Aselmed n Sidna Σisa s γur Luka Uqdis

Ixef 1

1 Imi aṭas i gebdan tira γef wayen yedṛan gar-aneγ,

2 akken i γ-t-id εawden wid yellan d inigan si tazwara, iwalan kullec s wallen-nsen; uγalen d iqeddacen n wawal n Sidi Ṛebbi.
3 Steqsaγ ula d nekk akken ilaq γef wayen akk yedṛan seg wass amezwaru, ufiγ d ayen yelhan a k-t-id aruγ a Tawfilus,
4 iwakken aț-țissineḍ tideț γef wayen i tesliḍ meṛṛa. Lexbaṛ n tlalit n Yeḥya
5 Di zzman n Hiṛudus, agellid n tmurt n Yahuda, yella yiwen n lmuqeddem si tejmaεt n Abya, isem-is Zakarya. Tameṭṭut-is Ilicaba, seg izuṛan n Haṛun.
6 D iḥeqqiyen i llan i sin, ḥerzen yerna ḍuεen awal n Sidi Ṛebbi.

7 Ur sεin ara dderya, meqqṛit i sin di leεmeṛ yerna Ilicaba ț-țiεiqeṛt.
8 Mi d-tewweḍ nnuba n leqdic n wedrum n Zakarya di lǧameε iqedsen

9 akken i tella di lεadda n lmuqedmin, gren tasγaṛt, tṣaḥ-ed Zakarya iwakken ad ikcem γer wemkan iqedsen ad isseṛγ lebxuṛ.
10 Mi gella isseṛγay lebxuṛ di lǧameε, lγaci meṛṛa yeqqimen di beṛṛa deεεun γer Sidi Ṛebbi.
11 Iḍheṛ-as-d yiwen lmelk n Sidi Ṛebbi, ibedd γer tama tayeffust n udekkan-nni anda sseṛγayen lebxuṛ.

12 Mi t-iwala Zakarya, yedhec ikcem-it lxuf.

13 Lmelk-nni yenna yas-ed : Ur țțagad ara a Zakarya, ayen i tessutreḍ γer Sidi Ṛebbi yețwaqbel. Tameṭṭut-ik Ilicaba ad a k-d-tesεu aqcic, a s-tsemmiḍ Yeḥya.
14 Aț-țfeṛḥeḍ yis, a k-yili d sebba n sseεd ; imdanen meṛṛa ad feṛḥen s tlalit-is.
15 Ad yesεu ccan d ameqqran γer Sidi Ṛebbi, a d-iččaṛ d Ṛṛuḥ iqedsen si tεebbuṭ n yemma-s, ur itess ccṛab, ur itess ayen nniḍen isekkṛen.
16 A d-yerr aṭas n wat Isṛail γer webrid n Sidi Ṛebbi.
17 Ad ilḥu s leεnaya n Sidi Ṛebbi, s ṛṛuḥ ț-țezmert n nnbi Ilyas. Ad issemlil imawlan d warraw-nsen, a d-yerr wid ijehlen γer webrid n iḥeqqiyen, akken ad iheggi i Sidi Ṛebbi agdud ara t-iḍuεen.
18 Zakarya yenna i lmelk : Amek ara εeqleγ belli ayen akka i d-tenniḍ ț-țideț ? Nekk d amγaṛ, ula ț-țameṭṭut-iw meqqṛet di leεmeṛ !
19 Lmelk-nni yerra-yas-d : Nekk d Jebrayil, d aqeddac n Sidi Ṛebbi ; usiγ-ed s γur-es iwakken a k-d-awiγ lexbaṛ-agi n lxiṛ.
20 Lameεna imi ur tumineḍ ara s yimeslayen-iw atan aț-țeggugmeḍ, ur d-ițeffeγ ara wawal seg yimi-k alamma d asmi ara d-yedṛu wannect-agi. Meεna ḥṣu belli ayen akka i k-d-nniγ ad yedṛu deg wass-is.
21 Lγaci-nni yețṛaǧun Zakarya deg ufrag, wehmen acuγeṛ iεeṭṭel deg umkan iqedsen n lǧameε.

22 Mi d-iffeγ, yeggugem, ur izmir ara a d-yessufeγ awal; lγaci-nni fehmen belli iweḥḥa-yas-ed kra Sidi Ṛebbi. Yebda ițwehhi-yasen-d s ifassen-is, yeqqim d agugam.
23 Mi kfan wussan n lxedma-s di lǧameε, Zakarya yuγal γer wexxam-is.

24 Σeddan kra n wussan, tameṭṭut-is Ilicaba terfed tadist ; dγa tesseḥjeb iman-is xemsa wagguren, teqqaṛ :
25 Atan Sidi Ṛebbi yerra-d ddehn-is γur-i, ikkes-iyi lεib zdat yemdanen.

Lexbaṛ n tlalit n Sidna Σisa

26 Aggur wis sețța, Sidi Ṛebbi iceggeε-d lmelk Jebrayil γer taddart n Naṣaret, di tmurt n Jlili.
27 Iceggeε-it-id γer yiwet n tlemẓit i gexḍeb yiwen wergaz isem-is Yusef, yellan seg izuṛan n Sidna Dawed. Tilemẓit-agi isem-is Meryem.
28 Ikcem lmelk γur-es yenna-yas : Sslam fell-am a tin iburek Sidi Ṛebbi ! Sidi Ṛebbi yella yid-em.
29 Meryem tedhec, tenna : D acu i d lmeεna n imeslayen agi ?
30 Lmelk yenna-yas : Ur țțaggad ara a Meryem ! S ṛṛeḥma-s tameqqrant, Sidi Ṛebbi yextaṛ-ikem.

31 Atan aț-țrefdeḍ tadist, a d-tesεuḍ aqcic, semmi-yas Σisa, (yeεni : Ť Amsellek ť)
32 Ad yesεu ccan d ameqqran, ad ițțusemmi Mmi-s n Sidi Ṛebbi εlayen. Sidi Ṛebbi a t-yerr d agellid akken i t-yella Sidna Dawed, yiwen si lejdud-is.

33 Ad iḥkem γef tarwa n Yeεqub i dayem, tageldit-is ur tfennu ara.
34 Meryem tenna i lmelk-nni : Amek ara d-idṛu yid-i wayagi nekk ur nezwiǧ ara ?
35 Lmelk yerra-yas : Atan a d-yers fell-am Ṛṛuḥ iqedsen ; tazmert n Sidi Ṛebbi εlayen a kem-tγumm am tili, daymi aqcic-agi imqeddes ara d-ilalen ad ițțsemmi Ť Mmi-s n Ṛebbi ť.
36 Ilicaba i m-ițțilin, ula d nețțat ațan s tadist a d-tesεu aqcic γas akken meqqṛet di leεmeṛ. Tin akken iwumi semman tiεiqeṛt, ațan deg waggur wis sețța,

37 imi ulac wayen iwumi ur izmir Sidi Ṛebbi.
38 Meryem tenna : Aql-i ț-țaqeddact n Sidi Ṛebbi, ad idṛu yid-i wayen i d-tenniḍ. Imiren Lmelk-nni yeǧǧa-ț, iṛuḥ.

Meryem terzef γer Ilicaba

39 Deg wussan-nni, Meryem tekker tṛuḥ s lemγawla γer yiwet n taddart yellan deg idurar n tmurt n Yahuda.
40 Tekcem γer wexxam n Zakarya, tsellem γef Ilicaba.

41 Akken i tesla Ilicaba i sslam n Meryem, yefrawes llufan yellan di tεebbuṭ-is ; imiren teččuṛ d Ṛṛuḥ iqedsen,

42 tεeggeḍ tenna :A Meryem, tețțubarkeḍ ger tilawin meṛṛa, ițțubarek daγen win yellan di tεebbuṭ-im.

43 D acu-yi, iwakken a d-terzef γur-i yemma-s n Ssid-iw ?
44 Akken kan i sliγ i sslam-im, llufan yellan di tεebbuṭ-iw yefrawes s lfeṛḥ.

45 Ţ-țaseεdit kemm yumnen s wayen i m-d-yenna Sidi Ṛebbi !
46 Meryem tenna : Taṛwiḥt-iw teḥmed Sidi Ṛebbi,
47 ul-iw yeččuṛ d lfeṛḥ imi d nețța i d amsellek-iw,
48 axaṭer iwala-yi-d nekk taqeddact-is tameγbunt ur nesεi azal. Sya d asawen si lǧil γer lǧil a yi-qqaṛen : Ť ț-țaseεdit ť,
49 imi Sidi Ṛebbi Bab n tezmert, yexdem yis-i ayen issewhamen. Isem-is d imqeddes.
50 Ṛṛeḥma-s tețdum si lǧil γer lǧil γef wid akk i t-iḍuεen.
51 Isken-ed tazmert n yiγil-is, isseεṛeq iberdan i wid yețzuxxun;
52 yessers-ed imeqqranen seg imukan eεlayen, yerfed wid yețwaḥeqṛen;
53 yesseṛwa-yasen leṛẓaq i wid yelluẓen, ma d imeṛkantiyen yerra-ten ifassen d ilmawen.
54 Isellek tarwa n wat Isṛail yellan d iqeddacen-is, ur ițțu ara Ṛṛeḥma-s,
55 i gewεed i Sidna Ibṛahim d warraw-is i dayem akken i t-yenna i lejdud-nneγ.
56 Meryem teqqim γer Ilicaba azal n tlata wagguren d wamek i tuγal γer taddart-is.

Talalit n Yeḥya d ṭṭhaṛa-ines

57 Yewweḍ-ed lweqt i deg ara d-tarew Ilicaba, tesεa-d aqcic.
58 Imawlan-is d lǧiran-is feṛḥen aṭas mi slan s ṛṛehma i d-issers fell-as Sidi Ṛebbi.
59 Mi wwḍen tmanya n wussan γef weqcic-nni, usan-d a s-sḍehṛen, bγan a s-semmin s yisem n baba-s : Zakarya.

60 Dγa tenṭeq-ed yemma-s tenna-yasen : Xaṭi ! A s-nsemmi Yeḥya !
61 Nnan-as : Ula d yiwen deg wedrum-nwen ur yesεi isem-agi.
62 Steqsan baba-s s uwehhi amek yebγa ad isemmi i mmi-s.

63 Issuter asen-d talwiḥt, yura-yasen-d deg-s : Ť Yeḥya i d isem-is ť. Dγa wehmen meṛṛa.
64 Imiren kan iserreḥ yiles-is, yebda iheddeṛ, yețḥemmid Ṛebbi ițcekkiṛ-it.

65 Imezdaγ n lǧiha-nni meṛṛa wehmen, tεeǧǧben. Deg idurar n tmurt n Yahuda țmeslayen akk γef wayen yedṛan.
66 Wid akk yeslan imeslayen-nni, ḥerzen-ten deg wulawen-nsen, qqaṛen : d acu ara d-iffeγ weqcic-agi ? Axaṭer s tideț afus n Sidi Ṛebbi yella fell-as.
67 Zakarya, baba-s n weqcic-nni, iččuṛ d Ṛṛuḥ iqedsen, icar-ed s imeslayen-agi :
68 Ad ițțubarek Sidi Ṛebbi, Illu n wat Isṛail imi d-yerra ddehn-is γer wegdud-is iwakken a t-isellek.
69 Yefka-yaγ-d yiwen wemsellek d ameqqran seg izuṛan n Sidna Dawed aqeddac-is,
70 am akken i t-id-ixebbeṛ Sidi Ṛebbi si zzman iεeddan, seg yimi n lenbiya iqedsen :
71 Ad yili d amsellek ara γ-imenεen seg yiεdawen-nneγ, si ger ifassen n wid akk i γ-ikeṛhen.
72 Isbeggen ṛṛeḥma-s i lejdud-nneγ, yemmekta-d lemεahda-s iqedsen
73 i gefka i jeddi-tneγ Sidna Ibṛahim.
74 M'ara nețțusellek seg ufus n yeεdawen-nneγ, a neεbed Sidi Ṛebbi mbla lxuf,
75 s lḥeqq, s ṭṭaεa d wannuz deg wussan n ddunit-nneγ meṛṛa.
76 Ma d kečč a mmi, aț-țețțusemmiḍ d nnbi n Sidi Ṛebbi eεlayen axaṭer aț-țedduḍ zdat-es iwakken aț-țheggiḍ iberdan-is,
77 aț-țesfehmeḍ agdud-is γef leslak n Sidi Ṛebbi s leεfu n ddnubat-nsen.
78 Axaṭer Ṛebbi-nneγ d aḥnin, s Ṛṛeḥma-ines a d-icṛeq fell-aγ tafat-is am tin n yiṭij seg yigenwan.
79 Tafat-is a d-tecṛeq γef wid yellan di ṭṭlam n lmut, ad aγ-yawi deg webrid n lehna.
80 Aqcic-nni ițțimγur yețnerni di leεqel. Iεac deg unezṛuf armi d ass i deg i d-ibeggen iman-is i wat Isṛail.

Ixef 2

Talalit n Sidna Σisa

1 Deg ussan-nni, yeffeγ-ed yiwen n lqanun s γur Qayṣeṛ ameqqran ; yefka lameṛ ad țțujerrden imezdaγ meṛṛa yellan di tmura-ines.
2 Ajerred-agi amezwaru yedṛa asmi yella Kirinyus d lḥakem n tmurt n Surya.

3 Imdanen meṛṛa ṛuḥen ad țțujerden mkul yiwen di taddart n lejdud-is.

4 Yusef yellan seg izuṛan n Sidna Dawed, yuli ula d nețța si taddart n Naṣaret n tmurt n Jlili γer Bitelḥem, taddart n lejdud-is yellan di tmurt n Yahuda.
5 Iṛuḥ ad ițțujerred nețța ț-țxedibt-is Meryem yellan s tadist.
6 Mi ten-yuγ lḥal dinna, yewweḍ-d lweqt i deg ara terbu ( tarew ) Meryem.

7 Tesεa-d mmi-s amenzu, tețțel-it, tessegen-it di lmedwed, imi ur ufin ara amkan deg wexxam n yemsafren.
8 Di tmurt-nni, llan imeksawen ițnusun di lexlawi, țεassan lmal-nsen deg yiḍ.

9 Ataya lmelk n Sidi Ṛebbi iḍheṛ-asen-d, tamanegt n Sidi Ṛebbi tecceεceε tezzi-yasen-d, ikcem-iten lxuf d ameqqran.
10 Lmelk yenna-yasen : Ur țțagadet ! Aql-i wwiγ-awen-d lexbaṛ lxiṛ ara isfeṛḥen wugdud meṛṛa.
11 Ass-agi di taddart n Sidna Dawed, ilul-awen-d yiwen wemsellek, d nețța i d Lmasiḥ n Sidi Ṛebbi !
12 Atan wamek ara t-tεeqlem : aț-țafem llufan yețțel, yeṭṭes di lmedwed.

13 Imiren kan, ț-țirebbaε n lmalayekkat i d-yernan γer lmelk nni, cennunt țḥemmident Sidi Ṛebbi, qqaṛent :
14 Lḥemd i Sidi Ṛebbi deg imukan eεlayen, lehna di ddunit γef yemdanen eεzizen fell-as.
15 Akken uγalent lmalayekkat-nni γer yigenni, imeksawen nnan wway gar-asen : Kkret a nṛuḥet γer Bitelḥem, a nẓer ayen i gedṛan, d wayen akka s wayes i γ-d-ixebbeṛ Sidi Ṛebbi.
16 Imiren kan ṛuḥen, ufan dinna Meryem d Yusef akk-d llufan-nni yeṭṭes di lmedwed.
17 Mi walan aqcic-nni, ḥkan-d wayen i sen-d-yenna lmelk fell-as.

18 Wid akk yeslan s wayen i d-ḥkan imeksawen-nni, dehcen.

19 Meryem teḥrez imeslayen-nni deg wul-is, tețxemmim fell-asen.
20 Mi uγalen imeksawen-nni, țḥemmiden țcekkiṛen Sidi Ṛebbi γef wayen slan d wayen ẓran, imi ufan kullec akken i sen-d-ițțuxebbeṛ.

Ṭṭhaṛa n Sidna Σisa

21 Yewweḍ-ed wass wis tmanya i deg ara s-sḍehṛen i weqcic-nni ; semman-as Σisa, isem-nni i s-yefka lmelk uqbel ad yili di tεebbuṭ n yemma-s.
22 Asmi wwḍen ṛebεin wussan γef tlalit n weqcic-nni, Yusef d Meryem wwin-t γer temdint n Lquds iwakken ad ițțuqeddem i Sidi Ṛebbi,

23 akken yura di ccariεa n Sidna Musa : yal aqcic amenzu, ilaq ad ițțuqeddem i Sidi Ṛebbi.

24 Yerna ṛuḥen iwakken ad fken d asfel snat n tmilliwin neγ sin yetbiren imeẓyanen akken yella di ccariεa n Sidna Musa.
25 Di temdint n Lquds yella yiwen wergaz isem-is Semεun. Argaz-agi d aḥeqqi, iḍuε Sidi Ṛebbi, yețṛaǧu amsellek n wat Isṛail, Ṛṛuḥ iqedsen yețțili yid-es.

26 Iweḥḥa-yas-ed belli ur ițmețțat ara alamma yeẓra Lmasiḥ n Sidi Ṛebbi.

27 Ṛṛuḥ n Sidi Ṛebbi iwelleh Semεun ad iṛuḥ γer lǧameε iqedsen.Atnaya kecmen-d Yusef d Meryem, wwin-d llufan-nni iwakken ad xedmen wayen i d-tenna ccariεa n Musa fell-as.
28 Semεun yeṭṭef aqcic-nni ger ifassen-is, iḥmed Sidi Ṛebbi yenna :
29 Tura a Sidi Ṛebbi γas ad mmteγ aql-i di lehna imi amsellek i γ-tweεdeḍ,

30 yewweḍ-ed yerna walaγ-t s wallen-iw :
31 win akken i theggaḍ i leǧnas meṛṛa,
32 d nețța ara yessalin ccan n wat Isṛail agdud-ik, ara yilin ț-țafat ara d-icceεceεen ula γef leǧnas nniḍen.
33 Baba-s d yemma-s n weqcic-nni tεeǧǧben γef wayen i d-qqaṛen fell-as.

34 Semεun iburek-iten, yenna i Meryem, yemma-s n weqcic-nni : Atan weqcic-agi ad yili i kra seg wat Isṛail d sebba n tuccḍa, ma d wiyaḍ a ten-id-yerr γer webrid. γef ddemma-s ara yili lxilaf ger yemdanen ;

35 s wakka ara d-banen ixemmimen n diri deg wulawen, ma d kemm aț-țejreḥ tasa-m, am akken tețwet s ujenwi.
36 Tella daγen yiwet n tmeṭṭut isem-is ?anna, meqqṛet di leεmeṛ, ula d nețțat si lenbiya, d yelli-s n Fanwil n wedrum n Azir. Seg wasmi i tedda ț-țislit, tεac d wergaz is sebεa n yiseggasen

37 dγa teǧǧel. Di leεmeṛ-is ṛebεa utmanyin n yiseggasen. Am yiḍ am ass ur teṭṭixiṛ si lǧameε iqedsen, tεebbed Sidi Ṛebbi, tețțuẓum, tețẓalla.

38 Ula d nețțat tewweḍ-ed di teswiεt-nni, teḥmed Sidi Ṛebbi, theddeṛ γef weqcic-nni i wid akk yețṛaǧun leslak n temdint n Lquds.

39 Mi fukken imawlan n Σisa ayen akk i d-tenna ccariεa n Sidi Ṛebbi, uγalen γer taddart-nsen Naṣaret yellan di tmurt n Jlili.

40 Aqcic-nni yețțimγur yețnerni di tmusni, lbaṛaka n Sidi Ṛebbi tella fell-as.

Mi gesεa Sidna Σisa tnac iseggasen

41 Imawlan n Sidna Σisa țṛuḥun mkul aseggas γer temdint n Lquds iwakken ad sεeddin Tafaska n izimer n leslak.

42 Asmi yesεa Σisa tnac yiseggasen, yedda akk-d imawlan-is γer temdint n Lquds, akken tella di lεadda n lεid.
43 Mi tεedda Tafaska, lγaci țțuγalen γer yexxamen-nsen, ma d Σisa yeqqim di temdint Lquds, imawlan-is ur d-wwin ara s lexbaṛ,

44 γilen yedda-d ț-țerbaεt nniḍen. Lḥan ass kamel dγa bdan țqelliben fell-as. Steqsan wid akk i sen-yețțilin d wid meṛṛa ssnen,

45 lameεna ur t-ufin ara. Uγalen γer temdint n Lquds iwakken ad qellben fell-as.
46 Ass wis tlata, ufan-t di lǧameε iqedsen yeqqim ger lecyux, ismeḥsis asen, isteqsay-iten.

47 Wid akk i s isellen wehmen di lefhama-s d wayen i d-ițarra i yesteqsiyen-nsen.
48 Mi t-walan imawlan-is, qqimen wehmen, dγa tenna-yas yemma-s : A mmi, acuγeṛ i γ-txedmeḍ akka ? Nekk d baba-k neṛwa aḥebbeṛ, acḥal i nqelleb fell-ak !
49 Nețța yenna-yasen : Acuγeṛ i tețqellibem fell-i ? Eεni ur teẓrim ara ilaq-iyi ad xedmeγ lecγal n baba ?
50 Lameεna nutni ur fhimen ara ayen i sen-d-yenna.

51 Σisa yedda d imawlan-is γer temdint n Naṣaret, yețțaγ-asen awal. Yemma-s teḥrez annect-agi meṛṛa deg wul-is.

52 Σisa ițțimγur, yetεeqqil ; eεziz γer Ṛebbi, eεziz γer yemdanen.

Ixef 3

Abecceṛ n Yeḥya aγeṭṭas

1 Deg wuseggas wis xemseṭṭac n tgeldit n Qayṣer Tibeṛyus, llan ṛebεa lḥekkam di tmurt n Falisṭin. Bunṭus Bilaṭus d lḥakem n tmurt n Yahuda, Hiṛudus Antifas yeḥkem γef tmurt n Jlili, Filbas gma-s n Hiṛudus, γef tmura n Iturya akk-d Tṛaxunit, ma d Lisanyas yeḥkem γef tmurt n Abilan.

2 Di lweqt-nni, Ḥanna akk-d Kayef llan d lmuqedmin imeqqranen. Awal n Sidi Ṛebbi ițwaxebbeṛ-as-ed i Yeḥya, mmi-s n Zakarya, deg unezṛuf.
3 Iṛuḥ ițnadi timura i d-izzin i wasif n Urdun, yețberriḥ yeqqaṛ : Beddlet tikli, uγalet-ed γer webrid, aset-ed aț-țețwaγeḍsem iwakken Sidi Ṛebbi a wen-isemmeḥ ddnubat-nwen !
4 Akken i d-ițțuxebeṛ di tektabt n nnbi Iceεya : d-țaγect n win ițεeggiḍen deg wunezṛuf : Heggit abrid n Sidi Ṛebbi, ssemsawit iberdan-is !

5 Iγezṛan, idurar ț-țγaltin ad uγalen d izuγaṛ ! Iberdan iεewjen ad țțuseggmen, wid ixesṛen ad qeεden.
6 Imdanen meṛṛa ad ẓren leslak n Sidi Ṛebbi.
7 Yeḥya yeqqaṛ i lγaci i d-ițțasen iwakken ad țwaγeḍsen deg waman : A ccetla n yizerman, anwa i kkun-isfaqen belli tzemrem aț- țrewlem i lεiqab i d-iteddun ?
8 Deg wayen akk txeddmem, sbeggnet-ed belli ṣfan wulawen nwen ! Ur qqaṛet ara kan deg yiman-nwen : jeddi-tneγ d Sidna Ibṛahim, axaṭer a wen-iniγ : seg idγaγen-agi, Sidi Ṛebbi yezmer a d-issufeγ dderya i Ibṛahim.
9 Ațan ihi tcaquṛt thegga γer izuṛan n ttjuṛ, yal ttejṛa ur d-nețțak ara lfakya lεali, at-tețwagzem, at-tețwaḍeggeṛ γer tmes.
10 Lγaci steqsan-t nnan-as : D acu i γ-ilaqen a t-nexdem ihi ?
11 Yerra-yasen : Win yesεan sin iqendyaṛ ad yefk yiwen i win ur nesεi ara ; win yesεan ayen ara yečč, ad yefk i win ur nesεi ara.

12 Usan-d ula d imekkasen itețțen ayla n medden iwakken ad țwaγeḍsen deg wasif, nnan-as : A Sidi, i nukkni yellan d imekkasen n tebzert ( leγṛama ) d acu ara nexdem ?
13 Yenna-yasen : Ur țnadit ara sennig wayen i d-yenna lqanun.
14 Iεeskṛiwen daγen steqsan-t : I nukkni, d acu ara nexdem ? Yerra-yasen : Ur xeddmet ara lbaṭel, ur țțaṭṭafet ara tajεelt, setqenεet kan s lexlaṣ nwen.
15 Yuγ lḥal lγaci meṛṛa llan țṛaǧun qqaṛen deg ulawen-nsen : Ahat d nețța i d Lmasiḥ !
16 Yeḥya yenna-yasen : Nekk sseγḍaseγ-kkun deg waman, meεna a d-yas win yesεan tazmert akteṛ-iw ; ur uklaleγ ara ad fsiγ ula d lexyuḍ n warkasen-is. Nețța a kkun-isseγḍes s Ṛṛuḥ iqedsen ț-țmes.

17 Yeṭṭef tazzart deg wufus-is, ad yessizdeg tirect deg wennar-is, a d-ijmeε irden γer yikufan, ma d alim a t-isseṛγ di tmes ur nxețți.

18 Yeḥya ițbecciṛ i lγaci lexbaṛ n lxiṛ, inehhu-ten s waṭas n yimeslayen nniḍen.

19 Yesseḍlem ula d agellid Hiṛudus, yeqqaṛ-as : mačči d lḥeqq fell-ak aț-țaγeḍ Hiṛudyad tameṭṭut n gma-k ! Ilumm-it daγen γef lecγal nniḍen n diri i gxeddem.
20 Hiṛudus ikemmel di txeṣṣarin-is, yessekcem Yeḥya γer lḥebs !

Aγḍas n Σisa Lmasiḥ

21 Mi țwaγeḍsen lγaci deg waman, Sidna Σisa yețwaγḍes ula d nețța. Akken i gdeεεu γer Sidi Ṛebbi, igenni yeldi-d,

22 Ṛṛuḥ iqedsen yers-ed fell-as s ṣṣifa icuban titbirt. Yiwet n taγect tekka-d seg yigenni tenna-d : Kečč, d mmi eεzizen, deg-k i gella lfeṛḥ-iw.

