|
Aselmed n Sidna Σisa
s γur
Marek Uqdis
Ixef 1
Abecceṛ
n Yeḥya aγeṭṭas
1 Akka i gebda lexbaṛ n lxiṛ yeεnan Σisa Lmasiḥ, Mmi-s
n ṛebbi.
2 Am akken yura di tektabt n nnbi Iceεya : Ad
zzewreγ zdat-ek amceggeε-iw, a k-ifres abrid.
3 Ţ-țaγect n win yețεeggiḍen deg unezṛuf : heggit abrid i Sidi
ṛebbi, ssemsawit iberdan-is !
4 Iban-ed Yeḥya aγeṭṭas deg unezṛuf, yesseγḍas lγaci deg waman,
yeqqaṛ-asen :
Beddlet tikli, aset-ed aț-țețwaγeḍsem iwakken a wen-yeεfu Sidi
ṛebbi.
5 Imezdaγ meṛṛa n tmurt n Yahuda d wid n temdint n
Lquds țṛuḥun-d γur-es, țqiṛṛin s ddnubat-nsen zdat lγaci
dγa
Yeḥya yeṣṣeγḍas-iten deg wasif n Urdun.
6 Yelsa llebsa yețwaxedmen s ccεeṛ n welγem, yebges
tabagust n weglim γef wammas-is. Lqut-is d ajṛad akk-d țament
n lexla.
7 Yețbecciṛ yeqqaṛ : Win ara d-yasen deffir-i yugar
iyi, yesεa tazmert akteṛ-iw ; ur uklaleγ ara ad knuγ a s-fsiγ
ula d lexyuḍ n warkasen-is.
8 Nekk sseγḍaseγ-kkun deg waman, lameεna nețța a kkun-isseγḍes
s ṛṛuḥ iqedsen.
Aγḍas
d ujeṛṛeb n Σisa Lmasiḥ
9 Deg wussan-nni, Sidna Σisa yusa-d si taddart n Naṣaret
γer tmurt n Jlili. Yesseγḍes-it Yeḥya deg wasif n Urdun.
10 Akken i d-iffeγ seg waman, iwala igenwan ldin, ṛṛuḥ iqedsen
iṣubb-ed fell-as s ṣṣifa n tetbirt.
11 Yiwet n taγect
tekka-d seg igenwan tenna-d :
Kečč d Mmi eεzizen ; deg-k i gella lfeṛḥ-iw !
12 Imiren kan, ṛṛuḥ iqedsen yewwi-t γer uneẓruf,
13 anda i t-ijeṛṛeb
Cciṭan ṛebεin wussan. Yețεic ger lewḥuc n lγaba,
lmalayekkat qeddcent fell-as.
ṛebεa
inelmaden imezwura
14 Mi gețwaḥbes Yeḥya, Sidna Σisa iṛuḥ γer tmurt n
Jlili ; yețbecciṛ lexbaṛ n lxiṛ n Sidi ṛebbi, yeqqaṛ :
15 Tageldit n ṛebbi tqeṛṛeb-ed ! Yewweḍ-ed lweqt-is
! Uγalet-ed γer webrid tamnem s lexbaṛ n lxiṛ !
16 Mi gella ileḥḥu rrif n lebḥeṛ n tmurt n Jlili,
iwala Semεun akk-d gma-s Andriyus ṭeggiṛen acebbak γer lebḥeṛ,
axaṭer d iṣeggaḍen i llan.
17 Sidna Σisa yenna-yasen
: Ddut-ed yid-i, a kkun-rreγ d iṣeggaḍen n yemdanen.
18 Imiren kan, ǧǧan icebbaken nsen, ddan yid-es.
19 Ikemmel abrid-is, iwala Yeεqub akk-d gma-s Yuḥenna
yellan d arraw n Zabadi, qqimen di teflukt-nsen țxiḍin icebbaken.
20 Yessawel-asen, imiren kan ǧǧan baba-tsen akk-d
ixeddamen-is di teflukt, ddan d Sidna Σisa.
Sidna Σisa di temdint n Kafernaḥum
21 Sidna Σisa d inelmaden-is wwḍen γer temdint n
Kafernaḥum. Deg wass n ssebt yellan d ass n westeεfu, Sidna
Σisa yekcem
γer lǧameε yebda yesselmad.
22 Lγaci i s-ițḥessisen wehmen deg uselmed ines axaṭer
imeslayen-is sεan tissas ( lhiba ), mačči am uselmed n lεulama
n ccariεa.
23 Yella di lǧameε-nni
yiwen n wergaz i gezdeγ uṛuḥani, yebda yețεeggiḍ yeqqaṛ :
24 D acu tebγiḍ γur-nneγ a Σisa anaṣari ? Tusiḍ-ed a γ-tesnegreḍ ?
Ẓriγ d acu-k, kečč d Imqeddes n
ṛebbi !
25 Sidna Σisa iεeggeḍ fell-as yenna : Susem ! Effeγ seg
wergaz-agi !
26 Aṛuḥani ihucc argaz-nni s lǧehd, yeffeγ seg-s s
leεyaḍ.
27 Lγaci meṛṛa xelεen,
wa yeqqaṛ i wa : D acu-t wayagi ? D acu-t uselmed-agi ajdid
yesεan lhiba ? Argaz-agi yeḥkem ula γef yiṛuḥaniyen yerna țțaγen-as awal !
28 Seg imiren, Sidna Σisa
yețwassen di tmurt n Jlili meṛṛa.
29 Mi d-ffγen si lǧameε, ṛuḥen γer wexxam n Semεun d
Andriyus, yedda Yeεqub d Yuḥenna.
30 Taḍeggalt n Semεun tuḍen, tuγ-iț tawla ; hedṛen-as
fell-as i Sidna Σisa.
31 Iqeṛṛeb γur-es, yeṭṭef-as afus, yeskker-iț-id. Imiren kan teffeγ-iț tawla-nni, tekker tqeddec-asen.
32 Tameddit mi geγli yiṭij,
wwin-as-d aṭas n imuḍan akk-d wid zedγen iṛuḥaniyen.
33 Lγaci n temdint meṛṛa nnejmaεen-d zdat tewwurt.
34 Sidna Σisa yesseḥla aṭas n imuḍan i ghelken yal aṭan
; yessufeγ aṭas n iṛuḥaniyen yerna ur ten-yețțaǧa ara a d-mmeslayen,
axaṭer nutni ẓran d acu-t.
Abecceṛ
di tmurt n Jlili
35 Ṣṣbeḥ zik uqbel ad yali wass, Sidna Σisa yeffeγ γer
lexla iwakken ad yedεu γer Sidi ṛebbi.
36 Semεun d imdukkal-is
ffγen ad nadin fell-as ;
37 mi t-ufan, nnan-as : A Sidi, medden
akk țnadin fell-ak.
38 Sidna Σisa yerra-yasen : Eyyaw a nṛuḥet γer tudrin
iqeṛben axaṭer ilaq ad beccṛeγ daγen dinna.
Γef wannect-agi i
d-usiγ.
39 Dγa iṛuḥ γer tmurt n Jlili, yețbecciṛ di
leǧwameε, yessufuγ leǧnun.
Ḥellu n yiwen ubeṛsi
40 Yiwen wergaz ihelken lbeṛs yusa-d γer Sidna
Σisa,
yeγli γef tgecrar, iḥellel-it yenna-yas : A Sidi, ma tebγiḍ,
tzemreḍ a yi-tesseḥluḍ.
41 Sidna Σisa iγaḍ-it wergaz-nni, dγa yeẓẓel afus-is
innul-it, yenna yas : Bγiγ, ili-k teḥliḍ !
42 Imiren kan, yeḥla si lbeṛs-nni, yuγal yeṣfa.
43 Sidna Σisa iserreḥ-as
ad iṛuḥ, iweṣṣa-t s lḥeṛs yenna-yas :
44 Sel-iyi-d mliḥ ! Ur țεawad i yiwen ayen yedṛan,
lameεna ṛuḥ a k-iẓer lmuqeddem, tawiḍ asfel γef
ṣeffu-inek akken i t-id-iweṣṣa Musa.
45 Meεna akken kan iṛuḥ, argaz-nni yebda yețberriḥ di
mkul amkan, ayen yedṛan yid-es. Daymi Sidna Σisa ur yezmir ara a
d-isbeggen iman-is di temdint, meεna yețγimi di beṛṛa deg
imukan iḍeṛfen. Lγaci țțasen-d γur-es si mkul tama.
Ixef
2
Ḥellu n
yiwen wukrif
1 Σeddan kra wussan, Sidna Σisa yuγal-ed γer Kafernaḥum
; yeffeγ lexbaṛ belli deg wexxam-nni i gella.
2 Aṭas n lγaci i d-innejmaεen, armi ur d-yeqqim wemkan
ula zdat tewwurt . Nețța yețbecciṛ-asen awal n Sidi ṛebbi.
3 A ten-aya ṛebεa yergazen wwin-d yiwen wukrif i Sidna
Σisa.
4 Akken walan ur zmiren
ara a t-ssiwḍen γur-es si lγaci-nni, kkan-d si ssqef, kksen
iqermuden sennig wanda yella Sidna Σisa, syenna ssadren-d ukrif-nni
deg wusu-ines.
5 Mi gwala liman-nsen, Sidna Σisa yenna i wukrif-nni :
Ţwaεeffan-ak
ddnubat-ik a mmi.
6 Llan dinna kra lεulama qqimen țxemmimen deg ulawen-nsen
qqaṛen :
7 Amek armi yessaweḍ a d-yini imeslayen-agi ? Wagi d
lekfeṛ ! Anwa i gzemren ad yeεfu ddnubat anagar Sidi ṛebbi ?
8 Imiren kan Sidna Σisa yeẓra ayen țxemmimen deg ulawen-nsen,
yenna yasen : Acuγer tețxemmimem akkagi deg ulawen-nwen ?
9 D acu i gsehlen a s-t-iniγ i wukrif-agi : țwaεfan-ak
ddnubat-ik, neγ kker ddem usu-inek telḥuḍ ?
10 Ihi bγiγ aț-țeẓrem
belli Mmi-s n bunadem yezmer ad yeεfu ddnubat di ddunit. Yenna
i wukrif-nni :
11 Kker, ddem usu-inek tṛuḥeḍ γer wexxam-ik !
12 Imiren kan, yekker yeddem usu-ines, yeffeγ zdat-nsen
irkul. Lγaci wehmen deg wayen yedṛan, țḥemmiden Sidi ṛebbi,
qqaṛen : Werǧin
( di leεmeṛ ) neẓri ayagi !
Sidna
Σisa yessawel i Lewwi
13 Sidna Σisa yuγal γer rrif n lebḥeṛ. Aṭas n lγaci i
d-ițasen γur-es dγa yesselmad-iten.
14 Mi gεedda, iwala yiwen
umekkas yeqqim ițeṭṭef leγṛama, isem-is Lewwi d mmi-s n
Σalfi.
Sidna Σisa yenna-yas : Ddud-d yid-i ! Lewwi yekker, yedda yid-es.
15 Mi llan tețțen deg wexxam n Lewwi nețța d
inelmaden-is, qqimen-d yid-sen imekkasen akk-d yir imdanen,
axaṭer aṭas i t-ittabaεen.
16 Lεulama d ifariziyen mi t-walan itețț d imekkasen
akk-d yir imdanen, nnan i inelmaden-is : Acuγer Ssid-nwen itețț
d imekkasen akk-d imednuben ?
17 Mi sen-yesla Sidna Σisa, yenna yasen :
Mačči d wid iṣeḥḥan i geḥwaǧen ṭṭbib, meεna d imuḍan.
Ur d-usiγ ara ad ssiwleγ i iḥeqqiyen, meεna i imednuben.
Asteqsi
γef wuẓummu
18 Inelmaden n Yeḥya aγeṭṭas akk-d ifariziyen llan
țțuẓummen. Usan-d ad steqsin Sidna Σisa nnan-as :
Acuγer inelmaden n Yeḥya d inelmaden n ifariziyen țțuẓummen,
ma d inelmaden-ik ur țțuẓummen ara ?
19 Sidna Σisa yerra-yasen : Eεni zemren inebgawen n tmeγṛa ad uẓummen ma yella yid-sen yesli ? Kra ara yekk yesli
yid-sen ur zmiren ara ad uẓummen.
20 A d-yas lweqt i deg ara sen yețwakkes yesli, deg wass-nni
ad uẓummen.
21 Yiwen ur yețxiḍi tafaweț tajdiṭ i uceṭṭiḍ
aqdim, neγ m'ulac tafaweț-nni ara s-nernu aț-țesseγṛes aceṭṭiḍ-nni
aqdim dγa acerrig-nni ad innerni.
22 Yiwen ur ițțačaṛ iyeddiden ( tiyelwin ) iqdimen s
ccṛab ajdid, neγ m'ulac ccṛab-nni ad ifelleq iyeddiden ;
ccṛab ad inγel, iyeddiden-nni ad qqeṛsen. Meεna ccṛab ajdid
ilaq ad immir γer iyeddiden ijdiden !
Ass n
westeεfu
23 Yiwen wass n ssebt yellan d ass n westeεfu , Sidna
Σisa yezger igran n yirden. Inelmaden-is teddun țekksen
tigedrin.
24 Ifariziyen nnan-as :
Acuγer xeddmen inelmaden-ik ayen ur nelli ara d leḥlal deg wass
n ssebt ?
25 Sidna Σisa yerra-yasen
: Di leεmeṛ teγṛim wayen yexdem ugellid Dawed asmi i
ten-yeṭṭef laẓ nețța d irfiqen-is ?
26 Yekcem γer wexxam n Sidi ṛebbi deg wussan i deg yella
Abyaṭar d lmuqeddem ameqqran, yečča nețța d irfiqen-is
tiḥbulin-nni n weγṛum yețțunefken d lweεda, γas akken aγṛum-nni i lmuqedmin kan iwumi yeḥlel.
27 Yenna-yasen : Ass n westeεfu yețwaxdem i wemdan,
mačči d amdan i gețwaxedmen i wass n westeεfu.
28 Daymi Mmi-s
n bunadem yeḥkem ula γef wass n westeεfu.
Ixef 3
Win
iwumi yekref ufus
1 Sidna Σisa yuγal γer
lǧameε. Yella dinna yiwen wergaz iwumi yekref ufus.
2 Wid yellan dinna țεassan
deg-s ad walin m' ad isseḥlu deg wass n westeεfu, iwakken ad
ccetkin fell-as.
3 Sidna Σisa yenna i wergaz-nni iwumi yekref ufus : Ekker
tbeddeḍ dagi di tlemmast.
4 Imiren yenna i wid yețmuqulen : D acu i d-teqqaṛ
ccariεa-nneγ γef wayen yeεnan ass n westeεfu ? A nexdem lxiṛ
neγ a nexdem cceṛ ? A nsellek taṛwiḥt n wemdan neγ a t-neǧǧ
ad immet ?
Lameεna nutni ssusmen meṛṛa, ur zmiren ara a d-rren awal.
5 Sidna Σisa imuqel-iten
s wurrif, yerna yeḥzen aṭas fell-asen imi qquṛen wulawen
nsen. Yenna i wergaz-nni : Ḍleq-ed ( eẓẓel-ed ) afus-ik !
Iḍleq-it dγa yeḥla ufus-is.
6 Imiren ifariziyen ffγen, ṛuḥen ad mcawaṛen nutni d
ihiṛudiyen amek ara t-nγen.
Sidna
Σisa akk-d lγaci
7 Sidna Σisa ijbed iman-is nețța d inelmaden-is γer
rrif n lebḥeṛ n tmurt n Jlili.
Aṭas n lγaci i t-id-itebεen. Usan-d si mkul tama n tmurt n
Jlili, si tmurt n Yahuda,
8 si temdint n Lquds, si
tmurt n Idum, si tmurt akkin i wasif n Urdun, si leǧwahi n
temdinin n Ṣur akk-d Sidun. Mi slan s wayen ixeddem, aṭas n
lγaci i d-yețțasen γur-es.
9 Sidna Σisa iweṣṣa inelmaden-is a s-heggin taflukt,
akken ur t-iḥeṛṛes ara lγaci.
10 Ladγa imi yețdawi
aṭas n imuḍan, wid akk yuḍnen ẓeddmen fell-as iwakken a
t-nnalen.
