen fell-as
ad ibbib amidag n Sidna Σisa.
33 Mi wwḍen γer yiwen
wemkan ițțusemman Gulguṭa, yeεni « amkan n uxecxuc »,
34 fkan-as ad isew ccṛab
i deg yexleḍ yiwen uεeqqaṛ aṛzagan. Iεreḍ-it, yugi a t-isew.
35 Mi t-semmṛen γef
wumidag, gren tasγaṛt iwakken ad feṛqen llebsa-ines, s wakka,
yedṛa-d wayen yuran di tira iqedsen : feṛqen llebsa-w, gren
tasγart γef wuqenduṛ-iw.
36 Imiren qqimen a
t-εassen,
37 εelqen sennig
uqeṛṛuy-is talwiḥt i γef uran sebba n lmut-is : Wagi d Σisa,
agellid n wat Isṛail
38 țwasemmṛen yid-es
sin imcumen, yiwen γer uyeffus-is wayeḍ γer uẓelmaḍ-is.
39 Imsebriden țhuzzun
iqeṛṛay-nsen reggmen-t,
40 qqaṛen-as : A win
ițhuddun lǧameε iqedsen ibennu-t di tlata wussan, sellek
iman-ik ma d Mmi-s n ṛebbi i telliḍ, ers-ed seg umidag-nni.
41 Imeqqranen n
lmuqedmin, lεulama n ccariεa akk-d imeqqranen n wegdud,
stehzayen fell-as ula d nutni, qqaṛen :
42 Isellek wiyaḍ ur
yezmir ad isellek iman-is ! Ma d agellid n wat Isṛail i gella,
a d-yers ihi seg umidag iwakken a namen yis.
43 Yețkel γef ṛebbi, a
t-isellek ihi ṛebbi ma iḥemmel-it aaxaṭer yenna-d : « Nekk d
Mmi-s n ṛebbi.»
44 Ula d imcumen-nni
ițțusemmṛen yid-es, regmen-t am wiyaḍ.
45 Deg uzzal si tnac armi
d țlata n tmeddit, yeγli-d ṭṭlam γef ddunit meṛṛa.
46 Γef leǧwahi n țlata,
Sidna Σisa iεeggeḍ s tεibṛanit, yenna : Ilya, Ilya, lama
sabaqtani ? Yeεni : Illu-iw, Illu-iw, acuγeṛ i yi-teǧǧiḍ ?
47 Kra seg wid iḥedṛen
dinna slan d acu i genna, qqaṛen : Issawal i nnbi Ilyas !
48 Imiren kan yiwen
seg-sen yuzzel yeddem-ed ameččim n taḍuṭ isselxes-it di
lxell, icudd-it γef wuγanim yefka-yas ad isew.
49 Wiyaḍ qqaṛen :
Anfet-as, a nwali ma yella a d-yas nnbi Ilyas a t-isellek.
50 Sidna Σisa iεeggeḍ
tikkelt nniḍen, dγa iffeγ-it ṛṛuḥ.
51 Imiren kan abeḥnuq n
leḥjab yellan di lǧameε iqedsen icerreg γef sin, seg ixef
ufella armi d akessar. Lqaεa tergagi, idurar ceqqeqen,
52 iẓekwan ldin, aṭas
seg iḥeqqiyen yemmuten, ḥyan-d
53 ffγen-d seg
iẓekwan-nsen. Mi d-iḥya Sidna Σisa, kecmen γer temdint
iqedsen, aṭas n lγaci iwumi i d-ḍehṛen.
54 Lḥakem yellan d
aqeṛṛuy γef meyya iεsekṛiyen akk-d iεsekṛiyen iεussen Sidna
Σisa, tekcem-iten tugdi mi walan tergagi lqaεa d wayen akk
yedṛan, nnan : ț-țideț, argaz-agi d Mmi-s n ṛebbi !
55 Aṭas n tilawin i
gellan dinna, țmuqulent-ed si lebεid. ț-țiggad-nni i d-yeddan
d Sidna Σisa si tmurt n Jlili iwakken a s-qedcent.
56 Tella gar-asent Meryem
tamagdalit, Meryem yemma-s n Yeεqub d Yusef akk-d d yemma-s n
warraw n Zabadi.
Tamḍelt n Sidna Σisa
57 Mi d-tewweḍ tmeddit,
yusa-d yiwen umeṛkanti n temdint n Arimati isem-is Yusef, ula d
nețța d anelmad n Sidna Σisa.
58 Iṛuḥ γer Bilaṭus
yessuter-as lǧețța n Sidna Σisa. Bilaṭus yumeṛ ad a
s-ț-id-fken.
59 Yusef yeddem-ed
lǧețța n Sidna Σisa, ițțel-iț di lekfen zeddigen,
60 issers-iț deg yiwen
uẓekka ajdid, i geγza deg uzṛu. Yeγleq tawwurt n uẓekka-nni s
weblaḍ ameqqran, dγa iṛuḥ.
61 Meryem tamagdalit
akk-d Meryem-nni nniḍen, llant dinna qqiment, qublent-ed
aẓekka.