Iẓuran n Sidna Σisa

23 Mi gebda Sidna Σisa aselmed, ad yili yesεa tlatin iseggasen di leεmeṛ-is. γer yemdanen yella : d mmi-s n Yusef atnan lejdud-is : Hili,

24 Matta, Lewwi, Melki, Yennay, Yusef,

25 Matatya, Σamus, Nahum, Hesli, Naggay,

26 Maḥat, Matatya, Camεi, Yusef, Yuda,

27 Yuḥanan, Rica, Zurubabil, Calatyel, Niri,

28 Melki, Addi, Qusam, Elmudan, Σir,

29 Yusa, Elyazer, Yurim, Matta, Lewwi,

30 Semεun, Yahuda, Yusef, Yuna, Elyaqim,

31 Melya, Menna, Mattata, Natan, Dawed,

32 Yassa, Σubed, Buεaz, Salmun, Naḥsun,

33 Σaminadab, Admin, Aram, ?esṛun, Fares, Yahuda,

34 Yeεqub, Isḥaq, Ibṛahim, Teraḥ, Naḥur,

35 Saruǧ, Raεu, Faleǧ, Σaber, Sala,

36 Kenan, Arfaksad, Cam, Nuḥ, Lamek,

37 Matusala, Hinuc, Yared, Mahalalyel, Kenam,

38 Inus, Cit, Adem illan d mmi-s n Ṛebbi.

Ixef 4

Ajeṛṛeb n Sidna Σisa

1 Mi d- yuγal Sidna Σisa seg wasif n Urdun, Ṛṛuḥ iqedsen yewwi-t γer unezṛuf.

2 Ṛebεin wussan ur yečči, Cciṭan yețjeṛṛib deg-s. Mi εeddan wussan-nni, yuγal illuẓ.

3 Cciṭan yenna-yas : Ma d Mmi-s n Ṛebbi i telliḍ, ini-yas i wedγaγ-agi a d-yuγal d aγṛum.
4 Sidna Σisa yerra-yas : Yura di tektabt iqedsen : amdan ur yețεic ara s weγṛum kan meεna s mkul awal i d-ițțasen s γur Sidi Ṛebbi.
5 Yuγal Cciṭan yewwi-t γer yiwen wemkan eεlayen, deg yiwet n teswiεt yesken-as-ed akk tigeldiwin n ddunit,

6 yenna-yas : Ad a k-d-fkeγ lḥekma d ccan n ddewlat-agi meṛṛa, axaṭer țțunefkent iyi-d. Zemreγ a tent-fkeγ i win i yi-ihwan ;

7 ma tseǧǧdeḍ zdat-i ad uγalent akk d ayla-k.
8 Sidna Σisa yerra-yas : Yura : Anagar Sidi Ṛebbi Illu-inek ara tεebdeḍ, i nețța kan iwumi ara tseǧǧdeḍ.
9 Cciṭan yewwi-t daγen γer temdint n Lquds, yessers-it γef yixef n lǧameε iqedsen, yenna-yas : Ma d Mmi-s n Ṛebbi i telliḍ, ḍeggeṛ iman-ik d akessar,

10 axaṭer yura : Ad yefk lameṛ i lmalayekkat-is iwakken ad ḥarbent fell-ak,

11 yerna a k-awint ger ifassen-nsent, ad ḥadrent iḍaṛṛen-ik γef wedγaγ.
12 Sidna Σisa yerra-yas : Yura daγen : Ur țjeṛṛib ara Sidi Ṛebbi, Illu-inek.
13 Mi i t-ijeṛṛeb s waṭas n tḥila ur s-yufi ara abrid, Iblis yeṭṭaxeṛ fell-as alamma ț-țikkelt nniḍen.

Sidna Σisa yebda ițbecciṛ di Naṣaret

14 Sidna Σisa yuγal γer tmurt n Jlili yeččuṛ ț-țazmert n Ṛṛuḥ iqedsen, slan yis di mkul tama n tmurt-agi.

15 Ikeččem γer leǧwameε n wat Isṛail yesselmad, imdanen meṛṛa țcekkiṛen-t.

16 Iṛuḥ γer taddart n Naṣaret anda yețțuṛebba ; akken innum, ikcem γer lǧameε deg wass n westeεfu.

17 Mi gekker a d-iγeṛ, fkan-as-d taktabt n nnbi Iceεya, yeldi-ț, yufa amkan anda yura :
18 Ṛṛuḥ n Sidi Ṛebbi yers-ed fell-i, axaṭer yextaṛ-iyi iwakken ad beccṛeγ lexbaṛ n lxiṛ i yimeγban, ad beccṛeγ i yimeḥbas tilelli, iwakken a d-rreγ iẓri i yiderγalen, a d kkseγ lḥif γef wid ițwaḍelmen,

19 ad beccṛeγ γef wuseggas i deg ara d-issers Sidi Ṛebbi ṛṛeḥma ines.
20 Ijmeε taktabt-nni, yerra-ț i uqeddac, imiren yeqqim. Wid akk yellan di lǧameε ččan-t s wallen.

21 Dγa yenna-yasen : Ayen i wen-d-γṛiγ akka, atan yedṛa-d gar-awen ass-agi !
22 Wehmen atas, tεeǧǧben deg yimeslayen i d-ițeffγen seg yimi-s, qqaṛen : Amek ? Mačči d mmi-s n Yusef wagi ?
23 Dγa yenna-yasen : Ẓriγ belli a yi-d-tinim lemtel-agi : Ť A ṭṭbib sseḥlu iman-ik,ť neγ Ť xdem dagi di tmurt-ik ayen i nesla txedmeḍ-t di temdint n Kafernaḥum.ť
24 Yenna-yasen daγen : S tideț a wen-iniγ : ulac nnbi yețwaqeblen di tmurt-is.
25 A wen-iniγ tideț : Di zzman n nnbi Ilyas, tlata yiseggasen d wezgen ur d-tewwit lehwa dγa yeγli-d laẓ d ameqqran γef tmurt meṛṛa. Deg wussan-nni, aṭas n tuǧǧal i gellan di tmurt n wat Isṛail.

26 Γas akken, Sidi Ṛebbi ur iceggeε ara nnbi Ilyas γer yiwet deg-sent, anagar γer yiwet n taǧǧalt yellan di taddart n Ẓarfat di tmurt n Sidun .

27 Llan daγen aṭas n wid ihelken lbeṛs di tmurt n wat Isṛail di zzman n nnbi Ilyaceε , meεna ula d yiwen deg-sen ur iḥli anagar Neεman n tmurt n Surya.
28 Mi slan imeslayen-agi, lγaci meṛṛa yellan di lǧameε yenγa-ten lγecc.

29 Kkren γur-es, ssufγen-t si taddart, ssawḍen-t armi d ixef n wedrar i γef tebna taddart-nsen iwakken a t-ssegrirben d akessar ;

30 lameεna nețța iεedda gar-asen, iṛuḥ.

Argaz n Kafernaḥum, yețwamelken

31 Sidna Σisa iṣubb γer tamdint n Kafernaḥum, illan n at Jlili, anda yesselmad lγaci deg wass n westeεfu.

32 Imdanen wehmen aṭas deg wuselmed-ines axaṭer imeslayen-is sεan tissas.
33 Di lǧameε, yella yiwen wergaz izdeγ-it uṛuḥani, iεeggeḍ s lǧehd n taγect-is :
34 D acu i tebγiḍ γur-nneγ a Σisa Anaṣari ? Tusiḍ-ed iwakken ad aγ tesnegreḍ ? ẓriγ d acu-k , kečč d Imqeddes n Ṛebbi !
35 Sidna Σisa yenṭeq γur-es yenna-yas : Ssusem ! Effeγ seg wergaz-agi ! Aṛuḥani iḍeggeṛ argaz-nni γer lqaεa di tlemmast-nsen, dγa iffeγ seg-s mbla ma iḍuṛṛ-it.
36 Lγaci ikcem-iten akk lxuf, qqaṛen wway gar-asen : D acu-ten yimeslayen-agi ? Yesεa tazmert s wayes iḥekkem ula γef leǧnun ! Akken kan ara sen-yefk lameṛ ad ffγen !
37 Di yal tama n tmurt slan s lexbaṛ n Sidna Σisa.
38 Iffeγ-ed si lǧameε, yerra γer wexxam n Semεun. Yuγ lḥal taḍeggalt n Semεun tuγ-iț tawla ț-țameqqrant, ḥellelen Sidna Σisa iwakken a ț-yesseḥlu.

39 Yekna γur-es, yumeṛ i tawla aț-țeffeγ seg-s, dγa teffeγ-iț ; imiren kan tekker teqdec-asen-d.
40 Tameddit mi geγli yiṭij, kra n win yesεan amuḍin n mkul aṭan, yewwi-yas-t-id. Mkul win i γef yessers afus-is yeḥla ! Yesseḥla-ten meṛṛa !

41 Llan daγen leǧnun i d-ițeffγen seg waṭas n yemdanen, țεeggiḍen qqaṛen :

Ť Kečč d Mmi-s n Ṛebbi ! ť Lameεna Sidna Σisa ițεeggiḍ fell- asen, ur ten-ițțaga ara a d-hedṛen, axaṭer nutni ẓran d nețța i d Lmasiḥ.
42 Mi guli wass, iffeγ si temdint, yerra γer yiwen wemkan yexlan. Aṭas n lγaci ṛuḥen țqelliben fell-as. Mi t-ufan, ḥellelen-t iwakken ad yeqqim γur-sen, ur ițṛuḥu ara.
43 Lameεna nețța yenna-yasen : Ilaq-iyi ad ṛuḥeγ ad beccṛeγ lexbaṛ n lxiṛ n tgeldit n Ṛebbi i temdinin nniḍen ! γef wayagi i d țțuceggεeγ !
44 Imiren iṛuḥ ițbecciṛ di leǧwameε n tmurt n Yahuda.

Ixef 5

Ṣṣyada tameqqrant

1 Yiwen wass, Sidna Σisa yella γef rrif n lebḥeṛ n Jiniṣaret. Lγaci meṛṛa zzin-as-d, mčuččaεen-d akken ad slen i wawal n Ṛebbi.

2 Iwala snat n teflukin rrif n lebḥeṛ, iḥewwaten rsen-d iwakken ad ssirden icebbaken nsen.

3 Sidna Σisa yuli γer yiwet si teflukin-nni, tin yellan n Semεun, yenna-yas ad ibεed acemma γef rrif. Yeqqim , yebda yesselmad-ed lγaci syenna.

4 Mi gfukk aselmed yenna i Semεun : Sbeεdet taflukt γer wemkan lqayen, tḍeggṛem icebbaken-nwen aț-țṣeggdem.
5 Semεun yenna-yas : A Sidi, iḍ kamel nukni d aṣeggeḍ ur d-neṭṭif acemma ; lameεna γef wawal-ik a nexdem akken i d-tenniḍ, a nḍeggeṛ icebbaken.
6 Mi xedmen akken i sen-yenna Sidna Σisa, ṭṭfen-d aṭas n iselman ( lḥut ), armi qṛib ad qeṛsen icebbaken nsen.

7 Ssawalen, țwehhin i yemdukkal nsen yellan di teflukt nniḍen a d-asen a ten-εiwnen. Mi d-usan, ččuṛen snat-nni n teflukin armi qṛib ad γeṛqent.
8 Semεun-Buṭrus, mi gwala ayagi, yuγal γef tgecrar zdat Sidna Σisa, yenna-yas : Beεεed fell-i a Sidi axaṭer d amednub i lliγ.
9 Ikcem-it lxuf nețța d wid yellan yid-es, dehcen imi i d-ṭṭfen annect-nni n yiselman.

10 Ula d Yeεqub akk-d Yuḥenna, arraw n Zabadi yellan d imdukkal n Semεun wehmen. Sidna Σisa yenṭeq γer Semεun yenna-yas :

Ur țțagad ara, sya d asawen mačči d iselman ara d-țṣeggideḍ, meεna d imdanen.
11 Imiren rran-d tiflukin-nsen γer rrif, ǧǧan kullec dinna, ddan d Sidna Σisa.

Sidna Σisa isseḥla yiwen wergaz ihelken lbeṛs

12 Mi gella Sidna Σisa deg yiwet n taddart n at Jlili, yusa-d yiwen wergaz ihelken lbeṛs, mi gwala Sidna Σisa, yuzzel γur-es yeγli γer iḍaṛṛen-is, yenna-yas : A Sidi, ma tebγiḍ, tzemreḍ a yi-tesseḥluḍ.
13 Sidna Σisa issers afus-is fell-as, yenna-yas : Bγiγ ! Ili-k teḥliḍ ! Imiren kan, argaz-nni ikkes-as lbeṛs, yeṣfa weglim-is.

14 Sidna Σisa iweṣṣa-t ur iqqaṛ i yiwen ayen yedṛan yid-es. Yenna-yas :

Ṛuḥ γer lmuqeddem a k-iwali, tefkeḍ lweεda γef ṣeffu-inek, akken yura di ccariεa n Musa. Lweεda-nni a sen-tili d țbut γef ḥellu-inek.
15 Simmal ițwassen Sidna Σisa, simmal țnejmaεen-d γur-es lγaci iwakken ad slen i wawal-is yerna a ten-isseḥlu si lehlakat-nsen ;

16 meεna nețța iṭeṛṛif iman-is, ițṛuḥu γer yimukan yexlan iwakken ad iẓẓall.
17 Yiwen wass Sidna Σisa yella yesselmad. Llan dinna ifariziyen d lεulama n ccariεa, usan-d si tuddar n at Jlili, n at Yahuda akk ț-țemdint n Lquds, qqimen smeḥsisen-as. Tazmert n Sidi Ṛebbi yellan yid-es tesseḥlay imuḍan.
18 Atnaya kra n yemdanen wwin-d yiwen wukrif akken deg wusu-ines. țqelliben amek ara t-skecmen iwakken a t-ssersen zdat Sidna Σisa.
19 Imi aṭas n lγaci i gellan, ur ufin ara ansi ara t-sεeddin ; ulin γef ssqef, kksen kra n iqermuden, ṣubben-t-id s wusu-ines γer tlemmast n lγaci, zdat Sidna Σisa.
20 Mi gwala liman-nsen, yenna i umuḍin-nni : Ay argaz, țwaεeffan-ak ddnubat ik !
21 Lεulama akk-d ifariziyen bdan țxemmimen qqaṛen : Amek yezmer a d-yini imeslayen agi ? Wagi d lekfeṛ ! Anwa i gzemren ad iεfu ddnubat anagar Sidi Ṛebbi ?
22 Sidna Σisa yeẓran ayen i țxemmimen, yenna-yasen : Acuγeṛ tețxemmimem akka deg ulawen-nwen ?
23 D acu i gsehlen a s-t-iniγ ? Ť țwaεeffan-ak ddnubat-ikť neγ Ť ekker telḥuḍ ? ť
24 Ilaq-awen aț-țeẓrem belli Mmi-s n bunadem yesεa tazmert ad yeεfu ddnubat di ddunit-agi ! Yezzi γer wukrif-nni, yenna-yas : Kker ddem usu-inek tuγaleḍ γer wexxam-ik !
25 Imiren kan ukrif-nni yekker zdat-sen, yeddem usu i deg yeḍleq, yuγal γer wexxam-is, ițḥemmid Sidi Ṛebbi.

26 Wehmen meṛṛa lγaci, țḥemmiden Sidi Ṛebbi, ikcem-iten lxuf qqaṛen : Ass-agi neẓra ayen werǧin neẓri !

Sidna Σisa yessawel i Lewwi

27 Mi geffeγ Sidna Σisa, iwala yiwen umekkas isem-is Lewwi yeqqim di texxamt anda țxelliṣen tabzert ( leγṛama ), iqeṛṛeb γur-es yenna-yas : Ddu yid-i.
28 Lewwi yekker, yeǧǧa kullec yedda yid-es.

29 Lewwi yeεṛeḍ Sidna Σisa γer wexxam-is, ihegga-yas imensi. Aṭas n yimekkasen d yemdanen nniḍen i geqqimen yid-sen ad ččen.
30 Ifariziyen d lεulama n ukabar-nsen iγaḍ-iten lḥal, nnan i yinelmaden is : Acuγeṛ i tețțem, tessem akk-d imekkasen imakaren d imednuben ?
31 Sidna Σisa yerra-yasen : Mačči d wid iṣeḥḥan i geḥwaǧen ṭṭbib, i t-iḥwaǧen d imuḍan.

32 Ur d-usiγ ara ad ssiwleγ i iḥeqqiyen, usiγ-ed γer yimednuben iwakken a d-uγalen γer webrid.
33 Nnan-as daγen : Inelmaden n Yeḥya d wid n ifariziyen țțuẓummen acḥal d abrid yerna țẓallan, ma d inelmaden-ik tețțen tessen.
34 Sidna Σisa yenna yasen : Eεni tzemrem a sen-tinim i yinebgawen n yesli ad uẓummen ass n tmeγṛa ? Ur tezmirem ara !
35 Ad asen wussan i deg ara sen-ițwakkes yesli, ass-nni ad uẓummen.
36 Yerna-yasen-d lemtel-agi : Yiwen ur d-itekkes tafaweț si llebsa tajdiṭ iwakken a ț-ixiḍ γef llebsa taqdimt , neγ m'ulac llebsa-nni tajdiṭ aț-țcerreg ; tafaweț-nni tajdiṭ ur d-țezgay ara γef llebsa-nni taqdimt.

37 Daγen yiwen ur ismaray ccṛab ajdid γer yiyeddiden iqdimen , neγ m'ulac ccṛab-nni ajdid ad icerreg iyeddiden nni ; ur d-ițγimi ccṛab ur d-țγimin iyeddiden.

38 Ihi ccṛab ajdid, ilaq a t-nesmir γer iyeddiden ijdiden.
39 Akken daγen win yennumen d ccṛab aqdim ur issutur ara ajdid axaṭer yeqqaṛ Ť d aqdim i gelhan. ť

Ixef 6

Ass n westeεfu

1 Yiwen wass, Sidna Σisa akk-d inelmaden-is zegren igran n yirden deg wass n westeεfu. Tekksen d tigedrin, țḥukkun-tent ger ifassen nsen, tețțen-tent.

2 Kra n ifariziyen nnan-asen : Acuγeṛ i txeddmem ayen ur neḥlil deg wass n westeεfu ?
3 Sidna Σisa yerra-yasen : Ur teγṛim ara ayen yexdem ugellid Dawed asmi yelluẓ nețța d imdukkal-is,

4 d wamek i gekcem γer wexxam iqedsen anda keččmen anagar lmuqedmin ! Iddem-ed aγṛum n lweεda, yečča yerna yefka i wid yellan yid-es γas akken aγṛum-nni i lmuqedmin kan iwumi yeḥlel !
5 Sidna Σisa yerna-yasen-d : Mmi-s n bunadem, d nețța i gḥekkmen γef wass n westeεfu !

Argaz iwumi yekref ufus ayeffus

6 Ass n westeεfu nniḍen, Sidna Σisa yekcem γer lǧameε, yebda yesselmad. Yella dinna yiwen wergaz iwumi yekref ufus ayeffus.

7 Lεulama n ccariεa d ifariziyen țεassan Sidna Σisa, ad ẓren ma ad isseḥlu deg wass n westeεfu iwakken a s-d-afen sebba s wacu ara ccetkin fell-as.
8 Lameεna Sidna Σisa yessnen ixemmimen-nsen, yekker yenna i wergaz-nni iwumi yekref ufus : Ekker tbeddeḍ dagi di tlemmast n lγaci. Argaz-nni yekker ibedd.

9 Sidna Σisa yenna : A kkun-steqsiγ : d acu yellan d leḥlal deg wass n westeεfu, a nexdem lxiṛ neγ a nexdem cceṛ ? A nsellek amdan neγ a t-neǧǧ ad immet ?

10 Yerfed allen-is γer wid akk i s-d-yezzin , dγa yenna i wergaz nni : Eḍleq afus-ik ! Ukrif-nni yeḍleq afus-is, yeḥla.
11 Nutni yenγa-ten lγecc, bdan țemcawaṛen wway gar-asen amek ara xedmen i Sidna Σisa.

Σisa Lmasiḥ yextaṛ tnac ṛṛusul

12 Deg ussan-nni, Sidna Σisa yuli γer wedrar akken ad iẓẓall. Yeqqim iḍ kamel nețța ideεεu γer Sidi Ṛebbi.

13 Mi yuli wass, yessawel i yinelmaden is, yextaṛ seg-sen tnac iwumi isemma Ť ṛṛusulť yeεni Ť imceggεen.ť
14 Yella Semεun iwumi isemma Buṭrus akk-d gma-s Andriyus, Yeεqub, Yuḥenna, Filbas, Bartelmay,

15 Matta, ?uma, Yeεqub mmi-s n Σalfi, Semεun iwumi qqaṛen awaṭani,

16 Yahuda mmi-s n Yeεqub d Yudas n taddart n Qeṛyut win yuγalen d axeddaε.
17 Sidna Σisa iṣubb-ed yid-sen seg wedrar, ḥebsen di luḍa anda nnejmaεen aṭas n yinelmaden-is d waṭas n lγaci i d-yusan si tmurt n Yahuda, si temdint n Lquds, si temdinin n ?ur akk-d Sidun yellan rrif n lebḥeṛ.

18 Usan-d iwakken ad slen i wawal-is yerna a ten-isseḥlu si lehlakat-nsen ; wid akk zedγen leǧnun, ḥlan.

19 Lγaci meṛṛa țqelliben a t-nalen ( a t-massen ) axaṭer tețțeffeγ-ed seg-s tezmert i ten-isseḥlayen akk.

Amarezg-nwen

20 Sidna Σisa yerfed allen-is γer inelmaden-is yenna : Amarezg-nwen kunwi yellan d iẓawaliyen, tagelda n Sidi Ṛebbi d ayla-nwen.
21 Amarezg-nwen kunwi yelluẓen tura, a d-yas wass i deg ara teṛwum. Amarezg-nwen kunwi yețrun tura, a d-yas wass i deg ara tilim di lfeṛḥ.
22 D iseεdiyen ara tilim m'ara kkun-keṛhen yemdanen, m'ara kkun-qecεen, m'ara kkun-regmen, ad rren isem-nwen amzun d lεaṛ γef ddemma n Mmi-s n bunadem.
23 Ass-nni ilit di lfeṛḥ, friwset s lfeṛḥ axaṭer d ṛṛezq ameqqran i kkun-ițṛaǧun deg igenni ! Imi akka i xedmen lejdud-nsen i lenbiya.
24 Ma d kunwi ay imeṛkantiyen, a tawaγit-nwen axaṭer rrbeḥ-nwen tesεam-t tura.

25 A tawaγit-nwen kunwi yeṛwan tura, aț-țuγalem aț-țellaẓem. A tawaγit-nwen kunwi yețțaḍṣan tura axaṭer aț-țilim di leḥzen d yimeṭṭawen.

26 A tawaγit nwen asm'ara kkun-cekkṛen yemdanen, axaṭer akka i xedmen lejdud-nsen i lenbiya n lekdeb.

Ḥemmlet iεdawen-nwen

27 Ma d nekk a wen-iniγ i kunwi i d-ițḥessisen : ḥemmlet iεdawen-nwen, xedmet lxiṛ i wid i kkun-ikeṛhen.

28 Barket wid i kkun-ineεlen, dεut s lxiṛ i wid i kkun-iḍelmen.
29 Ma yewwet-ik yiwen γer lḥenk, sendi-yas lḥenk nniḍen. Ma yekkes-ak yiwen abeṛnus-ik, anef-as ad yernu ula d aqenduṛ-ik.
30 Efk-as ayen yuḥwaj i win i k-id-yessutren ; win i k-ikksen kra, ur țṛaǧu ara a k-t-id-yerr.

31 Xedmet i wiyaḍ ayen i tebγam a wen-t xedmen i kunwi.
32 Ma yella tḥemmlem kan wid i kkun-iḥemmlen, d acu n lxiṛ i txedmem ? Ula d imcumen ḥemmlen wid i ten-iḥemmlen.
33 Ma yella txeddmem lxiṛ i wid kan i wen ixeddmen lxiṛ, d acu n lxiṛ i txedmem ? Ula d imcumen xeddmen akka.
34 Ma yella tṛeṭṭlem i wid kan i teẓram a wen-d-rren, d acu i trebḥem γer Sidi Ṛebbi ? Imcumen daγen ṛeṭṭlen i imddukal-nsen iwakken ad afen aṛeṭṭal ula d nutni.
35 Lameεna kunwi : ḥemmlet iεdawen-nwen, xedmet lxiṛ, ṛeḍlet mbla ṭṭmeε, akka ara tesεum lfayda tameqqrant, ara tilim d arraw n Sidi Ṛebbi εlayen. Axaṭer Ṛebbi d aḥnin ula γef yemcumen akk-d wid inekkṛen lxiṛ.

36 Iḥninet, sεut ṛṛeḥma akken i ț-isεa Baba-twen.
37 Ur țḥasabet ara wiyaḍ iwakken Sidi Ṛebbi ur kkun-ițḥasab ara. Ur ḥekkmet ara γef wiyaḍ iwakken Sidi Ṛebbi ur iḥekkem ara fell-awen. Semmḥet i wiyaḍ iwakken a wen isameḥ Sidi Ṛebbi.

38 Seddqet, a wen d-yuγal s γur Ṛebbi. Ma tseddqem mbla lkil, a wen-d yuγal s γur Ṛebbi mbla lkil ; axaṭer a wen-d-ițwaktal s lkil s wacu tektalem.
39 Yewwi-yasen-d lemtel nniḍen, yenna-yasen : Aderγal ur izmir ara ad iṭṭef afus i uderγal nniḍen, neγ m'ulac ad grirben i sin γer yeγzeṛ;

40 anelmad werǧin yugar ccix-is, lameεna anelmad ara yawḍen am ccix-is di tmusni, ad yili am nețța.
41 Acuγeṛ tețwaliḍ axeclaw yellan di tiṭ n gma-k ur tețwaliḍ ara tigejdit yellan di tiṭ-ik ?

42 Amek ara tiniḍ i gma-k : eǧǧ-iyi ad kkseγ axeclaw yellan di tiṭ-ik kečč ur neẓri tigejdit yellan di tiṭ-ik ? A bu sin wudmawen, ekkes uqbel tigejdit yellan di tiṭ-ik, imiren aț-țwaliḍ amek ara tekkseḍ axeclaw yellan di tiṭ n gma-k. Ttejṛa d lfakya-ines
43 Ulac ttejṛa lεali i d-ițțaken lfakya n diri. Ulac daγen ttejṛa n diri i d-ițțaken lfakya lεali.

44 Ihi mkul ttejṛa, tețwaεqal s lfakya-ines. Ur d-ntekkes ara lexṛif seg isennanen, ur d-ntekkes ara daγen tiẓurin seg inijel.

45 Argaz yelhan issufuγ-ed ayen yelhan seg wugerruj yellan deg wul-is, ma d amcum d ayen n diri yellan deg ul-is i d-issufuγ. Axaṭer d ayen yellan deg wul n wemdan i d-ițeffγen seg imi-s.