11 Iṛuḥaniyen m'ara t-walin, γellin zdat-es qqaṛen-as
: « Kečč d Mmi-s n ṛebbi !»
12 Meεna nețța yețgalla deg-sen iwakken ur d-qqaṛen
ara anwa-t.
Sidna
Σisa yextaṛ tnac ṛṛusul
13 Sidna Σisa yuli γer yiwet n tiγilt, yessawel i wid
yebγa dγa usan-d γur-es.
14 Yextaṛ tnac deg-sen ad ilin d ṛṛusul
ad țeddun daymen yid-es, iwakken a ten-iceggeε ad beccṛen
lexbaṛ n lxiṛ,
15 a sen-yefk tazmert akken ad ssuffuγen leǧnun.
16 A ten-ah tnac-nni yextaṛ : Semεun iwumi isemma
Buṭrus,
17 Yeεqub akk-d gma-s Yuḥenna yellan d arraw n Zabadi
iwumi isemma Buneṛǧes ( yeεni arraw n ṛṛεud ).
18 Andriyus, Filbas, Bartelmay, Matta, Tuma, Yeεqub mmi-s
n Σalfi, Taddi, Semεun akenεani ( awaṭani )
19 akk-d Yudas n
Qeṛyut, win akken ixedεen Sidna Σisa.
Ddnub
ur nețwasemmaḥ ara
20 Imiren, Sidna Σisa yuγal γer wexxam. Nnejmaεen-d daγen
γur-es lγaci ḥeṛsen-t nețța d inelmaden-is armi ur zmiren
ara ad ččen.
21 Mi gewweḍ lexbaṛ γer imawlan is, ṛuḥen-d a t-awin
axaṭer γilen yedderwec !
22 Imusnawen n ccariεa i
d-yusan si temdint n Lquds qqaṛen : D Balzabul iḥekkmen γef
leǧnun i t-izedγen , s tezmert-is i gessufuγ leǧnun !
23 Sidna Σisa yessawel-asen, ihdeṛ asen s lemtul,
yenna-yasen : Amek yezmer Cciṭan ad issufeγ Cciṭan ?
24 Ma yella țnaγen
imezdaγ n tmurt wway gar-asen, tamurt-nni ur tețdum
ara.
25 Ma yella yekker ccwal
ger wat wexxam, axxam-nni ad yeγli ur yețbeddad ara.
26 Ihi ma yella Cciṭan yețnaγ d yiman-is tebḍa
tgeldit-is, tazmert-is aț-țeγli dγa aț-țefnu.
27 Yiwen ur izmir ad ikcem γer wexxam n wergaz iǧehden
iwakken a d-yaker ayla-s, m'ur t-yuriz ara uqbel ! M'ara
t-yarez, imiren yezmer ad yaker axxam-is meṛṛa !
28 A wen-d-iniγ tideț : a sen țwasemmḥen i yemdanen
meṛṛa ddnubat-nsen d rregmat-nsen,
29 ma d win ireggmen ṛṛuḥ
iqedsen, d lmuḥal ad yețțusemmeḥ ; ddnub-is ad yeqqim γef
yir-is i dayem.
30 Yenna-d annect-agi axaṭer qqaṛen-as: Izdeγ-it
Cciṭan. Yemma-s d watmaten n Sidna Σisa
31 Wwḍen-d watmaten n Sidna Σisa akk-d yemma-s. Qqimen
di beṛṛa, ceggεen γur-es a d-yas.
32 Nețța yella zdaxel n
wexxam yezzi-yas aṭas lγaci ; nnan-as : A Sidi, yemma-k d
wayetma-k akk-d yessetma-k, atnan di beṛṛa țnadin fell-ak.
33 Sidna Σisa yerra-yasen : Anta i d yemma, anwi i d
aytma ?
34 Dγa imuqel meṛṛa wid i s-d yezzin yenna : Ațah
yemma, atnah wayetma.
35 Axaṭer win ixeddmen lebγi n Sidi ṛebbi, d win i d gma, i d weltma, i d yemma !
Ixef 4
Lemtel
n win izerεen
1 Sidna Σisa yebda daγen yețbecciṛ rrif n lebḥeṛ n tmurt
n Jlili. Imi i d-innejmaε γur-es waṭas n lγaci, yuli γer
teflukt yeqqim. Taflukt-nni tella s ufella n waman, lγaci yeqqim
γer lqaεa, rrif n lebḥeṛ.
2 Yebda yesselmad iten s
lemtul, yeqqaṛ-asen :
3 Selt-iyi-d ! Yiwen ufellaḥ yeffeγ ad izreε.
4 Mi gella izerreε, γlin kra iεeqqayen deg webrid : ṛuḥen-d igṭat ( ifṛax ) leqḍen-ten.
5 Kra iεeqqayen nniḍen γlin ger idγaγen anda ulac aṭas
n wakal, dγa mγin-d imiren, axaṭer tissi n wakal ur lqayet ara.
6 Mi d-yuli yiṭij, yezlef imγan-nni dγa qquṛen, imi
izuṛan-nsen ur lqayit ara.
7 Kra iεeqqayen nniḍen γlin ger isennanen ; mi gman
isennanen-nni γummen-ten dγa ur d-fkin ara lfakya.
8 Kra iεeqqayen nniḍen γlin deg wakal yelhan, mi gman, nnernan fkan-d tigedrin ; ta
tefka-d tlatin n tεeqqayin, tayeḍ sețțin, tayeḍ meyya.
9 Yenna-yasen : Win yesεan imeẓẓuγen, isel-ed !
Acuγer
ițmeslay Sidna Σisa s lemtul
10 Mi gebεed γef lγaci, wid i s-d yezzin akk-d tnac-nni
inelmaden ssutren-as a sen-yessefhem lemtul i sen d-yewwi.
11 Yerra-yasen : Kunwi
yețțunefk-awen aț- țissinem sser n tgeldit n ṛebbi, ma d
wiyaḍ sellen i mkul lḥaǧa s lemtul,
12 iwakken :
Γas țmuqulen
ur țwalin ara, γas sellen ur fehhmen ara ;
m'ulac a d-uγalen γer webrid dγa ṛebbi a sen-yeεfu
ddnubat-nsen !
Lmeεna
n lemtel n win izerεen
13 Yenna-yasen daγen : M'ur tefhimem ara lmeεna n lemtel-agi,
amek ara tfehmem lemtul nniḍen ?
14 Afellaḥ-nni, d win
izerrεen awal n ṛebbi.
15 Kra yemdanen cban iri n webrid anda yețwazreε wawal n
ṛebbi. Akken kan i s-slan, yusa-d Cciṭan iqleε-ed awal-nni i
gețwazerεen deg ulawen-nsen.
16 Wiyaḍ cban akal yeččuṛen d idγaγen, akken ara slen
i wawal n ṛebbi, qebblen-t s lfeṛḥ ;
17 lameεna ur t-țțaǧan
ara ad yefk izuṛan deg ulawen-nsen, ṭṭfen deg-s kra lweqt
kan.
Mi d-yewweḍ leεtab d uqehheṛ γef ddemma n wawal n ṛebbi,
țțuγalen γer deffir, țaǧǧan liman-nsen.
18 Wiyaḍ țemcabin γer wakal yeččuṛen d isennanen,
sellen i wawal n ṛebbi,
19 meεna iγeblan, ṭṭmeε,
lerbaḥ akk-d zzhu n ddunit-agi, skuffuren ( țkemmimen ) awal-nni,
ur d-yețțawi ara lfayda.
20 Wiyaḍ cban akal yelhan anda teγli zzerriεa, sellen i
wawal n ṛebbi, qebblen-t, țțaken-d lfayda. Mkul aεeqqa
yeggar-ed wa tlatin, wa sețțin, wa meyya.
Lemtel
n teftilt
21 Yenna-yasen daγen : Eεni yella win ara iceεlen taftilt
iwakken a ț-yerr seddaw lḥila neγ seddaw n wusu ? Mačči
iwakken a ț-issers s ufella n lmeṣbeḥ ?
22 Ulac ayen yeffren ur d-nețban, ulac ayen iγummen ur
d-tețbeggin tafat.
23 Smeḥset-ed mliḥ, ma
tesεam imeẓẓuγen isellen !
24 Yerna yenna-yasen : Ḥadret γef wayen tsellem ! Axaṭer
akken i tețțektilim i wiyaḍ ara wen-d-ițwaktil i kunwi,
yerna a wen-d ițwaktil s zzyada.
25 Axaṭer win yesεan a
s-rnun, ma d win ur nesεi ara a s-yețwakkes ula d ayen yesεa.
Lemtel
n zzerriεa i d-igman iman-is
26 Sidna Σisa yenna-yasen daγen : Tageldit n Sidi ṛebbi
tețțemcabi γer yiwen ufellaḥ i gzerεen iger.
27 Ama yeṭṭes ama ur yeṭṭis, am yiḍ am ass, zzerriεa
tețțemγay tgemmu, ur yeẓri amek.
28 Akal yețțak-ed s
yiman-is lγella. Tazwara d imγi ad yuγal ț-țigdert, taggara
tigdert-nni aț-țeččaṛ d iεeqqayen.
29 Mi wwan yirden, afellaḥ-nni a d-yas a ten-yemger,
axaṭer yewweḍ ed lweqt n tmegra.
Lemtel
n zzerriεa n uxerḍel
30 Yenna daγen : Γer wacu i nezmer a nmettel tageldit n ṛebbi, neγ anwa lemtel ara d-nawi fell-as ?
31 Ițemcabi γer uεeqqa n
uxerḍel. M'ara t-nezreε, d nețța i d aεeqqa amecṭuḥ meṛṛa
ger zzerriεat n ddunit.
32 Mi gețwazreε, igemmu
yețțali alamma yekka-d sennig akk yemγan n tebḥirt, yeggar ed
ifurkawen imeqqranen, ula d igṭaṭ ( ifṛax ) n igenni,
țruḥun-d ad ddarin ( ddurqen ) seddaw tili-ines.
33 S waṭas n lemtul am wigi i sen ițbecciṛ awal n
ṛebbi, akken i tella lefhama n mkul yiwen.
34 Ițmeslay-asen anagar
s lemtul, meεna m'ara yili akk-d inelmaden-is, yessefham-asen
kullec.
Sidna
Σisa yeḥbes tabuciḍant n lebḥeṛ
35 Ass-nni kan mi geγli yiṭij, Sidna Σisa yenna i
inelmaden-is : Eyyaw a nzegret agummaḍ n lebḥeṛ.
36 Mi gerra lγaci-nni, iṛuḥ yid-sen di teflukt i deg
yella. Ddant yid-es kra teflukin nniḍen.
37 Tekker-ed yiwet n tbuciḍant, tessalay-ed lemwaji γer
teflukt tețțacaṛ-iț.
38 Sidna Σisa yella yeṭṭes
di teflukt deffir n inelmaden-is, yessers aqeṛṛuy-is γef
tsumta. Sakin-t-id nnan-as :
A Sidi, eεni ur ak-tewqiε ara ma
nemmut ?
39 Sidna Σisa yekker-ed iεeggeḍ γef waḍu, yenna i
lebḥeṛ : Ssers iman-ik ! Ssusem ! Yers waḍu-nni, dγa tuγal-ed
talwit.
40 Yenna i inelmaden-is :
Acuγer i tuggadem akka ? Mazal ur tuminem ara ?
41 Meεna ikcem-iten akk lxuf d ameqqran, qqaṛen wway
gar-asen : Anwa-t wagi iwumi țțaγen awal ula d aḍu d lebḥeṛ
?
Ixef 5
Ḥellu n
wergaz yețwamelken
1 Usan-d seg ugemmaḍ n
lebḥeṛ γer tmurt n ijiṛaziyen.
2 Akken kan i d-yers
Sidna Σisa si teflukt, ataya yiwen wergaz yezdeγ uṛuḥani,
yeffeγ-ed si tjebbant iteddu-d γur-es.
3 Yezdeγ ger iẓekwan, yiwen ur izmir a t-yarez ula s
ssnesla
4 axaṭer acḥal d abrid
i t-qqnen s ixelxalen n wuzzal deg iḍaṛṛen, s ssnasel deg
ifassen, meεna yesseγṛas-iten akk, daymi ur yezmir yiwen a
t-iṭṭef.
5 Iḍ d wass nețța deg
uneẓruf, yețεeggiḍ, ijerreḥ iman-is s iblaḍen.
6 Mi gwala Sidna Σisa si lebεid, yuzzel-ed yeγli γef
tgecrar zdat-es.
7 Iεeggeḍ s lǧehd : D
acu i tebγiḍ γur-i a Σisa, a mmi-s n ṛebbi εlayen ? Di
leεnaya-k, γef wudem n ṛebbi ur iyi-țεețțib ara !
8 Axaṭer Sidna Σisa yeqqaṛ-as : Effeγ seg umdan-agi ay
aṛuḥani !
9 Yesteqsa-t yenna-yas : Isem-ik ? Yerra-yas-d : Isem-iw
tarbaεt, axaṭer deg waṭas yid-nneγ i nella.
10 Dγa țḥellilen deg-s rennun iwakken ur ten-yessufuγ
ara si tmurt-nni.
11 Yuγ lḥal tella dinna yiwet n tqeḍεit n yilfan kessen
;
12 ḥellelent nnan-as :
Di leεnaya-k, ǧǧaγ a nekcem deg yilfan-agi.
13 Iserreḥ-asen, dγa ffγen seg wergaz-nni, kecmen deg
ilfan-nni, imiren grarben seg wedrar γer lebḥeṛ, llan deg
wazal n walfin yid-sen, γeṛqen meṛṛa.
14 Wid ikessen ilfan-nni
rewlen, ssawḍen lexbaṛ γer temdint akk-d tudrin dγa lγaci ṛuḥen-d ad walin ayen yedṛan.
15 Mi d-wwḍen γer Sidna
Σisa, walan win akken tezdeγ terbaεt n iṛuḥaniyen yeqqim,
yelsa llebsa, yuγal-ed γer leεqel-is ; imiren ikcem-iten lxuf.
16 Wid i gḥeḍren ḥekkun-d i wiyaḍ ayen yedṛan d win
yețwazedγen akk-d țqeḍεit-nni n yilfan.
17 Imiren bdan țḥellilen Sidna
Σisa ad iffeγ si tmurt-nsen.
18 Akken iteddu Sidna Σisa ad yali γef teflukt, win akken
yellan yețwazdeγ yețḥellil deg-s yeqqaṛ-as : Di leεnaya-k
eǧǧ-iyi ad dduγ yid-ek.
19 Lameεna Sidna Σisa yugi, yenna-yas : Uγal γer
wexxam-ik d leḥbab-ik, teḥkuḍ-asen ayen i k-ixdem Sidi ṛebbi.
20 Iṛuḥ, yebda yețberriḥ di εecṛa n temdinin-nni
ayen akk i s-yexdem Sidna Σisa. Kra win i s-yeslan yetεeǧǧeb.
Ḥellu n
yiwet n tmeṭṭut akk-d ḥeggu n yelli-s n Jayṛus
21 Sidna Σisa yuγal s teflukt γer ugemmaḍ n lebḥeṛ.
Innejmaε-ed daγen lγaci γur-es mi gella rrif n lebḥeṛ.
22 Yiwen seg lecyux n lǧameε,
isem-is Jayṛus, akken i gwala Sidna Σisa, yeγli γer iḍaṛṛen-is,
23 ițḥellil deg-s
irennu, yeqqaṛ-as : A Sidi, di leεnaya-k ! Yelli tețmețțat,
ddu-d yid-i ssers ifassen-ik fell-as iwakken aț-țeslek, ur
tețmețțat ara !
24 Sidna Σisa iṛuḥ yid-es. Aṭas n lγaci i t-itebεen, ḥerṣen-t si mkul tama.
25 Tella dinna yiwet n
tmeṭṭut tehlek, tnac iseggasen nețțat tețțazal d idammen.
26 Tenεețțab aṭas ger ifassen n ṭṭeba, texṣeṛ ayen
akk i tesεa, meεna ur teḥli ara, terna tenṭer akteṛ.
27 Mi tesla heddṛen γef Sidna Σisa , tṛuḥ-ed deffir-es
ger lγaci, tennul ajellab-is.