62 Azekka nni yellan d
ass n uheggi n wass n westeεfu, imeqqranen n lmuqedmin d
ifariziyen ṛuḥen γer Bilaṭus
63 nnan-as : A Sidi,
necfa γef wayen i d-yenna ukeddab-agi asmi yedder, yenna-d : Ad
εeddin tlata wussan, a d-ḥyuγ si ger lmegtin.
64 Ceggeε iεessasen ad
εassen aẓekka-s alamma d ass wis tlata, iwakken inelmaden-is ur
d-țasen ara ad akren lǧețța-s, ad inin i wegdud : « iḥya-d
si ger lmegtin. » Neγ m'ulac lekdeb-agi aneggaru ad yaggar
amezwaru.
65 Bilaṭus yenna-yasen-d
: Awit iεessasen, ṛuḥet εasset-ț akken tebγam.
66 ṛuḥen, zemmemen aken
ilaq tawwurt n uẓekka-nni s weblaḍ, imiren sbedden taεessast
zdat-es.
Ixef
28
ḥeggu
n Sidna Σisa
1 Mi gεedda wass n
westeεfu, taṣebḥit n wass amezwaru n dduṛt, Meryem tamagdalit
akk-d meryem-nni nniḍen, ṛuḥent a d-ẓuṛent aẓekka n Sidna
Σisa.
2 Deg yiwet n teswiεt,
tergagi lqaεa ; ataya yiwen n lmelk n Sidi ṛebbi, iṣubb-ed
seg igenni, iqeṛṛeb γer uẓekka, iswexxeṛ ablaḍ-nni, yeqqim
fell-as.
3 Ițfeǧǧiǧ am lebṛaq,
llebsa-s ț-țamellalt am udfel.
4 Iεessasen yellan dinna,
ikcem-iten lxuf d ameqqran, qquṛen amzun mmuten.
5 Yenṭeq lmelk γer
tilawin-nni, yenna-yasent : Kunemti ur țțaggademt ara, axaṭer
ẓriγ γef Σisa i yețțusemmṛen γef wumidag i tețnadimt.
6 Ulac-it dagi, iḥya-d
si ger lmegtin akken i t-id-yenna. Asemt-ed aț-țwalimt amkan
anda akken yeḍleq !
7 Azlemt aț-ținimt i
inelmaden-is belli yeḥya-d si ger lmegtin. Atan a kkun-yezwir
γer tmurt n Jlili ; dinna ara t-teẓrem. Atan nniγ-akunt-ț-id !
8 Imiren kan, ṛuḥent
seg uẓekka-nni s lfeṛḥ d ameqqran γas akken uggadent. Uzzlent
ad awint lexbaṛ i inelmaden n Sidna Σisa.
9 Ataya Sidna Σisa imuger-itent-id,
yenna-yasent : Sslam fell-akunt ! Qeṛṛbent, seǧǧdent zdat-es,
ssudnent iḍaṛṛen-is.
10 Imiren Sidna Σisa
yenna-yasent : Ur țțaggademt ! ṛuḥemt inimt i watmaten-iw ad
ṛuḥen γer tmurt n Jlili, dinna ara yi-ẓren.
11 Mi țeddunt deg ubrid,
kra seg iεessasen-nni n uẓekka kecmen γer temdint, xebbṛen
imeqqranen n lmuqedmin γef wayen akk yedṛan.
12 Mi nnejmaεen
imeqqranen n wegdud akk-d imeqqranen n lmuqedmin, msefhamen ad
fken i iεessasen-nni ssuma tameqqrant n yedrimen,
13 nnan-asen : Init belli
d inelmaden-is i d-yusan deg yiḍ, ukren lǧețța-s mi nella
neṭṭes.
14 Ma yella yewweḍ
lexbaṛ-agi γer lḥakem, d nukkni ara t-iqablen iwakken ur awen-ixeddem
ula d acemma.
15 Iεsekṛiyen-nni ṭṭfen
idrimen-nni, xedmen ayen akk i sen-d-nnan lmuqedmin. Tamsalt-agi
țεawaden-ț-id wat Isṛail ar ass-a.
Sidna
Σisa idheṛ-ed i inelmaden-is
16 ḥdac inelmaden-nni ṛuḥen
γer tmurt n Jlili, γer wedrar-nni anda i sen-yenna Sidna Σisa ad
mlilen.
17 Mi t-walan seǧǧden zdat-es,
meεna kra seg-sen mazal țcukkuten.
18 Sidna Σisa iqeṛṛeb-ed
γur-sen, yenna-yasen : Tețțunefk-iyi-d tezmert ama di lqaεa
ama deg igenwan.
19 ṛuḥet γer tmura meṛṛa
n ddunit, slemdet imdanen iwakken ad uγalen d inelmaden-iw, ad
țwaγedṣen s yisem n Baba ṛebbi, s yisem n Mmi-s akk-d yisem n
ṛṛuḥ iqedsen.
20 Slemdet-asen ad tebεen
ayen akk i wen-slemdeγ. Ma d nekk ad iliγ yid-wen yal ass
alamma ț-țaggara n ddunit.
***
|
Amasih.net Akk izerfan
ttwaḥerzen.