Lsas n wexxam

46 Acuγer i yi-d-tessawalem Ť A Sidi, a Sidi ť, ur txeddmem ara ayen i wen-d-qqaṛeγ ?
47 A wen-d-iniγ ar wuγur ițemcabi wemdan i d-ițțasen γur-i, isellen i wawal-iw yerna yeṭṭafaṛ-it :
48 ițemcabi γer yiwen n wemdan yebnan axxam. Yeγza, yeγza deg wakal iwakken ad issers lsas-is γef wezṛu ; iḥmel-ed wasif, infel-ed γef wexxam-nni, meεna ur t-issenhezz ara imi lsas-is yerṣa, yebna γef wezṛu akken ilaq.
49 Ma d win isellen i wawal-iw ur netbiε ara ayen i d-nniγ, ițemcabi γer wemdan yebnan axxam γef ṛṛmel mbla lsas : iḥmel-ed wasif, infel-ed γef wexxam-nni, imiren kan yeγli , lexsaṛa-s ț-țameqqrant !

Ixef 7

Aqeddac n lqebṭan aṛumani

1 Mi gekfa awal zdat widak i s-d-ismeḥsisen, yekcem γer temdint n Kafernaḥum.

2 Yiwen lqebṭan aṛumani yesεa aqeddac i gḥemmel aṭas ; aqeddac-agi yuḍen, ițmețțat.
3 Mi gesla s Sidna Σisa, iceggeε γur-es kra seg yimeqqranen n wat Isṛail iwakken a d-yas ad isseḥlu aqeddac-is.

4 Mi wwḍen γer Sidna Σisa, ḥellelen-t nnan-as : A Sidi ! Yuklal a s-txedmeḍ lxiṛ agi,

5 axaṭer iḥemmel agdud nneγ ; d nețța i gebnan lǧameε-nneγ.
6 Sidna Σisa yedda yid-sen. Mi qṛib ad yaweḍ γer wexxam, lqebṭan-nni iceggeε imdukkal-is a s-inin : A Sidi, ur țεețțib ara iman-ik, ur uklaleγ ara a d-tkecmeḍ axxam-iw.
7 Nekk s yiman-iw daγen walaγ ur uklaleγ ara a n-aseγ γur-ek ; ini-d kan yiwen wawal, aqeddac-iw ad iḥlu.

8 Axaṭer sεiγ wid i gṭebbiṛen fell-i, sεiγ daγen lεeskeṛ seddaw lḥekma-w. Ad iniγ i yiwen ṛuḥ ad iṛuḥ ; i wayeḍ as-ed, a d-yas ; ad iniγ i wqeddac-iw xdem ayagi, a t-ixdem.

9 Mi gesla Sidna Σisa i yimeslayen-agi, itεeǧǧeb deg-sen. Yezzi γer lγaci yeddan yid-es, yenna-yasen : A wen-d-iniγ : di tmurt n wat Isṛail meṛṛa ur ufiγ ara liman yecban wagi.

10 Widak-nni i d-ițwaceggεen, mi uγalen γer wexxam ufan aqeddac-nni yeḥla.

Ḥeggu n mmi-s n yiwet n taǧǧalt

11 Azekka-nni, Sidna Σisa iṛuḥ γer yiwet n taddart isem-is Naεim. Ddan yid-es inelmaden-is d waṭas n lγaci.
12 Mi gewweḍ γer tewwurt n taddart, atnaya lγaci wwin-d lmegget a t-meḍlen, d mmi-s n yiwet n taǧǧalt, anagar nețța i tesεa. Aṭas n imezdaγ n taddart-nni i d-iddan yid-es.

13 Mi ț-iwala Sidna Σisa, tγaḍ-it, yenna-yas : Ur țru ara !
14 Iqeṛṛeb γer usenduq n lmegget nni, iḍleq afus-is innul-it, dγa widak i t-irefden ḥebsen. Yenna : Ay aqcic ! Ekker !
15 Dγa lmegget-nni ikker-ed, yebda iheddeṛ. Sidna Σisa yerra aqcic-nni i yemma-s.
16 Ikcem-iten akk lxuf, bdan țḥemmiden Ṛebbi qqaṛen : Ť Sidi Ṛebbi yerra-d ddehn-is γer wegdud is, nnbi ameqqran ikker-ed gar-aneγ. ť
17 Slan s wannect-agi di tmurt n Yahuda meṛṛa akk ț-țmura i s-d izzin.

Yeḥya iceggeε γer Sidna Σisa

18 Inelmaden n Yeḥya xebbṛen-t γef wayen akk yedṛan.

19 Yeḥya iceggeε sin seg yinelmaden-is γer Sidna Σisa iwakken a s-inin ma d nețța i d win akken ara d-yasen, neγ ilaq ad ṛǧun wayeḍ.
20 Ewwḍen γer Sidna Σisa nnan-as : Iceggeε-aγ-ed γur-ek Yeḥya aγeṭṭas iwakken a k-nesteqsi ma d kečč i d win akken ara d-yasen neγ ilaq a neṛǧu wayeḍ.
21 Di teswiεt-nni ufan Sidna Σisa isseḥla aṭas n yemdanen si lehlakat nsen d leεyubat-nsen, issufeγ leǧnun seg wid yețwamelken, yerra-d iẓri i waṭas n yiderγalen.
22 Sidna Σisa yenna i yinelmaden n Yeḥya : Ṛuḥet erret lexbaṛ i Yeḥya γef wayen teẓram d wayen teslam : iderγalen țwalin, wid ikerfen teddun, wid ihelken lbeṛs ṣeffun, iεeẓẓugen sellen, lmegtin ḥeggun-d, le xbaṛ n lxiṛ ițwabecceṛ i yigellilen .

23 D aseεdi win iwumi ur țțiliγ ara d ugur.
24 Mi ṛuḥen inelmaden-nni i d-iceggeε Yeḥya, Sidna Σisa yebda iheddeṛ i lγaci γef Yeḥya yenna : D acu i tṛuḥem a d-teẓrem deg unezṛuf ? D aγanim yețhuzzu waḍu ?

25 D acu i tṛuḥem a d-teẓrem ? D amdan yelsan llebsa ifazen ? Wid yețlusun llebsa ifazen, yețεicin di rrbeḥ atnan di lebṛuj n yigelliden !
26 Anwa i tṛuḥem a t-id-teẓrem ihi ? D nnbi ? Ih a wen-d-iniγ yugar nnbi !

27 Yeḥya d win i γef yura di tira iqedsen : Atan ad zzewreγ amceggeε-inu zdat-ek iwakken a k-iheggi abrid.
28 Nniγ-awen, ulac di ddunit amdan yugaren Yeḥya aγeṭṭas. Lameεna amecṭuḥ maḍi di tgelda n Sidi Ṛebbi, d ameqqran fell-as.
29 Lγaci meṛṛa mi slan i Yeḥya, setεeṛfen s lḥeqq n Sidi Ṛebbi, qeblen ad țwaγeḍsen deg waman, llan gar-asen ula d imekkasen n tebzert

( n leγṛama ).
30 Ma d ifariziyen d lεulama n ccariεa, ur qbilen ara ayen i sen yebγa Sidi Ṛebbi, ugin a ten yesseγḍes Yeḥya.
31 Γer wacu ara metleγ imdanen n lǧil-agi ? γer wuγur i țemcabin ?

32 Ţemcabin γer warrac yeqqimen di tejmaεt, țemsawalen wway gar-asen qqaṛen : Newwet-awen-d ajewwaq ur tecḍiḥem ara, nerna newwi-yawen-d acewwiq n leḥzen ur trum ara.
33 Yeḥya aγeṭṭas yusa-d ur itețț aγṛum ur itess ccṛab, teqqaṛem ițwamlek.
34 Mmi-s n bunadem yusa-d itețț itess, teqqaṛem : ițxemmim kan ad yečč ad isew, d amdakkul n yimekkasen akk-d yemcumen.
35 Lameεna lḥeqq n Sidi Ṛebbi εeqlen-t warraw-is, nutni qeblen-t.

Yir tameṭṭut iwumi țwasemḥen ddnubat

36 Yiwen ufarizi yusa-d ad iεṛrḍ Sidna Σisa ad yečč γur-es. Idda yid-es, ikcem γer wexxam-is, yeqqim ad yečč.

37 Di taddart-nni tella yiwet n tmeṭṭut yellan d yir tameṭṭut ; mi tesla s Sidna Σisa yella deg wexxam n wufarizi-nni, tekcem tewwi yid-es

tabuqalt n leεṭer.

38 Tekka-d deffir Sidna Σisa, teγli γer idaṛṛen-is tețru. Tessebzeg (tesselxes) iḍaṛṛen n Sidna Σisa s yimeṭṭawen-is, tesfeḍ-iten s ucebbub-is, tessudun-iten yerna tdehhin-iten s leεṭeṛ-nni.
39 Afarizi-nni mi gwala annect-nni, ixemmem deg iman-is yenna : Lemmer argaz-agi d nnbi i gella, yili yeεqel belli tameṭṭut-agi i t-ițnalen d yir

tameṭṭut i tella.
40 Sidna Σisa yenna i ufarizi-nni : A Semεun ! Bγiγ a k-d-iniγ yiwen wawal ! Afarizi yerra-yas-d : Ini-d a Sidi !
41 Sidna Σisa yenna-yas : Illa yiwen umeṛkanti issekray idrimen. Ițțalas i sin yergazen, yiwen yețțalas-as xemsmeyyat alef, wayeḍ xemsin.

42 Imi ur sεin ara i sin s wacu ara xelṣen, isemmeḥ-asen. Anwa deg-sen ara t-iḥemmlen akteṛ ?
43 Semεun afarizi yerra-yas : Ahat d win iwumi i gsumeḥ ṭṭlaba tameqqrant. Sidna Σisa yenna-yas : Tesεiḍ lḥeqq !
44 Dγa iwehha γer tmeṭṭut-nni, yenna i Semεun : Twalaḍ tameṭṭut-agi ? Kecmeγ-d γer wexxam-ik, ur iyi-d-tefkiḍ ara aman ad ssirdeγ iḍaṛṛen-iw, nețțat tessared-iten s yimeṭṭawen-is terna tesfeḍ-iten s ucebbub-is.
45 Kečč ur d-tselmeḍ ara fell-i, nețțat segmi i d-tekcem tessudun deg iḍaṛṛen-iw.

46 Kečč ur tedhineḍ ara aqeṛṛuy-iw ula s zzit, ma d nețțat tesmar-ed leεṭeṛ γef yiḍaṛṛen-iw.
47 A k-iniγ : ddnubat-is meṛṛa țwaεfan as daymi i d-tbeggen leḥmala tameqqrant. Ma d win iwumi yețwaεfa ciṭuḥ, leḥmala-ines ț-țamecṭuḥt.
48 Sidna Σisa yenna i tmeṭṭut-nni : Atan țwaεeffan-am ddnubat-im !
49 Inebgawen nniḍen bdan qqaṛen deg yiman-nsen : Ť d acu-t wergaz-agi i gessawḍen iman-is ad yeεfu ula d ddnubat ? ť
50 Sidna Σisa yenna i tmeṭṭut-nni : Imi tumneḍ yis-i tețțusellkeḍ, ṛuḥ di lehna.

Ixef 8

Wid iteddun d Sidna Σisa

1 Sidna Σisa iteddu yețbecciṛ lexbaṛ n lxiṛ n tgeldit n Ṛebbi si temdint γer tayeḍ, si taddart γer tayeḍ. Tnac-nni yinelmaden-is ddan yid-es,

2 ddant daγen kra n tilawin i gesseḥla si lehlakat-nsent, tid iwumi yessufeγ leǧnun. Tella gar-asent Meryem iwumi qqaṛen tamagdalit ițwasellken si sebεa leǧnun,

3 akk-d Yunna tameṭṭut n Cuza lewkil n ugellid Hiṛudus, Suzana akk ț-țilawin nniḍen i ten-ițεawanen s wayen sεant.

Lemtel n win izerεen

4 Lγaci usan-d seg waṭas n tudrin. Mi d-nnejmaεen γur-es, Sidna Σisa yewwi-yasen-d lemtel-agi :
5 Yiwen ufellaḥ iffeγ ad izreε irden. Mi gzerreε, kra n iεeqqayen γlin γer webrid , țwaṛekḍen yerna ččan-ten yefṛax n igenni.
6 Amur nniḍen n zzerriεa yeγli ger yedγaγen , mi d-temγi teqquṛ imi xuṣṣen waman.
7 Amur nniḍen yeγli daγen ger isennanen , mi d-temγi zzerriεa mγin-d yid-es isennanen, γummen-ț.

8 Amur nniḍen daγen yeγli deg wakal lεali ; mi d-mγin, mkul aεeqqa yefka-d meyya. Mi d-yenna ayagi, iεeggeḍ yenna :
Win yesεan imeẓẓuγen isel-ed !
9 Inelmaden-is ssutren-as d acu i d lmeεna n lemtel-agi.
10 Yerra-yasen : Kunwi yețțunefk-awen-d aț țissinem lbaḍna n tgeldit n Ṛebbi, ma d wiyaḍ ițțunefk-asen-d a ț-issinen s lemtul kan iwakken γas ad ẓren s wallen-nsen ur țwalin ara, γas ma slan ur fehhmen ara.

lmeεna n lemtel n win izerεen

11 Atah lmeεna n lemtel-agi : zzerriεa d awal n Ṛebbi.

12 Llan kra n yemdanen țemcabin γer webrid-nni anda teγli zzerriεa, m'ara slen i wawal, Cciṭan a d-yas a t-iqleε seg ulawen-nsen iwakken ur țțamnen ur țwasellaken.
13 Wiyaḍ țemcabin γer wakal yeččuṛen d idγaγen. M'ara slen i wawal a t-qeblen s lfeṛḥ lameεna ur t-țaǧǧan ara ad iger izuṛan ; imiren kan ad amnen, m'ara d-yas lweqt n ujeṛṛeb țțuγalen γer deffir.
14 Ayen yeγlin ger isennanen, d wid isellen i wawal meεna m'ara d-imγi ur igemmu ara deg-sen axaṭer țțaǧan anezgum d rrbeḥ akk-d zzhu n ddunit ad iγumm awal-nni.
15 Ma d ayen yețwazerεen deg wakal lεali, d wid isellen i wawal s wul yeṣfan d neyya ḥerzen-t yerna țțaǧan-d lxiṛ s ṣṣbeṛ-nsen.

Lemtel n teftilt

16 Yiwen ur iceεεel taftilt iwakken a ț-iγum s lḥila neγ a ț-issedreg; lameεna a ț-issers γef lmeṣbeḥ iwakken kra n win ara d-ikecmen ad iwali tafat.

17 Kra n wayen yeffren a d-iban, kra n wayen yellan di ṭṭlam a t-id-tesban tafat.
18 Σasset iman-nwen ihi γef wayen i tsellem, axaṭer win i gḥerzen ayen yesεa a s-nernu, ma d win ur nḥerrez ara a s-ițwakkes ula d ayen i gγil yesεa-t.

Yemma-s d watmaten n Sidna Σisa

19 Yemma-s d watmaten n Sidna Σisa usan-d a t-ẓren, meεna ur zmiren ara ad qeṛṛben γur-es imi aṭas n lγaci i gellan dinna.

20 Ssawḍen-as lexbaṛ nnan-as : A Sidi, yemma-k d watmaten-ik atnan di beṛṛa, bγan a k-ẓren.
21 Sidna Σisa yerra-yasen : Yemma d watmaten-iw d widak ismeḥsisen i wawal n Ṛebbi yerna ttabaεen-t.

Sidna Σisa iḥkem γef waḍu d lebḥeṛ

22 Yiwen wass, Sidna Σisa yuli γer yiwet n teflukt nețța d yinelmaden-is. Yenna-yasen : Eyyaw a nzegret γer tama nniḍen n lebḥeṛ n Jlili.
Dγa ṛuḥen.

23 Mi teddun γef waman, Sidna Σisa yeṭṭes. Yekker-ed waḍu iǧehden di lebḥeṛ, taflukt tebda tețțačaṛ d aman, ikcem-iten lxuf ameqqran.

24 Inelmaden qeṛṛben γur-es, sekkren-t-id nnan-as : A Sidi, a Sidi, atan a neγṛeq. Yekker-ed, dγa yumeṛ i waḍu d lemwaji ad ḥebsen, imiren kan ters-ed talwit.
25 Sidna Σisa yenna-yasen : Anida-t liman-nwen ? Tεeǧǧben, țergigin, qqaṛen wway gar-asen : Anwa-t wagi ? Izmer ad yefk lameṛ i waḍu d lebḥeṛ yerna țțaγen as awal !

Argaz imelken waṭas n leǧnun

26 Wwḍen γer tama nniḍen n lebḥeṛ, γer tmurt n ijiṛaziyen iqublen tamurt n Jlili.
27 Mi d-yers Sidna Σisa, ataya yusa-d γur-es yiwen wergaz n taddart nni, melken-t waṭas n leǧnun ; acḥal ur yelsi llebsa, ur yezdiγ axxam, yețεici di tmeqbeṛt ger iẓekwan.
28 Mi gwala Sidna Σisa, yeγli γer iḍaṛṛen-is iεeggeḍ yenna : D acu i tebγiḍ γur-i a Σisa Mmi-s n Ṛebbi εlayen ? Di leεnaya-k ur iyi-țεețțib ara.
29 Yenna-yas-d akka axaṭer Sidna Σisa yefka lameṛ i uṛuḥani i t-izedγen ad iffeγ seg-s. Acḥal d abrid i s-cudden ifassen d iḍaṛṛen s ssnasel,

nețța isseγṛas-itent yerna aṛuḥani-nni yezzuγur-it γer yimukan yexlan.

30 Sidna Σisa isteqsa-t yenna-yas : Isem-ik ? yerra-yas : Tarbaεt. Yenna-yas-d akka axaṭer aṭas n leǧnun i t-izedγen.

31 ?ḥellilen Sidna Σisa ur ten-ițceggiε ara γer yimukan n ṭṭlam.

32 Tella dinna yiwet n tqeḍεit tameqqrant n yilfan kessen deg yiwet n tiγilt.
Leǧnun-nni țḥellilen Sidna Σisa a ten-yeǧǧ ad kecmen deg yilfan-nni ; Sidna Σisa iserreḥ-asen.

33 Imiren ffγen seg wergaz-nni, kecmen deg yilfan, grarben seg ixef n tiγilt γer lebḥeṛ, γeṛqen.

34 Imeksawen-nsen mi walan ayen yedṛan uzzlen γer taddart d lexlawi ad ssiwḍen lexbaṛ.
35 Usan-d lγaci γer Sidna Σisa, ufan-d argaz-nni i seg d-ffγen leǧnun yeqqim γer iḍaṛṛen-is, yuγal-ed γer leεqel-is, yelsa llebsa. Wehmen akk, tekcem-iten tugdi.
36 Wid iḥedṛen i wayen yedṛan, ḥkan amek yețwasellek umeǧnun-nni.
37 Imezdaγ n tmurt uggaden, dγa ssutren i Sidna Σisa ad ibεed fell-asen. Sidna Σisa yuli γer teflukt iwakken ad iṛuḥ.
38 Argaz-nni i seg d-ffγen leǧnun, issuter a t-yeǧǧ ad yeddu yid-es, meεna Sidna Σisa yenna-yas :
39 Uγal γer wexxam-ik, teḥkuḍ ayen akk i k-ixdem Ṛebbi. Argaz-nni iṛuḥ, ikcem γer taddart, yeḥka meṛṛa wayen i s-ixdem Sidna Σisa.

Yelli-s n Jayṛus ț-țmeṭṭut yennulen abeṛnus n Sidna Σisa

40 Mi d-yuγal Sidna Σisa, lγaci meṛṛa i t-ițṛaǧun mmugren-t-id.
41 Yewweḍ-ed yiwen wergaz isem-is Jayrus, d ameqqran n lǧameε, yeγli γer iḍaṛṛen n Sidna Σisa, yețḥellil deg-s iwakken ad iddu γer wexxam is

42 axaṭer yesεa yelli-s tnac yiseggasen di leεmeṛ-is, tețmețțat yerna anagar nețțat i gesεa.

Akken ițeddu Sidna Σisa γer dinna, ḥeṛsen-t-id lγaci si mkul lǧiha.

43 Tella dinna yiwet n tmeṭṭut ihelken, tnac iseggasen nețțat tessaq d idammen. Texṣeṛ ayen akk i tesεa γer ṭṭebba, yiwen ur ț-isseḥla.

44 Tekka-d deffir Sidna Σisa, teḍleq afus-is, tennul iri n ubeṛnus-is, imiren kan teḥla ḥebsen idammen-nni.

45 Sidna Σisa yenṭeq yenna : Anwa akka i yi-d-innulen ? Imi ssusmen meṛṛa, Buṭrus yenna yas : A Sidi, lγaci yezzi-yak-d yerna iḥṛes-ik-id si mkul tama, kečč teqqaṛeḍ anwa i k-id-innulen !
46 Sidna Σisa yerra-yas : Yella yiwen i yi-d-innulen axaṭer ḥusseγ i kra n tezmert teffeγ seg-i.
47 Tameṭṭut-nni imi twala ulamek ara teffer, tusa-d tețțergigi teγli γer yiḍaṛṛen n Sidna Σisa, teḥka-d zdat lγaci meṛṛa acuγeṛ i t-tennul d wamek teḥla imiren kan si lehlak-is.

48 Sidna Σisa yenna-yas : A yell-i, imi tumneḍ yis-i teḥliḍ ! Ṛuḥ di talwit.
49 Mazal-it iheddeṛ, ataya yiwen wergaz yusa-d seg wexxam n Jayṛus, yewwi-yas-d lexbaṛ-agi : Yelli-k temmut ! Ur țεețțib ara Sidna Σisa.
50 Sidna Σisa mi s-yesla i wergaz-nni, yenna i Jayṛus : Ur țțagad ara ! Amen kan, yelli-k aț-țeslek.
51 Mi gewweḍ γer wexxam, ur yeǧǧi yiwen ad ikcem yid-es anagar Buṭrus, Yuḥenna, Yeεqub akk-d baba-s d yemma-s n teqcict-nni.

52 Wid yellan dinna țrun akk, țγerriden ( țmeǧǧiden ) fell-as. Sidna Σisa yenna-yasen : Beṛka-kkun imeṭṭawen ! taqcict ur temmut ara ! D iḍes i teṭṭes.
53 Nutni ugin a s-d-ḥessen imi ẓran taqcict temmut.
54 Sidna Σisa yeṭṭef-iț-id seg wufus yenna-yas s taγect εlayen : A taqcict, ekker !
55 Imiren kan yuγal-iț-id ṛṛuḥ, tekker-ed. Sidna Σisa yumeṛ a s-fken ayen ara tečč.

56 Imawlan-is wehmen. Sidna Σisa iweṣṣa-ten ur țεawaden i yiwen ayen yedṛan.

Ixef 9

Sidna Σisa iceggeε tnac ṛṛusul

1 Sidna Σisa isnejmaε-ed tnac yinelmaden-is, yefka-yasen tazmert d lḥekma s wacu ara ssufγen leǧnun, ara sseḥlun imuḍan.

2 Iceggeε-iten ad beccṛen tageldit n Ṛebbi, yerna ad sseḥlun imuḍan.

3 Yenna-yasen : Ur țțawit acemma yid-wen d aεwin, ur țțawit aεekkaz neγ agrab (aqwrab), ur țțawit aγṛum neγ idrimen, ur țțawit ara daγen sin yiqendyaṛ.
4 Kra n win ara yestṛeḥben yis wen, qqimet deg wexxam-is alamma tṛuḥem.
5 Ma d anda ur stṛeḥben ara yis-wen, m'ara teffγem si taddart-nni, zwit ula d aγebbaṛ-is seg yiḍaṛṛen nwen, iwakken aț-țcehdem fell-asen belli d nutni i kkun-yugin.
6 Ṛuḥen, țeddun si taddart γer tayeḍ, țbecciṛen lexbaṛ n lxiṛ, sseḥlayen imuḍan di mkul amkan. Hiṛudus ițțuεewweq
7 Hiṛudus lḥakem n tmurt n Jlili, yeεweq mi gesla s wayen yedṛan meṛṛa, axaṭer kra n yemdanen qqaṛen : Ť d Yeḥya i d-iḥyan si ger lmegtin ! ť

8 Wiyaḍ qqaṛen : Ť d Sidna Ilyas i d-yuγalen ! ť Neγ : Ť ahat d yiwen si lenbiya n zik i d-iḥyan ! ť
9 Lameεna Hiṛudus yeqqaṛ : Ť Yeḥya kkseγ-as aqeṛṛuy ! Anwa-t ihi wagi i γef selleγ annect-agi ? ť Dγa ițqellib ad iẓer Sidna Σisa.

Sidna Σisa yessečč xemsa alaf n yemdanen

10 Mi d-uγalen ṛṛusul n Sidna Σisa, bdan ḥekkun-as ayen akk i xedmen. Yewwi-ten yid-es γer yiwen wemkan, γer tama n taddart n Bitsayda akken ad qqimen weḥḥed-sen.
11 Mi slan anda yella lγaci tebεen-t. Nețța yesteṛḥeb yis-sen, yebda iheddeṛ-asen γef tgeldit n Ṛebbi, yesseḥla daγen wid ihelken.

12 Akken qṛib ad yeγli yiṭij, tnac-nni n ṛṛusul usan-d γer Sidna Σisa nnan-as : Serreḥ i lγaci ad ṛuḥen γer temdinin ț-țudrin iqeṛben iwakken ad afen ayen ara ččen d wanda ara ṭsen, axaṭer aql-aγ deg wemkan yexlan.

13 Sidna Σisa yenna-yasen : Fket-asen kunwi s yiman-nwen ayen ara ččen. Erran-as : ?uṛ-nneγ anagar xemsa teḥbulin n weγṛum d sin yiselman. Neγ tebγiḍ a nṛuḥ nukni a d-naγ ayen ara ččen lγaci-agi ?
14 Llan dinna azal n xemsa alaf n yergazen. Sidna Σisa yenna i yinelmaden-is : Feṛqet lγaci ț-țirebbaε n xemsin xemsin, tesγimem-ten.
15 Ṛuḥen sγimen-ten akken i sen-d yenna.

16 Sidna Σisa yerfed allen-is γer yigenni, yeḥmed Ṛebbi icekkeṛ-it, yeddem-ed xemsa-nni teḥbulin n weγṛum d sin-nni iselman yebḍa-ten, yefka-ten i inelmaden-is a ten- feṛqen i lγaci.

17 ?čan akk armi ṛwan, yerna ččuṛen tnac yiḍellaεen s wayen i d-yugran.

Buṭrus yeεqel belli d Sidna Σisa i d Lmasiḥ
( Mt 16. 13-19 ; Mq 8. 27-29 )

18 Yiwen wass Sidna Σisa yeqqim weḥd-es yețẓalla. Inelmaden-is qeṛṛben γur-es dγa isteqsa-ten yenna-yasen : D acu-yi γer lγaci ?
19 Rran-as : Kra qqaṛen d Yeḥya aγeṭṭas ; wiyaḍ d Sidna Ilyas i d-yuγalen ; ma d kra nniḍen qqaṛen d yiwen si lenbiya n zik i d-iḥyan si ger lmegtin.