28 Axaṭer teqqaṛ deg iman-is : ma nnuleγ ulamma d
icuḍaḍ n ubeṛnus-is, ad ḥluγ.
29 Imiren kan ḥebsen idammen-nni, tḥulfa ( tḥuss ) i
yiman-is teḥla seg waṭan-is.
30 Di teswiεt-nni Sidna
Σisa iḥuss i yiwet n tezmert teffeγ seg-s. Yezzi γer lγaci-nni
yenna : Anwa i d-innulen ajellab-iw ?
31 Inelmaden-is rran-as
: Aql-ik ger lγaci ḥeṛsen-k-id si mkul tama, teqqaṛeḍ anwa i
yi-d innulen ?
32 Nețța yețmuqul di lγaci i s-d yezzin iwakken ad
iwali tameṭṭut-nni.
33 Tameṭṭut-nni, mi
twala ayen yedṛan yid-es texleε, tețțergigi ; tṛuḥ-ed teγli
γer iḍaṛṛen n Sidna Σisa tenna-yas akk tideț.
34 Yenna-yas : A yell-i, d liman-im i kkem-yesseḥlan ;
ṛuḥ di lehna, aql-ikkem teṣfiḍ si lehlak-im.
35 Mazal-it yețmeslay, a ten-aya usan-d kra yergazen seg
wexxam n Jayṛus ccix-nni n lǧameε, nnan-as : Yelli-k temmut,
ur țεețțib ara Sidna Σisa.
36 Lameεna Sidna Σisa mi gesla i imeslayen-nni, yenna i
ccix-nni : Ur țțaggad ara, amen kan !
37 Ur yeǧǧi yiwen ad yeddu yid-es anagar Buṭrus,
Yeεqub akk-d gma-s Yuḥenna.
38 Mi wwḍen γer wexxam n
ccix-nni n lǧameε, Sidna Σisa yufa lγaci yenhewwal, țrun,
țmeǧǧiden.
39 Yekcem γer wexxam
yenna-yasen : Iwacu lehwel d imeṭṭawen-agi ? Taqcict ur temmut
ara, teṭṭes kan.
40 Stehzayen fell-as. Dγa yessufeγ iten akk, yewwi
imawlan n teqcict-nni akk-d tlata-nni inelmaden, yekcem γer
texxamt anda tella teqcict-nni ;
41 yeṭṭef afus n
teqcict-nni yenna-yas : Talita, qumi ! (Yeεni : « A taqcict,
ekker ! »)
42 Imiren kan, tekker-ed teqcict-nni tebda tleḥḥu.
Fell-as tnac iseggasen. Wid yellan dinna xelεen tεeǧǧben deg
wayen walan.
43 Sidna Σisa iweṣṣa-ten ur țεawaden i yiwen
ayen yedṛan ; dγa yenna-yasen :
Fket-as aț-țečč.
Ixef 6
Sidna Σisa di Naṣaret
1 Sidna Σisa iṛuḥ syenna γer tmurt-is, ddan yid-es
inelmaden is.
2 Akken i d-yewweḍ wass
n westeεfu, yebda yesselmad di lǧameε. Aṭas i gwehmen seg wid
i s-isellen, qqaṛen : Ansi i s-d-yekka wayagi ? D acu-ț
lefhama-yagi i s-d ițțunefken ? Ansi i s-d-tekka tezmert s
wayes ixeddem lbeṛhanat-agi meṛṛa ?
3 Mačči d wagi i d
aneǧǧaṛ-nni, mmi-s n Meryem, gma-s n Yeεqub, n Yuses, n Yuda
akk-d Semεun ? Anaγ yessetma-s gar-aneγ i țεicint ? Ayagi
yella-yasen d ugur daymi ur uminen ara yis.
4 Sidna Σisa yenna-yasen : Anagar di tmurt-is ger imawlan
is d wat wexxam-is i gețwaḥqeṛ nnbi.
5 Ur yexdim dinna ula d yiwen n lbeṛhan, anagar kra
imuḍan i γef yessers ifassen-is yesseḥla-ten.
6 Yewhem deg-sen imi ugin ad amnen. Dγa ileḥḥu,
yesselmad di tudrin iqeṛben tamdint n Naṣaret.
Sidna
Σisa iceggeε tnac inelmaden-is
7 Sidna Σisa yessawel i tnac-nni inelmaden, iceggeε-iten
sin sin, yefka yasen tazmert ad ssufγen iṛuḥaniyen.
8 Iweṣṣa-ten, yenna-yasen : Ur țțawit yid-wen acemma i
webrid, ama d aγṛum, ama d agrab ama d aṣurdi deg waggus,
anagar aεekkaz deg ufus.
9 Elset irkasen, meεna ur
țțawit ara yid-wen aqenduṛ wis sin.
10 Yenna-yasen daγen : Axxam anda stṛeḥben yis-wen
qqimet γur-sen alamma tṛuḥem.
11 Ma yella wanda ur sṭerḥben ara yis-wen, ur bγin ara
a wen-slen, ṛuḥet syenna, zwit aγebbaṛ n warkasen-nwen, ddnub
i yirawen-nsen.
12 ṛuḥen țbecciṛen i yemdanen iwakken a d-uγalen γer
webrid.
13 Ssufuγen aṭas n
leǧnun, dehhinen s zzit aṭas n imuḍan, sseḥlayen-ten.
Lmut n
Yeḥya aγeṭṭas
14 Yuγal yisem n Sidna Σisa mechuṛ di tmurt meṛṛa,
yewweḍ lexbaṛ-is γer ugellid Hiṛudus. Kra qqaṛen : D Yeḥya
aγeṭṭas i d-iḥyan si ger lmegtin, daymi i gezmer ad ixdem
lbeṛhanat.
15 Wiyaḍ qqaṛen : D nnbi Ilyas. Wiyaḍ daγen qqaṛen-as
: D nnbi am lenbiya nniḍen.
16 Meεna mi gesla Hiṛudus s wannect-agi, yeqqaṛ : D
Yehya-nni iwumi kkseγ aqqeṛṛuy, i d-iḥyan !
17 Axaṭer d Hiṛudus s yiman-is i gerran Yeḥya γer
lḥebs yeqqen-it s ssnasel, mi t-ilum imi guγ Hiṛudyad yellan
ț-țameṭṭut n gma-s Filbas.
18 Yeḥya aγeṭṭas yella yeqqaṛ-as : D leḥṛam fell-ak
aț-țaγeḍ tameṭṭut n gma-k !
19 Daymi i t-tekṛeh Hiṛudyad, yerna tețqellib amek ara
t-tneγ lameεna ur s-tufi ara abrid ;
20 axaṭer Hiṛudus
yețqadaṛ Yeḥya imi i t-iẓra d argaz yeṣfan, d aḥeqqi, daymi i
gețḥunnu fell-as. Iḥemmel ad ismeḥses i wawal-is,
meεna m'ara s-isel iεewweq.
21 Ațaya teγli-yas-d sebba i Hiṛudyad... Ass n lεid n
tlalit-is, Hiṛudus iεreḍ-ed γer imensi imeqqranen n tgelda-s,
imeqqranen n lεeskeṛ akk-d imdebbṛen n tmurt n Jlili.
22 Tekcem-ed yelli-s n Hiṛudyad tecḍeḥ, dγa teεǧeb-as
i Hiṛudus d inebgawen-is. Agellid yenna i teqcict-nni :
Ssuter-iyi-d ayen tebγiḍ a m-t-id fkeγ.
23 Yerna yeggul-as : Ssuter-ed ayen tebγiḍ a m-t-id
fkeγ, γas d azgen di tgelda-w.
24 Teffeγ tenna i yemma-s : D acu ara s-ssutreγ ?
Terra-yas : Ssuter-as aqeṛṛuy n Yeḥya.
25 Tekcem γer ugellid tenna-yas : Efk-iyi-d tura kan
aqeṛṛuy n Yeḥya deg uḍebsi !
26 Agellid-nni yeḥzen mačči d kra, lameεna imi
s-yeggul zdat inebgawen is, ur yezmir ara ad iḥnet.
27 Iceggeε imiren kan yiwen uεessas, yumeṛ-it a s-d-yawi
aqeṛṛuy n Yeḥya aγeṭṭas. Aεessas-nni iṛuḥ γer lḥebs,
ikkes-as aqeṛṛuy i Yeḥya.
28 Yewwi-t-id deg uḍebsi, yefka-t i teqcict-nni, ma d
nețțat tewwi-t i yemma-s.
29 Mi slan s wayagi, inelmaden n Yeḥya usan-d wwin
lǧețța-s meḍlen-ț.
Uγalen-d
inelmaden
30 Uγalen-d inelmaden, nnejmaεen γer Sidna
Σisa, ḥkan-as
ayen akk xedmen d wayen slemden.
31 Imi aṭas n lγaci i gețṛuḥun țțuγalen-d, ur sεin
ara lweqt ad ččen, dγa Sidna Σisa yenna-yasen : Eyyaw a
nṛuḥet γer wemkan iḍeṛfen iwakken aț-țesteεfum.
32 Rekben di teflukt, ṛuḥen ad stuṛṛfen iman-nsen.
Assefti n xemsa n teḥbulin n weγṛum d sin iselman (iḥewtiwen
)
33 Aṭas i ten-iwalan mi ṛuḥen, εeqlen-ten, imiren
uzzlen-d γef wuḍar si mkul tamdint. Zwaren-ten γer wanda akken
i teddun.
34 Mi d-yers si teflukt, iwala ayendin n lγaci ; dγa
γaḍen-t imi cban taqeḍεit n wulli ur nesεi ameksa. Yebda
yesselmad-iten deg waṭas n lecγal.
35 Mi qṛib ad yeγli
wass, usan-d inelmaden-is nnan-as : Amkan-agi yexla yerna iṛuḥ
lḥal,
36 serreḥ i lγaci ad ṛuḥen
γer leεzayeb ț-țudrin i d-iqeṛben iwakken a d-aγen
ayen ara ččen.
37 Yerra-yasen : Fket-asen kunwi ayen ara ččen ! Nutni
rran-as : Eεni tebγiḍ a nṛuḥ a d-naγ aγṛum s wazal n mitin
alef iwakken a nessečč annect-agi n lγaci ?
38 Dγa yenna-yasen : Acḥal n teḥbulin n weγṛum i
tesεam ? ṛuḥet aț-țwalim . Mi d-ẓran, nnan-as :
γur-nneγ
xemsa n teḥbulin n weγṛum d sin iḥewtiwen (iselman ).
39 Imiren, Sidna Σisa yenna i inelmaden-is ad sγimen
lγaci ț-țirebbaε γef leḥcic.
40 Qqimen ț-țirebbaε n meyya akk d xemsin.
41 Yeddem xemsa n teḥbulin-nni n weγṛum d sin
iḥewtiwen, yerfed allen-is γer igenni yeḥmed ṛebbi. Yebḍa aγṛum-nni, yefka-t i inelmaden a t-feṛqen i lγaci. Ifṛeq-asen
ula d sin-nni iḥewtiwen.
42 Ččan akk armi ṛwan,
43 jemεen-d tnac iḍellaεen n weγṛum akk-d lḥut i d-yegran.
44 Wid yeččan si lqut-nni llan di xemsa alef yid-sen.
Sidna
Σisa iteddu γef waman
45 Imiren kan, iḥettem γef yinelmaden-is ad zegren s
teflukt agummaḍ i lebḥeṛ, ad zwiren γer temdint n Bitsayda,
ma d nețța ad iqqim ad yerr lγaci.
46 Mi gemfaṛaq yid-sen, yuli γer wedrar iwakken ad iẓẓall.
47 Mi d-tewweḍ tmeddit, taflukt nni tella di tlemmast n
lebḥeṛ, ma d Sidna Σisa yeqqim weḥd-es di lberr.
48 Iwala ṛwan lḥif mi kkaten imeqdafen, axaṭer aḍu
yețțara-ten γer deffir. Mi qṛib ad yali wass iṛuḥ
γur-sen,
iteddu γef waman, yebγa a sen-iεeddi.
49 Mi t-walan ileḥḥu
γef waman, nwan-t d lexyal, bdan țεeggiḍen,
50 xelεen axaṭer
țwalin-t akk. Imiren iluεa-ten yenna-yasen : Ur xellεet ara, d
nekk ; ur țțaggadet ara !
51 Akken kan yekcem γer teflukt γur-sen, yers waḍu-nni.
52 Inelmaden dehcen
nezzeh, axaṭer ur fhimen ara lbeṛhan-nni n weγṛum, imi ulawen
nsen qquṛen.
Tamurt
n Jiniṣaret
53 Kemmlen abrid-nsen, ffγen γer tmurt n Jiniṣaret, rsen
dinna.
54 Mi d-ṣubben si teflukt, lγaci yeεqel Sidna
Σisa
imiren kan,
55 dγa uzzlen di mkul amkan n tmurt, bdan
țțawin-as-ed imuḍan deg wusu-nsen γer yal amkan anda yella.
56 Di mkul amkan anda iṛuḥ, ama ț-țaddart ama
ț-țamdint neγ d izuγaṛ, țțawin-as-ed imuḍan γer imukan n
tejmaεin, țḥellilen-t iwakken a ten-yeǧǧ ad nnalen ulamma
d icuḍaḍ n ujellab-is. Wid akk
i t-ițnalen ḥellun
Ixef 7
Sidna
Σisa akk-d lεaddat
1 Ifariziyen d kra lεulama n ccariεa i d-yusan si
temdint n Lquds, nnejmaεen-d γer Sidna Σisa.
2 Walan kra seg
inelmaden-is tețțen aγṛum mbla ma ssarden ifassen-nsen,
akken tella di lεadda-nsen.
3 Axaṭer ifariziyen akk-d wat Isṛail ur tețțen ara
uqbel ad ssirden ifassen-nsen, imi ṭṭfen di lεadda n
lejdud-nsen.
4 M'ara d-uγalen si ssuq, ur tețțen ara alamma uγen
luḍu. Ṭṭfen daγen deg waṭas n lεaddat nniḍen : tarda n
yeqbac, n tbuqalin, akk-d lḥilat meṛṛa n nnḥas.
5 Ifariziyen d lεulama steqsan-t, nnan-as : Acuγer
inelmaden-ik ur ṭṭifen ara di lεaddat i γ-d-ǧǧan lejdud
nneγ, atan tețțen s ifassen yumsen ?
6 Yerra-yasen : Ay at sin wudmawen ! Fell-awen i d-yura
nnbi Iceεya mi d-yenna : Lǧil-agi țεebbiden-iyi s
yimi-nsen kan, lameεna deg ulawen-nsen beεden fell-i aṭas.
7 Aεebbed-agi i yi-țεebbiden ur yesεi ara lqima, imi
ayen sselmaden mačči s γur-i i d-yekka meεna d lεaddat n
yemdanen kan.
8 Tețțaǧǧam lumuṛat i d-yefka Sidi ṛebbi akken
aț-țtebεem leεwayed n yemdanen.
9 Sidna Σisa yenna daγen : Tețțarram di ṭṭerf lumuṛ
n ṛebbi, iwakken aț-țeṭṭfem di leεwayed-nwen.
10 Axaṭer Musa yenna-d
qadeṛ baba-k d yemma-k. Yenna-d daγen : Win ara ineεlen
baba-s d yemma-s, ad ițwaḥkem fell-as s lmut.
11 Ma d kunwi tesselmadem belli yezmer yiwen ad yini i
baba-s neγ i yemma-s : « Ayen s wacu ilaq a kkun-refdeγ, fkiγ-t
d lqeṛban, ( yeεni d lweεda i ṛebbi ). »
12 S wakka tserrḥem-as
ur yețεawan ara imawlan-is.
13 Atah wamek i tețbeddilem awal n ṛebbi s lεaddat-nwen yerna aṭas n temsalin nniḍen i txeddmem
am tigi.
Ayen
yessenǧasen amdan
14 Yessawel daγen i lγaci yenna yasen : Smeḥset-iyi-d
akk, tfehmem :
15 Mačči d ayen
ikečmen γer daxel n wemdan ara t-yesneǧsen, meεna d ayen i
d-ițeffγen seg ul-is.
16 Ma tesεam imeẓẓuγen
isellen, slet-ed !