20 Yenna-yasen : I kunwi, d acu-yi γur-wen ? Yenṭeq Buṭrus yenna-yas : D kečč i d Lmasiḥ n Ṛebbi.
21 Sidna Σisa iweṣṣa-ten ur qqaṛen i yiwen belli d nețța i d Lmasiḥ.
22 Yenna-yasen daγen : Ilaq Mmi-s n bunadem ad yeεteb aṭas. A t-nekkṛen lecyux d lmuqedmin imeqqranen akk-d lεulama n ccariεa yerna a t-nγen, lameεna ass wis tlata a d-iḥyu si ger lmegtin.

23 Yenna daγen i lγaci : Win yebγan ad iddu yid-i ur ilaq ara ad ixemmem γef tudert-is ; ilaq ad iqbel ad yenεețțab yal ass γef ddemma n yisem-iw yerna ad yetbeε abrid-iw.

24 Axaṭer win yebγan ad isellek tudert-is a s-tṛuḥ. Ma d win iwumi ara tṛuḥ γef ddemma-w ad yuγal a ț-yaf.

25 D acu i d lfayda n wemdan ara irebḥen ddunit meṛṛa ma yesṛuḥ tudert-is neγ issenger iman-is ?

26 Atan win issetḥan yis-i neγ s yimeslayen iw, ad issetḥi yis Mmi-s n bunadem m'ara d-yas di tmanegt-is ț-țmanegt n Baba Ṛebbi akk-d lmalayekkat iqedsen.

27 A wen-d-iniγ tideț, llan gar-awen wid ur nețmețțat ara alamma walan Tageldit n Ṛebbi.

Tamanegt n Sidna Σisa tban-ed

28 Σeddan azal n tmanya wussan segmi i d-yenna imeslayen-agi. Sidna Σisa yewwi yid-es Buṭrus, Yuḥenna d Yeεqub, yuli γer wedrar ad iẓẓall.

29 Mi gella ideεεu yenbeddal wudem-is, llebsa-s tuγal ț-țamellalt tețfeǧǧiǧ am yiṭij.
30 Taswiεt kan bedden-d γur-es sin yergazen heddṛen yid-es : d Sidna Musa akk-d Sidna Ilyas.

31 Banen-ed di tafat tameqqrant, țmeslayen yid-es γef lmut-is ara yedṛun di temdint n Lquds.
32 Buṭrus d yimdukkal-is yewwi ten yiḍes. Mi d-endekwalen, walan tamanegt n Sidna Σisa akk-d wid yellan yid-es.
33 Mi kkren ad ṛuḥen sin-nni yergazen, yenṭeq Buṭrus γer Sidna Σisa yenna :

A Sidi, acḥal yelha m'akka nella dagi ! Ma tebγiḍ a nesbedd tlata yiqiḍunen, yiwen i kečč, yiwen i Sidna Musa wayeḍ i Sidna Ilyas.
Yenna-d akka, axaṭer ur yeẓri d acu i d-iqqaṛ !

34 Mazal-it iheddeṛ mi ten-id-tγumm yiwet n tagut. Buṭrus d imdukkal-is ikcem-iten lxuf d ameqqran.

35 Iffeγ-ed yiwen n ṣṣut si tagut-nni yenna-d : Wagi d Mmi, d nețța i xtaṛeγ, smeḥsiset-as.
36 Mi geḥbes ṣṣut-nni, walan anagar Sidna Σisa. Deg ussan-nni, inelmaden ur ḥkin i yiwen ayen ẓran.

Aqcic yețwamelken

37 Azekka-nni mi d-ṣubben seg wedrar, aṭas n lγaci i d-immugren Sidna Σisa.

38 Atah yiwen wergaz iεeggeḍ-ed si ger lγaci yenna : A Sidi, di leεnaya-k muqel-ed γer mmi, ala nețța i sεiγ !

39 Ikcem-it uṛuḥani, tiswiεin m'ara t-ițhuccu, yețεeggiḍ alamma ffγent-ed tkufta seg imi-s, ur as-ițserriḥ ara alamma yerẓa-t akk.

40 ?elleleγ inelmaden-ik a t-ssufγen seg-s, lameεna ur zmiren ara.

41 Sidna Σisa yenṭeq yenna : A lǧil ijehlen iεewjen, ar melmi ara yiliγ yid-wen, ara wen-sebṛeγ ? Awi-d mmi-k γer dagi !
42 Akken i d-iqeṛṛeb weqcic-nni, aṛuḥani isseglallez-it di lqaεa armi i d-țeffγent tkufta seg yimi-s. Sidna Σisa yefka lameṛ i uṛuḥani-nni iwakken a t-iffeγ. Aqcic-nni yeḥla, Sidna Σisa yerra-t i baba-s.

Sidna Σisa ixebbeṛ-ed daγen γef lmut-is

43 Lγaci meṛṛa wehmen di tezmert n Sidi Ṛebbi. Imi tεeǧǧben akk s wayen i gxeddem, Sidna Σisa yenṭeq γer yinelmaden-is yenna :
44 ?esset-ed mliḥ i wayen ara wen-d-iniγ tura : Ť Mmi-s n bunadem ad ițțusellem ger ifassen n yemdanen. ť
45 Inelmaden-is ur fhimen ara imeslayen-agi, lmeεna-ines tețwaffer fell-asen iwakken ur t-fehmen ara yerna kukran a t-steqsin.

Anwa i d ameqqran ?

46 Inelmaden țmeslayen wway gar-asen, țmesteqsayen anwa i d ameqqran deg-sen.

47 Sidna Σisa yeẓran ayen țxemmimen deg ulawen-nsen, ikker yeddem-ed yiwen weqcic isbedd-it zdat-es,

48 yenna-yasen : Win iqeblen aqcic am wagi γef ddemma n yisem-iw d nekk i geqbel, win i yi-qeblen, yeqbel win i yi-d iceggεen. Win yessimẓiyen iman-is gar-awen d nețța i d ameqqran.

Argaz yessuffuγen leǧnun s yisem n Sidna Σisa

49 Yuḥenna yenna i Sidna Σisa : A Sidi, neẓra yiwen wergaz yessuffuγ leǧnun s yisem-ik, nebγa a s-neqḍeε imi ur k-itbiε ara am nukni.

50 Sidna Σisa yerra-yas : Ur s-țțagit ara ! Win ur wen-d neffiγ ara d aεdaw, yid-wen i gella ! Taddart n isamariyen ur neqbil ara Sidna Σisa
51 Mi qṛib a d-awḍen wussan i deg ara yețwarfed γer igenwan, Sidna Σisa yeqsed ad iṛuḥ γer temdint n Lquds.

52 Yessezwer imceggεen zdat-es iwakken a s-heggin ayen ilaqen. Kecmen γer yiwet n taddart n yisamariyen,

53 lameεna ugin ad stṛeḥben yis imi slan γer temdint n Lquds i gteddu.
54 Yeεqub d Yuḥenna mi ẓran ayagi, nnan : A Sidi, tebγiḍ a nefk lameṛ i tmes n yigenni a d-teγli fell-asen a ten tessenger ?

55 Sidna Σisa yezzi γur-sen, iεeggeḍ fell-asen yenna : Acuγeṛ i tețxemmimem akka ?

56 Mmi-s n bunadem ur d-yusi ara ad issenger imdanen lameεna yusa-d a ten-isellek. Dγa ṛuḥen γer taddart nniḍen.

Wid yebγan ad tebεen Sidna Σisa

57 Mi teddun deg webrid, yiwen wergaz yenna i Sidna Σisa : A Sidi, anda teddiḍ ad dduγ !

58 Sidna Σisa yerra-yas : Uccanen γur-sen lγiṛan, ifṛax n yigenni sεan leεcuc, ma d Mmi-s n bunadem ur yesεi ara anda ara yessers aqeṛṛuy-is.

59 Dγa yenna i yiwen nniḍen : Eyya-d aț-țedduḍ yid-i. Yerra-yas : A Sidi, serreḥ-iyi uqbel ad ṛuḥeγ ad meḍleγ baba.

60 Sidna Σisa yenna-yas : Eǧǧ wid yemmuten ad meḍlen lmegtin-nsen, ma d kečč eyya-d aț-țbecṛeḍ tageldit n Ṛebbi.

61 Wayeḍ yenṭeq yenna-yas : Ad dduγ yid-ek a Sidi, lameεna eǧǧ-iyi ad ṛuḥeγ ad sellmeγ γef wat wexxam-iw.
62 Sidna Σisa yerra-yas : Kra n win yeṭṭfen lmaεun, yețmuqul γer deffir, ur yenfiε ara i tgelda n Ṛebbi.

Ixef 10

Sidna Σisa iceggeε tnin usebεin seg inelmaden-is

1 Syenna, Sidna Σisa yextaṛ-ed tnin usebεin yinelmaden nniḍen, iceggeε-iten sin sin ad ṛuḥen γer mkul taddart d mkul amkan anda ilaq ad iṛuḥ ula d nețța.

2 Yenna-yasen : Tamegra meqqṛet meεna drus yixeddamen i gellan. Dεut ihi γer Bab n tmegra iwakken a d-iceggeε ixeddamen γer yigran-is.

3 Atan a kkun-ceggεeγ am izamaren ger wuccanen.
4 Ur țțawit yid-wen idrimen, ur țțawit aεwin neγ tayuga nniḍen n yerkasen. Deg webrid-nwen ur sṛuḥuyet ara lweqt di sslam.

5 Kra n wexxam ara tkecmem init : sslam n Ṛebbi fell-awen ay at wexxam !
6 Ma yella dinna walebεaḍ d imhenni, sslam-nwen ad yers fell-as, neγ m'ulac lehna-nwen aț-țeqqim γur-wen.

7 Qqimet deg wexxam-nni, ččet swet ayen ara wen-d-fken, axaṭer axeddam yuklal lexlaṣ-is. Ur țṛuḥut ara seg wexxam γer wayeḍ.
8 Mkul taddart ara tkecmem, ma stṛeḥben yis-wen ččet ayen ara wen-d-ssersen.

9 Sseḥlut imuḍan-nsen, init-asen : tageldit n Ṛebbi tewweḍ-ed γur-wen.

10 Lameεna mkul taddart ara tkecmem m'ur stṛeḥben ara yis-wen, effγet γer yizenqan-nsen init :

11 Ť a nezwi ula d aγebbaṛ n taddart-nwen i d-ineṭḍen deg yiḍaṛṛen nneγ, meεna ḥṣut belli tageldit n Ṛebbi tewweḍ-ed γur-wen.
12 Aql-i nniγ-awen, ass n lḥisab taddart-agi aț-țețțuεaqeb akteṛ n temdint n ?udum.

13 A nnger-im a tamdint n Kurazim, a nnger-im a Bitsayda ! A lukan lbeṛhanat yețwaxedmen deg kkunt țwaxedmen di temdinin n ?ur akk-d Sidun, tili imezdaγ-nsent acḥal aya segmi sburren ticekkaṛin n leḥzen, sexnunnsen iman-nsen deg iγiγden iwakken a d-beggnen belli ndemmen, uγalen-d γer webrid.
14 Γef wannect-agi, ass n lḥisab a ț-țețțuεaqbemt akteṛ n temdinin n Ṣur d Sidun.
15 I kemmini a tamdint n Kafernaḥum, tγileḍ aț-țaliḍ γer yigenni ? Xaṭi ! γer tesraft lqayen n laxeṛt ara tețwaḍeggṛeḍ.
16 Win i wen-ismeḥsisen ismeḥsis-iyi-d i nekk. Win ur kkun-neqbil d nekk ur geqbil ara, win ur iyi-neqbil ara, ur iqbil ara Win i yi-d-iceggεen.
17 Tnin usebεin-nni yinelmaden uγalen-d ččuṛen d lfeṛḥ, nnan-as :
A Sidi, ula d leǧnun țțagaden-aγ s yisem-ik.
18 Yenna-yasen :
Walaγ Cciṭan yeγli-d am lebṛaq seg yigenni.
19 Slet-ed i wayen ara wen-iniγ : ț-țideț fkiγ-awen tazmert s wayes ara tṛekḍem izerman ț-țγerdmiwin, aț-țmeḥqem lǧehd n weεdaw yerna ulac ayen ara wen-izemren ;
20 lameεna ur feṛṛḥet ara imi i tḥekkmem γef leǧnun, feṛḥet imi ismawen-nwen țwajerden deg igenwan.

Sidna Σisa yeččuṛ d lfeṛḥ

21 Imiren kan, Sidna Σisa yeččuṛ-it Ṛṛuḥ iqedsen s lfeṛḥ, yenṭeq yenna : Tanemmirt a Baba, kečč yellan d Bab n yigenwan d lqaεa, imi ayen akk i teffreḍ γef lεuqal d yimusnawen tbeggneḍ-t-id i yimecṭuḥen. Tanemmirt a Baba Ṛebbi aḥnin axaṭer d wagi i d lebγi-k.
22 Baba yerra kullec ger ifassen-iw. Yiwen ur yeẓri d acu-yi anagar Baba Ṛebbi, yiwen ur issin Baba Ṛebbi anagar Mmi-s akk-d win iwumi yebγa Mmi-s a t-id-isbeggen.
23 Dγa yezzi γer yinelmaden-is yenna-yasen : Amarezg n wid iwalan ayen tețwalim !

24 Aql-i nniγ-awen : aṭas n lenbiya d waṭas n yigelliden i gebγan ad ẓren ayen i tẓerrem ur t-ẓrin, i gebγan ad slen ayen i tsellem ur t-slin.

Ḥemmel wayeḍ am yiman-ik

25 Ikred yiwen umusnaw n ccariεa yebγan ad ijeṛṛeb Sidna Σisa, yenna yas : A Sidi, d acu ara xedmeγ iwakken ad sεuγ tudert n dayem ?
26 Sidna Σisa yerra-yas : D acu yuran di ccariεa n Musa ? D acu i tfehmeḍ deg-s mi ț-teγriḍ ?
27 Yerra-yas-d : Aț-țḥemmleḍ Sidi Ṛebbi s wul-ik d ṛṛuḥ-ik, s wayen yellan di tezmert-ik akk-d lεeqliya-k. Aț-țḥemmleḍ daγen wiyaḍ am yiman-ik .

28 Sidna Σisa yenna-yas : Ayen akka i d-tenniḍ ț-țideț, exdem akka aț-țesεuḍ tudert n dayem !
29 Lεalem-nni n ccariεa yebγan ad yefk lḥeqq i yiman-is, yenna i Sidna Σisa : Anwa-ten wiyaḍ-agi ?
30 Sidna Σisa yerra-yas : Yiwen wergaz iṣubb-ed si temdint n Lquds γer temdint n Yiriku ; sqaṭεen-as yimakaren εerran-t rnan wten-t, ṛuḥen ǧǧan-t ur yemmut ur iddir.

31 Iεedda-d syenna yiwen lmuqeddem n ccariεa ; mi t-iwala iwwet iεedda si tama nniḍen.

32 Iεedda-d daγen seg webrid-nni yiwen wemṛabeḍ n at Lewwi, iwala-t, ikemmel abrid-is iṛuḥ.

33 Ataya yiwen wubeṛṛani n tmurt n Samarya, iwweḍ-ed γur-es, mi t-iwala iγaḍ-it.
34 Iqeṛṛeb γur-es, idhen leǧruḥ-is s zzit d ccṛab, icudd iten ; isserkeb-it γef zzayla-s, yewwi-t γer yiwen wexxam n yemsafren, ilha-d yid-es.

35 Azekka-nni yefka sin yiṣurdiyen i bab n wexxam-nni, yenna-yas : Ť Bedd γur-es, ayen ara tṣeṛṛfeḍ n zzyada fell-as, a k-t-id-kemmleγ asm'ara d-uγaleγ. ť

36 Di tlata-agi, anwa i gḥemmlen am yiman-is argaz-agi yețțuεerran ?
37 Amusnaw n ccariεa yerra-yas : D win akken iḥunnen fell-as, i s ixedmen lxiṛ. Sidna Σisa yenna-yas : Ṛuḥ ula d kečč exdem akken.

Marṭa d Meryem

38 Deg webrid-nsen γer temdint n Lquds, Sidna Σisa yekcem γer yiwet n taddart. Yiwet n tmeṭṭut isem is Marṭa teεṛeḍ-it γer wexxam-nsen.

39 Tesεa weltma-s isem-is Meryem, teqqim-ed γer iḍaṛṛen n Sidna Σisa, tesmeḥsis i wawal-is.
40 Marṭa tqeddec yečča-ț ccγel, tusa-d γer Sidna Σisa tenna-yas : A Sidi, ur ak-tewqiε ara lmeεna imi iyi-teǧǧa weltma ad qedceγ weḥd-i ? Ini-yas aț-țekker a yi-tεiwen.
41 Sidna Σisa yerra-yas : A Maṛta, tețḥebbiṛeḍ tețqelliqeḍ iman-im γef waṭas n tγawsiwin ;

42 lameεna yiwet kan i gṣeḥḥan ! Meryem textaṛ ayen ilaqen yerna yiwen ur as-t-ițekkes.

Ixef 11

Sidna Σisa yesselmed i yinelmaden-is amek ara ẓallen

1 Yiwen wass, Sidna Σisa yețẓalla deg yiwen wemkan. Mi gfukk, yiwen seg yinelmaden-is yenna-yas : A Sidi, selmed-aγ amek ara neẓẓal akken yesselmed Yeḥya i yinelmaden-is.

2 Yenna-yasen : M'ara tẓallem, init : A Baba Ṛebbi, isem-ik ad ițwaqeddes, lḥekma n tgeldit-ik a d-tas.
3 Yal ass efk-aγ-d aγṛum-nneγ.
4 Semmeḥ-aγ ddnubat-nneγ akken i nețsamaḥ ula d nukkni i wid i γ-ixedmen cceṛ, ur aγ-țaǧǧa ara a neγli deg wujeṛṛeb.
5 Yenna-yasen daγen : Ma yella yiwen deg-wen yesεa aḥbib, iṛuḥ γur-es di țnaṣfa n yiḍ a s-yini : Ť Ay aḥbib ṛḍel-iyi-d tlata teḥbulin n weγṛum,

6 atan yusa-yi-d yiwen weḥbib i geṭṭef webrid, ur sεiγ d acu ara s-d-sserseγ. ť
7 Ma yerra-yas-d si zdaxel n wexxam : Ť Ur iyi-țεețțib ara, tawwurt tsekkeṛ, nekk d warraw-iw aql-aγ neṭṭes, ur zmireγ ara a d-kkreγ iwakken a k-d-fkeγ aγṛum. ť
8 A wen-d-iniγ : ma yeεdez ur yebγi ara a d-yekker γur-es γas akken d aḥbib-is, a d-ikker a s-d-yefk ayen akk i s-issuter axaṭer yusa-d γur es di țnaṣfa n yiḍ yeṛṛez-as aqeṛṛuy-is.
9 Ma d nekk nniγ-awen : ssutret a wen-d-ițunefk, qellbet aț-țafem, sqerbebbet di tewwurt a wen-d-ldin.

10 Axaṭer kra n win yessuturen a s-d ițunefk, win ițqelliben ad yaf, win yesṭebṭuben a s-d-ldin tawwurt.
11 Anwa deg-wen ara yefken i mmi-s adγaγ ma yessuter-as aγṛum ? Neγ a s-yefk azrem ma yessuter-as aslem ?

12 Neγ ma yessuter-as tamellalt a s-yefk tiγirdemt ?
13 Ma yella kunwi yellan d imcumen tessnem aț-țefkem ayen yelhan i warraw-nwen, amek Baba-twen yellan deg igenni ur d-ițțak ara Ṛṛuḥ iqedsen i wid i s-t-issuturen ?

Argaz i gesgugem lǧen

14 Yiwen wass ikker Sidna Σisa yessuffeγ lǧen yesgugmen yiwen wergaz. Mi t-iffeγ lǧen, argaz-nni yebda iheddeṛ ; lγaci meṛṛa wehmen.

15 Lameεna kra deg-sen nnan : Ť D Balzabul iḥekmen γef leǧnun i s-yefkan tazmert akken a ten issuffeγ. ť
16 Kra nniḍen bγan a t-jeṛṛben, ssutren-as yiwen n lbeṛhan ara d-yasen seg yigenni.

17 Sidna Σisa yessnen ixemmimen-nsen yenna yasen : Yal tagelda i deg ara țnaγen imezdaγ-is wway gar-asen tețțeddu γer nnger, ixxamen-is ad γlin.
18 Ma yella Cciṭan yețnaγ d yiman-is amek ara tdum tgelda-s ? Teqqaṛem s Balzabul i ssufuγeγ leǧnun !

19 Ma yella nekk s Balzabul i ten-ssufuγeγ, anwa ihi i sen-ițțaken tazmert i yinelmaden-nwen iwakken a ten-ssuffuγen ? Daymi d nutni ara kkun-iḥasben.
20 Lameεna ma yella s ufus n Ṛebbi i ten-ssuffuγeγ, ațan ihi tageldit n Ṛebbi tewweḍ-ed γur-wen.
21 Argaz iǧehden yesεan leslaḥ, ițεassan γef wexxam-is, ṛṛezq-is ad yili di laman.
22 Ma yusa-d γur-es yiwen iǧehden akteṛ-is iγleb-it, a s-ikkes leslaḥ γef wacu yețkel, ad yernu ad ifṛeq i wiyaḍ ayen akk yesεa.

23 Win ur nelli ara yid-i, d axṣim-iw ; win ur njemmeε ara yid-i, yețḍeggiε.

Aṛuḥani yuγalen γer wansi i d-iffeγ

24 M'ara yeffeγ uṛuḥani seg yiwen wergaz, ad iṛuḥ γer yimukan yexlan akken ad iqelleb γef ṛṛaḥa. M'ur yufi ara, ad yini : Ť ad uγaleγ γer tnezduγt-iw ansi i d-ffγeγ. ť
25 M'ara yaweḍ γer tnezduγt-nni, a ț-yaf zeddiget, tqeεεed ;

26 imiren ad iṛuḥ a d-yawi sebεa yiṛuḥaniyen nniḍen iweεṛen akteṛ-is, ad kecmen ad zedγen deg-s ; s wakka lḥala n wergaz-nni aț-țenṭeṛ akteṛ n tikkelt tamezwarut.
27 Mi d-yenna Sidna Σisa ayagi, yiwet n tmeṭṭut tenṭeq-ed s ṣṣut εlayen si ger n lγaci tenna-yas : ?-țaseεdit tmeṭṭut i k-id-yurwen, i k-issuṭṭḍen !
28 Lameεna nețța yerra-yas : Iseεdiyen, d wid ismeḥsisen i wawal n Ṛebbi, yerna ḥerzen-t.

Wid yessuturen lbeṛhan

29 Mi d-innejmaε γur-es waṭas n lγaci, Sidna Σisa yekker yenna-yasen : Lǧil-agi d lǧil amcum, yessutur lbeṛhan ! Ur as-d-ițunefkay ara lbeṛhan anagar win n nnbi Yunes !
30 Axaṭer akken yella nnbi Yunes d lbeṛhan i yimezdaγ n temdint n Ninebi, ara yili Mmi-s n bunadem d lbeṛhan i lǧil-agi.
31 Ass n lḥisab tagellit n tmurt n usammer a d-tekker γer yemdanen n lǧil-agi a ten-tesseḍlem imi nețțat tusa-d seg yixef n ddunit iwakken aț-țsel i tmusni n ugellid Sliman.
Atah yella gar-awen win yugaren agellid Sliman !
32 Ass n lḥisab a d-kkren daγen imezdaγ n temdint n Ninebi γer lǧil-agi a ten-sḍelmen, axaṭer nutni uγalen-d γer webrid mi sen-ibecceṛ nnbi Yunes.
Kunwi tesεam dagi gar-awen win yugaren nnbi Yunes !

Tiṭ ț-țafat n wemdan

33 Yiwen ur iceεεel taftilt iwakken a ț-iffer neγ akken a ț-iγumm s lḥila, lameεna a ț-issers γef lmeṣbeḥ iwakken kra n win ara d-ikecmen ad iwali tafat.
34 Tiṭ ț-țaftilt n wemdan. Ma yella tiṭ-ik tṣeḥḥa aț-țiliḍ di tafat, meεna ma tedderγel aț-țiliḍ di ṭṭlam.
35 ?ader ihi aț-țuγal tafat yellan deg-k d ṭṭlam.

36 Ma telliḍ di tafat s lekmal-ik, ur yețțili ara deg-k ṭṭlam, aț-țiliḍ di tafat am teftilt m'ara d-cceεceε fell-ak.

Ifariziyen akk-d lεulama n ccariεa

37 Mi gfukk Sidna Σisa ameslay, iεreḍ-it yiwen wufarizi γeṛ imensi.

38 Afarizi-nni yewhem mi gwala Sidna Σisa ur issared ara uqbel ad yečč, akken tella di lεadda-nsen.

39 Sidna Σisa yenna-yas : Kunwi s yifariziyen tessiridem taqbuct d uḍebṣi s wufella kan ma zdaxel n wulawen teččuṛem d ṭṭmeε akk-d ddγel.
40 A wid iγeflen ! Eεni win i d ixelqen ayen yellan s wufella, mačči d nețța i d-ixelqen ayen n daxel ?
41 Fket lweεda s wulawen-nwen, imiren kullec ad awen-yeṣfu.
42 A nnger-nwen ay ifariziyen ! Kunwi yețεecciṛen nneεneε d uwermi d wayen i d-ițemγayen di tebḥirt, ma d lḥeqq d leḥmala n Sidi Ṛebbi tețțarram-ten γer deffir ; d annect-agi i gezwaren mbla ma tețțum ayen nniḍen.
43 A nnger-nwen ay ifariziyen ! Tḥemmlem imukan imezwura di leǧwameε, tḥemmlem ad țsellimen fell-awen yemdanen deg iberdan.
44 A nnger-nwen, kunwi yecban iẓekwan i gγumm wakal, ur d-nețban ara, εeffsen-ten yemdanen ur d-wwin s lexbaṛ.

45 Yenṭeq yiwen lεalem n ccariεa, yenna-yas : A Sidi, atan tregmeḍ-aγ ula d nukkni s wayen i d-tenniḍ akka !
46 Sidna Σisa yerra-yas : A nnger-nwen ula d kunwi a lεulama n ccariεa ! Tețεebbim i wiyaḍ tiεekkmin ẓẓayen, ma d kunwi ur tent-tețnalem ara ula s yiwen uḍaḍ.
47 A tawaγit-nwen ! Lejdud-nwen nγan lenbiya, kunwi tbennum-asen iẓekwan.
48 S wakka i d-tesbegnem belli tqeblem ayen i xedmen yerna tețkemmilem di tikli-nsen ; axaṭer nutni nγan-ten, kunwi tbennum-asen iẓekwan.
49 γef wayagi Sidi Ṛebbi yeẓran kullec yenna : a sen-ceggεeγ lenbiya d ṛṛusul, kra a ten-nγen kra a ten qehṛen.
50 Daymi lǧil-agi ad ițțuḥaseb γef tazzla n yidammen n lenbiya seg wasmi i d-texleq ddunit ;

51 seg yidammen n Habil mmi-s n Adem armi d idammen n Zakarya i nγan ger udekkan n iseflawen d lǧameε iqedsen. Lǧil-agi ad ițțuḥaseb γef ayagi meṛṛa.
52 A tawaγit-nwen a lεulama n ccariεa ! Teṭṭfem tasaruț n tmusni, ur tekcimem kunwi, ur teǧǧim ad kecmen wid yebγan.
53 Mi geffeγ Sidna Σisa, lεulama n ccariεa d ifariziyen ḥeṛsen-t iwakken a d-immeslay γef waṭas n tγawsiwin nniḍen,

54 țqelliben amek ara t-id-sseγlin deg wawal.

Ixef 12

Sεut yiwen wudem

1 Di teswiεt-nni kan, lγaci yennejmaε-ed s luluf armi țemyeεfasen. Sidna Σisa yenna i yinelmaden-is : Ḥadret iman-nwen γef temtunt ( iγes ) n yifariziyen, axaṭer d at sin wudmawen.

2 Kra n wayen iγummen a d-iban, kra n wayen yeffren ad yemẓer.

3 Ayen i thedṛem di ṭṭlam a t-slen di tafat, ayen i tennam γer umeẓẓuγ di texxamt ad ițțuberreḥ deg yizenqan.

Win i glaq aț-țaggadem

4 A wen-d-iniγ i kunwi yellan d iḥbiben-iw : ur țțagadet ara wid ineqqen lǧețța, sennig lmut ur zmiren ad xedmen acemma nniḍen.
5 A wen-d-iniγ anwa i glaq aț- țaaggadem : aggadet win izemren a kkun-ikkes si ddunit yerna a kkun-iḍeggeṛ γer ǧahennama. Atan nniγ-awen-t-id, d nețța i glaq aț- țaggadem.

6 D acu i swan xemsa iẓiwcen ? Anaγ sin iṣurdiyen kan ! Lameεna Sidi Ṛebbi ur itețțu ula d yiwen deg-sen.
7 Ula d anẓaden n iqeṛṛay-nwen țwaḥesben yiwen yiwen. Ur țțagadet ara ihi, teswam akteṛ n iẓiwcen.
8 A wen-d-iniγ : kra n win ara d-icehden zdat yemdanen belli yumen yis-i, Mmi-s n bunadem ur t-inekkeṛ ara zdat lmalayekkat,

9 ma d win ara yi-nekṛen zdat yemdanen, ula d nekk a t-nekkṛeγ zdat lmalayekkat n Ṛebbi.
10 Kra n win ara yewten di Mmi-s n bunadem a s-ițusemmeḥ, ma d win ara iregmen Ṛṛuḥ iqedsen ulac fell-as ssmaḥ.
11 M'ara kkun-awin ad ḥekmen fell-awen di leǧwameε zdat lecyux d lḥekkam, ur țxemmimet ara amek ara tsellkem iman-nwen neγ γef wayen ara d-tinim,

12 axaṭer d Ṛṛuḥ iqedsen ara wen-d-ifken di teswiεt-nni ayen ilaqen a t-id-tinim.

Leṛzaq n ddunit-agi

13 Yiwen wergaz inṭeq-ed si ger n lγaci yenna i Sidna Σisa : A Sidi, ini-yas i gma ad ibḍu yid-i lweṛt i d-iǧǧa baba-tneγ.
14 Sidna Σisa yerra-yas : Ay argaz, anwa i yi-sbedden iwakken ad bḍuγ gar-awen ?
15 Dγa yenna i lγaci : Ḥadret iman-nwen γef ṭṭmeε imi tudert n wemdan ur d-tekki ara seg wayen yesεa γas akken di rrbeḥ ameqqran i gella.
16 Imiren yewwi-yasen-d lemtel agi : Yiwen umeṛkanti, yesεa tamurt tefka-d aṭas n lγella.

17 Ixemmem deg iman-is, yenna : Ť amek ara xedmeγ imi ur sεiγ ara amkan anda ara jemεeγ leṛẓaq-iw ?
18 Ad huddeγ ikuffan-iw, ad bnuγ wiyaḍ d imeqqranen iwakken ad jemεeγ irden-iw d leṛẓaq-iw meṛṛa.
19 Imiren ad iniγ i yiman-iw : Ť atan tesxezneḍ leṛẓaq i waṭas n iseggasen ; steεfu tura, ečč, sew tezhuḍ. ť
20 Lameεna Sidi Ṛebbi yenna yas-d : Ť a win iγeflen ! Iḍ-agi ad a k-ddmeγ ṛṛuḥ-ik ! Ayen meṛṛa i tjemεeḍ, iwumi ara d-yeqqim ? ť
21 Akka i tdeṛṛu d win ijemεen leṛẓaq i yiman-is, wala ad ixdem γef laxeṛt-is, ad yili d ameṛkanti γer Ṛebbi.

Sεut laman di Baba Ṛebbi

22 Sidna Σisa yenna daγen i yinelmaden-is : γef wayagi i wen-d-qqaṛeγ ur țḥebbiṛet ara γef tudert-nwen, γef wayen ara teččem d wayen ara telsem.

23 Axaṭer tudert-nwen tugar lqut, lǧețța-nwen tugar llebsa.
24 Walit tigerfiwin , ur zerrεent ur meggrent , ur sεint akufi ur sεint acbayli meεna Sidi Ṛebbi ițεeyyic itent. Acḥal teswam akteṛ n yefṛax n igenni !

25 Anwa deg-wen i gzemren s uḥebbeṛ ad yessiγzef leεmeṛ-is ula s yiwen n wass ?

26 Imi ur tezmirem ara i tγawsiwin timecṭuḥin, acuγeṛ i tețḥebbiṛem γef wayen nniḍen ?

27 Walit amek gemmun ijeǧǧigen n lexla ! Ur țellmen ur ẓeṭṭen ! Atan qqaṛeγ-awen : ula d agellid Sliman s yiman-is di ccan-is, ur yelsi am yiwen seg yijeǧǧigen-agi.
28 Ma yella Sidi Ṛebbi yeslusu akka leḥcic yellan ass-agi di lexla, azekka ad iṛeγ di tmes, amek ur kkun-islusu ara kunwi,

ay imdanen ixuṣṣen di liman !
29 Ur țḥebbiṛet ara ihi ! Ur țqellibet ara γef wayen ara teččem d wayen ara teswem,

30 axaṭer d imdanen ur nețțamen ara s Ṛebbi i gețqelliben γef wayagi meṛṛa. Baba-twen yellan deg yigenwan yeẓra ayen teḥwaǧem.
31 Qellbet axiṛ γef tgeldit n Ṛebbi, ayen nniḍen meṛṛa d nețța ara wen-t-id ifken.

Agerruj n tideț

32 Ur țțagad ara a taqeḍεit illan tamecṭuḥt, axaṭer iεǧeb-as i Baba Ṛebbi a wen-d-yefk tageldit-is.
33 Zzenzet ayen tesεam, tsedqem-t. Heggit i yiman-nwen deg yigenwan agerruj ur nkeffu, ur nrekku, dinna ulac imakaren ara t-yakren, ulac ibeεεac ara t-iččen.

34 Axaṭer anda yella ugerruj-ik, dinna ara yili wul-ik.

Aqeddac ițεawazen

35 Heggit iman-nwen, εiwzet, beggset γef yiman-nwen tceεlem tiftilin-nwen !
36 Ilit am wid yețṛaǧun amεellem nsen ara d-yuγalen si tmeγṛa ; akken kan ara d-yesqeṛbeb a s-ldin tawwurt.
37 Amarezg n yiqeddacen-agi ara d-yaf wemεellem-nsen εawzen. A wen-d iniγ tideț, ad ibeddel llebsa, a ten isγim γer ṭṭabla iwakken a sen-yefk ad ččen.

38 Ma yewweḍ-ed di țnaṣfa n yiḍ neγ akteṛ, amarezg-nsen ma yufa-ten-id mazal țṛaǧun-t !
39 Fehmet ayagi : lemmer yeẓra bab n wexxam lweqt i deg ara d-yas umakar, tili a t-iεass ur t-ițțaǧa ara ad ikcem axxam-is.
40 Heggit iman-nwen ula d kunwi imi di lweqt i γef ur tebnim (tedmim) ara a d-yas Mmi-s n bunadem.
41 Buṭrus inṭeq yenna-yas : A Sidi, i nukkni iwumi d-tenniḍ lemtel-agi neγ i lγaci meṛṛa ?
42 Sidna Σisa yerra-yas : Anwa i d lewkil iḥeṛcen i γef yella lețkal, ara iwekkel bab n wexxam γef wayla-s, iwakken ad ifṛeq i yiqeddacen amur-nsen n yirden di lweqt ilaqen ?

43 Amarezg n wuqeddac agi ara d-yaf bab-is ibedd γer cceγl-is !

44 A wen-d-iniγ tideț, a t iwekkel γef wayen akk yesεa.
45 Lameεna aqeddac-nni ma yeqqaṛ deg wul-is : Ť amεellem-iw iεeṭṭel ur d yuγal arať ! Yebda iḥeqqeṛ iqeddacen ț-țqeddacin, yekkat-iten, iteț itess alamma yeskkeṛ.
46 A d-yas umεellem-is deg wass i γef ur yebni ara, di lweqt ur yessin ara, a t-iεaqeb s lmut akken țțuεaqben wid iεuṣan Ṛebbi.
47 Aqeddac yessnen lebγi n bab-is yerna ur t-ixdim ara, ad yečč tiγṛit tameqqrant,

48 ma d win ur nessin ara lebγi n bab-is, ixdem ayen yuklalen tiγṛit, ad yečč tiγṛit tamecṭuḥt. Win iwumi nefka aṭas a s-nessuter aṭas, ma d win i γef nețkel aṭas a neṛǧu deg-s akteṛ.

Sidna Σisa d sebba n beṭṭu

49 Usiγ-ed a d-awiγ yiwet n tmes γer ddunit ! Acḥal γeṣbeγ melmi ara tecεel !

50 Yella yiwen n weγḍas i yi-țṛaǧun... D leεtab ameqqran yerna γeṣbeγ melmi ara d-yas wass-nni !
51 Tγilem d lehna i d-wwiγ γer ddunit ? Xaṭi, d beṭṭu i d-wwiγ !
52 Sya γer zdat ma llan xemsa deg yiwen wexxam, ad bḍun ; tlata a d-kkren γer sin, sin a d-kkren γer tlata.
53 Ababat a d-innaγ d mmi-s, mmi-s a d-yekker γer baba-s ; tayemmaț aț-țennaγ d yelli-s, yelli-s akk-d yemma-s ; tamγaṛt aț-țennaγ ț-țeslit-is, tislit akk-d temγaṛt-is.

Fehmet zzman-agi

54 Sidna Σisa yenna daγen i lγaci : M'ara twalim asigna yekka-d si lγeṛb, teqqaṛem atan a d-tewwet lehwa ; d ayen i gdeṛṛun.
55 M'ara d-iṣuḍ waḍu seg usammer teqqaṛem ad iḥmu lḥal ; d ayen i d-ideṛṛun daγen.
56 Ay at sin wudmawen ! Imi tessnem aț-țεeqlem lḥal n yigenni d lqaεa, amek ur tezmirem ara aț-țεeqlem zzman-agi ?
57 Acuγeṛ ur tețmeyyizem ara s yiman-nwen γef wayen yellan d lḥeqq ?

58 M'ara k-yessiweḍ wexṣim-ik γer ccṛeε, eεṛeḍ a ț-tefruḍ yid-es uqbel aț-țawḍem γer dinna, neγ m'ulac a k-yawi γer lḥakem, lḥakem a k-yefk i uεessas, aεessas a k-iḍeggeṛ γer lḥebs.
59 A k-d-iniγ : ur d-tețțeffγeḍ ara syenna alamma txellṣeḍ aṣurdi aneggaru n ṭlaba-inek.

Ixef 13

Beddlet tikli uqbel aț-țemtem

1 Di lweqt-nni, kra n yemdanen usan-d a s-ḥkun i Sidna Σisa γef kra n yergazen n tmurt n Jlili i genγa Bilaṭus, d wamek issexleḍ dammen-nsen d idammen n iseflawen nsen.
2 Sidna Σisa yenna-yasen : Tγilem belli imezdaγ-agi n Jlili ițțuεetben akka d imednuben akteṛ n wiyaḍ ?

3 Xaṭi, meεna a wen-d-iniγ : m'ur tbeddlem ara tikli aț-țemtem ula d kunwi.
4 Neγ am tmenṭac-nni yergazen yemmuten mi d-yeγli fell-asen ṣṣuṛ n Silwi, tγilem d imednuben akteṛ n imezdaγ nniḍen n temdint n Lquds ?

5 Xaṭi, meεna nniγ-awen : m'ur tbeddlem ara tikli aț-țemtem ula d kunwi.
6 Yewwi-yasen-d lemtel-agi : Yiwen wergaz yesεa taneqleț teẓẓa deg yiger n tẓurin. Yusa-d iwakken a d-ikkes tibexsisin lameεna ur yufi ara.

7 Yenna i uxeddam n yiger-nni : tlata n yiseggasen aya nekk țțaseγ ed iwakken a d-kkseγ lexṛif si tneqleț agi meεna ur d-țțafeγ ara, gzem-iț ihi ! Acuγeṛ ara teṭṭef akal mbla nnfeε ?
8 Axeddam-nni yerra-yas : a Sidi, eǧǧ-iț aț-țernu aseggas-a ; aț-țneqceγ, a s-rreγ leγbaṛ,

9 sya d asawen ma tefka-d lfakya eǧǧ-iț, m'ulac qeleε -iț.

Ḥellu n yiwet n tmeṭṭut deg wass n westeεfu

10 Sidna Σisa yesselmad deg yiwen n lǧameε deg wass n westeεfu.

11 Tella dinna yiwet n tmeṭṭut ihelken tmenṭac yiseggasen aya ; d yiwen uṛuḥani i ț-ikerfen ur tezmir ara aț-țesbedd lqedd-is.

12 Mi ț-iwala Sidna Σisa, iluεa-ț yenna-yas : A tameṭṭut, teḥliḍ seg wekraf-im.
13 Issers ifassen-is fell-as , imiren kan tesbedd lqedd-is, teḥmed Sidi Ṛebbi.

14 Ccix-nni n lǧameε iγaḍ-it lḥal imi i ț-isseḥla Sidna Σisa deg wass n westeεfu, yenna i lγaci : Llan sețța wussan i deg ilaq a nexdem ; aset-ed ihi deg ussan-nni iwakken a kkun-isseḥlu mačči deg wass n westeεfu !
15 Sidna Σisa yerra-yas : Ay at sin wudmawen ! Anwa deg-wen ur d-nețserriḥ i wezger-ines neγ i weγyul-is iwakken a t-yawi a d-isew γas deg wass n westeεfu ?
16 I tmeṭṭut-agi yellan si dderya n Ibṛahim, i gekref Cciṭan tmenṭac n yiseggasen aya, eεni ur ilaq ara a s-nekkes akraf γas akka d ass n westeεfu ?
17 Mi d-yenna imeslayen-agi, ixṣimen-is meṛṛa nneḥcamen ma d lγaci feṛḥen s leεǧayeb i gxeddem.

Aεeqqa n zzerriεa akk-d y iγes n temtunt

18 Yenna daγen : γer wacu i tețțemcabi tgeldit n Ṛebbi ? γer wacu ara ț-metleγ ?

19 Tețțemcabi γer uεeqqa amecṭuḥ n zerriεa n uxerḍel i geẓẓa yiwen wergaz di tebḥirt-is. Mi d-imγi yuγal d ttejṛa, ifṛax n igenni bnan leεcuc deg ifurkawen-is.

20 Yenna daγen : γer wacu i zemreγ ad metleγ tageldit n Ṛebbi ?

21 Tețțemcabi γer ciṭṭuḥ yiγes n temtunt i d-teddem tmeṭṭut, tger-it di tlata lkilat n uwren dγa teǧǧa-t armi yuli meṛṛa.

Kecmet di tewwurt iḍeyqen

22 Deg webrid-is γer temdint n Lquds, Sidna Σisa ițεedday γef temdinin ț-țudrin, isselmad.
23 Isteqsa-t yiwen yenna-yas : A Sidi, drus n yemdanen ara yețțuselken ?
24 Yenna-yasen : Qellbet amek ara tkecmem si tewwurt iḍeyqen ; a wen-d-iniγ : aṭas ara yebγun ad kecmen lameεna ur țțizmiren ara.

25 M'ara d-yekker bab n wexxam ad isekkeṛ tawwurt, wid i d-yufa lḥal di beṛṛa a d-bdun asqeṛbeb ad qqaṛen :

Ť A Sidi ! A Sidi ! Ldi-yaγ tawwurtť ! Nețța a wen-d-yerr : ur kkun-ssineγ ur ẓriγ ansi i d-tekkam !?
26 Kunwi ad as-tinim : Ť anaγ nečča neswa yid-ek, teslemdeḍ deg yizenqan nneγ ! ť

27 Nețța a wen-d-yerr : Nniγ-awen ur kkun-ssineγ ara, beεdet akkin fell-i a kunwi ixeddmen cceṛ !
28 Dinna ara yilin yimeṭṭawen d nndama tameqqrant m'ara twalim Ibṛahim, Isḥaq, Yeεqub akk-d lenbiya di tgelda n yigenwan, ma d kunwi aț-țeqqimem di beṛṛa.
29 A d-asen si cceṛq d lγeṛb, seg umalu d usammer, ad ṭṭfen imukan di tmeγṛa n tgelda n igenwan.
30 Imiren ad ilin ineggura ara yuγalen d imezwura, am akken daγen ara yilin imezwura ara yuγalen d ineggura.

Sidna Σisa yeṭṭef abrid γer temdint n Lquds

31 Di teswiεt-nni, kra n ifariziyen usan-d γer Sidna Σisa nnan-as : Ṛuḥ tixxeṛ syagi, atan Hiṛudus ițqellib a k-ineγ.
32 Yenna-yasen : Ṛuḥet init-as i wuccen-agi : ass-a d uzekka ad ssufγeγ leǧnun, ad sseḥluγ imuḍan , ass wis tlata ad fakeγ cceγl-iw.
33 Lameεna ilaq ad kemmleγ tikli-inu ass-a, azekka d sellazekka, axaṭer ur s-ilaq ara i nnbi ad immet beṛṛa n temdint n Lquds.
34 A tamdint n Lquds ! A tamdint n Lquds ineqqen lenbiya, iṛeǧǧmen wid i m-d-ițwaceggεen s γur Ṛebbi ! Acḥal d abrid i εerḍeγ a d-jemεeγ arraw-im am tyaziṭ i d-ijemεen ifṛax-is seddaw wafriwen-is, lameεna ur tebγim ara.

35 Atan ihi, axxam-nwen ad ixlu yerna nniγ-awen, ur iyi-tẓerrem ara alamma d asmi ara tinim : Ad ițțubarek win i d-yusan s yisem n Sidi Ṛebbi.

Ixef 14

Aseḥlu deg wass n westeεfu

1 Yiwen wass yellan d ass n westeεfu, Sidna Σisa illa yețwaεreḍ γer wexxam n yiwen seg yimeqqranen n yifariziyen iwakken ad yefteṛ. Wid yellan dinna țεassan-t d acu ara yexdem.

2 Yella dinna yiwen wergaz yesεan lehlak n ubezzug.

3 Sidna Σisa yenṭeq γer lεulama n ccariεa d yifariziyen yenna-yasen : D acu twalam ? D leḥlal win ara isseḥlun deg wass n westeεfu neγ ala ?
4 Imi yiwen deg-sen ur d-yenṭiq, Sidna Σisa iqeṛṛeb γer umuḍin-nni, yesseḥla-t, iserreḥ-as ad iṛuḥ.

5 Dγa yenna i wiyaḍ : Anwa deg-wen ma yeγli-yas mmi-s neγ wezger-ines γer lbir, ur t-id-ițekkes ara γas ma d ass n westeεfu ?
6 Yiwen ur izmir a s-d-yerr awal.

Lemtel n wemkan amezwaru

7 Mi gwala wid yețwaεerḍen bdan țextiṛin imukan imezwura, Sidna Σisa yewwi-yasen-d lemtel-agi yenna yasen :
8 M'ara k-id-yeεreḍ yiwen γer tmeγṛa, γurek ur țțaṭṭaf ara amkan amezwaru ! Axaṭer yezmer ad yili yiwen ger inebgawen yesεan leqdeṛ akteṛ-ik,

9 a d-yas win i kkun-iεerḍen i sin a k-yini : Ť eǧǧ-as amkan-nni i wagi ! ť Imiren aț-țenneḥcameḍ, aț-țṛuḥeḍ aț-țeṭṭfeḍ amkan aneggaru.
10 Lameεna m'ara tețwaεeṛḍeḍ, ṭṭef amkan aneggaru iwakken m'ara d-yas win i k-id-iεerḍen, a k-yini : Ť ay aḥbib εeddi-d γer zdat ! ť Imiren aț-țesεuḍ leqdeṛ zdat inebgawen meṛṛa.
11 Axaṭer kra n win yessalayen iman-is a t-id-yessers Ṛebbi , ma d win yesrusuyen iman-is a t-yerfed.

12 Yenna daγen i win i t-id iεeṛḍen : M'ara tebγuḍ aț-țseččeḍ, ur d-εeṛṛeḍ ara imdukkal-ik neγ atmaten ik, ur d-εeṛṛeḍ ara imawlan-ik neγ lǧiran-ik imeṛkantiyen ; m'ulac a k εerḍen ula d nutni iwakken a k-d-rren lxiṛ-ik.
13 Lameεna m'ara txedmeḍ tameγṛa, εṛeḍ-ed igellilen, ineεyuba, iquḍaren d yiderγalen.

14 Ili-k di lfeṛḥ imi ur zmiren ara a k-d-rren lxiṛ-ik, axaṭer lxiṛ-ik a k-id-yuγal asm'ara d-ḥyun wid yellan d iḥeqqiyen γer Ṛebbi.

Lemtel n inebgawen

15 Mi gesla i imeslayen-agi, yiwen seg inebgawen inṭeq-ed yenna i Sidna Σisa : Amasseεd n win ara yeččen tiremt di tgelda n yigenwan!
16 Sidna Σisa yerra-yas : Yiwen wergaz ixdem imensi, iεreḍ-ed aṭas lγaci.

17 Lweqt n imensi, iceggeε aqeddac-is iwakken ad yini i inebgawen : aset-ed ! Kullec iwjed !

18 Akken ma llan ufan-d sebba. Amezwaru yenna-yas : Ť aql-i uγeγ iger, ilaq ad ṛuḥeγ a t-id-ẓreγ , di leεnaya-k semmeḥ-iyi ť.

19 Wayeḍ yenna-yas : Ť aql-i uγeγ-d xemsa n tyugiwin n yezgaren bγiγ ad ṛuḥeγ a tent-εerḍeγ, di leεnaya-k semmeḥ iyi ť.

20 Wayeḍ daγen yenna-yas : Ť tura kan i zewǧeγ, ulamek ara d aseγ ť.
21 Mi d-yuγal uqeddac γer umεellem-is, yeḥka-yas ayen akk i s-d-nnan. Bab n wexxam yerfa, yenna i uqeddac-is : Ť azzel, ṛuḥ γer yiberdan d yizenqan n temdint, tεeṛḍeḍ-ed iẓawaliyen, ineεyuba, iderγalen d iquḍaren ť.

22 Mi d-yuγal uqeddac-nni yenna-yas : a Sidi, ayen i yi-d-tenniḍ xedmeγ-t yerna mazal llan imukan.

23 Amεellem yenna i uqeddac is : Ť effeγ γer iberdan n tudrin d lexlawi ; wid akk ara tafeḍ, ḥṛeṣ-iten a d asen iwakken ad iččaṛ wexxam-iw. ť
24 Atan nniγ-awen : ula d yiwen seg wid-nni yețwaεerḍen d imezwura ur iεerreḍ imensi-inu.
Win yebγan ad yetbeε Sidna Σisa
25 Aṭas n lγaci i geddan d Sidna Σisa. Yezzi γur-sen yenna-yasen :
26 Kra n win ara d-yasen γur-i, ma iḥemmel baba-s d yemma-s neγ tameṭṭut-is d warraw-is neγ ayetma-s d yessetma-s neγ iḥemmel iman-is akteṛ-iw, ur izmir ara ad yili d anelmad-iw.
27 Kra n win ur neqbil ara ad yeεteb γef ddemma n yisem-iw yerna ur iyi-d-itbiε ara, ur izmir ara ad yili d anelmad-iw.
28 Anwa deg-wen ma yebγa ad ibnu lbeṛǧ, ur yețγimi ara ad ixdem uqbel leḥsab-is, iwakken ad iẓer ma yezmer a t-ifak ?

29 Axaṭer ma yebda lsas yeǧǧa-t akken, kra n wid ara t-iẓren ad stehzin fell-as ad inin :

30 argaz-agi yebda lsas ur izmir ad ikemmel lebni.
31 Neγ anwa agellid ara yekkren ad innaγ d ugellid nniḍen, ur ixeddem ara uqbel leḥsab iwakken ad iẓer ma yezmer ad iqabel s εecṛa alaf iεsekṛiwen win i d-iteddun γur-es s εecrin alef iεsekriwen ?
32 Ma iwala ur s-izmir ara, ad iceggeε γur-es uqbel a d-yaweḍ, iwakken ad ifru yid-es tamsalt s lehna.
33 S wakka, yiwen ur yezmir ad yili d anelmad-iw m'ur yeqbil ara ad yeǧǧ ayen akk yesεa.
34 Lmelḥ d ayen yelhan, lameεna ma tṛuḥ-as lbenna-s amek ara s-ț-id-nerr ?
35 Ur yelhi i wakal, ur yelhi i leγbaṛ, ilaq kan a t-nḍeggeṛ γer beṛṛa. Win yesεan imeẓẓuγen isellen, isel-ed !