17 Mi geǧǧa lγaci-nni, yekcem γer yiwen wexxam,
inelmaden-is ssutren as a sen-d-issefhem lemtel nni.
18 Yenna-yasen : Eεni ula d kunwi ur tefhimem ara ayen
bγiγ a wen-t-id-iniγ ? Ur teẓrim ara belli mačči d ayen i
gkeččmen γer daxel n wemdan i t-yessenǧasen ?
19 Axaṭer ayagi ur
ikeččem ara γer wul-is, meεna γer uεebbuḍ-is, dγa ad
ițwadeggeṛ γer beṛṛa. S wakka, i gesseḥlel Sidna
Σisa yal
lqut.
20 Yerna yenna : D ayen i
d-ițeffγen seg wemdan i t-yessenǧasen.
21 Axaṭer si zdaxel n
wul-is i d-țeffγen yir ixemmimen : asefsed, tukerḍa,
timegṛaḍ,
22 zzna, yir ccehwat,
cceṛ, tiḥila, lexdeε, tismin, lekfeṛ, zzux, d wayen akk
yellan d lehbala.
23 Ayagi akk ițeffeγ-ed seg ul n wemdan yessenǧas-it.
Tabeṛṛanit yumnen s Sidna Σisa
24 Sidna Σisa iṛuḥ syenna γer leǧwahi n temdint n
Ṣur.
Yekcem γer yiwen wexxam. Ur yebγi ara a t-ẓren medden anda
yella, lameεna ur yezmir ara ad iffer fell-asen.
25
Ţ-țideț, akken kan
yewweḍ, ațaya yiwet n tmeṭṭut yesεan yelli-s izdeγ-iț
uṛuḥani ; tesla s Sidna Σisa dγa tusa-d teγli γer
idaṛṛen-is.
26 Tameṭṭut-agi ț-țagrikit,
tusa-d si leǧwahi yellan ger tmurt n Surya d Finisya. Tessuter-as
ad issufeγ aṛuḥani izedγen yelli-s.
27 Sidna Σisa yenna-yas : Eǧǧ uqbel arrac n wexxam ad ṛwun, axaṭer ur ilaq ara a nḍeggeṛ
aγṛum n warrac i yeqjan
imecṭaḥ.
28 Terra-yas : Ih a Sidi, meεna iqjan imecṭaḥ ddaw
ṭṭabla, tețțen tifețțitin iγellin i warrac.
29 Imiren yenna-yas : Γef wawal-agi i d-tenniḍ, ṛuḥ,
yelli-m yeffeγ-iț uṛuḥani.
30 Mi tewweḍ γer wexxam-is, tufa yelli-s teḍleq γef
wussu, yeffeγ-iț uṛuḥani.
Ḥellu n
wergaz iεuggnen iεuẓẓgen
31 Sidna Σisa iṛuḥ si lǧiha n temdint n
Γur, iεedda-d γef temdint n Sidun, yezger tamurt n
εecṛa-nni n temdinin i deg
llant εecṛa temdinin-nni, yewweḍ γer lebḥeṛ n Jlili.
32 Wwin-as-d yiwen wergaz d aεeẓẓug, d ameqmaq ; ḥellelen-t iwakken ad issers afus-is fell-as.
33 Sidna Σisa yewwi-t yid-es, issebεed-it γef lγaci ; mi
gessekcem iḍuḍan-is deg imeẓẓuγen n wergaz nni, idhen
iḍuḍan-is s imetman, yennul-as iles-is yis-sen,
34 dγa yerfed allen-is
γer igenni, yerra-d nnehta yenna : Effataḥ ! (Yeεni : eldi )
35 Imiren kan, imeẓẓuγen-is ldin, iles-is iserreḥ,
yebda yețmeslay akken ilaq.
36 Sidna Σisa
iweṣṣa-ten ur țεawaden i yiwen ayagi ; meεna simmal
yețweṣṣi deg-sen, simmal nutni țberriḥen lexbaṛ.
37 Lγaci wehmen,
tεeǧǧben deg wayen ixeddem, qqaṛen-as :
Ayen ixeddem akk igerrez ; yețțarra-d ula ț-țimesliwt i
iεeẓẓugen yessenṭaq-ed ula d igugamen !
Ixef 8
Assefti
wis sin n weγṛum
1 Deg wussan-nni, innejmaε-ed daγen waṭas n lγaci, ur
sεin ara ayen ara ččen. Sidna Σisa yessawel i inelmaden-is,
yenna-yasen :
2 Tejreḥ tasa-w γef lγaci-agi, tlata wussan aya i qqimen
yid-i, yerna ulac ayen ara ččen.
3 Ma yella rriγ-ten ansi
i d-kkan i laẓ, ad nezfen deg webrid axaṭer kra deg-sen usan-d
si lebεid.
4 Inelmaden-is rran-as-d : Ansi ara γ-d-yekk weγṛum ara
ten-yesseṛwun deg wemkan-agi yexlan ?
5 Sidna Σisa yesteqsa-ten : Acḥal n teḥbulin n weγṛum
i tesεam ? Rran-as-ed : ?uṛ-nneγ sebεa teḥbulin !
6 Yenna i lγaci ad qqimen γer lqaεa. Dγa yeddem-ed sebεa
teḥbulin-nni n weγṛum, yeḥmed Sidi ṛebbi, yebḍa-tent,
yefka-tent i inelmaden-is feṛqen-tent i lγaci.
7 Sεan daγen kra iselman
( iḥewtiwen ) imecṭaḥ. Yeḥmed daγen Sidi ṛebbi, yenna-yasen
a ten-feṛqen i lγaci.
8
Ččan armi ṛwan. Rnan
sagren-d azal n sebεa iqecwalen.
9 Llan deg wazal n ṛebεa
alaf n yemdanen. Mi fukken lmakla, iserreḥ-asen ad uγalen γer
ixxamen-nsen.
10 Imiren kan yuli γer teflukt nețța d inelmaden-is, ṛuḥen
γer leǧwahi n Dalmanuta.
Ifariziyen ssutren lbeṛhan
11 ṛuḥen-d ifariziyen, bdan țmeslayen d Sidna
Σisa
iwakken a t-jeṛṛben, ssutren-as ad ixdem lbeṛhan ara
d-iṣubben seg igenni.
12 Sidna Σisa yerra-d
nnehta, yenna : Acuγer i yi-d-ssuturen lbeṛhan yemdanen n
lǧil-agi ? S tideț aql-i nniγ-awen : d lmuḥal a s-d-ițunefk
lbeṛhan i lǧil-agi !
13 Dγa yeǧǧa-ten, yerkeb daγen di teflukt iwakken ad
izger agummaḍ.
14 Inelmaden țțun ur wwin
ara aγṛum anagar yiwet n teḥbult i gellan γur-sen di
teflukt.
15 Sidna Σisa
iweṣṣa-ten, yenna-yasen : Ḥadret iman-nwen γef temtunt ( iγes
) n ifariziyen akk-d win n Hiṛudus.
16 Inelmaden qqaṛen wway gar asen : «Yenna-yaγ-d ayagi
imi ur d newwi ara aγṛum.»
17 Mi geẓra ayen țxemmimen, yenna-yasen : Acuγer
tețxemimem γef weγṛum ? Urεad tfaqem ? Mazal ur tefhimem ara ?
18 Eεni qquṛen
wulawen-nwen ? Tesεam allen ur tețwalim ara, tesεam imeẓẓuγen ur
tsellem ara ?
19 Ur tecfim ara mi bḍiγ xemsa teḥbulin-nni n weγṛum i
xemsa alaf n yergazen, acḥal n iḍellaεen n tsigar i tjemεem ?
Rran-as : Tnac iḍellaεen.
20 I wasmi bḍiγ sebεa teḥbulin n weγṛum i ṛebεa alaf
n yemdanen, acḥal n tqecwalin yeččuṛen ț-țisigar i
d-tjemεem ? Nnan-as : Sebεa n tqecwalin.
21 Dγa yenna-yasen : Werεad tefhimem ihi ? Ḥellu n yiwen
uderγal
22 Ewwḍen γer temdint n Bitsayda. Wwin-as-d yiwen
uderγal, ḥellelen-t iwakken a t-yennal.
23 Sidna Σisa yeṭṭef
afus i uderγal-nni, yewwi-t beṛṛa n taddart. Yessers imetman
γef wallen n uderγal-nni, yessers ifassen is fell-as yesteqsa-t
: Yella kra tețwaliḍ ?
24 Yerfed allen-is yenna : Ţwaliγ imdanen am akken d
ttjuṛ i gleḥḥun.
25 Sidna Σisa iεawed issers-as ifassen γef wallen, mi
gemmuqel uderγal-nni, yuγal-it-id yeẓri, ițwali akken ilaq.
26 Dγa Sidna Σisa
iceggeε-it γer wexxam-is, yenna-yas : Ur keččem ara γer
taddart.
Buṭrus
yeεqel anwa i d Lmasiḥ
27 Sidna Σisa akk-d inelmaden-is ṛuḥen γer tudrin n
Qiṣarya n Filibus. Deg webrid, yesteqsa-ten yenna yasen : D
acu-yi γer lγaci ?
28 Rran-as-d : Kra deg-sen qqaṛen d Yeḥya aγeṭṭas i
telliḍ, wiyaḍ qqaṛen d Sidna Ilyas, ma d wiyaḍ ḥesben-k d
yiwen si lenbiya.
29 Yerna yesteqsa-ten : I kunwi, d acu-iyi γur-wen ?
Buṭrus yerra-yas : Keččini d Lmasiḥ. ( yeεni win yextaṛ ṛebbi )
30 Yumeṛ-iten iwakken ur țεawaden i yiwen ayagi.
31 Sidna Σisa yebda yesselmad-iten yeqqaṛ :
Mmi-s n bunadem ilaq ad yenεețțab
aṭas ; a t-nekkṛen lecyux d lmuqedmin imeqqranen akk-d lεulama
n ccariεa. A t-nγen, m'ara εeddin tlata wussan, a d-iḥyu si ger
lmegtin.
32 Yenna-yasen-d ayagi εinani. Buṭrus ijbed-it weḥd-es,
ilumm fell-as.
33 Sidna Σisa yezzi,
imuqel inelmaden-is, yenna i Buṭrus : Wexxeṛ akkin fell-i a
Cciṭan ! Ixemmimen-ik mačči n ṛebbi, meεna n yemdanen !
Amek ara netbeε Sidna Σisa
34 Sidna Σisa yessawel i lγaci akk-d inelmaden-is,
yenna-yasen :
Ma yella win yebγan ad iddu
yid-i, ur ilaq ara ad ixemmem γef yiman-is, meεna ilaq ad iqbel
leεtab γef ddemma n yisem-iw, ad ibbib amidag-is, a yi-d-itbeε.
35 Axaṭer win yebγan ad isellek taṛwiḥt-is, a s-tṛuḥ
; ma d win ara yesṛuḥen tarwiḥt-is γef ddemma-w akk-d lexbaṛ
n lxiṛ, a ț-isellek.
36 Ma yella irbeḥ-ed wemdan ddunit meṛṛa, acu n lfayda
i gesεa ma yesṛuḥ tudert-is ?
37 D acu ara yefk wemdan
iwakken ad icafeε taṛwiḥt-is ?
38 Ma yella win yessetḥan yis-i akk-d imeslayen-iw ger
lǧil-agi amednub, ifesden, ula d Mmi-s n bunadem ad issetḥi
yis m'ara d-yas akk-d lmalayekkat iqedsen di lεaḍima n baba-s.
Ixef
9
Tban-ed
tamanegt n Sidna Σisa
1 Sidna Σisa yenna daγen : S tideț a wen-d-iniγ, kra
seg wid yellan dagi, ur țmețțaten ara alamma walan tagelda n ṛebbi tusa-d s tmanegt tameqqrant.
2 Mi εeddan sețța wussan, Sidna Σisa yewwi yid-es
Buṭrus, Yeεqub d Yuḥenna, ulin γer yiwen wedrar εlayen. Mi
llan dinna weḥḥed-sen, tenbeddal ṣṣifa-s zdat-sen,
3 llebsa-s tuγal
ț-țamellalt tețfeǧǧiǧ, ula d yiwen di ddunit ur izmir a
ten yessimlul akken.
4 ?ehṛen-asen-d nnbi Ilyas akk-d Sidna Musa, țmeslayen
d Sidna Σisa.
5 Yenṭeq Buṭrus yenna i
Sidna Σisa : A Sidi, yelha imi nella dagi. A nesbedd tlata
iqiḍunen ; yiwen i kečč, wayeḍ i Sidna Musa wayeḍ i Sidna
Ilyas.
6 Ur yeẓri d acu i d-yeqqaṛ axaṭer tekcem-iten lxelεa ț-țameqqrant.
7 Taswiεt kan ters-ed yiwet n tagut tγumm-iten, si
tagut-nni tenṭeq-ed yiwet n taγect tenna-d : Wagi d Mmi
ameεzuz, smeḥsiset as !
8 Imiren kan, inelmaden muqlen γer mkul tama, ur walan
ula d yiwen, anagar Sidna Σisa yellan yid-sen.
9 Mi d-ṣubben seg udrar,
Sidna Σisa iweṣṣa-ten : Ur ḥekkut i yiwen ayen teẓram,
alamma yeḥya-d Mmi-s n bunadem si ger lmegtin.
10 Uγen-as awal, d acu kan țemsteqsayen, qqaṛen : Acu i
d lmeεna n ḥeggu si ger lmegtin ?
11 Inelmaden steqsan-t nnan-as : Acuγer lεulama n
ccariεa qqaṛen-d : ilaq a d-yas uqbel Sidna Ilyas ?
12 Yerra-yasen : Ţ-țideț, a d-yas uqbel Ilyas,
iwakken ad iseggem kullec. lameεna acuγer yețwakteb γef Mmi-s n
bunadem belli ilaq ad yenεețțab aṭas yerna ad
yețwaqehheṛ ?
13 Aql-i nniγ-awen : Ilyas yusa-d, xedmen deg-s akken
bγan, am akken yețwakteb fell-as di tira iqedsen.
Ḥellu n
yiwen weqcic yezdeγ uṛuḥani
14 Mi d-ṣubben seg udrar, ufan-d lγaci akk-d lεulama n
ccariεa zzin i inelmaden nniḍen, țmeslayen yid-sen.
15 Mi
d-walan Sidna Σisa, dehcen, uzzlen ad selmen fell-as.
16 Sidna Σisa
yesteqsa-ten : Γef wacu i tețmeslayem akka yid-sen ?
17 Yiwen wergaz si lγaci-nni yerra-yas-d : A Sidi,
wwiγ-ak-d mmi axaṭer yesgugem-it uṛuḥani.
18 Kra wanda ara
t-yeṭṭef, yesseγlay-it γer lqaεa ; aqcic yessufuγ-ed tikufta,
yețqeṛṛic tuγmas, yețțuγal d asemmaḍ.
Ḥelleleγ
inelmaden-ik a t-ssufγen seg-s meεna ur zmiren ara.
19 Sidna Σisa yenna-yasen : A lǧil i gxuṣṣ liman ! Ar
melmi ara yiliγ yid-wen ? Ar melmi ara wen-ṣebṛeγ ? Awit-ed
aqcic-agi ! Wwin-as-t-id ;
20 akken kan iwala Sidna Σisa, aṛuḥani-nni yebda
yețhuccu aqcic-nni, yesseγli-t γer lqaεa yessemṛareγ-it armi i
s-d yessufeγ tikufta.
21 Sidna Σisa yesteqsa
baba-s n weqcic-nni yenna-yas : Si melmi i d-ideṛṛu yid-es
wayagi ? Yerra-yas-d : Seg wasmi yella d amecṭuḥ.
22 Acḥal d abrid i t-idemmer uṛuḥani-agi γer tmes d
waman iwakken a t-ineγ. Tura, ma yella wayen iwumi tzemreḍ, ḥunn fell-aγ,
εiwen-aγ !
23 Sidna Σisa yerra-yas : Teqqaṛeḍ : ma tzemreḍ... ?
Win yețțamnen yezmer i kullec !
24 Imiren kan, baba-s n weqcic-nni yenna : Umneγ ! Meεna
sseǧhed-iyi axaṭer xuṣṣeγ di liman.
25 Sidna Σisa mi gwala lγaci uzzlen-d γur-sen, yumeṛ i
uṛuḥani-nni, yenna-yas : Ay aṛuḥani ! yesgugumen
yesεuẓẓugen, effeγ seg weqcic-agi ur țεawad ara aț-țkecmeḍ
deg-s !
26 Imiren iεeggeḍ, ihucc-it nezzeh, dγa yeffeγ seg-s.
Aqcic-nni yuγal am lmegget, daymi aṭas i s-yeqqaṛen : «
yemmut. »
27 Meεna Sidna Σisa
yeṭṭef-as afus, isekker-it-id, ibedd.
28 Mi kecmen γer wexxam, inelmaden-is steqsan-t : Acuγer
ur nezmir ara nukni a nessufeγ aṛuḥani-nni ?
29 Yenna-yasen : Iwakken aț-țessufγem iṛuḥaniyen am
wigi, ilaq aț-țețțuẓumem yerna aț-țețẓallam.
Sidna
Σisa iεawed-ed axebbeṛ γef lmut-is d ḥeggu-ines
30 ṛuḥen syenna, zegren tamurt n Jlili. Sidna
Σisa ur
yebγi ara ad ẓren lγaci anda i gella,
31 axaṭer yesselmad
inelmaden-is, yenna-yasen : Mmi-s n bunadem ad ițțusellem ger
ifassen n yemdanen, a t-nγen, meεna tlata wussan mbeεd lmut-is a
d-iḥyu.
32 Inelmaden-is ur fhimen ara lmeεna n wawal-agi, yerna
kukran a t-steqsin.
Anwa i
d ameqqran ?
33 Mi ewwḍen γer temdint n Kafernaḥum. llan deg wexxam,
Sidna Σisa yesteqsa-ten : Γef wacu i tețmeslayem deg webrid ?
34 Lameεna ssusmen akken ma llan, axaṭer deg webrid
țmesteqsayen anwa i d ameqqran gar-asen.
35 Sidna Σisa yeqqim,
yessawel i tnac-nni inelmaden-is, yenna-yasen : Win yebγan ad
yili d amezwaru, ilaq ad yeqqim d aneggaru, ad yuγal d aqeddac i
mkul yiwen.
36 Yeddem-ed yiwen weqcic
amecṭuḥ, yesbedd-it zdat-sen dγa yerfed-it ger ifassen-is,
yenna-yasen :
37 Win iqeblen aqcic amecṭuḥ am wagi γef ddemma n
yisem-iw, d nekk i geqbel, win i yi-qeblen mačči d nekk i
geqbel lameεna yeqbel Win i yi-d iceggεen.
38 Yuḥenna yenna i Sidna
Σisa : A Sidi, nwala yiwen wergaz yessufuγ leǧnun s yisem-ik ;
nugi-yas imi ur iteddu ara yid-nneγ.
39 Sidna Σisa yerra-yas : Aneft-as, imi ulac win izemren
ad ixdem lbeṛhan s yisem-iw, imiren ad yehdeṛ ayen n diri
fell-i.
40 Win ur nelli ara d aεdaw-nneγ, yid-nneγ i gella.
41 Kra win ara wen-d-yefken lkas n waman imi d inelmaden
n Lmasiḥ i tellam, a wen-iniγ s tideț, lxiṛ-is ur
s-yețwankaṛ ara.
Win ara
yilin d sebba n tuccḍa
42 Win ara yilin d sebba n tuccḍa i yiwen seg
imecṭuḥen-agi yumnen yis-i, axiṛ-as a s-εelqen γer temgeṛṭ
aγaṛef n tsirt, a t-ḍeggṛen γer lebḥeṛ.
43 Ma yella d afus-ik i d sebba n tuccḍa, gzem-it ;
axiṛ-ak aț-țkecmeḍ γer tudert n dayem s yiwen ufus wala
aț-țkecmeḍ s sin ifassen γer ǧahennama,
aț-țețwaḍeggreḍ γer tmes ur nxețți.
44 [Dinna awekkiw itețțen lǧețțat ur yețmețțat
ara, times ur txețți ara maḍi.]
45 Ma yella d aḍaṛ-ik i d sebba n tuccḍa, gzem-it
;axiṛ-ak aț-țkecmeḍ γer tudert n dayem s yiwen uḍar wala
aț-țkecmeḍ s sin iḍaṛṛen γer ǧahennama,
aț-țețwaḍeggreḍ γer tmes ur nxețți.
46 [Dinna awekkiw itețțen lǧețțat ur yețmețțat
ara, times ur txețți ara maḍi.]
47 Daγen ma yella ț-țiṭ-ik i gellan d sebba n tuccḍa,
qleε-iț-id ; axiṛ-ak aț-țkecmeḍ γer tgelda n Sidi ṛebbi s
yiwet n tiṭ, wala aț-țwaḍeggṛeḍ s snat wallen γer
ǧahennama.
48 Dinna awekkiw itețțen lǧețțat ur yețmețțat
ara, times ur txețți ara maḍi.
49 Axaṭer mkul amdan ilaq ad yețwamelleḥ s tmes.
50 Lmelḥ, d ayen yelhan ; meεna ma tṛuḥ-as lbenna-s, s
wacu ara t-tmellḥem ?
51 Sεut lmelḥ deg yiman-nwen, tεicem wway gar-awen di
lehna.
Ixef
10
Ayen
yeεnan berru
1 Sidna Σisa yeṭṭef abrid γer tmurt n Yahuda agummaḍ i
wasif n Urdun. Nnejmaεen-d daγen γur-es aṭas n lγaci. Yebda
yesselmad-iten akken yennum.
2 Ifariziyen qesden-t-id
a t-jeṛṛben. Steqsan-t nnan-as : Yeḥlel i wergaz ad yebru i
tmeṭṭut-is neγ ala ?
3 Yerra-yasen : Acu n lameṛ i wen-d-yeǧǧa Musa ?
4 Nnan-as : Sidna Musa issereḥ-aγ a nebru i
tmeṭṭut-nneγ ma nefka-yas leεqed n berru.
5 Sidna Σisa yerra-yasen :
Γef ddemma n wulawen-nwen
yeqquṛen i wen-d-yeǧǧa lameṛ-agi.
6 Lameεna di tazwara,
Sidi ṛebbi ixleq-ed argaz ț-țmeṭṭut.
7 Daymi : Argaz ad
yeǧǧ baba-s akk-d yemma-s,iwakken ad iεic ț-țmeṭṭut-is.
8 Imiren, di sin
yid-sen ad uγalen d yiwet n lǧețța. S wakka, ur llin ara
d sin meεna ad uγalen d yiwen.
9 Ihi, ur feṛqet ara wayen yesdukkel ṛebbi.
10 Mi llan deg wexxam, steqsan-t daγen inelmaden-is γef
wannect-nni.
11 Yerra-yasen : Kra win
ara yebrun i tmeṭṭut-is yuγ tayeḍ, ixdeε tameṭṭut
tamezwarut, yezna.
12 Akken daγen,
tameṭṭut ara yebrun i wergaz-is aț-țaγ wayeḍ, tezna.
Sidna
Σisa d warrac imecṭuḥen
13 Kra yemdanen wwin-as-d arrac imecṭuḥen iwakken ad
yessers ifassen-is fell-asen, meεna inelmaden țțaran-ten.
14 Mi ten-iwala Sidna Σisa, yezεef fell-asen yenna-yasen
: Anfet i warrac a d-asen γur-i ! Ur ten-țțarrat ara, axaṭer
tagelda n ṛebbi i wid yellan am nutni.
15 A wen-iniγ tideț : kra win ur neqbil ara tagelda n ṛebbi am weqcic amecṭuḥ, ur
ț-ikeččem ara.
16 Imiren issuden-iten, yessers ifassen-is fell-asen, dγa
iburek-iten.
Ilemẓi
ameṛkanti
17 Akken iteddu Sidna Σisa ad iṛuḥ, ataya yiwen ilemẓi
yeγli γef tgecrar zdat-es, yenna-yas : A ccix yelhan, d acu
ilaqen a t-xedmeγ iwakken ad sεuγ tudert n dayem ?
18 Sidna Σisa yerra-yas : Acuγeṛ i yi-tsemmaḍ « win
yelhan » ? Ulac win yelhan, anagar ṛebbi weḥd-es.
19 Tessneḍ ccariεa n Musa : Ur tneqqeḍ ara, ur
tzennuḍ ara, ur tețțakṛeḍ ara, ur tețcehhiḍeḍ ara s
ẓẓur, ur txeddεeḍ ( tețḍuṛuḍ ) ara, aț-țqadṛeḍ baba-k
d yemma-k.
20 Yerra-yas : A Sidi, ayagi akk xedmeγ-t seg wasmi lliγ
d ameẓyan.
21 Sidna Σisa imuqel-it s leḥnana yenna-yas : Txuṣṣ-ik
kan yiwet n lḥaǧa : ṛuḥ, zzenz akk ayen tesεiḍ, tseddqeḍ-t
i imeγban iwakken aț-țesεuḍ agerruj deg igenni ; imiren as-ed
tbeε-iyi-d.
22 Mi gesla ilemẓi-nni i imeslayen n Sidna Σisa,
yennuγna. Iṛuḥ s leḥzen axaṭer yesεa aṭas n cci.
23 Sidna Σisa imuqel wid i s-d-izzin, yenna i
inelmaden-is : Acḥal i gewεeṛ i wid yesεan cci ad kecmen γer
tgelda n Sidi ṛebbi !
24 Inelmaden-is dehcen mi slan imeslayen-agi. Sidna Σisa
yenna-yasen daγen : Acḥal i gewεeṛ unekcum γer tgelda n Sidi ṛebbi a tarwa !
25 Ishel-as i welγem ad iεeddi di tiṭ n tissegnit wala i
umeṛkanti ad ikcem γer tgelda n Sidi ṛebbi.
26 Ayagi issewhem inelmaden akteṛ, qqaṛen wway gar-asen
: Ihi, anwa i gzemren ad ițțusellek ?
27 Sidna Σisa imuqel-iten, yenna yasen : Ayen yellan d
lmuḥal i wemdan yeshel i Sidi ṛebbi, imi Sidi ṛebbi yezmer i
kullec.
28 Buṭrus yenna-yas : Aql-aγ neǧǧa kullec yerna
netbeε-ik.
29 Sidna Σisa yenna-yasen : A wen-d-iniγ tideț : win
yeǧǧan axxam-is, ayetma-s, yessetma-s, yemma-s, baba-s,
arraw-is, tiferkiwin-is ( akal-is ), γef ddemma-w akk-d ddemma n
ubecceṛ n lexbaṛ n lxiṛ,
30 a s-d-yețțunefk meyya iberdan akteṛ di lweqt-agi :
ixxamen, atmaten, tiyestmatin, tiyemmatin, dderya akk-d
tferkiwin meεna s waṭas n uqehheṛ ; di lweqt i d-iteddun a
s-d-tețțunefk tudert n dayem.
31 Aṭas seg imezwura ara
yuγalen d ineggura, aṭas seg ineggura ara yuγalen d imezwura.
Sidna
Σisa ixebbeṛ-ed γef lmut-is tikkelt tis tlata
32 Llan leḥḥun iwakken ad alin γer temdint n Lquds,
Sidna Σisa yezwar zdat-nsen. Inelmaden-nni xelεen, ma d wid i
d-itebεen deffir-sen, ikcem iten lxuf. Sidna Σisa yewwi daγen
yid-es tnac-nni n inelmaden, ixebbeṛ- iten s wayen ara yedṛun
yid-es.
33 Yenna-yasen : Atan a
nali γer temdint n Lquds, Mmi-s n bunadem ad ițwasellem ger
ifassen n lmuqedmin imeqqranen d lεulama, ad ḥekmen fell-as s
lmut, a t-sellmen ger ifassen n ikafriwen.
34 Ad ḍsen fell-as, a
t-ssusfen, a t-wten s ujelkkaḍ, a t-nγen, m'ara εeddin tlata
wussan, a d-iḥyu si ger lmegtin.
Assuter
n warraw n Zabadi
35 Yeεqub d Yuḥenna yellan d arraw n Zabadi qeṛṛben
γer Sidna Σisa nnan-as : A Sidi, nebγa a γ-txedmeḍ ayen akka
ara k-d-nessuter.
36 Yenna-yasen : D acu tebγam a wen-t-xedmeγ ?
37 Nnan-as : Efk-aγ imukan di lεaḍima-k, wa γer tama-k
tayeffust, wa γer tama-k taẓelmaṭ.
38 Sidna Σisa yenna-yasen : Ur teẓrim ara ayen akka i
yi-d tessuturem. Eεni tzemrem aț-țeswem lkas-agi n lemṛaṛ
ara sweγ ? Neγ tzemrem a d-tεeddim seg weγḍas-agi s wayes ara țwaγeḍseγ ?
39 Nnan-as : Ih a Sidi, nezmer. Sidna Σisa yenna-yasen :
Ţ-țideț, aț-țeswem lkas-agi n lemṛaṛ ara sweγ, yernu
aț-țεeddim seg weγḍas s wayes ara țwaγeḍseγ.
40 Ma yella d ayen yeεnan
imukan γer uyeffus-iw neγ γer uzelmaḍ-iw, mačči deg ufus-iw i
gella, meεna ad țțunefken i wid iwumi țwaheggan.
41 Mi slan i waya, εecṛa n inelmaden nniḍen rfan γef
Yeεqub akk-d Yuḥenna.
42 Sidna Σisa yessawel
asen yenna-yasen : Twalam ayen iḍeṛṛun di ddunit : wid
nețwali d igelliden akk-d d imeqqranen n yegduden țqehhiṛen
lγaci-nsen yerna ḥekkmen fell-asen s ẓẓur !
43 Ur ilaq ara ad yili wannect-a gar-awen. Meεna win
yebγan ad yili d ameqqran gar-awen ilaq ad yuγal d aqeddac-nwen.
44 Win yebγan daγen amkan
amezwaru, ilaq ad yili d aqeddac-nwen meṛṛa.
45 Axaṭer Mmi-s n bunadem ur d-yusi ara iwakken ad qedcen
fell-as wiyaḍ, meεna d nețța ara iqedcen fell-asen, yerna ad
yefk tudert-is d asfel γef waṭas n yemdanen. Ḥellu n
yiwen uderγal
46 Sidna Σisa akk-d inelmaden-is wḍen γer temdint n
Yiriku. Mi d-ffγen si temdint, ddan-d yid-sen aṭas n lγaci.
Ataya yiwen uderγal isem-is Baṛtimay mmi-s n Timay, yeqqim ṭṭerf n webrid yessutur tin n
ṛebbi.
47 Mi gesla belli d Σisa
anaṣari i d-iεeddan, yebda yețεeggiḍ yeqqaṛ : A
Σisa, a
Mmi-s n Sidna Dawed, ḥunn fell-i !
48 Aṭas i gețεeggiḍen fell-as iwakken ad issusem,
meεna nețța yețsuγu akteṛ yeqqaṛ : A mmi-s n Sidna Dawed, ḥunn fell-i !
49 Sidna Σisa iḥbes yenna : Siwlet-as. Ssawlen-as,
nnan-as : Ur țțaggad ara, kker fell-ak, atan yessawel-ak-ed.
50 Aderγal-nni iḍeggeṛ abeṛnus-is, ijelleb-ed, yusa-d
γer Sidna Σisa.
51 Sidna Σisa yenṭeq
γur-es yenna-yas : D acu tebγiḍ a k-t-xedmeγ ? Aderγal-nni
yenna-yas : A Sidi, bγiγ a yi-d-yuγal yeẓri.
52 Dγa Sidna Σisa yenna-yas : ṛuḥ, liman-ik isellek-ik.
Imiren kan, yuγal-it-id yeẓri, yetḍfer Sidna Σisa deg webrid.
Ixef 11
Sidna
Σisa ikcem γer temdint n Lquds
1 Mi qṛib ad awḍen γer temdint n Lquds, zdat n tuddar n
Bitfaji akk-d Bitanya γer tama n yiγil n uzemmur, Sidna
Σisa
iceggeε sin seg inelmaden-is
2 yenna-yasen : ṛuḥet
γer taddart-nni yellan zdat-wen, m'ara tawḍem aț-țafem aγyul
d amecṭuḥ yeqqen, leεmeṛ yerkeb fell-as ula d yiwen. Fsit-as-ed
cced tawim-t-id.