Ixef 15

Tixsi iεeṛqen

1 Imekkasen n tebzert akk-d yir imdanen țțasen-d γer Sidna Σisa iwakken a s-slen.
2 Ifariziyen d lεulama n ccariεa iγaḍ-iten lḥal qqaṛen wway garasen : Ť argaz-agi yesṭerḥib s imednuben yerna yețγimi yid-sen γer lmakla ť.
3 Dγa Sidna Σisa yewwi-yasen-d lemtel-agi :
4 Anwa deg-wen ma yesεa meyya wulli tṛuḥ-as yiwet deg-sent, ur yețțaǧa ara di lexla țesεa uțesεin nniḍen akken ad iṛuḥ a d-inadi γef tin i s-iεeṛqen alamma yufa-ț ?
5 M'ara ț-yaf, a ț-id-ibibb γef tuyat-is s lfeṛḥ.
6 M'ara d-yaweḍ γer wexxam, ad issiwel i imdukkal-is d lǧiran-is, a sen-yini : feṛḥet yid-i, atan ufiγ tixsi-nni i yi-iεeṛqen.
7 S wakka nniγ-awen : ad yili lfeṛḥ d ameqqran deg igenni γef yiwen umednub i d-yuγalen γer webrid wala γef țesεa uțesεin nniḍen ur neεṛiq ara. Tawizeț iεeṛqen
8 Neγ anta tameṭṭut ma tesεa εecṛa n twiztin tṛuḥ-as yiwet, ur tceεεel ara taftilt, ur tberrez ara axxam akken aț-țqelleb fell-as alamma tufa-ț ?
9 Mi ț-tufa aț-țessiwel i tmeddukal-is ț-țǧiratin-is a sent-tini : ufiγ tawizeț-nni i yi-ṛuḥen ! Feṛḥemt yid-i !
10 S wakka a wen-d-iniγ : yețțili lfeṛḥ d ameqqran γer lmalayekkat γef yiwen umednub i d-yuγalen γer webrid. Aqcic i d-yuγalen γer baba-s
11 Yenna-yasen daγen : Yiwen wergaz yesεa sin warrac.

12 Ameẓyan deg-sen yenna i baba-s : a baba, efk-iyi-d amur i yi-d-iṣaḥen deg wayla-k. Dγa baba-s yefka-yas amur-is.
13 Mi Σeddan kra n wussan, ikker ameẓyan-nni ijmeε-ed akk amur-is, izzenz-it, ibeddel tamurt, iṛuḥ γer yiwet n tmurt ibeεden.
Dinna yewwi-t zzhu, yesṛuḥ ayen akk yesεa.

14 Mi i gṣeṛṛef akk idrimen is, yeγli-d laẓ d ameqqran di tmurt nni, ula d nețța yuγal yelluẓ.

15 Yufa lxedma γer yiwen umezdaγ n tmurt nni, iceggeε-it ad yeks taqeḍεit n yilfan.
16 Acḥal imenna ad yečč ulamma d axeṛṛub-nni i tețțen yilfan-nni, meεna yiwen ur as-d-yefki.
17 Ihi yebda yețxemmim deg iman-is yenna : Ť acḥal n ixeddamen yellan γer baba ṛwan aγṛum, nekk yenγa-yi laẓ dagi.
18 Ad kkreγ kan ad uγaleγ γer baba, a s-iniγ : a baba εuṣaγ Ṛebbi erniγ-k keččini ;

19 ur uklaleγ ara ad iliγ d mmi-k, ḥseb-iyi am yiwen seg ixeddamen-ik ť
20 Ikker iṛuḥ γer baba-s. Akken qṛib ad yaweḍ γer wexxam, baba-s iεqel-it-id si lebεid, iγaḍ-it, yuzzel-ed γur-es.

Yeṭṭef-it ger iγallen-is isellem fell-as.
21 Mmi-s yenna-yas :
Ť a baba, εuṣaγ Ṛebbi rniγ-k keččini, ur uklaleγ ara a yi-tḥesbeḍ d mmi-k ť.

22 Lameεna baba-s ikker yenna i iqeddacen-is :
Ť γiwlet awit-ed abeṛnus-nni n leḥrir selset-as-t, qnet-as taxatemt i uḍaḍ-is ternum-as isebbaḍen i iḍaṛṛen-is.
23 Awit-ed agenduz-nni yeṭṭuqten tezlum-t a t-nečč, a nexdem tameγṛa ;

24 axaṭer mmi-nni i ḥesbeγ yemmut yuγal-ed idder, yella yeεṛeq tura iban-ed ť.
Dγa bdan tameγṛa.
25 Mmi-s amenzu yella di lexla. Mi d-yuγal, akken qṛib a d-yaweḍ γer wexxam, yesla i ccna d ccḍeḥ.
26 Yessawel i yiwen seg iqeddacen, isteqsa-t γef wayen yedṛan.

27 Aqeddac nni yenna-yas :
Ť d gma-k i d-yuγalen, baba-k ifṛeḥ aṭas imi i d-yuγal di lehna, yezla-yas agenduz-nni yeṭṭuqten.
28 Mi gesla i yimeslayen-nni, yerfa yugi ad ikcem γer wexxam. Baba-s yeffeγ a t-iḥellel iwakken ad ikcem,

29 lameεna nețța yenna-yas : Ť acḥal iseggasen nekk qeddceγ fell-ak, ula d yiwen webrid ur εuṣaγ awal-ik, leεmeṛ ur iyi-tefkiḍ ula d yiwen yiγid a t-zluγ iwakken ad feṛḥeγ d imdukkal-iw.

30 ma d mmi-k-agi i gesṛuḥen ayen akk yesεa γef yir tilawin, i nețța tezliḍ agenduz-nni yeṭṭuqten ! ť
31 Ikker baba-s yenna-yas : A mmi, kečč kull ass tețțiliḍ yid-i, ayen akk sεiγ d ayla-k.
32 Lameεna ilaq-aγ a nefṛeḥ axaṭer gma-k i ḥesbeγ yemmut atan yuγal-ed idder, yella ijaḥ, tura iban-ed.

Ixef 16

Leṛẓaq n ddunit-agi

1 Sidna Σisa yenna daγen i inelmaden-is : Yiwen wergaz d ameṛkanti yesεa lewkil ; lewkil-agi ccetkan fell-as γer umεellem-is nnan-as : Ť lewkil-ik ițḍeggiε ayla-k ť.
2 Amεellem-is issawel-as yenna yas : Ť d acu-ten imeslayen-agi i sliγ fell-ak ? Efk-iyi-d leḥsab γef wayen akk i d-teskecmeḍ d wayen i tessufγeḍ, axaṭer sya d asawen ur tețțiliḍ ara d lewkil-iw ť.

3 Lewkil-agi ixemmem deg iman-is yenna : d acu ara xedmeγ imi amεellem-iw ad iyi ikkes amkan-iw ? Ad xedmeγ akal... Ur zmireγ ara ! Ad țreγ.... ssetḥaγ !

4 ?riγ d acu ara xedmeγ, iwakken m'ara yi-istixxeṛ umεellem-iw, ad afeγ wid ara yi-iεiwnen !
5 Yessawel-asen yiwen yiwen i wid akk yesεan ṭṭlaba γer umεellem-is. Yenna i umezwaru : Ť Acḥal i k-ițalas umεellem-iw ? ť
6 Argaz-nni yerra-yas-d : Ť Meyya yecbuyla n zzit uzemmur. ť Yenna-yas : Ť sellek awi-d leḥsab ik, qqim taruḍ xemsin ť.
7 Yenna daγen i wayeḍ : Ť i keččini, acḥal i k-ițalas ? ť Yenna-yas-d : Ť meyya tcekkaṛin n yirden. ť Yenna-yas : Ť awi-d leḥsab-ik, qqim taruḍ tmanyinť.
8 Amεellem n lewkil-nni axeddaε icekkeṛ-it γef tiḥeṛci-ines axaṭer arraw n ddunit-agi ḥeṛcen di lecγal wway gar-asen akteṛ n warraw n tafat.
9 Ma d nekk atan a wen-d iniγ: sxedmet adrim n ddunit-agi iwakken aț-țesεum imdukkal, s wakka asm'ara yefnu cci n ddunit, aț-țețțuqeblem di tmezduγin n dayem.
10 Ma nesεa laman deg yiwen γef tγawsiwin timecṭuḥin, a nețkel fell-as ula γef tmeqqranin ; win yellan d axeddaε di tγawsiwin timecṭuḥin, ad yili d axeddaε ula di tmeqqranin.
11 Ma yella tețḍeggiεem leṛẓaq n ddunit-agi, anwa ara kkun-iwekklen γef leṛẓaq n tideț ?
12 Ma yella ulac daγen laman deg-wen γef wayen i wen-iwekkel walebεaḍ, amek ara wen-d-yefk Sidi Ṛebbi ayen i wen-ihegga i kunwi ?

Wid iḥemmlen cci n ddunit

13 Ulac aqeddac ara iqedcen γef sin yemεellmen : ma iḥemmel yiwen ad ikṛeh wayeḍ neγ ma yeṭṭef deg yiwen ur yețțak ara lqima i wayeḍ. Ur tezmirem ara aț-țqedcem γef Ṛebbi ma yella tettabaεem leṛẓaq n ddunit agi.
14 Ifariziyen i gesmeḥsisen i wayen i d-iqqaṛ Sidna Σisa, stehzayen fell-as axaṭer nutni ḥemmlen idrimen ;

15 ma d nețța yenna-yasen : Tesbegginem-d iman-nwen d iḥeqqiyen zdat medden, meεna Sidi Ṛebbi yessen ulawen-nwen ; ayen yesεan ccan γer yemdanen di ddunit-agi, d ayen yețwakeṛhen γer Sidi Ṛebbi.
16 Uqbel lweqt n Yeḥya aγeṭṭas, kullec iteddu s ccariεa n Musa d wayen i d-xebbṛen lenbiya. Tura, lexbaṛ n lxiṛ yeεnan tgelda n Ṛebbi ițțubecceṛ ; mkul yiwen yekkat amek ara ț-ikcem s ddreε.

17 Yeshel i igenni d lqaεa ad fnun, ma d ccariεa n Sidi Ṛebbi ur ițțanqas seg-s ula d yiwen n usekkil.

18 Kra n win ara yebrun i tmeṭṭut-is iεawed zzwaǧ, yezna ; kra n win ara yaγen tameṭṭut yennebran, yezna daγen.

Laεẓar d umeṛkanti

19 Yiwen wergaz d ameṛkanti, ițlusu anagar llebsa ifazen n leḥrir aṛqaq ; mkul ass ixeddem tameγṛa, ițεici di zzhu d lfeṛḥ.
20 Yiwen igellil isem-is Laεẓar, iččuṛ d ideddiyen, ițγimi γer tewwurt n umeṛkanti-nni,

21 iṭṭamaε deg-s ad yečč γas d ayen i gγellin γer lqaεa ; ula d iqjan țțasen-d ad mecḥen ideddiyen-is.
22 Asmi yemmut uẓawali-nni, ddment-eț lmalayekkat wwint-eț γer igenni γer wanda yella Ibṛahim. Ameṛkanti-nni yemmut ula d nețța, meḍlen-t.

23 Di laxeṛt yenεețțab aṭas, yerfed allen-is, iwala mebεid Ibṛahim akk-d Laεẓar γer tama-s.
24 Iεeggeḍ yenna-yas : Ť A baba Ibṛahim, ḥunn fell-i ceggeε-ed Laεẓar ad iger ulamma d ixef n uḍad-is deg waman ad issismeḍ iles-iw, aql-i nneεtabeγ aṭas deg uḥǧaǧu-yagi n tmes. ť
25 Ibṛahim yerra-yas :
A mmi, mmekti-d belli tewwiḍ amur-ik di ddunit ; ma d Laεẓar yeṛwa lehmum. Tura nețța yețțuṣebbeṛ yufa dagi lfeṛḥ, kečč iṣaḥ-ik-id lqeṛḥ.

26 Yerna yella gar-aneγ yiwen yeγzeṛ annect ila-t, wid yebγan ad zegren sya γur-wen, ur zmiren ara ; kunwi daγen ur tezmirem ara a d-zegrem γur-nneγ.
27 Ameṛkanti-nni yenna-yas : Ihi a baba Ibṛahim di leεnaya-k ceggeε Laεẓar γer wexxam n baba ;

28 ad iεeggen i xemsa-nni wayetma, iwakken ur d-țțasen ara ula d nutni γer wemkan-agi n leεtab.
29 Ibṛahim yerra-yas : Atmaten-ik γur-sen ccariεa n Musa d lenbiya, a ten-tebεen !
30 Ameṛkanti-nni yenna-yas-d : A baba Ibṛahim, ur țḥessisen ara i ccariεa d lenbiya lameεna ma yuγal γur-sen yiwen syagi, ad beddlen tikli.
31 Ibṛahim yerra-yas : M'ur semḥessen ara i ccariεa n Musa d lenbiya, atan γas ma yuγal yiwen si lmegtin ur as-smeḥsisen ara.

Ixef 17

γur-ek aț-țiliḍ d sebba n tuccḍa!

1 Sidna Σisa yenna i inelmaden is imeslayen-agi : D lmuḥal ur d-țilint ara sebbat ara yesseγlin imdanen di ddnub. A nnger n win ara yilin d sebba n uγelluy ;

2 axiṛ a s-εelqen aγaṛef n tsirt γer temgeṛṭ-is, a t-ḍeggṛen γer lebḥeṛ wala ad yesseγli di ddnub yiwen seg imecṭuḥen-agi.
3 Ḥadret γef yiman-nwen ! Ma yeḍlem gma-k ssefhem-it, ma yendem deg wayen ixdem semmeḥ as.

4 Γas ma yeḍlem-ik sebεa iberdan deg wass, ma yusa-d γur-ek sebεa tikkal a k-d-yini : Ť aql-i ndemmeγ deg wayen xedmeγ ť, ilaq a s tsemmḥeḍ. Liman
5 Ṛṛusul n Sidna Σisa nnan-as : A Sidi ssemγeṛ liman-nneγ !
6 Sidna Σisa yerra-yasen : Lemmer tesεam liman ulamma annect n uεeqqa n yired, aț-țizmirem aț-ținim i ttejṛa-yagi n țut qleε sya tṛuḥeḍ aț-țeẓẓuḍ iman-im di lebḥeṛ, a wen-taγ awal.
7 Anwa deg-wen ara yesεun axeddam ikerrzen neγ ikessen lmal, ara s-yinin m'ara d-yuγal si lexla :
Ť lεeslama-inek, qqim aț-țesteεfuḍ, tura a k-d-awiγ aț-țeččeḍ ť.

8 Mačči akka ara s-yini, meεna a s-yini : Ť γiwel beddel lqecc-ik tawiḍ-iyi-d ad ččeγ ad sweγ, mi ččiγ ṛwiγ,

imiren aț-țeččeḍ aț-țesweḍ ula d keččini. ť
9 Eεni ad icekkeṛ axeddam-is imi gexdem ayen i s-yumeṛ ?

10 Kunwi daγen m'ara txedmem ayen i wen-d yețwamṛen, init : d iqeddacen kan i nella, nexdem ayen ilaqen a t-nexdem.

Ḥellu n εecṛa yemdanen ihelken lbeṛs

11 Deg webrid-is γer temdint n Lquds, Sidna Σisa iεedda ger tmurt n Samarya akk ț-țmurt n Jlili.

12 Mi gekcem γer yiwet n taddart, mmugren t-id εecṛa imuḍan ihelken lbeṛs, bedden mebεid

13 εeggḍen nnan-as : A Sidna Σisa ! A Sidi ḥunn fell-aγ !
14 Mi ten-iwala, Sidna Σisa yenna yasen : Ṛuḥet a kkun-walin lmuqedmin, a d-cehden belli teḥlam.
Deg webrid-nsen mi ṛuḥen, akken walan iman-nsen ḥlan ṣfan,

15 yiwen deg-sen yuγal-ed seg webrid-nni yețḥemmid Ṛebbi s kra yellan di taγect-is.

16 Yusa-d yeγli γer iḍaṛṛen n Sidna Σisa, iseǧǧed zdat-es, icekkeṛ-it, yerna argaz-agi d aṣamari i gella.

17 Sidna Σisa yenna i lγaci : Eεni ur ḥlin ara di εecṛa yid-sen ? I țesεa nniḍen anda llan ?

18 Anagar abeṛṛani-agi i d-yuγalen ad yeḥmed Ṛebbi !
19 Dγa yenna i usamari-nni : Kker fell-ak uγal γer wexxam ik, imi tumneḍ yis-i, tețțusellkeḍ.

Tageldit n Ṛebbi

20 Ifariziyen steqsan Sidna Σisa melmi ara d-tas lḥekma n tgeldit n Sidi Ṛebbi. Sidna Σisa yerra-yasen :
Lḥekma n Sidi Ṛebbi mačči d ayen țwalint wallen.

21 Ur nezmir ara a d-nini : ațan dagi neγ ațan dihin, axaṭer lḥekma n Sidi Ṛebbi ațan gar-wen.
22 Sidna Σisa yenna i inelmaden-is : A d-yas lweqt i deg ara tmennim aț-țeẓrem Mmi-s n bunadem ulamma

d yiwen wass lameεna ur kkun-id-ițṣaḥ ara.

23 Imiren ma nnan-awen-d : atah dagi neγ atan dihin ur țṛuḥut ara, ur țțazzalet ara,

24 axaṭer am lebṛaq m'ara yewwet seg yixef n igenni γer wayeḍ, akken ara yili Mmi-s n bunadem ass n tuγalin-is.

25 Tazwara ilaq ad yeεteb aṭas, yerna lǧil-agi ur t-iqebbel ara.
26 D ayen yedṛan di zzman n Nuḥ ara yedṛun deg ussan n tuγalin n Mmi-s n bunadem.
27 Imdanen llan tețțen, țessen, țemyezwaǧen, zeggjen i dderya-nsen, armi d asmi yekcem Nuḥ γer lbabuṛ ; yewwet-ed uḥemmal, neflen-d waman γef ddunit, imdanen meṛṛa mmuten.
28 D ayen yedṛan di zzman n Luṭ ara yedṛun daγen : imdanen tețțen tessen, țțaγen znuzun, țeẓẓun, bennun ;

29 asmi d-yeffeγ Luṭ si temdint n Ṣudum, teγli-d seg igenni tmes d ukebri i ten-isnegren akk.

30 Akken ara d-tedṛu asm'ara d-iban Mmi-s n bunadem.
31 Ass-nni win ara yilin sufella n wexxam ur ilaq ara ad yekcem a d-iddem lqecc-is ; win i d-yufa lḥal di lexla ur ilaq ara ad yuγal γer deffir ;

32 mmektit-ed tameṭṭut n Luṭ.
33 Win ara yebγun ad isellek tudert-is ad a s-tṛuḥ, win iwumi ara tṛuḥ γef ddemma n yisem-iw a ț-isellek.
34 Qqaṛeγ-awen : deg iḍ-nni, ger sin ara yilin deg yiwen wusu, yiwen ad ițwarfed wayeḍ a d-yeqqim.
35 Ger snat n tilawin yeẓẓaden, yiwet aț-țețwarfed tayeḍ a d-teqqim.

36 Ger sin yergazen ara yilin di lexla, yiwen ad ițwarfed wayeḍ a d-yeqqim.

37 Inelmaden-is steqsan-t nnan-as : Anda ara yedṛu wayagi a Sidi ? Yenna-yasen : Anda yella umurḍus, dinna ara a d-nejmaεen igudar.

Ixef 18

Taǧǧalt d lqaḍi

1 Sidna Σisa yewwi-yasen-d lemtel-agi iwakken ad deεεun daymen γer Sidi Ṛebbi ur feččlen ara.

2 Yenna-yasen : Deg yiwet n temdint yella yiwen lqaḍi, ur ițțagad Ṛebbi ur yețqadaṛ imdanen.

3 Di temdint-nni tella daγen yiwet n taǧǧalt tețṛuḥu γur-es, teqqaṛ-as : Ť eḥkem s lḥeqq gar-i d wexṣim-iw. ť
4 Aṭas i geqqim yegguma a s-yefk lḥeqq, meεna ixemmem deg yiman-is yenna : Ť taǧǧalt-agi eεyiγ deg-es ! Γas ur țțaggadeγ Ṛebbi ur ḥsibeγ yiwen

5 a s-fkeγ lḥeqq akken ur d-tețțuγal ara a yi-teṛṛeẓ aqeṛṛuy-iw. ť
6 Dγa Sidna Σisa yenna : Twalam ayen i d-yenna lqaḍi agi amesbaṭli !

7 Amek Sidi Ṛebbi ur d-yețțak ara lḥeqq i wid i gextaṛ, i gețεeggiḍen γur-es am yiḍ am ass ? A wen-d-iniγ : ur yețεeṭṭil ara iwakken a ten-iεiwen, a sen-yefk lḥeqq.
8 Meεna Mmi-s n bunadem asm'ara d-yas, wissen ma d-yaf liman di ddunit ?

Lemtel n ufarizi d umekkas

9 Yenna-d daγen lemtel-agi γef kra n yemdanen iḥesben iman-nsen d iḥeqqiyen γer Ṛebbi, iḥeqqṛen wiyaḍ :
10 Sin yergazen ulin γer lǧameε ad ẓallen ; yiwen (d ccix n lǧameε) n ukabar n ifariziyen, wayeḍ d amekkas

(ixeddmen γer iṛumaniyen istεemṛen tamurt).
11 Afarizi ibedd yețẓalla yeqqaṛ deg iman-is : a k-ḥemdeγ a k-cekkṛeγ a Sidi Ṛebbi imi ur lliγ ara am wid yellan d imcumen, d ixeddaεen, yețεicin di zzna ; a k-cekkṛeγ daγen imi ur lliγ ara am umekkas-agi.
12 Țțuẓumeγ sin wussan di dduṛt, țțakeγ leεcuṛ seg wayen sεiγ.
13 Amekkas-nni ibedd mebεid, issetḥa ad yerfed ula d allen-is γer igenni, yekkat deg idmaren-is yeqqaṛ : Ť a Sidi Ṛebbi, ḥunn fell-i nekk yellan d amednub ! ť
14 A wen-d-iniγ : amekkas-nni yuγal γer wexxam-is di lehna, yețwaqbel γer Sidi Ṛebbi, ma d afarizi-nni ur yețwaqbel ara. Kra n win yessimγuren iman-is a t-id-isres Sidi Ṛebbi ; ma d win yessimẓiyen iman-is a t-issaεli.

Tagelda n Sidi Ṛebbi d warrac imeẓyanen

15 Lγaci țțawin-as-ed ula d llufanat iwakken ad issers afus-is fell-asen a ten-ibarek. Inelmaden-is mi walan ayagi, țnaγen-ten.

16 Sidna Σisa issawel asen-d yenna : Anfet-asen i warrac imeẓyanen a d-asen γur-i ur ten-țțarrat ara, axaṭer tagelda n Ṛebbi tețwahegga i wid yellan am nutni.

17 A wen-iniγ tideț : kra n win ur neqbil ara tageldit n Sidi Ṛebbi am weqcic ameẓyan, ur ț-ikeččem ara.

Tageldit n Sidi Ṛebbi d umeṛkanti

18 Yiwen umeṛkanti isteqsa Sidna Σisa yenna-yas : Ay argaz n lεali, d acu i yi ilaqen a t-xedmeγ iwakken ad sεuγ tudert n dayem ?
19 Sidna Σisa yenna-yas : Acuγeṛ i yi-d-tenniḍ Ť ay argaz lεali ť ? Ulac win yellan d lεali-t anagar Sidi Ṛebbi !

20 Tessneḍ ayen i d-tenna ccariεa n Musa : ur xeddem ara zzna, ur neqq ara, ur țțaker ara, ur țcehhid ara s ẓẓur, qadeṛ baba-k d yemma-k.
21 Argaz-nni yenna-yas : Ayagi akk xeddmeγ-t seg wasmi lliγ d ameẓyan.
22 Mi gesla Sidna Σisa i imeslayen agi, yenna-yas : Ihi txuṣṣ-ik yiwet lḥaǧa kan : ṛuḥ zzenz ayen akk tesεiḍ, seddeq-it i yigellilen iwakken aț-țesεuḍ agerruj deg igenni, tuγaleḍ-ed aț-țedduḍ yid-i.
23 Argaz-nni mi gesla i yimeslayen-agi yeγli-d fell-as leḥzen imi d ameṛkanti i gella.

24 Mi t-iwala yeḥzen, Sidna Σisa yenna : Acḥal i sen-yewεeṛ i wid yesεan cci ad kecmen γer tgelda n Sidi Ṛebbi !

25 Ishel i welγem ad iεeddi di tiṭ n tissegnit wala i umeṛkanti ad yekcem γer tgelda n Sidi Ṛebbi.
26 Wid i s-yeslan, nnan-as : Anwa i gzemren ad ițțusellek ?
27 Sidna Σisa yerra-yasen : Ayen yellan d lmuḥal i wemdan yeshel γer Sidi Ṛebbi.
28 Buṭrus yenna-yas : I nukkni yeǧǧan kullec iwakken a neddu yid-ek ?
29 Sidna Σisa yenna-yasen : A wen-iniγ tideț : kra n win yeǧǧan axxam-is, tameṭṭut-is, ayetma- s, imawlan-is neγ arraw-is γef ddemma n tgeldit n Ṛebbi,

30 a s-d-ițunefk di ddunit-agi akteṛ n wayen yeǧǧa yerna γer zdat, ad yesεu tudert n dayem.

31 Sidna Σisa ijmeε-ed γur-es tnac-nni inelmaden-is yenna-yasen : Aql-aγ a nali γer temdint n Lquds, ad idṛu wayen akk i d-uran lenbiya γef wayen yeεnan Mmi-s n bunadem.

32 Ad ițțusellem ger ifassen n lkeffaṛ, ad ḍsen fell-as, ad kksen fell-as sser, a t-ssusfen.

33 A t-wwten s ujelkkaḍ ( s ucelliṭ ), a t-enγen ; ass wis tlata a d-iḥyu si ger lmegtin.

34 Inelmaden-is ur fhimen acemma deg wayen i sen-d-yenna, lmeεna n imeslayen-agi tețwaffer fell-asen. Ur ẓrin ara d acu i gebγa a t-id-yini.

Sidna Σisa yerra-d iẓri i uderγal di temdint n Yiriku

35 Akken qṛib ad yaweḍ Sidna Σisa γer temdint n Yiriku, yiwen uderγal yeqqim rrif n webrid yessutur tin n Ṛebbi.
36 Mi gesla i lγaci țεeddayen, yesteqsa d acu i gedṛan ;

37 nnan-as belli d Σisa Anaṣari i d-iεeddan.

38 Dγa iεeggeḍ yenna : A Σisa, a mmi-s n Sidna Dawed, ḥunn fell-i !
39 Wid yezwaren țdemmiren-t γer deffir qqaṛen-as : Ssusem a k-ihdu Ṛebbi ! Meεna nețța yețεeggiḍ akteṛ : A mmi-s n Sidna Dawed, ḥunn fell-i !
40 Sidna Σisa yeḥbes, yefka lameṛ a s-t-id-awin. Mi d-yewweḍ γur-es, yenna-yas :
41 D acu tebγiḍ a k-t-xedmeγ ? Yerra-yas-d : A Sidi, bγiγ a yi-d-yuγal yeẓri !
42 Sidna Σisa yenna-yas : Wali ! Imi tumneḍ yis-i atan tețțusellkeḍ.

43 Imiren kan yuγal-it-id yeẓri yețwali, yedda d Sidna Σisa, iḥemmed Ṛebbi. Mi walan ayagi, lγaci meṛṛa ḥemden Ṛebbi.

Ixef 19

Sidna Σisa akk-d Zaci

1 Sidna Σisa iεedda si temdint n Yiriku.

2 Yella dinna yiwen umeṛkanti isem-is Zaci, d ameqqran n imekkasen n ddewla.

3 Yebγa ad iẓer anwa i d Sidna Σisa lameεna ur yezmir ara a t-iwali imi aṭas lγaci i gellan, yerna nețța d awezlan.

4 Yuzzel γer zdat, yuli γef ttejṛa iwakken a t-iwali m'ara d-iεeddi syenna.

5 Mi gewweḍ Sidna Σisa γer wemkan-nni, yerfed allen-is yenna i Zaci : A Zaci, γiwel ers-ed syenna, γur-ek ara nseγ ass-agi.
6 Zaci yers-ed s lemγawla ad yesteṛḥeb s Sidna Σisa.

7 Lγaci mi walan ayagi smermugen wway gar asen qqaṛen : Ť γer yiwen umekkas (axeddaε) am wagi ara yens ! ť
8 Zaci iqeṛṛeb-ed γer Sidna Σisa, yenna-yas : A Sidi, atan ad fkeγ i igellilen azgen n wayen sεiγ, yerna ma ḍelmeγ yiwen a s-rreγ ṛebεa imuren.
9 Sidna Σisa yenna-yas : Ass-agi leslak ikcem-ed axxam agi, imi argaz-agi ula d nețța d mmi-s n Ibṛahim.
10 Axaṭer Mmi-s n bunadem yusa-d ad inadi γef wid iḍaεen, a ten-isellek.

11 Sidna Σisa yerna-d yiwen n lemtel i wid i s ismeḥsisen, axaṭer qṛib ad awḍen γer temdint n Lquds, lγaci γilen imiren kan ara d-tas tgeldit n Sidi Ṛebbi.

12 Yenna yasen : Yiwen wergaz imawlan-is muceεen, ițeddu ad iṛuḥ γer yiwet n tmurt ibeεden iwakken a t-sbedden d agellid γef tmurt-is , imiren a d-yuγal.
13 Qbel ad iṛuḥ, yessawel i εecṛa seg iqeddacen-is ; yefka tawizeț i mkul yiwen deg-sen, yenna-yasen : Ť xedmet yis-sent tjaṛa alamma uγaleγ-ed ť.
14 Arraw n tmurt-is i t-ikeṛhen, ceggεen deffir-es kra n yemdanen ara yinin : Ť ur nebγi ara ad yili wergaz agi d agellid fell-aneγ. ť
15 Mi t-sbedden d agellid, yuγal ed γer tmurt-is ; yessawel i iqeddacen nni iwumi yefka tiwiztin iwakken ad isteqsi mkul yiwen deg-sen d acu i d-yerbeḥ yis-sent.

16 Amezwaru yusa-d, yenna : A Sidi, s twizeț-nni i yi-d-tefkiḍ rebḥeγ-ed εecṛa nniḍen.
17 Agellid yenna-yas : D ayen yelhan ay aqeddac lεali, imi deg-ek laman γef lḥaǧa tamecṭuḥt, a k-fkeγ aț-țḥekmeḍ γef εecṛa n tudrin.
18 Aqeddac wis sin yusa-d yenna : A Sidi, rebḥeγ-ed xemsa n twiztin s twizeț i yi-d-tefkiḍ.
19 Agellid yenna-yas : Ula d kečč a k-sbeddeγ d lḥakem γef xemsa tudrin.
20 Yusa-d uqeddac wis tlata yenna : A Sidi, ațah twizeț-inek ! Freγ-ț deg yiwen uceṭṭiḍ ;

21 uggadeγ-k axaṭer tweεṛeḍ, tețțeddmeḍ ayen ur tesriseḍ, tmeggreḍ ayen ur tezriεeḍ.
22 Agellid yerra-yas : γef yimeslayen-ik ara k-ḥasbeγ ay aqeddac amcum ! Teẓriḍ weεṛeγ, țeddmeγ ayen ur sriseγ, meggreγ ayen ur zriεeγ ;

23 acuγeṛ ihi ur tefkiḍ ara idrimen-iw i wid ara ten-isxedmen, iwakken m'ara d-uγaleγ a ten-id jebdeγ s lfayda ?
24 Dγa yenna i widak yellan dinna : Kkset-as tawizeț-nni, rnut-as-ț i win yesεan εecṛa.
25 Nnan-as : A Sidi, yesεa yakan εecṛa !
26 Yerra-yasen : Nniγ-awen : win yesεan a s nernu, ma d win ur nesεi ara a s nekkes ula d ayen i gγil yesεa-t.

27 Ma d iεdawen-nni-inu ur neqbil ara ad iliγ d agellid fell-asen, awit-țen-id γer dagi tezlum-ten zdat-i.
28 Mi gekfa ameslay, Sidna Σisa yezwar γer zdat lγaci iwakken ad yali γer temdint n Lquds.

Sidna Σisa yuli γer temdint n Lquds

29 Mi qṛib ad yaweḍ γer tuddar n Bitfaji akk-d Bitani, γer tama n yiwen yiγil ițțusemman Ť Iγil Uzemmur, ť Sidna Σisa iceggeε sin seg inelmaden-is,

30 yenna-yasen : Ṛuḥet γer taddart ihin i γ-d iqublen, aț-țafem ajḥiḥ yeqqen, leεmeṛ ur yerkib fell-as yiwen ; brut-as-ed, tawim-t-id.
31 Ma yella win i wen-d yennan : Ť acuγeṛ i s-d-tebram ? ť Init-as : yeḥwaǧ-it Ssid-nneγ.
32 Imceggεen-nni ṛuḥen, ufan kullec akken i sen-d-yenna Sidna Σisa.

33 Mi s-d-bran i wejḥiḥ-nni, bab-is yenna-yasen : I wacu i s-d-tebram ?
34 Rran-as : Yeḥwaǧ-it Ssid-nneγ.
35 Wwin-d ajḥiḥ-nni, ssersen fell-as ibeṛnyas-nsen, srekben Sidna Σisa.

36 Akken i gteddu, lγaci tessun-as-d ibeṛnyas-nsen deg webrid.
37 Mi qṛib ad awḍen γer temdint n Lquds, di tkessart-nni n yiγil n uzemmur, inelmaden-is d lγaci meṛṛa ččuṛen d lfeṛḥ, țḥemmiden Sidi Ṛebbi s ṣṣut eεlayen γef lbeṛhanat akk i walan.

38 Qqaṛen : Yețțubarek ugellid i d-yusan s yisem n Sidi Ṛebbi ! Lehna deg igenwan, tamanegt i Sidi Ṛebbi deg imukan εlayen.
39 Kra ifariziyen di tlemmast lγaci nnan i Sidna Σisa : A Sidi, ini-yasen i inelmaden-ik ad ssusmen.
40 Yenna-yasen : A wen-iniγ : ma ssusmen nutni, d idγaγen ara d-iεeggḍen.
Sidna Σisa yețru γef temdint n Lquds
41 Mi qṛib ad yaweḍ γer temdint n Lquds, akken i ț-iwala, Sidna Σisa yețru fell-as,

42 yenna : A tamdint n Lquds ! Lemmer teẓriḍ ass-agi ayen ara m-d-ifken lehna ! Lameεna tura ayagi yeffer γef wallen-im !
43 A d-asen wussan anda ara d-zeḍmen fell-am yeεdawen-im, a d-kecmen a m-d-zzin si mkul tama, a kem-ḥeṛsen ;

44 a kem-snegren kemm d warraw-im, ur țțaǧan deg-m azṛu γef wayeḍ ; axaṭer ur teεqileḍ ara usan i deg i d-yusa leslak n Sidi Ṛebbi γur-em.

Sidna Σisa di lǧameε iqedsen

45 Sidna Σisa yekcem γer wefrag n lǧameε iqedsen, yebda ițqecciε wid yeznuzun,

46 yeqqaṛ-asen : Yura di tira iqedsen : Axxam-iw ad yili d axxam n tẓallit, kunwi terram-t d axxam n imakaren.
47 Sidna Σisa yesselmad mkul ass di lǧameε iqedsen. Lmuqedmin imeqqranen, lεulama d imeqqranen n wegdud țnadin a t-nγen,

48 lameεna ur s-ufin ara abrid axaṭer lγaci meṛṛa smeḥsisen-as, yerna tεeǧǧben deg yimeslayen-is.

Ixef 20

Ansi d-tekka tezmert n Sidna Σisa

1 Yiwen wass deg ussan-nni, Sidna Σisa yella yesselmad lγaci deg wefrag n lǧameε iqedsen yețbecciṛ lexbaṛ n lxiṛ ; leḥqen-d lmuqedmin d lεulama n ccariεa akk d imeqqranen n wegdud,

2 nnan-as : Di leεnaya-k ! ansi i k-d-tekka lḥekma s wacu i txeddmeḍ annect agi ? Anwa i k-ț-id-yefkan ?
3 Yerra-yasen : A kkun-steqsiγ ula d nekkini, init-iyi-d :

4 anwa i d-icegn, d Ṛebbi neγ d imdanen ?
5 Bdan țemcawaṛen wway gar-asen, qqaṛen : Ma nenna-yas d Ṛebbi, a γ-d yini iwacu ihi ur tuminem ara yis ?

6 Ma nenna-yas d imdanen, lγaci akk a γ-ṛejmen axaṭer umnen meṛṛa belli Yeḥya d nnbi.
7 Dγa nnan i Sidna Σisa : Atan ur neẓri ara anwa i t-id iceggεen.
8 Sidna Σisa yenna-yasen : Ula d nekk ur awen-d-qqaṛeγ ara ansi i yi-d-tekka lḥekma s wacu i xeddmeγ annect-agi.

Lemtel n ixeddamen n tfeṛṛant

9 Dγa yewwi-d lemtel-agi i lγaci : Yiwen wergaz yeẓẓa tafeṛṛant ( iger n tẓurin ) issekra-ț i ixemmasen, iṛuḥ γer lγeṛba, iεeṭṭel dinna.

10 Mi d-yewweḍ lweqt n tẓurin, iceggeε γur-sen aqeddac iwakken a s-d-fken amur-is ; lameεna ixemmasen-nni wwten-t, rrant-id ifassen d ilmawen.
11 Iceggeε daγen aqeddac nniḍen, lameεna ula d nețța ewten-t, regmen-t, rrant-id ifassen d ilmawen.
12 Iceggeε-asen daγen wis tlata, jerḥen-t rnan qecεen-t-id syenna.
13 Amεellem-nni n tfeṛṛant yenna : Ť d acu ara xedmeγ tura ? A sen ceggεeγ mmi ameεzuz , ahat nețța a t-qadṛen ! ť

14 Lameεna ixemmasen nni mi t-walan, mcawaṛen wway gar asen nnan : Ť ataya win ara iweṛten ! Kkret a t-nenneγ iwakken aț-țuγal tfeṛṛant d ayla-nneγ. ť

15 ?eggṛen-t beṛṛa n tfeṛṛant, nγan-t. D acu ara sen-yexdem tura bab n tfeṛṛant-agi ?

16 A d-yas ad ineγ ixemmasen-nni, ad yefk tafeṛṛant i wiyaḍ. Lγaci mi slan annect-agi, nnan : A γ-imneε Ṛebbi !
17 Lameεna Sidna Σisa imuqel-iten yenna : D acu i d lmeεna n wawal-agi yuran : adγaγ i ḍeggṛen wid ibennun, yuγal d win yeṭṭfen lebni.
18 Kra n win ara yeγlin γef wedγaγ-agi ad yeṛṛez ; ma d win i γef ara d-yeγli, ad ițwanγed.
19 Lεulama n ccariεa d imeqqranen n lmuqedmin țqelliben a t-ṭṭfen imiren kan, axaṭer fehmen fell-asen i d-yenna lemtel-agi, lameεna uggaden lγaci.

Axelleṣ n tebzert i Qayṣer

20 Bdan țεassan Sidna Σisa iwakken ma yeγli-d deg wawal a t-ṭṭfen. Fkan tajεelt i kra n yemdanen yerran iman-nsen d wid iḍuεen

Ṛebbi iwakken a t-zenzen γer lḥakem n tmurt.

21 Steqsan-t ihi s imeslayen-agi : A Sidi, neẓra ayen i d-teqqaṛeḍ d wayen i tesselmadeḍ d lḥeqq, yerna ur txeddmeḍ ara lxilaf ger yemdanen, tesselmadeḍ abrid n Ṛebbi s tideț.

22 Ini-yaγ-d ma d leḥlal a nxelleṣ tabzert i Qayṣer (isteεmṛen tamurt)?
23 Sidna Σisa ifaqen i tḥila-nsen, yerra-yasen : Seknet-iyi-d aṣurdi.

24 Udem-agi d wayen yuran γef wuṣuṛdi-agi wi ten-ilan ? Rran-as : D udem n Qayṣer!
25 Dγa yenna-yasen : Ihi erret i Qayṣer ayen yellan n Qayṣer, terrem i Ṛebbi ayen yellan n Ṛebbi.
26 Wehmen s wayen i sen-d-yerra dγa ssusmen irkul, axaṭer ur ufin ara amek ara t-id-sseγlin deg wawal zdat lγaci.

Asteqsi γef ḥeggu n lmegtin

27 Kra n isaduqiyen ur nețțamen ara s ḥeggu n lmegtin, qeṛṛben-d γer Sidna Σisa, steqsan-t nnan-as :
28 A Sidi, atah wayen i d-teqqaṛ ccariεa n Musa : Ma yemmut yiwen wergaz yeǧǧa-d tameṭṭut-is mbla dderya, ilaq gma-s ad yaγ tameṭṭut-nni, ad yesεu yid-es dderya iwakken a d-ixlef isem n gma-s yemmuten.
29 Ihi llan sebεa watmaten : amezwaru yezweǧ, yemmut ur d yeǧǧi dderya.

30 Wis sin yuγ taǧǧalt-nni, yemmut ula d nețța.
31 Yuγ-iț daγen wis tlata, akken armi d wis sebεa ; mmuten meṛṛa, yiwen ur d-yeǧǧi yid-es dderya.

32 Γer taggara temmut tmeṭṭut-nni ula d nețțat.

33 Ass n ḥeggu n lmegtin, anwa ara ț-yesεun ț-țameṭṭut-is imi ț-uγen yiwen yiwen di sebεa yid-sen ?
34 Sidna Σisa yerra-yasen : Irgazen akk-d tilawin n ddunit agi țemyezwaǧen wway gar-asen.

35 Lameεna wid ara yuklalen a d-ḥyun si lmut γer tudert n dayem, ur țemyezwaǧen ara,

36 axaṭer ur țțuγalen ara ad mmten, ad ilin am lmalayekkat ; Sidi Ṛebbi a ten-yerr d arraw-is imi i d-ḥyan si ger lmegtin.

37 Γef wayen yeεnan ḥeggu n lmegtin ula d nnbi Musa ihḍeṛ-ed fell-as mi gessawel i Sidi Ṛebbi zdat udarnu iṛeqqen : a Ṛebbi, Illu n Ibṛahim, Illu n Isḥaq, Illu n Yeεqub.
38 Ṛebbi mačči d Ṛebbi n wid yemmuten meεna d Ṛebbi n wid yeddren imi γur-es ddren irkulli γas akken mmuten.
39 Kra n imusnawen n ccariεa neṭqen-d nnan-as : A Sidi, d awal n lεali i d-tenniḍ.
40 Kukran a s-rnun ula d yiwen usteqsi. Lmasiḥ, d mmi-s n Dawed ?
41 Sidna Σisa yenna-yasen : Amek armi qqaṛen Lmasiḥ d mmi-s n Dawed ?
42 Dawed s yiman-is yenna-d di tektabt n ?abur : Sidi Ṛebbi yenna i Ssid-iw : qqim aț-țḥekmeḍ γer tama- w tayeffust

43 alamma rriγ iεdawen-ik seddaw iḍaṛṛen-ik.
44 Ma yella Dawed isemma i Lmasiḥ Ť Sidi ť, amek i gezmer ad yili d mmi-s ?
45 Lγaci meṛṛa llan smeḥsisen, Sidna Σisa yenna i inelmaden-is :
46 Ḥadret iman-nwen γef lεulama n ccariεa i gḥemmlen ad țḥewwisen s ijellaben iγezfanen,

ḥemmlen ad țsellimen fell-asen yemdanen di leswaq, ad ṭṭfen imukan imezwura di leǧwameε d imukan lεali di tmeγṛa.
47 Tețțen ayla n tuǧǧal, ssiγzifen taẓallit iwakken a ten-id-walin wiyaḍ. γef wannect-agi, Sidi Ṛebbi ihegga-yasen-d lεiqab d ameqqran.

Ixef 21

Lweεda n tideț

1 Sidna Σisa yerfed allen-is, iwala imeṛkantiyen srusun lewεadi deg usenduq n lǧameε.
2 Ațaya yiwet n taǧǧalt taẓawalit tger sin iṣurdiyen γer usenduq-nni,

3 dγa yenna : A wen-iniγ tideț : lweεda n taǧǧalt-agi taẓawalit tugar akk tiyaḍ ;

4 axaṭer wiyaḍ fkan seg wayen sεan d zzyada ma d nețțat tefka ciṭṭuḥ-nni s wacu ara tεic.

Ayen ara yedṛun uqbel ass n lḥisab

5 Kra n yemdanen țmeslayen γef lǧameε iqedsen qqaṛen wway gar-asen : Acḥal yecbeḥ lebni n lǧameε-agi akk-d țγawsiwin i s-d-yețțunefken d lweεda ! Sidna Σisa yenna-yasen :
6 Deg wayen akka i tețwalim, a d-awḍen wussan anda kullec ad ihudd, ur d-yețγimi wedγaγ γef wayeḍ.
7 Steqsan-t nnan-as : A Sidi, melmi ara d-yedṛu wannect-a ? Anta licaṛa ara d isbegnen belli qṛib a d-yedṛu waya ?
8 Yenna-yasen : ?uṛ-wat a kkun-kellxen, axaṭer aṭas ara d-yasen s yisem-iw a d inin : d nekk i d Lmasiḥ ! Neγ a wen-d-inin : lweqt yewweḍ-ed ! Ur ten-țțamnet ara !

9 M'ara teslem heddṛen γef tegrawliwin d ṭradat ur țțagadet ara, axaṭer ilaq a d-yedṛu uqbel wayagi, lameεna mačči imiren i ț-țaggara n ddunit.
10 Yenna-yasen daγen : A d-yekker wegdud γer wayeḍ, a d-tekker tagelda γer tayeḍ.
11 A d-tilint zzelzlat timeqqranin, a d-γlin di yal lehlakat i gderrεen ( i gneṭṭḍen) akk-d laẓ, a d-tilint leεǧubat yessexlaεen akk-d licaṛat timeqqranin deg igenni.

12 Lameεna uqbel a d-yedṛu wannect-a, kunwi s inelmaden-iw a kkun-ṭṭfen, a kkun qehṛen, ad ḥekmen fell-awen di leǧwameε, a kkun-ḍeggṛen γer leḥbus, a kkun-sbedden zdat igelliden d lḥekkam γef ddemma n yisem-iw.
13 A d-yedṛu wannect-a yid-wen iwakken aț-țilim d inigan-iw zdat-sen.

14 Ur țḥebbiṛet ara amek ara tsellkem iman-nwen,

15 axaṭer a wen-d-fkeγ imeslayen d leεqel s wacu ara tqablem iεdawen nwen, ur țizmiren ara ad bedden zdat-wen neγ a kkun-xalfen.
16 Ula d imawlan-nwen akk-d atmaten-nwen d imdukkal-nwen a kkun-zzenzen yerna ad nγen aṭas seg-wen.
17 A kkun-keṛhen yemdanen meṛṛa γef ddemma-w,

18 lameεna yiwen wenẓad n uqeṛṛuy-nwen ur yețṛuḥu.

19 ?ebṛet, axaṭer s ṣṣbeṛ-nwen ara tsellkem tiṛwiḥin-nwen.

Tamdint n Lquds a ț-ṛekḍen leǧnas

20 M'ara teẓrem tamdint n Lquds zzin-as-d lεeskeṛ n yeεdawen-is, ḥṣut belli nnger-is yewweḍ-ed.

21 Ass-nni ilaq wid ara yilin di temdint n Lquds ad ffγen, wid ara yilin di lexla ur keččmen ara γer temdint, wid ara yilin di tmurt n Yahuda ad rewlen γer idurar.

22 Axaṭer ussan-nni d ussan n twaγit deg wacu ara yedṛu meṛṛa wayen yuran.
23 A nnger n tilawin ara yilin s tadist neγ tid ara yessuṭuḍen deg ussan-nni axaṭer a d-teγli cedda ț-țameqqrant γef tmurt, a d-yeγli wurrif n Sidi Ṛebbi γef wegdud,

24 imezdaγ-is ad mmten s ujenwi, a ten-awin d imeḥbas γer tmura nniḍen. Tamdint n Lquds a ț-ṛekḍen leǧnas ur nețțamen ara s Sidi Ṛebbi, alamma yețwakemmel lweqt i sen-d-yefka Sidi Ṛebbi, imiren ad yezzi γef leǧnas-nni, a ten-iεaqeb.

Asmi ara d-yas Mmi-s n bunadem

25 A d-tbanent licaṛat deg iṭij, deg waggur d yitran. Di ddunit, imdanen meṛṛa a ten-iffeγ leεqel, ur ẓerren ara d acu ara xedmen m'ara slen i ṣṣut n lemwaji d lebḥuṛ.

26 Ad ilin wid ara yemten si lxuf m'ara walin lmuṣibat ara d-yeγlin γef ddunit ; igenwan d kra yellan deg-sen ad rgagin.
27 Imiren imdanen ad walin Mmi-s n bunadem iteddu-d γef wusigna s tezmert d lεaḍima tameqqrant.
28 M'ara yebdu wannect-agi iḍeṛṛu, sbeddet lqedd-nwen trefdem iqeṛṛay-nwen axaṭer leslak-nwen yewweḍ-ed.

Lemtel n tneqleț

29 Yewwi-yasen-d lemtel-agi : Walit taneqleț neγ ttjuṛ nniḍen !

30 M'ara bdunt fessunt, teẓram qṛib a d-yaweḍ unebdu.

31 Kunwi daγen m'ara twalim yewweḍ-ed wannect-agi ḥṣut belli tageldit n Ṛebbi teqṛeb-ed.
32 A wen-iniγ tideț: lǧil-agi ur yețmețțat ara alamma yedṛa wannect-agi meṛṛa.
33 Igenni d lqaεa ad fnun ma d awal-iw ur ifennu ara.
34 Σasset γef yiman-nwen, ḥadret a kkun-iγurṛ zzhu n ddunit ; εasset iman-nwen γef tissit n ccṛab d iγeblan, neγ m'ulac a d-yeγli fell awen wass-nni ur tebnim fell-as.

35 Ass-nni a d-yeγli am ucebbak γef yemdanen n ddunit meṛṛa.

36 Σiwzet ihi, deεεut dayem γer Sidi Ṛebbi a wen-d-yefk tazmert ara kkun-imenεen seg wayen i d-iteddun, s wayes ara tbeddem zdat Mmi-s n bunadem.
37 Deg wass, Sidna Σisa yesselmad di lǧameε iqedsen ma deg iḍ, yețṛuḥu ad yens deg yiwen yiγil ițțusemman : ŤIγil n uzemmur ť.

38 Ṣṣbeḥ zik, lγaci meṛṛa țṛuḥun γur-es γer lǧameε iqedsen iwakken ad slen i wawal-is.

Ixef 22

Yudas yexdeε Sidna Σisa

1 Lεid i deg xedmen aγṛum mbla iγes n temtunt ițțusemman Ť Tafaska n izimer n leslak ť tqeṛb-ed.

2 Lmuqedmin imeqqranen d lεulama n ccariεa țqelliben amek ara nγen Sidna Σisa lameεna uggaden lγaci.
3 Yudas n Qeṛyut yiwen si tnac-nni n inelmadenis, ikcem-it Cciṭan.

4 Iṛuḥ ad yemcawaṛ d lmuqedmin imeqqranen akk-d lḥekkam iεessasen n lǧameε iqedsen, iwakken a sen izzenz Sidna Σisa.
5 Nutni feṛḥen yerna εuhden-t a s-fken idrimen.

6 Yudas yefra awal yid-sen syenna yebda yețqellib amek ara sen-t-yezzenz s tuffra γef lγaci.

Tafaska taneggarut

7 Yewweḍ-ed wass n Tfaska n weγṛum mbla iγes n tamtunt i deg ilaq ad zlun izimer n leslak.

8 Sidna Σisa iceggeε Buṭrus d Yuḥenna, yenna-yasen : Ṛuḥet a γ-theggim imensi n Tfaska.
9 Nnan-as : Anda tebγiḍ a t-nheggi a Sidi ?
10 Yerra-yasen : M'ara tkecmem γer temdint, a d-temmagrem yiwen wergaz yerfed tacmuxt n waman ; tebεet-eț γer wexxam anda ara yekcem.

11 Init i bab n wexxam-nni : yeqqaṛ-ak-d Ssid nneγ, anda ara nečč imensi n Tfaska nekk d inelmaden-iw ?
12 A wen-d-isken yiwet n tγurfeț tameqqrant iwejden, dinna ara theggim imensi n Tfaska.
13 Mi ṛuḥen, ufan kullec akken i sen-t-id-yenna, dγa heggan imensi n Tfaska.
14 Mi d-yewweḍ lweqt n imensi, Sidna Σisa yeqqim ad yečč nețța d Ṛṛusul-is,

15 yenna-yasen : Acḥal i mennaγ ad ččeγ imensi n Tfaska-agi yid-wen uqbel ad nneεtabeγ !

16 A wen-d-iniγ : atan ur țțuγaleγ ara maḍi a t-ččeγ alamma tețwakemmel lmeεna-ines di tgelda n Sidi Ṛebbi.
17 Yeddem-d tabuqalt n waman n tẓurin, yeḥmed Sidi Ṛebbi yenna : Axet tabuqalt-agi, feṛqet-eț way gar-awen,

18 a wen-d-iniγ : sya d asawen ur țțuγaleγ ara ad sweγ seg waman-agi n tẓurin alamma tewweḍ ed tgeldit n Sidi Ṛebbi.

19 Yeddem-ed daγen aγṛum, iḥmed Sidi Ṛebbi, yebḍa-t yefka-yasen-t, yenna : Aγṛum-agi d lǧețța-w ara fkeγ fell-awen, feṛqet-eț gar-awen. Sya d asawen xeddmet akkagi akken ad iyi-d-tețmektayem.
20 Mi gfukk imensi, yeddem-ed tabuqalt n waman n tẓurin, yefka yasen-ț yenna : Tabuqalt-agi, d leεqed ajdid s idammen-iw ara yazzlen fell-awen.

21 Ma d win ara yi-zzenzen atan yeqqim-ed yid-i γer lmakla.

22 Mmi-s n bunadem ad immet akken yura fell-as di tira iqedsen, lameεna a nnger n wemdan agi ara t-izzenzen !

23 Ṛṛusul bdan țmesteqsayen wway gar-asen anwa-t wagi ara t-ixedεen.