3 Ma yella win i wen-d-yennan : « acimi txeddmem ayagi ?
» Innit-as : « yeḥwaǧ-it Ssid-nneγ, taswiεt kan a wen-t
id-yerr. »
4 ṛuḥen inelmaden-nni ufan aγyul deg webrid yeqqen γer
tewwurt n yiwen n wexxam, fsin-as ccedd.
5 Kra seg wid yellan dinna nnan asen : D acu txeddmem
akka ? Acuγer i d-tserḥem i weγyul-agi ?
6 Rran-asen akken i sen-d-yenna Sidna Σisa, dγa
ǧǧan-ten.
7 Wwin-d aγyul-nni i Sidna Σisa, ssersen fell-as
llebsa-nsen iwakken ad yerkeb fell-as.
8 Aṭas i s-ițessun
llebsa-nsen deg webrid, ma d wiyaḍ țessun-as tiseḍwa i
d-gezmen si lexla.
9 Wid yezwaren d wid yettabaεen țεeggiḍen
: « Husana, ad yețțubarek win i d-yusan s γur Sidi ṛebbi !
10 Tețțubarek tgeldit i d-yusan, tageldit n Sidna
Dawed baba-tneγ ! Husana ( tamanegt ) deg imukan εlayen. »
11 Sidna Σisa yewweḍ γer temdint n Lquds, yekcem γer
lǧameε iqedsen. Imuqel ayen akk i gdeṛṛun dina, imiren mi
geẓra ifut lḥal, iṛuḥ γer taddart n Bitanya nețța d tnac
inelmaden-is.
Sidna
Σisa yesxeḍ tameγṛust ( tagrurt )
12 Azekka-nni akken ffγen si taddart n Bitanya, Sidna
Σisa yelluẓ.
13 Iwala si lbeεd tameγṛust yesεan iferrawen, iṛuḥ ad iqelleb kra ibakuṛen ara
yečč. Mi gqeṛṛeb γur-es, yufa deg-s anagar iferrawen,
axaṭer mačči d lawan n lexṛif.
14 Yenṭeq γur-es zdat n
inelmaden-is, yenna-yas : Ur tețțuγaleḍ ara a d-tefkeḍ
lfakya !
Sidna
Σisa yetlef wid yeznuzun di lǧameε iqedsen
15 Mi wwḍen γer temdint n Lquds, Sidna Σisa yekcem γer
lǧameε iqedsen, yebda itellif wid yețțaγen znuzun dinna.
Yeqleb ṭṭwabel d ikersiyen n wid ițbeddilen idrimen akk-d wid
yeznuzun itbiren.
16 Ur yeǧǧi ula d yiwen ad yawi yid-es lḥaǧa γer
daxel n lǧameε.
17 Dγa yesselmed lγaci s imeslayen-agi : Eεni ur
yețwakteb ara : Axxam-iw ad ițțusemmi d axxam n tẓallit i
leǧnas meṛṛa, ma d kunwi terram-t d axxam n imakaren !
18 Mi s-slan, lmuqedmin imeqqranen d lεulama uggaden-t,
imiren țnadin amek ara t-nγen, axaṭer lγaci meṛṛa wehmen deg
uselmed-ines.
19 Mi d-yeγli yiḍ, Sidna Σisa d inelmaden-is ffγen si
temdint.
Tameγṛust-nni yeqquṛen
20 Azekka-nni ṣṣbeḥ mi d-εeddan syenna, inelmaden-is
walan tameγṛust nni teqquṛ armi d iẓuran.
21 Buṭrus yemmekta-d ayen
iεeddan, yenna i Sidna Σisa : A Sidi, muqel ! Tameγṛust-nni iwumi tedεiḍ teqquṛ !
22 Sidna Σisa yenṭeq yenna : A wen-d-iniγ tideț :
23 ma yenna walebεaḍ i
wedrar-agi « qleε syenna tḍeggṛeḍ iman-ik γer lebḥeṛ» ma
yumen ur icukket ara, atan a d-yedṛu wayen i d-yenna.
24 Daymi i wen-qqaṛeγ : kra wayen ara tessutrem i ṛebbi
di tẓallit, amnet belli yewweḍ-ikkun-id yerna a
wen-d-ițțunefk.
25 M'ara tekkrem
aț-țẓallem yili teṭṭfem cceḥna i walebεaḍ, semmḥet-as,
iwakken baba-twen yellan deg igenwan a wen-isemmeḥ ula i kunwi
ddnubat nwen.
26 [ Meεna ma yella ur
tețsemmiḥem ara i wiyaḍ, baba-twen yellan deg igenwan ur
wen-ițsemmiḥ ara ddnubat-nwen daγen i kunwi. ]
Ansi i
d-tekka lḥekma n Sidna Σisa
27 Uγalen γer temdint n Lquds. Di teswiεt-nni, Sidna
Σisa
yella itezzi di Lǧameε iqedsen ; lmuqedmin imeqqranen d lεulama
akk-d lecyux, qeṛṛben-d γur-es
28 nnan-as : Ansi i
k-d-tekka lḥekma-agi ? Anwa i k-d-yefkan tazmert aț- țxedmeḍ
ayagi ?
29 Sidna Σisa yerra-yasen : Ula d nekk a kkun-steqsiγ s
yiwen usteqsi kan, ma terram-iyi-d, a wen-d-iniγ ansi i
yi-d-tekka lḥekma s wayes i xeddmeγ ayagi :
30 Anwa i d-iceggεen Yeḥya ad isseγḍes deg waman, d ṛebbi neγ d imdanen ? Erret-iyi-d !
31 Bdan țemcawaṛen wway gar asen qqaṛen : ma nerra-yas
: « d ṛebbi i t-id iceggεen», a γ-d-yini : « acimi ihi ur
tuminem ara s Yeḥya ? »
32 Ma nenna-d : « d imdanen i t-id iceggεen... » Uggaden
ma nnan-d akken, axaṭer lγaci umnen akk belli Yeḥya d nnbi.
33 Ihi rran-as i Sidna
Σisa : Ur neẓri ara ! Sidna Σisa yerra-yasen : Ula d nekk ur
wen-d-qqaṛeγ ara ansi i yi-d-tekka lḥekma s wayes xeddmeγ
ayagi.
Ixef 12
Lemtel
n ixemmasen n tfeṛṛant
1 Sidna Σisa yebda ițmeslay-asen s lemtul : Yiwen wergaz
yeẓẓa tafeṛṛant, izeṛṛeb-iț, yeγza amkan i tεeṣṣart n
tẓurin yerna yebna taxxamt n tεessast. Issekra-ț i ixemmasen n
tfeṛṛant imiren iṛuḥ ad yinig.
2 Mi d-yewweḍ lweqt n
tẓurin, iceggeε aqeddac-is γer ixemmasen-nni iwakken a s-d-fken
amur-is.
3 Meεna ṭṭfen
aqeddac-nni, wwten-t, qecεen-t ifassen-is d ilmawen.
4 Iceggeε-asen aqeddac wis sin , reggmen-t yerna wwten-t
ula d nețța γer uqeṛṛuy.
5 Iceggeε-asen aqeddac wis tlata, wagi nγan-t.
Iceggeε-asen aṭas iqeddacen nniḍen, kra nγan-ten kra wten-ten.
6 Yeqqim-as-d anagar mmi-s ameεzuz. Iceggeε-it d aneggaru
γur-sen, yenna : « ahat a t-qadṛen imi d mmi. »
7 Meεna ixemmasen-agi nnan wway gar-asen : « atan win ara
iweṛten ! Ekkret a t-nenneγ iwakken lweṛt nni ad yuγal d
ayla-nneγ !»
8 Ṭṭfen-t-id wwten-t armi yemmut, imiren ḍeggṛen-t γer
beṛṛa n tfeṛṛant.
9 D acu ara yexdem tura
bab n tfeṛṛant ? A d-yas nețța s yiman-is, ad ineγ
ixemmasen-nni ad yernu ad iwekkel tafeṛṛant-nni i wiyaḍ.
10 Eεni ur teγṛim ara awal-agi n tira iqedsen ?
Adγaγ i ḍeggṛen wid ibennun, d nețța i guγalen d azṛu
alemmas yeṭṭfen lebni.
11 Ayagi yekka-d s γur Sidi ṛebbi, yerna γer
γur-nneγ d ayen i gessewhamen !
12 Faqen belli fell-asen i d-yewwi lemtel-agi. Bγan a
t-ṭṭfen imiren, lameεna uggaden lγaci ; dγa ǧǧan-t, ṛuḥen.
Axelleṣ n tebzert i Qayṣer
13 Kra ifariziyen akk-d kra seg wid yellan si terbaεt n
Hiṛudus,
ceggεen γer Sidna Σisa iwakken a t-id-sseγlin deg
wawal akken a t-ṭṭfen s imeslayen-is.
14 Usan-d nnan-as : A Sidi, neẓra belli theddṛeḍ ṣṣeḥ, ur txeddmeḍ ara lxilaf ger yemdanen, tesselmadeḍ
abrid n ṛebbi s tideț. Ini-yaγ-d : d leḥlal neγ d leḥṛam
fell-aγ ma nxelleṣ tabzert i wugellid Qayṣer (yesṭeεmeṛen
tamurt-nneγ) ?
15 Sidna Σisa ifaq i tḥila-nsen, yenna-yasen : Acuγer i
yi-d-tneddim tifxeț ? Awit-iyi-d aṣurdi iwakken a t-ẓreγ.
16 Fkan-as-d aṣurdi dγa yenna yasen : Udem-agi d wayen
yuran fell-as wi ten-ilan ? Nnan-as : N Qayṣer. Imiren Sidna
Σisa yenna-yasen :
17 Erret ihi i Qayṣer ayen yellan n Qayṣeṛ, terrem i
ṛebbi ayen yellan n ṛebbi. Qqimen wehmen deg-s.
Ayen
yeεnan ḥeggu n lmegtin
18 Isaduqiyen yellan d wid ur nețțamen ara s ḥeggu n
lmegtin, usan-d γer Sidna Σisa steqsan-t :
19 A Sidi, atan wayen i γ-d yeǧǧa Sidna Musa di
ccariεa :
Ma yella yemmut wergaz
yeǧǧa-d tameṭṭut-is, m'ur yesεi ara dderya, ilaq gma-s ad
yerr tameṭṭut-nni iwakken a d-yesεu dderya i gma-s yemmuten.
20 Llan ihi sebεa watmaten : amezwaru yezweǧ yuγal
yemmut ur d-yeǧǧi ara dderya.
21 Wis sin yuγ
taǧǧalt-nni, yemmut ula d nețța mbla ma yeǧǧa-d dderya.
Akken daγen i tedṛa d wis tlata,
22 ula d yiwen si
sebεa-nni i gzewǧen yid-es ur d-yeǧǧi dderya. ?er taggara,
ula ț-țameṭṭut-nni temmut.
23 Asmi ara d-ḥyun
lmegtin, anwa si sebεa watmaten-nni ara ț-yesεun ț-țameṭṭut-is imi i
ț-uγen di sebεa yid-sen ?
24 Sidna Σisa yerra-yasen : Tγelṭem ! Ur tefhimem tira
iqedsen, ur tessinem tazmert n ṛebbi.
25 Axaṭer ass n ḥeggu n lmegtin, irgazen ț-țlawin ur
țemyezwaǧen ara, lameεna ad ilin am lmalayekkat deg igenwan.
26 Ma d ayen yeεnan ḥeggu n lmegtin, leεmeṛ
ur teγṛim di tektabt n Musa, mi
t-id-iluεa Sidi ṛebbi zdat udarnu ireqqen ? Yenna-yas-d :
Nekk d Illu n Ibṛahim, d Illu n Isḥaq, d Illu n Yeεqub.
27 Ihi ṛebbi mačči d Illu n lmegtin i gella, lameεna d
Illu n wid yeddren. S tideț, atan tγelṭem aṭas.
Lameṛ
ameqqran
28 Yiwen n umusnaw n ccariεa mi geẓra Sidna Σisa ijaweb
akken ilaq, iqeṛṛeb γur-es yenna-yas : Anwa i d lameṛ
ameqqran di ccariεa ?
29 Sidna Σisa yerra-yas : Atah lameṛ ameqqran :
Ḥess-ed ay agdud n Isṛail ! Sidi ṛebbi-nneγ d yiwen.
30 Ilaq aț-țḥemmleḍ
Sidi ṛebbi s wul-ik, s teṛwiḥt-ik akk, s wayen yellan di
tezmert-ik akk-d lεeqliya-k meṛṛa.
31 Atah wis sin : Ilaq aț-țḥemleḍ lγiṛ-ik am
yiman-ik.
Ulac lameṛ yugaren wigi.
32 Lεalem-nni yenna-yas :
Ţ-țideț a Sidi ! Ayen i d-tenniḍ
d ṣṣeḥ ; ṛebbi d yiwen ulac wayeḍ.
33 Yerna ma nḥemmel-it s
wul-nneγ, s lεeqliya-nneγ, akk-d wayen yellan di țezmert-nneγ
meṛṛa, ma nḥemmel daγen lγiṛ-nneγ am yiman-nneγ, annect-agi
axiṛ n iseflawen akk-d lewεadi.
34 Sidna Σisa mi t-iwala
ijaweb-ed s tmusni, yenna-yas : Ur tebεideḍ ara γef tgelda n
Sidi ṛebbi. Ulac win i s-d-yernan asteqsi nniḍen.
Lmasiḥ akk-d Sidna Dawed
35 Mi gella Sidna Σisa yesselmad di lǧameε iqedsen
yenna : Amek armi imusnawen n ccariεa qqaṛen-d belli Lmasiḥ d
mmi-s n Sidna Dawed ?
36 S ṛṛuḥ iqedsen i d-yenna Dawed s yiman-is :
Sidi ṛebbi yenna-d i Sidi : Qqim γer tama-w tayeffust alamma
rriγ iεdawen-ik seddaw iḍaṛṛen-ik.
37 Dawed s yiman-is issawel-as « a Sidi », amek ihi
yezmer ad yili d mmi-s ? Aṭas n lγaci i s-yesmeḥsisen s lfeṛḥ.
At sin
udmawen
38 Sidna Σisa yesselmad lγaci yeqqaṛ-asen :
Ḥadret daγen
iman-nwen γef yimusnawen n ccariεa i gḥemmlen ad ḥewwsen s
ijellaben iγezfanen, ḥemmlen daγen ad selmen fell-asen medden
di leswaq ;
39 țextiṛin imukan
imezwura di leǧwameε akk-d imukan lεali di tmeγṛiwin, lameεna
40 tețțen ayla n tuǧǧal ; ssiγzifen taẓallit iwakken
a ten-id-walin yemdanen. Lεiqab-nsen ad yili d ameqqran !
Lweεda
n yiwet taǧǧalt taẓawalit
41 Sidna Σisa yella yeqqim deg umkan iqublen asenduq i
deg srusun lewεadi, yețmuqul amek srusuyen lγaci lewεadi-nsen.
Aṭas n imeṛkantiyen yeggaren xiṛella n yedrimen.
42 Tusa-d yiwet n
taǧǧalt tigellilt tessers sin iṣurdiyen yesεan azal n ṛebεa
twiztin n lfeṭṭa.
43 Sidna Σisa yessawel i
inelmaden-is, yenna yasen : A wen-d-iniγ tideț : lweεda i
tessers taǧǧalt-agi taẓawalit, tugar akk lewεadi i ssersen
wiyaḍ.
44 Axaṭer wiyaḍ seddqen seg wayen sεan d zzyada, ma d
nețțat tseddeq ciṭṭuh-nni s wacu ara tεic.
Ixef 13
Lmuṣibat i d-iteddun
1 Mi d-iffeγ Sidna Σisa
si lǧameε iqedsen, yiwen seg inelmaden-is yenna-yas : A Sidi,
muqel acḥal yecbeḥ lebni-agi ! Acḥal cebḥen yedγaγen-is !
2 Sidna Σisa yerra-yas : Deg wayagi irkul i tețwaliḍ, ur
d-yețγimi yiwen wedγaγ γef wayeḍ ; kullec ad ihudd.