Anwa i d ameqqran ?

24 Inelmaden bdan țemjadalen wway gar-asen iwakken ad ẓren anwa deg-sen ara ițwaḥesben d ameqqran.

25 Sidna Σisa yenna yasen : Imeqqranen n ddunit ḥekmen s ddreε γef yigduden-nsen yerna țțusemman d at lxiṛ.

26 Kunwi xḍut i wannect-agi. Ameqqran deg-wen ad yili am umeẓyan, win iḥekmen ad yili am win iqeddcen.
27 Anwa i d ameqqran , d amεelem yeqqimen ad yečč neγ d win i s iqeddcen ? Yak d win yeqqimen ad yečč ! Ma d nekk, aql-i gar-awen am win iqeddcen.

28 Kunwi aql-ikkun tṣebṛem yid-i di lmeḥnat-iw.

29 Akken i yi-d-ihegga Baba tagelda, ula d nekk a wen-ț-id heggiγ i kunwi

30 iwakken aț-țeččem aț-țeswem yid-i di tgelda-inu. Aț-țeqqimem γef yikursiyen n lḥekma, aț-țḥekmem γef tnac leεṛac n wat Isṛail.

Buṭrus ad inkeṛ Sidna Σisa

31 Sidna Σisa yenna : A Semεun sel-iyi-d ! Cciṭan yessuter a kkun-isserwet am yirden,

32 lameεna dεiγ γer Sidi Ṛebbi fell-ak akken ur tfeččleḍ ara di liman. Ma d kečč m'ara d-tuγaleḍ γur-i, sseǧhed atmaten-ik.
33 Buṭrus yenna-yas : Aql-i heggaγ iman-iw ad kecmeγ yid-ek γer lḥebs, ad dduγ yid-ek ula γer lmut.
34 Sidna Σisa yenna-yas : A k-d-iniγ a Buṭrus , ass-a uqbel ad iskkuε uyaziḍ ad iyi-tnekṛeḍ tlata iberdan, aț-ținiḍ ur iyi-tessineḍ ara !
35 Yenna-yasen daγen : M'akken i kkun-ceggεeγ mbla idrimen, mbla agrab, mbla arkasen, yella kra i kkun-ixuṣṣen ? Rran-as : Ur aγ-ixuṣṣ wacemma !
36 Yenna-yasen : Ihi tura win yesεan idrimen neγ agrab yawi-ten, win ur nesεi ara ajenwi ad izzenz abeṛnus-is iwakken a d-yaγ yiwen.

37 Axaṭer qqaṛeγ awen : Ilaq ad yedṛu yid-i wayen yuran. Ť Ițțuneḥsab seg yembaṣiyen, ť yerna ayen yuran fell-i, atan yewweḍ ed.
38 Inelmaden-is nnan-as : A Sidi , atnan sin ijenwiyen ! Yenna-yasen : D ayen tura, beṛka !

Deg yiγil n uzemmur

39 Akken yuγ tannumi, Sidna Σisa yeffeγ, iṛuḥ γer yiγil n uzemmur ; inelmaden-is tebεen-t.

40 Mi gewweḍ γer wemkan-nni, yenna-yasen : Dεut γer Ṛebbi akken ur tγellim ara deg ujeṛṛeb.
41 Dγa yessebεed iman-is fell-asen azal n kra n lmitrat, yeqqim γef tgecrar ideεεu i Ṛebbi yeqqaṛ :
42 A Baba, ma tebγiḍ ssebεed fell-i leεtab-agi i yi-țṛaǧun ; lameεna d lebγi-k ara yedṛun mačči d lebγi inu.
43 Yiwen n lmelk n Sidi Ṛebbi iḍheṛ-as-d a t-yesseǧhed.

44 Iḍaq wul-is, ikețțeṛ di tẓallit armi tuγal tidi-ines d idammen yețqiṭṭiren γer lqaεa.

45 Mi gekfa, yuγal-ed γer inelmaden-is, yufa-ten-id yewwi-ten yiḍes axaṭer yeγli-d fell-asen leḥzen ameqqran ;

46 dγa yenna-yasen : Acuγeṛ i tegnem ? Kkret, dεut γer Ṛebbi akken ur tγellim ara deg ujeṛṛeb.

Sidna Σisa yețwaṭṭef

47 Mazal-it iheddeṛ, atnaya wwḍen d lγaci. Yudas, yiwen si tnac-nni inelmaden-is yezwar-ed zdat-sen, iqeṛṛeb γer Sidna Σisa ad isellem fell-as.

48 Sidna Σisa yenna yas : A Yudas, s sslam ara txedεeḍ Mmi-s n bunadem !
49 Wid yellan d Sidna Σisa, mi walan ayen ara yedṛun nnan-as : A Sidi, a newwet s ijenwiyen ?
50 Yiwen deg-sen yewwet aqeddac n lmuqeddem ameqqran, igzem-as ameẓẓuγ ayeffus.

51 Sidna Σisa yenna yasen : ḥebset ! Dayen tura ! Yessers afus-is γef wemkan n umeẓẓuγ n uqeddac-nni, yerra-yas-t akken yella.

52 Dγa yezzi γer wid i d-yusan a t-ḥebsen, γer lmuqedmin imeqqranen d lεuqal akk-d lḥekkam n iεessasen n lǧameε iqedsen yenna yasen :
Tusam-d γur-i s ijenwiyen d iεekzan am akken d amakar i lliγ.

53 Mkul ass țțiliγ yid-wen di lǧameε iqedsen yiwen ur d-yerfid afus-is γur-i. Lameεna taswiεt-agi ț-țaswiεt nwen, ț-țaswiεt n tezmert n ṭṭlam.

Buṭrus yenkeṛ Sidna Σisa

54 Mi ṭṭfen Sidna Σisa, wwin-t γer wexxam n lmuqeddem ameqqran. Buṭrus itbeε-iten s lebεid.

55 Ceεlen times di tlemmast n wefrag, qqimen. Buṭrus yella yid-sen.
56 Yiwet n tqeddact twala-t-id yeqqim yeẓẓiẓin, tmuqel-it tenna : Argaz-agi daγen yella yid-es.

57 Lameεna Buṭrus yenkeṛ, yenna : Ur t-ssineγ ara a tameṭṭut !
58 Cwiṭ akka, iwala-t-id yiwen nniḍen, yenna : Kečč daγen d yiwen seg-sen. Buṭrus yerra-yas, yenna : Ur lliγ ara seg-sen ay argaz !
59 Iεedda wazal n ssaεa, yenṭeq-ed yiwen nniḍen yenna : Mbla ccekk argaz-agi yella yid-es axaṭer d ajlili.
60 Buṭrus yerra-yas : Ur ẓriγ ara d acu i d-teqqaṛeḍ ay argaz ! Werεad yekfi ameslay... yeskkuε uyaziḍ.

61 Sidna Σisa yezzi γur-es, immuqel-it. Dγa Buṭrus yemmekta-d wayen i s-d-yenna Sidna Σisa : Ť Ass-agi, uqbel ad iskkuε uyaziḍ ad iyi-tnekṛeḍ tlata iberdan.ť

62 Yeffeγ γer beṛṛa iṭṭerḍeq s imeṭṭawen axaṭer yendem.

63 Irgazen-nni i gεussen Sidna Σisa, stehzayen fell-as kkaten-t.
64 Ţγummun-as udem-is, rnan qqaṛen-as Ť eεqel ihi anwa i k-id yewten ť.

65 Rnan regmen-t s mkul rregmat yellan.

Sidna Σisa zdat usqamu n ccṛeε

66 Mi guli wass, tajmaεt n lεuqal n wegdud, lmuqedmin imeqqranen d lεulama n ccariεa nnejmaεen. Wwin-d Sidna Σisa γer usqamu n ccṛeε.
67 Steqsan-t nnan-as : Ma d kečč i d Lmasiḥ, ini yaγ t-id. Yerra-yasen : Atan ma nniγ-awen-t-id ur iyi tețțamnem ara,

68 ma steqsaγ-kkun-id ur iyi-d-țarram ara.

69 Lameεna a wen-d-iniγ, sya γer zdat, Mmi-s n bunadem ad yeḥkem γer tama tayeffust n Sidi Ṛebbi Bab n tezmert.
70 Kkren-d akken ma llan nnan : Ihi kečč d Mmi-s n Ṛebbi ? Nețța yerra-yasen : Tennam-t-id, d nekk !
71 Imiren εeggḍen nnan : Dayen ur neḥwaǧ ara inigan, yenna-t-id s yimi-s, nesla-yas s imeẓẓuγen-nneγ.

Ixef 23

Sidna Σisa zdat lḥakem Bilaṭus

1 Tajmaεt meṛṛa tekker, win Sidna Σisa γer lḥakem Bilaṭus.

2 Bdan țcetkin fell-as, qqaṛen : Nufa argaz-agi yeskker ccwal ger lγaci-nneγ, yeqqaṛ-asen : Ť ur țxelliṣet ara leγṛama i Qayṣer ť, yeqqaṛ daγen : Ť d nețța i d Lmasiḥ, i d agellid ť.
3 Bilaṭus isteqsa-t s imeslayen-agi : D kečč i d agellid n wat Isṛail ? Sidna Σisa yerra-yas : Tenniḍ-t-id.
4 Bilaṭus yenna i lmuqedmin imeqqranen d lγaci : Ur s-d-ssukkseγ acemma i wergaz-agi.

5 Nutni țkemmilen qqaṛen : Yeskker ccwal ger lγaci s wayen yesselmad ; yebda-d si tmurt n Jlili, yuγal γer tmurt n Yahuda meṛṛa, tura yewweḍ-ed γer dagi.

6 Bilaṭus, mi gesla bedren-d tamurt n Jlili, yesteqsa γef Sidna Σisa ma d ajlili i gella.

7 Mi geẓra belli Sidna Σisa ajlili, n tmurt i γef yeḥkem Hiṛudus, iceggeε-as-t i Hiṛudus yellan ula d nețța di temdint n Lquds ussan-nni.

Sidna Σisa zdat ugellid Hiṛudus

8 Hiṛudus ifṛeḥ aṭas mi geẓra Sidna Σisa, axaṭer acḥal segmi yebγa a t-iẓer γef ddemma n wayen yesla fell-as. Yețmenni a t-iwali yexdem lbeṛhan,

9 isteqsa-t aṭas, lameεna Sidna Σisa ur as-d-yerri acemma.
10 Lmuqedmin imeqqranen akk-d lεulama n ccariεa yellan dinna țcetkayen fell-as s lγecc.

11 Hiṛudus d lεeskeṛ-is ḥeqṛen-t, stehzayen fell as, selsen-as yiwen ubeṛnus ifazen, imiren rran-t i Bilaṭus.

12 Seg wass-nni, Bilaṭus d Hiṛudus uγalen d imdukkal nutni yellan zik d iεdawen.

Sidna Σisa neγ Barabas

13 Imiren Bilaṭus yesnejmaε-ed lmuqedmin imeqqranen d lεulama akk-d lγaci,

14 yenna-yasen : Tewwim-iyi-d argaz-agi, tennam d yeskker ccwal ger lγaci ; atan steqsaγ-t zdat-wen ur ufiγ ara deg-s ayen akka s wayes i d-teccetkam fell as.

15 Ula d Hiṛudus ur s-d yessukkes acemma imi i γ-t-id-yerra. Ihi argaz-agi ur yexdim ara ayen yuklalen lmut.

16 A s-fkeγ tiγṛit imiren a s-serrḥeγ.

17 Mkul Tafaska n izimer n leslak Bilaṭus yețserriḥ-ed i yiwen umeḥbus.

18 Lγaci meṛṛa țεeggiḍen qqaṛen : Enγ-it , tserḥeḍ-ed i Barabas !
19 Barabas-agi yețwaḥbes γef ccwal i gexdem di temdint-nni akk ț-țemgeṛṭ i genγa.
20 Bilaṭus yebγan a d-iserreḥ i Sidna Σisa ihḍeṛ-ed tikkelt nniḍen i lγaci,

21 lameεna nutni țεeggiḍen qqaṛen : Semmeṛ-it, semmeṛ-it γef wumidag.
22 Bilaṭus inṭeq-ed tikkelt tis tlata, yenna-yasen : D acu n cceṛ i gexdem ? Ur ufiγ ara deg-s ayen yuklalen lmut.

Atan ihi a s-fkeγ tiγṛit, imiren a s-serrḥeγ.

23 Lameεna nutni ḥeṛsen-t s leεyaḍ qqaṛen : Semmeṛ-it γef lluḥ ! ?elben-t s leεyaḍ-nsen

24 dγa Bilaṭus yeqbel ayen i s-ssutren.

25 Iserreḥ-as-d i umeḥbus-nni issekren ccwal yerna yenγa tamgeṛṭ ; ma d Sidna Σisa yefka-yasen-t ad xedmen yis ayen bγan.

Deg webrid n Gulguṭa

26 Mi wwin Sidna Σisa, mmugren-d yiwen wergaz n temdint n Qiṛwan ițțusemman Semεun, yuγal-ed si lexla ; ḥettmen fell-as ad ibbib amidag-nni, ad iddu deffir Sidna Σisa.

27 Aṭas n lγaci i d-itebεen deffir nsen, llant gar-asen tilawin kkatent deg idmaren-nsent, țrunt fell-as.

28 Sidna Σisa yezzi-d γur-sent yenna-yasent : A yessi-s n temdint n Lquds ur țrumt ara fell-i, țrumt γef yiman-nkunt d warraw-nkunt,

29 axaṭer atan a d-asen wussan i deg ara yinin : Ť ț-țiseεdiyin tid ur nezmir ara a d-sεunt dderya, ț-țiseεdiyin tid ur d-nuriw ara, ur nessuṭeḍ ara.ť

30 Imiren imdanen ad bdun ad qqaṛen : ay idurar γlit-ed fell-aγ, a tiγaltin ffremt-aγ.

31 Axaṭer ma xedmen annect-a i wesγaṛ akken d azegzaw amek ara tedṛu d uquṛan ?
32 Wwin daγen sin n yemcumen iwakken a ten-semmṛen akk-d Sidna Σisa.

Sidna Σisa γef Umidag

33 Mi wwḍen γer yiwen wemkan ițțusemman Ť Iγil Uqeṛṛuyť, semmṛen Sidna Σisa γef lluḥ, nețța d sin-nni yembaṣiyen, yiwen γer tama-s tayeffust wayeḍ γer tama-s tazelmaṭ.

34 Dγa Sidna Σisa yenṭeq-ed yenna : A Baba eεfu-yasen imi ur ẓrin ara d acu i xeddmen. Iεsekṛiwen-nni gren tasγaṛt ad feṛqen gar-asen llebsa-ines.

35 Lγaci i gbedden dinna țfeṛṛiǧen ; lmuqedmin țmesxiṛen fell-as qqaṛen : Isellek wiyaḍ, ad isellek iman-is tura ma yella ț-țideț d Lmasiḥ i gextaṛ Ṛebbi.
36 Iεsekṛiwen daγen țmesxiṛen fell as, qeṛṛben γur-es bγan a s-sswen lxell,

37 qqaṛen-as : Ma d agellid n wat Isṛail i telliḍ, sellek iman-ik.
38 Ddmen-d daγen yiwet n telwiḥt, semmṛen-ț sennig uqeṛṛuy-is, uran deg-s : Ť wagi d agellid n wat Isṛail ť.
39 Yiwen seg seg imbaṣiyen-nni ițțusemmṛen γef lluḥ, ireggem Sidna Σisa, yeqqaṛ-as : Ma d Lmasiḥ i telliḍ sellek iman ik tsellkeḍ-aγ ula d nukkni.
40 Lameεna wayeḍ ilumm-it yenna yas : Ur tuggadeḍ ara Ṛebbi, kečč ițțusemmṛen am nețța ?
41 Nukni ma ḥekmen fell-aγ d lḥeqq axaṭer nuklal lmut s wayen i nexdem ; lameεna nețța ur yexdim acemma n wayen n diri.
42 Yezzi γer Sidna Σisa yenna-yas : A Σisa, mmekti-yi-d m'ara d-tas lḥekma n tgeldit-ik.
43 Sidna Σisa yerra-yas : A k-iniγ tideț, ass-agi aț-țiliḍ yid-i di lǧennet.

Lmut n Sidna Σisa

44 Aț-țili d leǧwahi n tnac, yeγli-d ṭṭlam γef tmurt meṛṛa armi d țlata n tmeddit.

45 Leḥjab yellan deg umkan iqedsen di lǧameε, icerreg di tlemmast.
46 Sidna Σisa iεeggeḍ s ṣṣut εlayen : A Baba Ṛebbi, atan ṛṛuḥ-iw ger ifassen-ik. Mi genna imeslayen-agi, yeffeγ-it ṛṛuḥ.

47 Lqebṭan mi geẓra ayen yedṛan yețweḥḥid Ṛebbi yenna : ?-țideț, amdan-agi d aḥeqqi.
48 Lγaci akk i gḥedṛen dinna, mi walan ayen yedṛan ḥeznen, uγalen syenna kkaten deg idmaren-nsen.
49 Wid akk iḥemmlen Sidna Σisa qqimen deg lebεid țmuqulen ayen yedṛan, llant gar-asen tilawin i d yeddan yid-es si tmurt n Jlili.

Sidna Σisa deg uẓekka

50 - 51 Yella yiwen wergaz ger lmuqedmin imeqqranen n usqamu n ccṛeε, isem-is Yusef, n taddart n Arimati n at Yahuda.

Ur iqbil ṛṛay-nsen, ur iqbil lecγal-nsen, d argaz n lεali yerna d aḥeqqi, yețṛaǧu tageldit n Ṛebbi.

52 Iṛuḥ γer Bilaṭus yessuter-as lǧețța n Sidna Σisa.
53 Iṣubb-it-id seg umidag, yețțel-it di lekfen, yessers-it deg uẓekka yeγzan deg wezṛu anda ur yemḍil ula d yiwen.
54 Ass-nni d ass n lǧemεa i deg țheggin lγaci iman-nsen i wass n ssebt yellan d ass n westeεfu.
55 Tilawin-nni i d-yeddan d Sidna Σisa si tmurt n Jlili, ddant d Yusef γer uẓekka, walant amek i ssersen lǧețța-s.
56 Syenna uγalent γer yexxamen nsent iwakken ad heggint leεṭeṛ d wayen xeddmen i lmegtin, i lǧețța n Sidna Σisa. Azekka-nni n ssebt, steεfant akken i d-tenna ccariεa.

Ixef 24

Ḥeggu n Sidna Σisa

1 Ass n lḥedd ṣṣbeḥ zik, tilawin nni ṛuḥent γer uẓekka, wwint yid-sent leεṭeṛ i d-heggant.
2 Ufant azṛu-nni iqeflen aẓekka, yegrareb akkin.

3 Mi kecment γer daxel, ur ufint ara lǧețța n Sidna Σisa ;

4 qqiment wehment. Atnaya ḍehṛen-asent-id sin yergazen s llebsa yețfeǧǧiǧen.

5 Ikcem itent lxuf, brant i wallen nsent γer lqaεa ; irgazen-nni nnan-asent : Acuγeṛ tețqellibemt deg uẓekka win yeddren ?

6 Ulac-it dagi, yeḥya-d si ger lmegtin. Ur tecfimt ara γef wayen i wen-d-yenna di tmurt n Jlili ?
7 Ť Ilaq Mmi-s n bunadem ad ițwasellem ger ifassen n yemcumen, ad ițusemmeṛ γef wumidag, ass wis tlata a d-iḥyu si ger lmegtin. ť

8 Dγa mmektant-ed imeslayen n Sidna Σisa.

9 Fγent seg uẓekka iwakken ad ssiwḍent lexbaṛ γef wayen yedṛan, i ḥdac-nni yinelmaden d wid yellan yid-sen.
10 Llant gar-asent Meryem-nni tamagdalit, Yunna, Meryem yemma-s n Yeεqub akk-d tidak nniḍen yeddan yid-sent ; ḥkant kullec i inelmaden.
11 Lameεna ayen i sen-ḥkant iban asen-d am tmacahuț, ur tent-uminen ara.

12 Dγa Buṭrus yekker yuzzel γer uẓekka. Mi gewweḍ, imuqel γer daxel, iwala anagar lekfen di lqaεa. Yuγal syenna, iwhem deg wayen yedṛan.

Deg webrid n taddart n Amawes

13 Ass-nni, sin inelmaden teddun γer yiwet n taddart isem-is Amawes, taddart-agi tebεed γef temdint n Lquds azal n snat sswayeε n tikli.

14 ?eddun țmeslayen wway gar-asen γef wayen akk yedṛan.

15 Akken llan țmeslayen, Sidna Σisa iqeṛṛeb γur-sen, yedda yid-sen.

16 Lameεna nutni ur t-eεqilen ara.

17 Yenna-yasen : γef wacu i tețmeslayem akka deg webrid ? D acu i d yesseγlin fell-awen leḥzen ?
18 Yiwen deg-sen, isem-is Klufas, yenna-yas : Eεni anagar kečč ur neẓri ara ayen yedṛan ussan-agi di temdint n Lquds ?
19 Nețța yenna-yasen : D acu yedṛan akka ? Rran-as : Ayen yedṛan d Σisa anaṣari nnbi-nni, yesεan tazmert tameqqrant deg wayen ixeddem d wayen i d-iqqaṛ zdat Ṛebbi akk-d yemdanen.
20 Lmuqedmin imeqqranen d lḥekkam-nneγ sellmen-t γer ifassen n iṛumaniyen, ḥekmen fell-as s lmut, semmṛen-t γef wumidag.

21 Nukni neḍmeε d nețța ara isellken wat Isṛail ; ass-agi d ass wis tlata segmi yedṛa wannect-a.
22 ?-țideț, kra si tilawin-nneγ swehment-aγ ! Mi ṛuḥent ṣṣbeḥ zik γer uẓekka

23 ur ufint ara lǧețța-s. Uγalent-ed nnant-aγ-ed belli ḍehṛen asent-ed snat n lmalayekkat i sent id-yennan Ť atan yedder. ť
24 Kra seg-neγ ṛuḥen γer uẓekka ufan kullec akken i t-id-nnant tilawin nni ; lameεna nețța ur t-ẓrin ara.
25 Dγa Sidna Σisa yenna-yasen : A wid iγeflen ! Acimi tețεeṭṭilem aț-țamnem s wayen i d-nnan lenbiya ?

26 Eεni ur ilaq ara ad yenεețțab Lmasiḥ akka uqbel ad yekcem di tmanegt-is ?
27 Dγa yessefhem-asen ayen meṛṛa yuran fell-as di tira iqedsen ; yebda-d si tektabin n Sidna Musa, armi ț-țid n lenbiya meṛṛa.
28 Mi qṛib ad awḍen γer taddart i γer teddun, Sidna Σisa yerra iman-is am akken yebγa ad ikemmel abrid-is.

29 Lameεna nutni ḥellelen-t nnan-as : Qqim yid-nneγ, atan ț-țameddit, qṛib a d-yeγli yiḍ.
Sidna Σisa ikcem ad yeqqim yid-sen.
30 Mi qqimen γer imensi, yeddem ed aγṛum, yeḥmed Ṛebbi, yebḍa-t, ifṛeq-asen-t.

31 Dγa ldint-ed wallen nsen, εeqlen-t, imiren kan yețwaṛfeε gar-asen.

32 Bdan qqaṛen wway gar-asen :

Ur nḥuss ara i kra iṛeqqen deg wulawen-nneγ mi γ-d-iheddeṛ deg ubrid yerna yessefham-aγ-d ayen yellan di tira iqedsen ?
33 Imiren kan, kkren-d uγalen γer temdint n Lquds. Ufan ḥdac-nni inelmaden akk-d imdukkal-nsen nnejmaεen.

34 Nnan-asen-d : Ţ-țideț Sidna Σisa iḥya-d, yesban ed iman-is i Semεun.
35 Nutni daγen bdan ḥekkun-asen ayen yedṛan yid-sen deg webrid d wamek i t-εeqlen mi sen-ifṛeq aγṛum.

Sidna Σisa yesbeggen-ed iman-is i ḥdac yinelmaden-is

36 Mazal-iten țmeslayen, Sidna Σisa s yiman-is ibedd-ed gar-asen. Yenna yasen : Sslam fell-awen.
37 Ikcem-iten akk lxuf, γilen d lexyal i d-ibedden γur-sen.

38 Nețța yenna-yasen : Acuγeṛ i tuggadem ? D acu-t ccekk-agi deg ulawen-nwen ?
39 Walit ifassen-iw akk-d iḍaṛṛen iw, d nekk s yiman-iw ! Nnalet-iyi-d, walit ! Lexyal ur yesεi aksum ur yesεi iγsan, akken tețwalim sεiγ-ten !
40 Mi sen-yenna ayagi, yesken-asen ifassen-is d iḍaṛṛen-is.
41 Wehmen, ččuṛen wulawen-nsen d lfeṛḥ armi ur zmiren ara ad amnen ayen țwalin, dγa yenna-yasen : Yella dagi wayen ara ččeγ ?
42 Fkan-as-d aftat n lḥut ikenfen.

43 Iddem-it-id, yečča-t zdat-sen.

44 Yenna yasen : Atah wayen i wen-d-nniγ mi lliγ yid-wen : Ť ilaq ad yedṛu wayen akk yuran fell-i di ccariεa n Musa, d lenbiya akk-d Ẓabur ť.
45 Dγa yeldi-yasen leεqel iwakken ad fehmen tira iqedsen,

46 yenna yasen : Atah wayen yuran tira iqedsen: Ť ilaq Lmasiḥ ad yeεteb, a d-iḥyu ass wis tlata si ger lmegtin,

47 țțuba d leεfu n ddnubat ad țwabeccṛen s yisem-is i leǧnas meṛṛa, a d-bdun si temdint n Lquds ť.
48 Aql-ikkun d inigan-iw.

49 Atan a d-ceggεeγ fell-awen wayen i wen yewεed Baba Ṛebbi. Qqimet di temdint-agi alamma ters-ed fell-awen tezmert n Ṛebbi ara d-yasen seg igenni.

Sidna Σisa yuli γer yigenni

50 Sidna Σisa yewwi inelmaden-is armi d leǧwahi n taddart n Bitani. Yerfed ifassen-is, iburek-iten.
51 Di teswiεt-nni yemfaṛaq yid-sen, yețwarfed γer igenni,

52 ma d nutni γlin γef tgecrar, țḥemmiden-t ; imiren uγalen γer temdint n Lquds s lfeṛḥ.

53 Yal ass țțilin deg wufrag n lǧameε iqedsen, țḥemmiden Sidi Ṛebbi.

***

Asmel agi inulfad i wakken ad n selmed Tamasiḥit s Tmaziγt (Teqbaylit). | Tanekda | Amasih.net Akk izerfan ttwaḥerzen.

Arut aγ-d

Lalla n Ǧerǧer

Vatican