3 Sidna Σisa yeqqim deg iγil uzemmur iqublen lǧameε
iqedsen. Buṭrus, Yeεqub, Yuḥenna akk-d Andriyus i gellan
yid-es, steqsan-t :
4 Ini-yaγ-d melmi ara d-yedṛu wayagi ; d acu ara
γ-d-isbeggnen lweqt i deg ara yedṛu wannect-a.
5 Imiren, Sidna Σisa yebda yețweṣṣi ten :
γur-wat win
ara kkun-ikellxen !
6 Axaṭer aṭas ara
d-yasen s yisem-iw, a wen-d-inin : « D nekk i d Lmasiḥ » ad
kellxen i waṭas n lγaci.
7 M'ara teslem s tegrawliwin i d-ideṛṛun di mkul amkan
akk-d țid i d-iteddun, ur țțaggadet ara axaṭer ilaq a
d-yedṛu wannect-nni, lameεna mačči ț-țaggara n ddunit i
d-yewḍen.
8 Agdud a d-yekker γer wayeḍ, tageldit aț-țennaγ ț-țayeḍ, a d-ilint zzelzlat di kra imukan, a d-yili laẓ ;
akkagi ara d-yebdu leεtab di ddunit.
9 Ḥadret γef yiman-nwen ; atan a kkun-caṛεen zdat
lεulama n ccariεa, a kkun-wten di leǧwameε.
Γef ddemma-w, a kkun-sbedden
zdat wid i gḥekmen tamurt akk-d igelliden iwakken aț-țilim d
inigan-iw zdat-nsen.
10 Lameεna di tazwara
ilaq lexbaṛ n lxiṛ ad ițwabecceṛ uqbel i leǧnas meṛṛa.
11 M'ara kkun-ẓẓuγṛen a kkun awin γer ccṛeε, ur
xeddmet ara anezgum γef wayen ara tinim ; init-ed kan ayen ara
wen-d-yasen di teswiεt-nni, axaṭer mačči d kunwi ara
imeslayen lameεna d ṛṛuḥ iqedsen.
12 Yiwen ad yefk gma-s γer lmut, wayeḍ ad yefk mmi-s ;
dderya a d-kkren γer imawlan-nsen a ten-ssiwḍen γer lmut.
13 A kkun-keṛhen irkul
γef ddemma n yisem-iw. Lameεna win ara yeṭṭfen alamma
ț-țaggara ad ițwasellek.
Lmuṣiba tameqqrant
14 Ass m'ara twalim lmuṣiba tameqqrant tella deg umkan
anda ur ilaq ara aț-țili, « win ara yeγṛen ayagi ilaq ad
imeyyez ! » ass-nni wid ara yilin di tmurt n Yahuda ad rewlen
γer idurar ;
15 win ara yilin s ufella
n ssqef, ur ikeččem ara γer wexxam-is iwakken a d-iddem
leḥwayeǧ-is.
16 Akken daγen win ara yilin di lexla, ur yețțuγal ara
γer deffir iwakken a d-yawi abeṛnus-is.
17 A tawaγit n tilawin ara yilin s tadist akk-d țid ara
yeṣṣuṭuḍen deg wussan-nni.
18 Dεut γer ṛebbi iwakken ur d-ideṛṛu ara wannect-nni
di ccetwa,
19 axaṭer deg
wussan-nni, ad yili yiwen n leεtab ur neẓri seg wasmi i
d-texleq ddunit ar ass-a, yerna d ayen ur nețțuγal a d-yedṛu.
20 Lemmer ur yessenqes ara Sidi ṛebbi kra seg
wussan-nni, yiwen ur yezmir ad imneε. Meεna issenqes seg-sen γef
ddemma n wid yextaṛ.
21 Di lweqt-nni ma yenna-yawen walebεaḍ : « Lmasiḥ atah
dagi » neγ «atan dihin», ur t-țțamnet ara.
22 Axaṭer a d-asen wid ara yerren iman-nsen d Lmasiḥ
neγ d lenbiya, ad xeddmen lbeṛhanat akk-d licaṛat, iwakken ad
kellxen ma zemren ula d wid yextaṛ Sidi ṛebbi.
23 Atah nniγ-awen-d
annect-agi uqbel a d-yeḍru.
Tuγalin
n Mmi-s n bunadem
24 M'ara εeddin wussan n twaγit-nni, tafat n
yiṭij aț-țenqes, aggur ur d-yețțak ara tiziri-ines,
25 5 itran daγen a
d-γlin seg igenni, t inezmarin n igenwan ad rgagint.
26 Imiren, ad anwali Mmi-s n bunadem yusa-d s ufella n
usigna s tezmert tameqqrant d lεaḍima.
27 A d-iceggeε
lmalayekkat-is γer yal amkan n ddunit, a d-snejmaεen seg
yixfawen n ddunit wid i gextaṛ meṛṛa.
Ass
aneggaru n ddunit
28 Meyyzet ihi γef lemtel n tmeγṛust : mi lqaqit isegman-is,
fsan, fkan-d iferrawen, teẓram iqeṛṛeb-ed unebdu.
29 Akken ula d kunwi,
m'ara twalim ayagi meṛṛa yewweḍ-ed, ḥṣut belli yusa-d
lweqt, Mmi-s n bunadem atan γer tewwurt.
30 A wen-d-iniγ tideț :
lǧil-agi ur ițεeddi ara alamma yedṛa-d wayagi meṛṛa.
31 Igenni d lqaεa ad fnun
ma d imeslayen-iw ur fennun ara.
32 ?ef wayen yeεnan ass
akk-d lweqt-nni yiwen ur ten-yessin, ama d lmalayekkat deg
igenwan ama d Mmi-s n bunadem, anagar Baba ṛebbi i ten-isnen.
33 Ur gganet ara, εasset
iman-nwen imi ur teẓrim ara melmi ara d-yaweḍ lweqt-nni.
34 Ad yili wass-nni am yiwen wergaz ara yinigen γer
lebεid, ad iwekkel axxam-is i iqeddacen-is, yal yiwen s
ccγel-is, imiren ad iweṣṣi aεessas n tewwurt ad iεiwez.
35 Σiwzet ihi, axaṭer ur teẓrim ara melmi ara d-yas bab
n wexxam, ama tameddit neγ țnaṣfa n yiḍ, m'ara yeskkuε
uyaziḍ neγ taṣebḥit.
36 Ḥadret a kkun-id-yaf teṭṭsem imi ur teẓrim ara
melmi ara d-yas.
37 Ayen akka i wen-d-nniγ, nniγ t-id i mkul yiwen deg-wen
: εiwzet !
Ixef 14
Amcaweṛ γef Sidna Σisa
1 Qqimen-d sin wussan i Tfaska n izimer n leslak i deg
xeddmen aγṛum mbla tamtunt ( iγes ). Lmuqedmin imeqqranen d
lεulama, țnadin s tḥila, sebba s wayes ara ḥebbsen Sidna
Σisa
iwakken a t-nγen.
2 Qqaṛen : Ur nezmir ara
a t-nessekcem γer lḥebs deg wass n lεid, neγ m'ulac lγaci ad
sekkren ccwal.
Taqbuct
n leεṭer
3 Sidna Σisa yella di taddart n Bitanya, deg wexxam n
Semεun ihelken lbeṛs ; mi qqimen ad ččen, ațaya yiwet n
tmeṭṭut tekcem-ed, tewwi-d yid-es taqbuct ițwaxedmen s wezṛu
amellal, teččuṛ d leεṭeṛ yeṣfan γlayen. Teṛẓa taqbuct-nni,
tesmar-iț γef wuqeṛṛuy n Sidna Σisa.
4 Kra deg-sen zeεfen nnan : Acuγer i tessexṣeṛ leεṭeṛ-agi ?
5 Lemmer i t-nezzenz, a
d-yawi akteṛ n telt meyya twiztin n lfeṭṭa ara nefṛeq i
igellilen ! Dγa rfan γef tmeṭṭut-nni.
6 Sidna Σisa yenna : Anfet-as acimi i ț-tesnuγnayem ?
Ayen akka i yi-texdem d ayen yelhan !
7 Igellilen ad ilin
daymen gar-awen, tzemrem a ten-tεiwnem melmi i wen yehwa ; ma d
nekkini ur țγimiγ ara daymen yid-wen.
8 Ayen tezmer a t-texdem texdem it : tedhen lǧețța-w
thegga-ț i temḍelt.
9 A wen-d-iniγ tideț : di mkul amkan n ddunit anda ara
yețțubecceṛ lexbaṛ-agi n lxiṛ, a d-țmektayen
tameṭṭut-agi d wayen akka texdem.
Lexdeε
n Yudas
10 Yudas n Qeṛyut yiwen si tnac inelmaden, iṛuḥ γer
imeqqranen n lmuqedmin, yemsefham yid-sen amek ara sen yezzenz
Sidna Σisa.
11 Feṛḥen aṭas mi s-slan, εuhden-t a s-fken idrimen.
Imiren Yudas ițqellib tagniț i deg ara sen-t-yezzenz.
Imensi
aneggaru
12 Ass amenzu n Tfaska n weγṛum mbla tamtunt ( iγes
), i deg zellun izimer n leslak, inelmaden nnan i Sidna Σisa :
Anda tebγiḍ a nheggi imensi n Tfaska ?
13 Iceggeε sin seg inelmaden-is, yenna-yasen : ṛuḥet
γer temdint, a d-temlilem d yiwen wergaz yewwi-d tacmuxt n
waman, tebεet-eț γer wanda ara yekcem,
14 init i bab n
wexxam-nni : Ssid-nneγ yenna-yak : « anda-ț texxamt i deg ara
ččeγ imensi n Tfaska n izimer nekk d inelmaden-iw ? »
15 A kkun-yessali γer
yiwet n tγurfeț tameqqrant iwesεen, kullec yella deg-s. Dinna
ara theggim imensi n Tfaska.
16 Inelmaden ṛuḥen, mi wwḍen γer temdint, ufan kullec
akken i sen-t yenna. Dγa heggan imensi n Tfaska.
17 Mi d-teγli tmeddit, Sidna Σisa yusa-d akk-d tnac-nni
inelmaden.
18 Mi qqimen ad ččen,
Sidna Σisa yenna yasen : A wen-iniγ tideț : yiwen seg-wen itețțen
yid-i, ad iyi-ixdeε.
19 Yeγli-d leḥzen fell-asen, bdan steqsayen-t yiwen
yiwen qqaṛen-as : A Sidi, neγ mačči d nekk ?
20 Yenna-yasen : D yiwen seg-wen, yessasnen yid-i talqimt
n weγṛum deg uḍebsi.
21 Ţ-țideț, Mmi-s n bunadem ad iṛuḥ akken yețwakteb
fell-as di tira iqedsen ; meεna a nnger n wergaz-nni ara
t-ixedεen. Axiṛ-as lemmer ur d-ilul ara γer ddunit !
22 Mi bdan tețțen, Sidna Σisa yeddem-d aγṛum, yeḥmed
ṛebbi, yebḍa-t, ifṛeq-it i inelmaden-is, yenna yasen :
Ţčet-eț, ayagi d-lǧețța-w.
23Yeddem-ed daγen lkas n ccṛab, yeḥmed ṛebbi,
yefka-yasen, swan meṛṛa seg-s.
24 Sidna Σisa yenna-yasen : Ayagi d idammen n leεqed
amaynut, d idammen-iw ara yazlen γef waṭas n yemdanen.
25 S tideț nniγ-awen : ur țuγaleγ ara ad sweγ si lfakya
n tẓurin, alamma d ass i deg ara sweγ ccṛab ajdid di tgelda n
ṛebbi.
26 Mi cnan isefra n Ẓabur, ulin γer yiγil n uzemmur.
27 Sidna Σisa yenna-yasen : A kkun-yewwet akk wugur akken
yețwakteb : Ad ewwteγ ameksa, ulli ad rewlent γer mkul
lǧiha.
28 Yerna-yasen-d : Meεna m'ara d-ḥyuγ si ger lmegtin a
wen-zwireγ γer tmurt n Jlili.
29 Buṭrus yenna-yas :
Γas ad ccḍen akk, nekkini ur țeccḍeγ ara.
30 Sidna Σisa yerra-yas : A k-d-iniγ tideț : iḍ-agi
uqbel ad yeskkuε uyaziḍ snat n tikkal, kečč a i-tnekṛeḍ
tlata iberdan.
31 Meεna Buṭrus yenna-yas daγen : Ad qebleγ ad dduγ
yid-ek ula γer lmut wala a k-nekkṛeγ. Inelmaden nniḍen nnan-d
meṛṛa akken.
Tamazirt n Jitsimani
32 Mi wwḍen γer tmazirt n Jitsimani, Sidna Σisa
yenna-yasen i inelmaden-is : Qqimet dagi, ma d nekk ad ṛuḥeγ
ad ẓalleγ.
33 Yewwi yid-es Buṭrus, Yeεqub akk-d Yuḥenna.
Yetḥeyyeṛ, tekcem-it tugdi.
34 Yenna-yasen : Ḥusseγ s
leḥzen n lmut ; qqimet dagi, εiwzet !
35 Issebεed iman-is fell-asen, iḍeggeṛ iman-is γer
lqaεa, yedεa γer Sidi ṛebbi ma yella wamek ara yessebεed
fell-as taswiεt-nni n leεtab.
36 Yeqqaṛ-as : A baba, a
baba ṛebbi ! Kečč tzemreḍ i kullec ; ssebεed fell-i lkas-agi
n leεtab. Lameεna d lebγi-k kan ara yedṛun mačči d lebγi-w.
37 Yuγal-ed γer inelmaden-is, yufa-ten-id ṭṭsen. Yenna
i Buṭrus : A Semεun, teṭṭseḍ ? Ur tezmireḍ ara
aț-țεiwzeḍ ula d ssaεa ?
38 Σiwzet tẓallem, iwakken ur tγellim ara deg ujeṛṛeb.
ṛṛuḥ yeǧhed yerna yebγa, meεna lǧețța ur tezmir ara,
tulwa.
39 Issebεed iman-is daγen, iεawed i tẓallit-nni.
40 Mi d-yuγal yufa-ten
daγen ṭsen, iγleb-iten nuddam. Ur ẓrin d acu ara s-d-erren.
41 Yuγal-ed tikkelt tis tlata yenna yasen : Mazal-ikkun
teṭṭsem, testeεfam ! Dayen tura, tewweḍ-ed teswiεt-nni !
Mmi-s n bunadem ițusellem ger ifassen n imednuben.
42 Kkret fell awen a nṛuḥet
! Win i yi-izzenzen yewweḍ-ed.
Sidna
Σisa yețwaḥbes
43 Mazal-it iheddeṛ, mi d-yewweḍ Yudas, yiwen si
tnac-nni. Ddan-d yid-es aṭas n lγaci s iεekkzan d ijenwiyen,
ceggεen-ten-id lεulama n ccariεa, imeqqranen n lmuqedmin akk-d
imeqqranen n wegdud.
44 Win akken i gzenzen
Sidna Σisa yemsefham yid-sen, yenna-yasen : Win i γef ara
selmeγ, d nețța ; ṭṭfet-eț tefkem-t i iεessasen a t-awin.
45 Akken kan i d-yewweḍ, iqeṛṛeb ed γer Sidna
Σisa
yenna-yas : A Sidi ! Dγa isellem fell-as.
46 Imiren lγaci mmγen γef Sidna Σisa, ṭṭfen-t.
47 Yiwen seg wid yellan dinna ijbed-ed ajenwi, yewwet
aqeddac n lmuqeddem ameqqran, igzem-as ameẓẓuγ.
48 Sidna Σisa yenna-yasen : Teffγem-d γur-i s ijenwiyen
d iεekzan am akken d amcum i lliγ ?
49 Mkul ass lliγ yid-wen
sselmadeγ di lǧameε, yiwen ur yessers afus-is fell-i. Meεna
ayagi yedṛa-d, iwakken ad nnekmalent tira iqedsen.
50 Imiren ǧǧan-t akk inelmaden-is, rewlen.
51 Yiwen ilemẓi yelsan
anagar timelḥeft itbeε-it. Emmγen fell-as a t-ṭṭfen,
52 meεna iserreḥ i
tmelḥeft-nni, yerwel akken d aεeryan.
Sidna
Σisa zdat usqamu n ccṛeε
53 Wwin Sidna Σisa γer wexxam n lmuqeddem ameqqran, anda
nnejmaεen imeqqranen n lmuqedmin, lεulama n ccariεa akk-d
imeqqranen n wegdud.
54 Buṭrus itbeε-it s
lebεid, armi d azniq n wexxam n lmuqeddem ameqqran. Yeqqim ger
iεessasen, yesseḥmuy γer tmes.
55 Lmuqedmin imeqqranen akk-d tejmaεt n ccṛeε, țnadin
cchada iṣṣeḥan s wacu ara ḥekmen fell-as s lmut, lameεna ur
ufin ara.
56 Aṭas i gcehden
fell-as s ẓẓur, lameεna cchadat-nsen ur ṣṣeḥant ara.
57 Kra deg-sen kkren-d ad
cehden fell-as s ẓẓur, nnan :
58 Nesla-yas mi d-yenna : « ad huddeγ lǧameε-agi iqedsen
yebnan s ufus n wemdan ; di tlata wussan, ad bnuγ wayeḍ ur
nețwabennuy ara s ufus n wemdan.»
59 Lameεna ula γef wayagi cchadat nsen ur ṣṣeḥant ara.
60 Lmuqeddem ameqqran
ibedd di tlemmast n tejmaεt, yesteqsa Sidna Σisa yenna-yas : Ur
d-tețțaraḍ ara awal ? Acu akka i d-qqaṛen yemdanen-agi i
d-icehden fell-ak ?
61 Sidna Σisa yessusem ur d-yerri acemma. Ameqqran n
lmuqedmin iεawed isteqsa-t yenna-yas : Kečč, d Lmasiḥ Mmi-s
n ṛebbi yețțubarken ?
62 Sidna Σisa yerra-yas :
Ţ-țideț, d nekk ! Yerna
aț-țeẓrem Mmi-s n bunadem yeqqim γer tama tayeffust n Bab
n tezmert ; a t-twalim asmi ara d-yas seg igenwan γef wusigna.
63 Lmuqeddem ameqqran icerreg aqenduṛ-is yenna : Ur
nuḥwaǧ ara inigan nniḍen !
64 Teslam akken yekfeṛ ?
D acu twalam ? ?ekmen fell-as s lmut akken ma llan.
65 Kra seg-sen
ssusufen-t, țγummun-as udem-is, kkaten-t s lbunyat qqaṛen-as :
Eεqel anwa i k-id-yewten ! Iεessasen-nni wwin-t, kkaten-t s
ibeqqayen.
Buṭrus
yenkeṛ Sidna Σisa
66 Buṭrus mazal-it deg ufrag n wexxam n lmuqeddem
ameqqran ; ațaya yiwet n tqeddact,
67 twala-t yesseḥmay,
tmuqel-it nezzeh, tenna yas : Ula d kečč telliḍ akk-d
Σisa
anaṣari.
68 Inkeṛ yenna : Ur ẓriγ, ur fhimeγ ayen i
d-teqqaṛeḍ. Dγa yeffeγ, iṛuḥ γer wesqif. Imiren kan yeskkuε
uyaziḍ.
69 Twala-t daγen
tqeddact-nni, tenna i wid yellan dinna : Argaz-agi d yiwen
seg-sen ! Yenkeṛ tikkelt tis snat.
70 Taswiεt kan, wid
yellan dinna nnan daγen i Buṭrus : Mbla ccekk ula d kečč
telliḍ seg-sen, axaṭer d ajlili i telliḍ.
71 Yebda yețgalla yeqqaṛ : A yi-inεel ṛebbi ma
skaddbeγ ! Ur ssineγ ara argaz-agi i γef tețmeslayem.
72 Imiren kan yeskkuε uyaziḍ tikkelt tis snat, imiren
Buṭrus yemmekta-d awal i s-d-yenna Sidna Σisa : « uqbel ad
yeskuε uyaziḍ tikkelt tis snat, a yi-tnekkṛeḍ tlata iberdan.
» Dγa yeṭṭerḍeq d imeṭṭawen.
Ixef
15
Sidna
Σisa zdat Bilaṭus
1 Ṣṣbeḥ zik, lmuqedmin imeqqranen ruḥen mcawaṛen
akk-d imeqqranen n wegdud, lεulama n ccariεa akk dusqamu n
ccṛeε. Urzen Sidna Σisa, wwin-t sellmen-t i Bilaṭus.
2 Bilaṭus yesteqsa-t
yenna yas : D kečč i d agellid n wat Isṛail ? Sidna
Σisa
yerra-yas : Tenniḍ-t-id.
3 Lmuqedmin imeqqranen ccetkan fell-as γef waṭas n
temsalin.
4 Bilaṭus yerna
yesteqsa-t : Ur d-tețțaraḍ ara awal ? Ur tesliḍ ara ayen akk
s wayes i d-țcetkin fell-ak ?
5 Meεna Sidna Σisa ur d-yerri acemma ; Bilaṭus yewhem
deg-s.
Σisa
neγ Barabas
6 Di mkul lεid, Bilaṭus ițserriḥ-ed i yiwen umeḥbus,
win ara s-ssutren lγaci.
7 Yella yiwen umeḥbus isem-is Barabas, yețwaḥbes nețța
akk-d imcewwlen nniḍen γef ddemma n ccwal i d-yeskker, yerna
yenγa tamgeṛṭ.
8 Lγaci ulin γer Bilaṭus
iwakken a s-ssutren ayen yennum ixeddem-asen-t.
9 Bilaṭus yerra-yasen-d : Tebγam a wen-d-serrḥeγ i
ugellid n wat Isṛail ?
10 Axaṭer ifaq belli s tismin i s-t-id-wwin lmuqedmin
imeqqranen.
11 Lameεna lmuqedmin
imeqqranen sḥeṛcen lγaci iwakken ad inin i Bilaṭus: « d
Barabas iwumi ara d-tserrḥeḍ. »
12 Bilaṭus yenna-yasen daγen : D acu tebγam ad xedmeγ s
win iwumi teqqaṛem agellid n wat Isṛail ?
13 Ţεeggiḍen-as :
Ṣemmeṛ-it γef wumidag !
14 Bilaṭus yenna-yasen : D acu i gexdem n diri ? Rnan
țεeggiḍen akteṛ :
Ṣemmeṛ-it γef wumidag !
15 Imi i gebγa Bilaṭus ad yeddu di lebγi i lγaci,
iserreḥ-ed i Barabas, ma d Sidna Σisa yefka lameṛ a t-ewten s
ujelkkaḍ, syenna a t-semmṛen γef wumidag.
Sidna
Σisa yețwaṣemmeṛ γef wumidag
16 Lεeskeṛ wwin Sidna Σisa γer wefrag n lbeṛj,
ssawlen-d i terbaεt nsen.
17 Sburren-as abeṛnus
azeggaγ, xedmen-d taεeṣṣabt s isennanen ssersen-ț γef
wuqeṛṛuy-is.
18 Stehzayen fell-as qqaṛen-as : Azul fell-ak, ay
agellid n wat Isṛail !
19 Kkaten-t s uγanim γer uqeṛṛuy, ssusufen-t, kerfen
tigecrar iwakken ad seǧǧden zdat-es.
20 Mi stehzan fell-as, kksen-as abeṛnus-nni azeggaγ,
rran-as lqecc-is, imiren wwin-t γer beṛṛa iwakken a
t-ṣemmṛen γef lluḥ.
21 Iεedda-d syenna yiwen umsebrid i d-yuγalen si lexla,
isem-is Semεun n Qiṛwan, baba-s n Alexandrus akk-d Rufus ; ḥeṛsen-t lεeskeṛ iwakken ad ibbib amidag n Sidna
Σisa.
22
Ẓẓuγṛen Sidna
Σisa
armi d yiwen n wemkan ițțusemman Gulguṭa, yeεni « tiγilt n
uqeṛṛuy.»
23 Fkan-as ad isew ccṛab ixelḍen s uselγaγ n lmuṛ,
lameεna yugi a t-isew.
24 Semmṛen-t γef lluḥ, gren tasγaṛt iwakken ad feṛqen
llebsa-s.
25 Aț-țili d țesεa n ṣṣbeḥ mi t-ṣemmṛen
γef wumidag.
26 Uran sebba γef wacu i
t-semmṛen : « Wagi d agellid n wat Isṛail.»
27 Semmṛen daγen sin yemcumen, yiwen γer uyeffus-is wayeḍ
γer uẓelmaḍ-is.
28 S wakka, yețwakemmel
wayen yuran di tira iqedsen : Seddan-t di lehṣab n yemcumen.
29 Kra n wid yețεeddayen syenna reggmen-t, țhuzzun
iqeṛṛay-nsen, qqaṛen-as : Hey ! a win yețhuddun lǧameε
iqedsen, ibennu-t di tlata wussan,
30 sellek iman-ik !
ers-ed seg umidag- ik !
31 Ula d imeqqranen n lmuqedmin d lεulama n ccariεa țaḍsan fell-as, qqaṛen gar-asen : Isellek wiyaḍ, ur yezmir
ad isellek iman-is.
32 A d-iṣubb ihi tura seg umidag, Lmasiḥ... Agellid n
wat Isṛail ! A nwali iwakken a namen. Ula d wid ițțuṣemmṛen
yid-es reggmen-t.
Lmut n
Sidna Σisa
33 Aț-țili d leǧwahi n tnac mi d yeγli ṭṭlam γef
ddunit meṛṛa, armi d tlata n tmeddit.
34
Γef tlata n tmeddit,
Sidna Σisa iεeggeḍ s ṣṣut εlayen : Eluwa, Eluwa, Lama
sabaqtani ? Yeεni : Illu-iw ! Illu-iw ! acuγer i yi teǧǧiḍ
?
35 Kra seg wid yellan
dinna slan-as, nnan : Slet-as, atan yessawal i Sidna Ilyas !
36 Yiwen seg-sen iṛuḥ yesselxes-ed ameččim n taḍuṭ
di lxell, icudd-it γer tγanimt, imekken-as-t iwakken ad isew,
yenna : Aṛǧut a nwali ma yella a d-yas Sidna Ilyas a
t-id-iṣṣub seg umidag !
37 Meεna Sidna Σisa iεeggeḍ imiren kan, dγa yessufeγ
taṛwiḥt.
38 Leḥjab n wemkan
iqedsen n lǧameε, icerreg γef sin seg yixef ufella, armi d
ixef n wadda.
39 Yiwen umeqqran n
lεeskeṛ ibedd zdat Sidna Σisa ; mi gwala amek i gessufeγ
taṛwiḥt, yenna : Ţ-țideț, argaz-agi d Mmi-s n ṛebbi !
40 Kra tilawin țmuqulent si lebεid. Llant gar-asent
Meryem tamagdalit, Meryem yemma-s n Yeεqub ameẓyan, n Yuses
akk-d Salumi.
41 Llant daγen tilawin-nni meṛṛa i t-ittabaεen, i
s-iqeddcen mi gella di tmurt n Jlili akk-d waṭas n tilawin
nniḍen i d-yeddan yid-es γer temdint n Lquds.
Tamḍelt
n Sidna Σisa
42 Mi d-teγli tmeddit, yewweḍ-ed Yusef n temdint n
Arimati, yellan d argaz mucaεen aṭas di tejmaεt n ccṛeε ; ula
d nețța yessaram a d-tass tgelda n Sidi ṛebbi.
43
Ţ-țameddit n wass i
deg țheggin iman-nsen i wass n westeεfu, daymi Yusef ur ikukra
ara ad iṛuḥ γer Bilaṭus iwakken ad issuter lǧețța n Sidna
Σisa.
44 Mi gesla s Sidna Σisa yemmut, Bilaṭus yewhem.
Yessawel i umeqqran n meyya iεsekṛiwen, isteqsa-t ma yella aṭas
aya segmi yemmut.
45 Mi s-d-yerra lexbaṛ, Bilaṭus iserreḥ-as i Yusef ad
yawi lǧețța n Sidna Σisa.
46 Yusef iṛuḥ yuγ-ed
lekfen, iṣubb-ed lǧețța n Sidna Σisa, ikfen-it, yewwi-t
issers-it deg yiwen uẓekka yeγzan deg wezṛu am lγaṛ, imiren
yessegrareb azṛu γef yimi uẓekka-nni.
47 Meryem tamagdalit d Meryem yemma-s n Yeεqub, țmuqulent
iwakken ad ẓren-t anda i t-ssersen.
Ixef 16
Ḥeggu n
Sidna Σisa
1 Mi gεedda wass n westeεfu, Meryem tamagdalit d Meryem
yemma-s n Yeεqub d Salumi uγent-ed leεṭeṛ iwakken ad dehnent
lǧețța n Sidna Σisa.
2 Ass amezwaru n dduṛt,
ṣṣbeḥ zik mi d-yecṛeq yiṭij, ṛuḥent γer uẓekka.
3 Qqaṛent wway gar-asent : Anwa ara γ-yekksen azṛu-nni γef yimi
uẓekka ?
4 Mi refdent allen-nsent, walant azṛu-nni ameqqran
yegrareb akkin.
5 Kecment γer daxel uẓekka , walant yiwen ilemẓi
yeqqim γer lǧiha tayeffust, yelsa llebsa tamellalt ; dehcent.
6 Yenna-yasent : Ur
xellεemt ara ! Tețnadimt γef Σisa anaṣari win yețwasemmṛen
γef wumidag ? Ulac-it dagi, yeḥya-d si ger lmegtin. Muqlemt,
atan wemkan anda i t-ssersen.
7 ṛuḥemt tura, inimt-asen
i inelmaden-is akk-d Buṭrus : atan yezwar γer tmurt n Jlili ;
dinna ara t-teẓrem akken i wen-t-yenna.
8 Ffγent-ed seg uẓekka-nni, rewlent s tergagit d lxelεa,
iffeγ-itent leεqel, daymi ur εawdent i yiwen ayen yedṛan.
Sidna
Σisa isbeggen-ed iman-is
9 Sidna Σisa yeḥya-d si ger lmegtin ass amezwaru n dduṛt,
ass i d-yernan γef wass n westeεfu. Di tazwara isbeggen-ed iman-is
i Meryem tamagdalit, seg i d-issufeγ sebεa n leǧnun.
10 Wid akk iteddun d Sidna Σisa, mazal-iten di leḥzen d
imeṭṭawen, mi d-tewwi Meryem lexbaṛ i inelmaden.
11 Mi slan yis yeḥya-d si ger lmegtin yerna twala-t, ur
ț-uminen ara.
12 Yesbeggen-ed iman-is s ṣṣifa nniḍen, i sin seg
inelmaden iteddun γer lexla.
13 Uγalen-d xebbṛen inelmaden nniḍen, lameεna ula d
nutni ur ten uminen ara.
14 Yesbeggen-ed iman-is i ḥdac-nni inelmaden mi llan tețțen.
Ilumm-iten γef lqella n liman-nsen d wulawen nsen yeqquṛen, imi
ur uminen ara wid akk i t-yeẓran yeḥya-d.
15 Dγa yenna-yasen : ṛuḥet beccṛet di ddunit meṛṛa,
lexbaṛ n lxiṛ i yemdanen di mkul amkan.
16 Win ara yamnen, ara
yețwaγeḍsen, ad ițțusellek ; ma d win ur nețțamen ara, ur
yețwasellak ara.
17 Atnah lbeṛhanat ara xeddmen wid yețțamnen yis-i : S
yisem-iw ad ssufuγen leǧnun, ad heddṛen timeslayin nniḍen,
18 γas ṭṭfen izerman neγ swan ssem, ur sen-ixeddem
acemma ; ad srusun ifassen-nsen γef yimuḍan a ten sseḥlun.
Sidna
Σisa yețwarfed γer igenni
19 Mi gekfa yid-sen ameslay, Sidna Σisa yețwarfed γer
igenni, yeqqim γer uyeffus n Sidi ṛebbi.
20 Inelmaden ṛuḥen ad beccṛen di mkul amkan ; Sidi
ṛebbi yețțili yid sen, yețbeggin-ed s waṭas lbeṛhanat,
tideț n wayen țbecciṛen.
***
|
Amasih.net Akk izerfan
ttwaḥerzen.